Patura’a i te hō’ē niu ’āpī

Te 18 nō Tiurai 2023, ’ua fa’aru’e mai te ta’ata faufa’a roa a’e o tō’u orara’a. Tō’u māmā ’o tō’u ïa pūai, tō’u pou ’oia ato’a rā tōu paruparu. I taua tau ra, ’aita vau i haere fa’ahou i te purera’a nō te mea tē rave ra vau i te ’ohipa i te mau mahana ato’a, te sābati ’e te mau mahana fa’aeara’a ’ohipa ato’a, ’e e putuputu tā’u pāroita i te hora 8. Hō’ē taime, i muri iho fa’ahou ā… e ’ua riro mai ’ei ’ōhura’a peu ’ino.

I te taime ’a pohe ai tō’u māmā, ’ua ’ite atu vau ē ’aita vau i rave rahi i te taime nō te fa’aea i pīha’i iho iāna. ’Ua ha’amata vau i te tātarahapa i te ’orera’a e fa’aru’e i tā’u ’ohipa nō te rave i te taime nō te fa’aea i pīha’i iho iāna, i muri a’e ’a ro’ohia ai ’oia i te ma’i AVC i te ’āva’e Māti 2020. ’Ua ora mai ’oia e toru matahiti hau, nō te mea rā tei te ’ohipa noa vau, e au ra iā’u ’aita vau i māuruuru hope roa i tōna mau taime hōpe’a. ’Ua fa’a’ī te hō’ē nīno’a mana’o o te hapa iā’u. I roto tō’u ferurira’a, tei roto vau te terera’a ’ohipa mātaro : te ’ohipa, te fārereira’a i te taote, te aupurura’a i tō’u māmā, te taoto i roto te tā’āto’ara’a. ’Aita e vāhi fa’ahou nō te tahi atu ’ohipa.

I reira noa vau i te māramaramara’a i te parau mau : ’Aita vau i ti’aturi maita’i i te Atua. ’Ua ha’afaufa’a rahi a’e au i tō’u mau hina’aro pae tino i tō’u orara’a pae vārua.

Teie rā, ’ua ha’afātata te fa’aru’era’a mai o tō’u māmā iā’u i te Fatu. ’Ua riro ’oia ’ei turu nō’u. I roto iāna, ’ua ’ite mai au i te hau ’e te here ’o tā’u i hina’aro nō te upo’oti’a i tō’u heva. ’Ua hōro’a vau iā’u iho te tītaura’a nō 2024, e ha’amata i te haere tāmau i te purera’a ’ōro’a.

Ma te fa’aitoitora’a a tō’u paoti, ’ua ’āmui atu vau i te pāroita nō Puurai i te ’ōmuara’a nō te matahiti 2024. I reira, ’ua fa’ari’i-pōpou-hia vau e te mau melo maita’i ’e te mata ’ata’ata noa. ’Ua riro mai te reira ’o tō’u ha’apūra’a i te sābati tāta’itahi. Rahi atu ā tō’u ’āmuira’a atu, rahi atu ā vau i te putapū i te here o tō tātou Metua i te ao ra. I te reira iho taime, ’ua ha’amata vau i te feruri pāpū maita’i i tā’u mau ’ohipa mātāmua.

’Oia mau, e tītauhia te hō’ē ’ohipa ’e te hō’ē faufa’a moni nō te ora, ’ua ha’amata rā vau i te ’ite i te rohirohi i te pae manava, i te pae tino ’e i te pae ferurira’a. I reira tō’u ’episekōpo i te paraura’a mai nō ni’a i te tuahine Tararaina Mana, misiōnare piha ’ohipa ’e ’ei ti’a rauti nō te tōro’a i roto i tā mātou pāroita. ’Ua parau mai ’oia iā’u ē, e nehenehe au e fārerei iāna mai te peu e hina’aro vau. ’Ua hina’aro ’oi’oi roa vau. Tei roto vau i te hō’ē fa’a’ōhura’a ’e ’aita vau i ’ite fa’ahou e aha te mea e rave.

Te sābati 2 nō Tiunu 2024, ’ua fa’ari’i au i tā’u putuputura’a mātāmua nō te rautira’a ’e ’ōna[te ti’a rauti]. E mea ta’a ’ē roa te reira fārereira’a mātāmua i te mea ’o tā’u i mana’o. ’Ua mana’o vau i te reira mai te hō’ē putuputura’a nō te ha’api’ipi’ira’a, i reira ’oe e mā’iti ai i te hō’ē tōro’a mai te au i tā ’oe mau parau tū’ite, terā rā ’ua hau atu ā te reira. Nō te taime mātāmua, ’ua uihia mai iā’u te mau uira’a e tano maita’i nō’u. I ō atu i tō’u mau ’ite hiva tahu’a, ’ua fa’atumu tō’u ti’a rauti i ni’a i tō’u mau hina’aro, tō’u mau tīa’ira’a—i ni’a iā’u, ’o terā noa.

