Kātoanga Fānifo ʻo e Laumālié: Laʻaá, ʻOneʻoné, Fānifó, mo hono Fakahaofi ʻo e Ngaahi Laumālié

ʻI he matāfanga fakatonga hahake ʻo ʻAositelēliá ʻoku tuʻu ai e vāhenga fakaʻofoʻofa ko e Coffs Harbour. ʻOku ʻiloa ia ʻi hono ngaahi foʻi tafungofunga afeafé, vaotaá, matātahí, mo e ʻea ʻoku feʻunga ki he fānifó. ʻOku toe ʻiloa foki ia ʻi hono fakahoko ai e feʻauhi fakataʻu ko e Kātoanga Fānifo ʻo e Laumālié (Soul Surfest Surfing).

ʻI he taʻu ʻe hongofulu mā hiva kuohilí, naʻe loto ai ha kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ke kamataʻi ha feʻauhi fānifo ke tokoni ki ha ongo tamaiki tangata kei talavou naʻe faingataʻaʻia ʻena moʻuí. 

ʻI he malaʻe ʻo e fānifó, ʻoku ʻi ai ha lao ʻoku ʻikai ke tohiʻi ka ʻoku tuʻutuʻuni ai kapau ʻe ʻi ai ha taha ʻe faingataʻaʻia ʻi tahi, te ke taʻofi e meʻa hono kotoa kae tokoniʻi e tokotaha ko iá. ʻI he tuʻunga ko ʻení, naʻa nau kamataʻi leva ha feʻauhi fānifo ke tokoni ki he ongo tamaiki tangata ko ʻení.

Naʻa nau muimui foki ki he ngaahi akonaki ʻa Sīsū Kalaisí ʻa ia naʻá ne akoʻi “. . . kapau ʻoku maʻu ʻe ha tangata ha sipi ʻe teau, pea ʻalu hē pē hanau taha, ʻikai ʻokú ne tuku ʻa e hivangofulu mā hivá . . . ʻo kumi ʻa ia kuo heé?” (Mātiu 18:12).

Naʻe pehē ʻe Kaafi Makī, ko ha taha ʻo e niʻihi naʻa nau fokotuʻu ʻa e feʻauhí, “ʻOku mau fakataha tuʻo taha mai ʻi he taʻu ko ha kau fānifo ʻo ʻikai koeʻuhí pē ko ʻemau manako he fānifó, ka ke toe vahevahe ʻemau tuí mo fefakamālohiaʻaki.”

ʻOku fakaʻatā ʻe he meʻá ni e kau fānifo mei he toʻu kotoa pē ke nau feʻauhi ʻi ha sipoti ʻoku nau saiʻia ai, mo feohi mo e kau mēmipa ʻo ʻenau tuí mo e ngaahi kaungāmeʻa he koló. ʻOku haʻu ʻa e niʻihi ʻoku kau maí mei he feituʻu kotoa pē ʻo ʻAositelēlia, pea ʻi he taʻú ni naʻe ʻi ai e tokotaha he kau feʻauhí naʻe haʻu ia mei Palāsila.

ʻOku fakahoko e feʻauhi fānifó ʻi he ʻaho Tuʻapulelulu, Falaite mo e Tokonaki. ʻOku fakataha mai e kau feʻauhí mo honau ngaahi fāmilí ʻi he efiafi Falaité ki ha fakataha lotu, pea mo ha hulohula fakafāmili ʻi he ʻaho Tokonakí. Ki ha ngaahi fāmili tokolahi, ko e Kātoanga Fānifo ʻo e Laumālié (Soul Surfest) ko ha taimi ia ki ha fakataha fakafāmili mo hono fakafehokotaki e ngaahi tuʻunga fakakaungāmeʻa kuo fakatupulaki ʻi ha ngaahi taʻu lahi.

Naʻe pehē ʻe Saimone ʻa ia kuo laka hake he tuʻo 16 ʻene kau mai ki he feʻauhí, “ʻOku ou saiʻia he haʻu ki he Kātoanga Fānifó koeʻuhí he ʻoku ou maʻu ai ha taimi ke feohi mo e kakai ʻoku nau manako ʻi he fānifó pea mo Sīsū Kalaisi. ʻOku mamata ai ʻeku fānaú ki ha kakai lelei, kau fānifo lelei, mo ha kakai ʻoku nau ʻofa ʻi he ʻEikí. ʻI heʻeku fakakaukau ki he Kātoanga Fānifó ʻoku ou fakakaukau ai ki he ʻofá, koló, pea mo e ongoongolelei ʻo Sīsu Kalaisí.”

Ki he niʻihi naʻe kau maí, naʻe ʻi ai ha ongo ʻo e ʻofá mo hono tali lelei kita ʻi he tuʻunga ʻokú te ʻi aí. Ko ha sīpinga fakaʻofoʻofa moʻoni ʻa e meʻa ʻoku hokó ki hono hiki hake ʻo e niʻihi kehé ʻaki hono muimuiʻi ʻo e ngaahi akonaki ʻa Sīsū Kalaisí ke “ʻofa ki ho kaungāʻapí ʻo hangē pē ko koé” (Mātiu 22:39).