« Tō ’outou hoa ’o Mai, pe’e mai», Liahona, Tēnuare 2026.

Tō ’outou hoa ’o Mai, pe’e mai

Nā Ted Barnes

Fa’ananeara’a i te fa’anahora’a ha’api’ira’a a te ’Ēkālesia

E hōro’a te mau mātēria tauturu nō teie matahiti i te mau ’ohipa anoihi ’āpī ’e te mau mana’o fa’atupu nō tā ’outou tuatāpapara’a i te Faufa’a Tahito.

fa’ahōho’ara’a nō te hō’ē ta’ata tei amohia ma te tā’amuhia e te taura

E ’ere ānei i te mea maita’i mai te mea ē, ’a tai’o ai ’outou i tā ’outou mau pāpa’ira’a mo’a, e vai noa rā te hō’ē hoa i pīha’i iho ia ’outou, nō te fa’aitoito ia ’outou ? Penei a’e te tahi ta’ata tei here i te mau pāpa’ira’a mo’a ’e tē ’ana’anatae nei i te tai’ora’a atu, ē ’aita tāna e nehenehe e fa’aea. I te tahi taime e parau mai teie hoa i te mau mea mai teie : « E ’ere ānei teie i te mea fa’ahiahia ? » « E aha tō ’oe mana’o i te reira mau ’īrava ? » « ’Auē ho’i ē, mai te reira ato’a tō tātou orara’a, e aha tō ’oe mana’o ? » Mai te mea ’ua mau ’outou ’aore rā e ta’a ’ore ’outou i te hō’ē tuha’a fifi, e nehenehe tō ’outou hoa e parau i te hō’ē mea mai teie te huru, « Teie te tahi atu rāve’a nō te hi’o i te reira. E tauturu ānei te reira ? »—e ara maita’i rā ’oia ’eiaha e fa’a’ite i te tā’āto’ara’a o te ’ā’amu. E hoa ho’i ’oia.

Hō’ē ā ïaMai, pe’e mai e hoa ato’a te reira. Tāna fā, ’o te tauturura’a ïa ia ’outou ’ia fa’ari’i i te hō’ē ’itera’a fa’ahiahia nō te tai’ora’a i te mau pāpa’ira’a mo’a. E nehenehe te reira e fa’a’ite ia ’outou i te mau tuha’a o tē tauturu i te patu i tō ’outou fa’aro’o i te Metua i te ao ra ’e ia Iesu Mesia—i muri iho e tauturu te reira ’ia fa’atū’ati ia ’outou i te reira mau tuha’a ’īrava i te mau mea e tupu nei i roto i tō ’outou orara’a. E nehenehe te reira e tauturu, mai te mea e uira’a tā ’outou, i te rahira’a rā o te taime e ani Mai, pe’e mai i te mau uira’a ’eiaha rā e hōro’a mai i te pāhonora’a—nō te mea, te hō’ē hoa maita’i e’ita ’ōna e tāpe’a ia ’outou i te ’oa’oa ’ia ’ite i te mau parau mau pae vārua nō ’outou iho.

E neheneheMai, pe’e mai e rave i teie mau mea, mai te hō’ē hoa ra i te huru, i te mau taime ato’a e tai’o ai ’outou i te mau pāpa’ira’a mo’a. ’Oia mau, noa atu ā tē taio ra ’outou i te Faufa’a Tahito i teie matahiti.

Ta’a ’ē noa atu te mau uira’a fa’atupura’a mana’o ’e te mau ’ohipa ri’i rau, e ’ite mai ’outou i te tahi atu mau rāve’a tauturu i roto i te Mai, pe’e mai. Teie te tahi mau hi’ora’a :

Hi’ora’a rahi nō te Faufa’a Tahito

I te Mai, pe’e mai, nō teie matahiti 2026 e haere mai nei, e ’ite mai ’outou i te hō’ē hi’ora’a rahi nō te Faufa’a Tahito. Mai te hō’ē fa’anahora’a tere-ra’a-tau i roto te mau i’oa o te mau peropheta, te mau ari’i ’e te tahi atu mau ta’ata tuiro’o. E tauturura’a maita’i te reira nō te mea e ’ere te mau buka i roto i te Faufa’a Tahito i te ’āna’ira’a tano. E nehenehe te fa’anahora’a tere-ra’a-tau e fa’a’ite, ’ei hi’ora’a, i hea te mau pāpa’ira’a a te mau peropheta mai ia Isaia ’e Ieremia i roto i te ’ā’amu o te bāsileia ’o Iuda. E nehenehe ’outou e ’ite i hea te mau ’ā’amu ’o Daniela ’e ’o Esetera e tano ai i roto i te hōho’a rahi o te Faufa’a Tahito. Mai te mea ’ua fifihia ’outou i roto i te Faufa’a Tahito, ’a fāriu atu i ni’a i te « Fa’anahora’a tere-ra’a-tau » ’ia māramarama maita’i.

