Founga ʻe 30 ke Fakamanatua ʻa e Toetuʻú Toko Taha Pē pe mo e Ngaahi Kaungāmeʻá

ʻE lava ke fakataipe ʻe ha konga lahi ʻo e māmani fakanatulá ʻa e Toetuʻu ʻa Kalaisí, pea ʻe lava ke tokoni ʻeni ke tataki hoʻo ngaahi fakakaukaú kiate Ia lolotonga hoʻo teuteu ki he Toetuʻú. Fakakaukau ke fakakau ʻa e ngaahi fakakaukau ko ʻeni ʻoku fakatefito ʻi natulá ʻi hoʻo ngaahi ʻekitivitī ʻo e Toetuʻú:

1. ʻAlu ʻo lue lalo lolotonga hoʻo fakakaukau ki he fakataipe ʻo e moʻui foʻou ʻi he faʻahitaʻu failaú.

2. Fokotuʻutuʻu fakataha ʻa e ʻū haʻinga matalaʻiʻakaú pea tuku kinautolu ʻi he tafaʻaki ʻo ha fakatātā ʻo e pongipongi Toetuʻú.

3. Fakahoko ha kaimeʻakai fakafāmili ʻi ʻapi ke mou tangutu ʻi tuʻa ʻo aleaʻi ha ngaahi potufolofola fekauʻaki mo e ʻuhinga ʻo e Toetuʻú.

4. Tō ha matalaʻiʻakau pe ʻakau kai lolotonga hoʻo fakakaukau ki he founga ʻoku tokoniʻi ai kitautolu ʻe Kalaisi ke tau tupulaki fakalaumālie ʻo fakafou ʻi Heʻene Fakaleleí.

5. Mamata ʻi ha hopo ʻa e laʻaá pea fakalaulauloto ki he maama mo e ʻamanaki lelei naʻe ʻomi fakataha mo e ʻEiki kuo toetuʻú.

6. Tā pe faitaaʻi ha ngaahi fakaʻilonga ʻo e failaú ke hiki e ngaahi fakaʻilonga ʻo e fakafoʻoú mo e fanauʻi foʻoú.

7. Lue ʻi ha ngoue pe paaka lolotonga hoʻo fanongo ki he ngaahi himi pe folofola ʻo e Toetuʻú.

8. Faʻu ha ʻaati ʻoku fakatefito ʻi natula (hangē ko e fakatātā ʻo ha ʻū lauʻi ʻakau pe ʻū matalaʻiʻakau kuo tataʻo) ke fakafofongaʻi e moʻui foʻou ʻia Kalaisí.

9. ʻAlu ʻo matamāhina pea fakakaukauloto ki he fakakaukau taʻengata ʻoku ʻomi ʻe he Fakalelei mo e Toetuʻu ʻa Kalaisí.

10. Langa ha fokotuʻuna maka fakaʻilonga ʻokú ne fakataipe ʻa e ngeʻesi fonualotó mo e ikunaʻi ʻe Kalaisi ʻa e maté.

Naʻe fakaʻaongaʻi ʻe Kalaisi ha konga lahi ʻo e uike fakaʻosi ʻo ʻEne moʻuí ke tokanga taha ki he niʻihi kehé. Ko ha ngaahi ʻekitivitī fakakulupu ʻeni ʻo e Toetuʻú te ne lava ʻo fakamanatu atu ʻa e tā-sīpinga ʻa e Fakamoʻuí:

1. ʻAʻahi ki ha kaungāmeʻa pe kaungāʻapi te ne ala fiemaʻu ha taha ke na talatalanoa lolotonga e Toetuʻú.

2. Hiki ha fanga kiʻi fakamatala mo ha ngaahi potufolofola pe ngaahi kupuʻi lea fekauʻaki mo Sīsū Kalaisi pea ʻoange fakafufū ia ki ho kaungā-lokí pe kau tangata mo e kau fafine ngāue fakaetauhí.

3. Fakaafeʻi ha ngaahi kaungāmeʻa pe kāingalotu ʻo e uōtí ke nau kau fakataha mo koe ʻi ha ʻaukai makehe ke fakamanatua ʻa e feilaulau ʻa Kalaisí pea fakakaukau ki he meʻa te ke lava ʻo fai maʻa ha taha ʻoku faingataʻaʻia.

4. Fokotuʻutuʻu ha kulupu ke fakamaʻa ha paaka fakafonua pe ngoue fakafeituʻu ko e fakamanatu ʻo e moʻui tokoni ʻa Kalaisí.

5. Fakahoko ha pō vaʻinga pe lukuluku meʻakai ʻi he Toetuʻú maʻanautolu ʻoku ʻikai ofi mai honau fāmilí.

6. Faʻu ha fanga kiʻi kato tokoni faingofua ki he Toetuʻú maʻá e kakai ʻi ho uōtí pe koló te nau ngali fiemaʻu ha fakalotolahí.

