Ngāue Tokoní: Ko ʻEtau Fiefia Lahi Tahá

Lolotonga ʻa e mahaki fakaʻauha COVID-19, naʻe kei maʻu pē ha paʻanga hū mai ʻa kinautolu naʻe ʻi ai ʻenau ngāue pau ʻi Peluú, ka ko ha tokolahi ʻo e kakai Peluú ko ha kau fakatupu koloa ʻoku nau fakatau atu ʻa e ngaahi meʻá ʻi he halá. Naʻe ʻikai totonu ke mavahe ʻa e kakaí mei honau ngaahi ʻapí koeʻuhí ko e fakataputapuí, ko ia ko ha kakai tokolahi naʻe ʻikai ke lava ʻo ngāue.

ʻI ha ʻaho ʻe taha, naʻe tau mai ai ha kau faiva mo ha tāmeʻa ki homau halá ʻo kamata ke nau faiva. Naʻe laku ʻe homau ngaahi kaungāʻapí ha ngaahi paʻanga maka kiate kinautolu mei honau ngaahi matapaá. Naʻe foaki ange ʻe kinautolu naʻe ʻikai haʻanau paʻangá ha meʻakai.

Naʻe ongo ki hoku lotó ʻa ʻeku vakai ki he kakai ʻi he faʻahinga masiva peheé. Naʻe ʻikai ke maʻu ʻe hoku fāmilí ha meʻa fēfē, ka naʻe lahi ange ʻa e meʻa naʻa mau maʻú ʻi he meʻa naʻa nau maʻú. Naʻa mau tokoniʻi kinautolu ʻi he lahi taha naʻa mau lavá.

Naʻe akoʻi au ʻe he aʻusia ko iá ʻoku ʻafioʻi kitautolu ʻe he ʻEikí mo ʻetau ngaahi fiemaʻú, pea naʻe tokoni lelei ia kiate au ʻi hoku uiuiʻi ko e pīsopé. ʻI he fatongia pelepelengesi ʻo e tokangaʻi e fānau ʻa e ʻOtuá, naʻá ku ongoʻi ha faʻahinga meʻa ʻi he uiuiʻi ko iá naʻe teʻeki ai ke u ongoʻi he lolotonga ʻeku ngāue ʻi he ngaahi uiuiʻi kehé.

Ko e taimi naʻá ku toe kamata ngāue ai ʻi he hili ʻo e mahaki fakaʻauhá, naʻá ku faʻa toki foki ki ʻapi ʻi he 8:00 poʻulí. Peá u hangatonu leva ki he falelotú ke fakahoko ʻa e ngaahi ʻinitaviu mo e kakai naʻe fiemaʻu faleʻi mo ha ngāue fakaetauhí. Naʻe faʻa māʻuloloa ʻa e ngaahi ʻinitaviú.

Naʻá ku ongoʻi ʻa e ʻofa lahi ʻoku maʻu ʻe he ʻEikí ki Heʻene fānaú, ʻi he lolotonga e tokoní. Ko ha ongo fakaofo ia naʻe teʻeki ke u ongoʻi kimuʻa. Naʻá ku faʻa foki ki ʻapi ʻi he taimi ʻe niʻihi ʻoku ou tangi.

ʻI ha ngaahi taimi ʻe niʻihi, naʻá ku ongoʻi helaʻia mo vaivai, ka naʻe fakaivia au ʻe he ʻEikí ʻi he lolotonga ʻo ʻeku hoko ko e pīsopé. Naʻe poupouʻi foki au ʻe hoku uaifí, pea naʻá ku houngaʻia ʻi he lava ʻeku fānaú ʻo mamata ki heʻeku tokoni ki he ʻEikí.

Naʻe fakaʻau foki ʻo mahino kiate au ʻa e ʻofa lahi ʻoku maʻu ʻe hotau kau takí kiate kitautolú. ʻOku ou houngaʻia ʻi he tokoniʻi ʻe he ʻilo ko iá ʻeku fakamoʻoní ke tupulakí. Pea ʻoku ou fakafetaʻi kuo tāpuekina au ʻe he ʻEikí ʻaki ʻa e meʻafoaki ʻo e manavaʻofá (vakai, Molonai 7:46–48).

ʻOku ou ongoʻi naʻe foaki mai ʻe he ʻOtuá ha faingamālie ke u tokoni ai naʻe ʻikai haʻaku totonu ki ai. Naʻá ku faʻa fehuʻi pē kiate au, “Ko e hā ʻoku fili ai aú?” Naʻe aʻu ʻo mahino kiate au naʻe ʻofa ʻa e ʻEikí ʻiate au mo fakatokangaʻi ha faʻahinga meʻa naʻe ʻikai ke u fakatokangaʻi ʻiate au.

ʻOku ʻikai mole ha meʻa ia ʻi he ngāue ʻa e ʻEikí. ʻI he ngaahi ʻekitivitī kotoa ʻoku lava ke tau kau ai ʻi Hono Siasí, ʻoku ou ʻiloʻi ʻe hanga ʻe he ngāue, tokoni ki he niʻihi kehé, mo e hoko ko e toʻukupu ʻo e ʻEikí ʻi he lolotonga ʻo e taimi faingataʻá ʻo ʻomai kiate kitautolu ʻa e fiefia lahi tahá (vakai, Mōsaia 2:17).