’Ua ha’amata māua i te mau ’ohipara’a ’o tā’u i ’ore i ta’a maita’i i te ha’amatara’a. ’Ua ha’amata māua nā roto i te tuha’a « Nō te aha ». Maoti teie ’ohipara’a, ’ua ha’amata vau i te feruri hōhonu i tā’u mau fā ’e i tā’u hi’ora’a i te orara’a. ’Ua ’ite fa’ahou mai au iā’u iho. ’Ua ha’api’i mai au i te fa’aro’o iā’u iho, ’ia mātau maita’i iā’u iho, ’ia ti’aturi iā’u iho. ’Ua ’ite a’era vau ē, ’ua mo’ehia iā’u ’o vai rā vau. ’Ua vaiiho vau iā’u iho ’ia ha’apauhia e te mau hina’aro i te pae tino ’e i te mau tīa’ira’a a te tōtaiete.

’Ua hōro’a mai te tōtaiete ia tātou te hō’ē hōho’a nō : Te ha’api’ira’a, te parau tu’ite, te ’ohipa maita’i roa, te fare, te pere’o’o, i muri iho te ’utuāfare. Te ti’ara’a mau rā e mea ’eta’eta a’e ïa. ’Ua rave te ri’ari’a, te fea’a ’e te ahoaho e tū’ati i te mau hina’aro tumu i ni’a a’e i tō’u haerera’a i mua pae vārua,

I teie mahana, te ta’a-’ē-ra’a i rotopū iā’u i ma’iri a’enei ’e ’o vau i teie mahana e mea rahi roa ïa. Mai te ’āva’e Tetepa 2024 e tae atu i te ’āva’e ’Ēperēra 2025, ’ua rave au e rave rau mau ’ohipa ri’iri’i nō te aufau i tā’u mau ha’amāu’ara’a e vai ra, ’a fa’aitoito ai te ti’a rauti iā’u ’e ’a ha’api’i ai iā’u i te fa’atītī’aifarora’a. ’Ua hina’aro vau e fa’atupu i te mau rāve’a ta’ata ’aravihi nō’u iho, nō reira ’ua tāpa’o atu vau iā’u iho i roto e toru tata’ura’a : Tia’i mau auri, ’aravihi nō te tōro’a fa’ari’i rātere ’e te fa’anahora’a ha’api’ipi’ira’a SEFI (Pū nō te ’ohipa o te fenua iho).

Maoti tō’u fa’aro’o i te Atua, tō’u tāmau-māite-ra’a ’e tā’u mau putuputura’a rauti, ’ua riro vau i teie mahana ’ei ’aravihi nō te tōro’a fa’ari’i rātere. ’Ua manuia vau i te mau tata’ura’a nō te ’ohipa tia’i mau auri ’e ’ua tāpa’o vau iā’u i teienei nō te ha’api’ipi’ira’a i roto « Fatura’a ’e te fa’aterera’a i te hō’ē taiete », hō’ē fa’anahora’a tauto’ora’a pūai e toru ’āva’e. E mau rāve’a tei mātara nō’u.

I ni’a i te faitō ta’ata iho, tē feruri nei au i teienei e ’imi i tō’u hoa mure ’ore, te hō’ē ta’ata nā muri iāna nō te patu i tō’u ’utuāfare mure ’ore. Te tu’ura’a i te Mesia i rōpū i tō’u orara’a, ’ua riro ’ei hō’ē mā’itira’a māramarama ’e te nātura.

’Ua riro te rautira’a ’ei hō’ē umera’a hōhonu i ni’a i tō’u orara’a. ’Aita ana’e teie mau putuputura’a tāmau, tē mo’e noa ra vau, tāpe’ahia e te ri’ari’a, te fea’a ’e i te ti’aturi ’ore iā’u iho. I teie mahana, ’ua ’ite au i te mea tā’u i hina’aro. ’Ua ineine au nō te haere i mua. ’E i te hope’a e nehenehe au e parau ē, tē te’ote’o nei au iā’u iho ’e i te ’ē’a tā’u i haere mai, noa atu ’ua fa’a’īhia te reira i te mau tāmatara’a.

Ma te Fatu rā i tō’u pae ’e te mau ta’ata fa’auruhia mai tō’u ti’a rauti, ’ua ’ite au i te vāhi tā’u e haere ra E ’oa’oa iti rahi tō’u ’ia roa’a te ’ohipa mau, ’ia nehenehe iā’u, i tō’u taime, e ha’amāuruuru i te feiā ’o tei turu mai iā’u i te taime ’aita tā’u hō’ē a’e mea. E mea faufa’a rahi roa te reira no’u.