7. Palani ha pō hiva fakakulupu ke hivaʻi fakataha ai ha ngaahi himi mo ha ngaahi hiva ʻoku fakatefito ʻi he Toetuʻú.

8. Loto-fiemālie ke tokoni ʻi ha polokalama Toetuʻu fakalotofonua, hangē ko ha kumi fuaʻimoa fufū ʻa e koló.

9. Vahevahe hoʻo potufolofola pe kupuʻi lea ʻokú ke saiʻia taha ai fekauʻaki mo e Toetuʻú ʻi he mītia fakasōsialé ke langaki hake ʻa e niʻihi kehé.

10. Faʻu ha tohinoa fevahevaheʻaki ʻo e Toetuʻú, ʻa ia ʻe tānaki atu ai ʻe he tokotaha takitaha ha fakakaukau, potufolofola, pe fakamoʻoni fekauʻaki mo Sīsū Kalaisi.

ʻOku hoko mai ʻa e ʻātí ʻi ha ngaahi founga kehekehe pea ʻe lava ke ne ʻomi ha ngaahi fakataipe ʻo Sīsū Kalaisi ki heʻetau moihū ʻi he Toetuʻú. Tatau ai pē pe ko e hā e tuʻunga taukei ʻokú ke ʻi aí, ko ha ngaahi fakakaukau ʻeni ki hono fakaʻaongaʻi ʻo e ʻātí ke fiefia ai ʻi he faʻahitaʻu Toetuʻú:

1. Ako ke taʻo ha mā ʻi ʻapi lolotonga hoʻo fakalaulauloto ki he ʻOhomohe Fakaʻosí mo e meʻaʻofa ʻo e sākalamēnití. Vahevahe ia mo haʻo ngaahi kaungāmeʻa.

2. Tautau ha papa fanongonongo maʻá e kaungā-lokí pe kau mēmipa ʻo e fāmilí ke tānaki atu ki ha ʻū fakatātā mo ha ngaahi potufolofola fekauʻaki mo e Uike Toputapú.

3. Ngaohi ha fakatātā ʻaki e afo mo ha fanga kiʻi vaʻakau ʻo ha foʻi haati pe ngeʻesi fonualoto ke fakakaukauloto ki he feilaulau ʻa Kalaisí.

4. Faʻufaʻu ha ʻū kaati tā valivali ʻo e Toetuʻú ʻoku ʻi ai ha ngaahi potufolofola pe ngaahi fakaʻilonga ke vahevahe mo e ngaahi kaungāmeʻá pe fakaʻaliʻali ʻi ʻapi.

5. Teuteuʻi ha ʻū teʻelango ʻaki ha ngaahi meʻa fakamaʻu teʻelango, matalaʻiʻakau kuo tataʻo, pe ngaahi fakaʻilonga kuo tā fakatātaaʻi ke fakafofongaʻi ʻa Kalaisi ko e Maama ʻo Māmaní.

6. Ako ke tā tongitongi ʻi he papá pea faʻu ha fakaʻaliʻali ʻo Sīsū Kalaisi ʻi he Toetuʻú, ʻo tatau mo e ʻAloʻi ʻi he Kilisimasí.

7. Fokotuʻutuʻu ha puha tō ngoue maʻa ha taha, ke maʻu ai ha founga ke nau fiefia ai ʻi he ʻū matalaʻiʻakaú mo e fanga kiʻi ʻakau foʻou ʻoku fakafofongaʻi e Toetuʻu ʻa e Fakamoʻuí.

8. Vali ha fanga foʻi maka ʻaki ha ngaahi pōpoaki ʻo e Toetuʻú pea fokotuʻu takai kinautolu ʻi homou ʻapiakó pe koló.

9. Faʻu ha fakatātā faingofua ʻo e Toetuʻú ʻo fakaʻaongaʻi ʻa e ʻū laʻipepa kuo kosikosí pe ʻū naunau kuo ʻosi fakaʻaongaʻi ke fakaʻaliʻali ʻi he funga tēpilé.

10. Faʻu ha fakatātā ʻo ha ngaahi kupuʻi lea fakafolofola mei he Uike Toputapú ʻi ha fanga kiʻi pepa pipiki pea tānaki kinautolu ki hoʻo folofolá ke tokoni ke ke fakakaukauloto ki he ngaahi meʻa naʻe hokó.

Neongo pe ʻoku fōtunga fēfē hoʻo moʻuí, ka ʻoku ʻikai fiemaʻu ia ke faingataʻa pe fakataʻelata ʻa hono fakamanatua ʻo e Fakalelei mo e Toetuʻu ʻa e Fakamoʻuí. Naʻe akoʻi ʻe ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá ko e “pōpoaki nāunauʻia mo ikuna ʻo e Toetuʻú,” ʻe tokoni atu ke ke “maʻu ha fakamoʻoni fakataautaha kia Sīsū Kalaisi ko hotau Fakamoʻui mo e Huhuʻí” pea ke maʻu ha vā fetuʻutaki loloto ange mo Ia pea mo e kakai ʻoku mou feohí.