Hōho’a ’āpī

’Ahuru ma piti hōho’a pēni ’āpī tei fa’ata’ahia nō teie matahiti nō te Mai, pe’e mai. Teie te tahi mau arata’ira’a :

Enoch Sees the Meridian of Time, nā Jennifer Paget, e fa’ahōho’ara’a nō te ’ōrama a Enoha nō ni’a i te tūsia a te Fa’aora (hi’o Mose 7).
Stand as a Witness, nā Kwani Povi Winder, e fa’a’ite nei i te « pōti’i iti » ’e tōna ’itera’a pāpū o tei hōro’a mai i te hō’ē temeio rahi (hi’o 2 Te mau Ari’i 5).
I Have a Great Work to Do, nā Tyson Snow e fa’ahōho’ara’a i tō Nehemia pāpūra’a ’ia patu fa’ahou i te mau papa’i ’o Ierusalema, noa atu te pāto’ira’a a tōna mau ’enemi (hi’o Nehemia 4).
I Will Surely Deliver Thee, nā Eva Timothy, hō’ē fa’a’itera’a nō Ieremia tei fa’aorahia mai i te fare ’āuri e te ta’ata ra ’o Ebed-melech, ta’ata nō Etiopia (hi’o Ieremia 38–39).

« Te mau mana’o e tāpe’a noa i roto i te ferurira’a »

E mea pinepine, te terera’a o te mau arata’i ha’api’ira’a hepetoma i roto i te Mai, pe’e mai e fa’aeari’i i ni’a i « Te mau mana’o e tāpe’a noa i roto i te ferurira’a ». E mau pāpa’ira’a na’ina’i nō ni’a i te mau tumu parau mai te mau fafaura’a, te fa’atusiara’a, te ha’aputuputura’a ia ’Īserā’ela ’e te rohipehe o te Faufa’a Tahito. « Te mau mana’o e tāpe’a noa i roto i te ferurira’a » e hōro’a mai te reira i te mau ’ā’amu, te mau hi’ora’a ātea nō te mau mahana hope’a nei, ’e te mau mana’o ’ōhie o te fa’a’ōhie i te fa’atupura’a i te mau ’itera’a nō te patu i te fa’aro’o i roto i te tuatāpapara’a i te Faufa’a Tahito.

Mai te mau matahiti i ma’iri a’enei, e’ere Mai, pe’e mai i te tumu nō tā ’outou tuatāpapara’a. E hoa tauturu noa ’a tuatāpapa ai ’outou i te parau a te Atua i roto i te mau pāpa’ira’a mo’a. Tera ihoā te tumu o te mau hoa.

Mai te mea e ’orometua ha’api’i ’outou

Ta’a ’ē noa atu i tā ’outou iho tuatāpapara’a pāpa’ira’a mo’a, e nehenehe teie hoa nō ’outou Mai, pe’e mai e tauturu mai te mea tē ha’api’i nei ’outou i tō ’outou iho ’utuāfare ’aore rā i te hō’ē piha ha’api’ira’a i te ’Ēkālesia. Nā taua mau uira’a ’e mau ’ohipara’a e ha’amaita’i i te ha’api’ira’a mai i te ’evanelia i te fare, e nehenehe ato’a nō te ’āparaura’a pupu. ’E ’eiaha e ha’ape’ape’a nō ni’a i te fa’ahiti-fa’ahou-ra’a i te hō’ē uira’a ’aore rā te hō’ē ’ohipara’a i roto i te piha ha’api’ira’a noa atu ’ua rave a’ena rātou i te fare. Mai te mea ’ua nā reira a’enei rātou, tē vai ra ïa te mau mana’o e tia ’ia fa’a’ite. Mai te mea ’aita, e nehenehe ’outou e fa’ari’i i te hō’ē ’itera’a fa’ahiahia ’ia fa’a’ohipa ’āmui ana’e ’outou i te ’ātivite ’ei pupu.