’Ua hau tō’u ’ā’au

Faʼahōho’araʼa nā Allen Garns

I tō’u fa’ari’ira’a i nā pi’ira’a e piti i roto i te ’Ēkālesia ’ei fa’ata’i piāna i roto noa hō’ē hepetoma, ’ua ha’ape’ape’a vau nō te ’imi i te taime nō te rave fa’aoti i tā’u mau hōpoi’a i te fare, i te ’ohipa ’e i te fare ha’api’ira’a. I roto i tō’u ’ā’au, tō’u hina’aro rahi roa a’e ’o te tāvinira’a ïa i te Fatu ’e te fa’ataera’a i tōna Vārua i te mau ta’ata ’a ’a ha’amaita’i ai i tā’u mau tārēni. Terā rā, ’ua mana’o vau i te tano ’ore nō tō’u tāpe’ara’a i tā’u mau tārēni nō teie nā pi’ira’a ’āpī.

I te hepetoma i muri iho, ’ua rahi atu te tītaura’a a tā’u taiete ’ohipa. Nō te mea ho’i te rahira’a o tā’u ’ohipa e patapata i te mātini pāpa’i, ’ua ha’amata tō’u nā rima ’e tō’u mau manimani rima i te māuiui. ’Ua ha’ape’ape’a vau, e nehenehe ānei au ’ia ha’uti i te piāna mai te mea ’aita te māuiui i ’ore.

I te Sābati iho, ’a ha’uti ai au i te pehe ’ōmuara’a i ni’a i te piāna o te fare purera’a, ’ua ha’amata tō’u mau uaua ’ia māuiui fa’ahou. ’Oi’oi noa vau i te pure i roto i tō’u ’ā’au, ma te ani ’ia roa’a i te pūai ’ia tāmau noa i te ha’uti.

I te taime nō te ’ōro’a mo’a, ’ua ’ite a’era vau ē, te hīmene tei tārenahia i muri iho ’o te hō’ē ïa hīmene o tā’u i ha’uti e mea maoro a’enei. « Mai te mea ra ē, ’aita tō’u māuiui i nava’i », ’ua mana’o vau, « teie fa’ahou ïa te tahi tītaura’a, ’ia ha’uti i te hō’ē hīmene fifi ». I reira tō’u tai’ora’a i teie mau parau, tei parau pāpū maita’i nō tō’u taiā :

I reira noa, ’ua hau tō’u ’ā’au. ’Ua ’ite au, ’ua ’ite te Fa’aora i tō’u mau māuiui. Inaha ho’i, ’ua fa’a’oroma’i ’oia i te reira (hi’o Alama 7:11–12). ’Aita vau i tītauhia ’ia fa’auru i teie taime ’o vau ana’e. ’Aita vau i mana’o ri’i a’e mai te reira, terā rā,’ua putapū vau i te Vārua o te Fatu.

I tō’u rā ha’amatara’a i te ha’uti, ’aita vau i māuiui fa’ahou, ’e mai te huru rā ē, ’ua mātau tō’u nā rima i te mau nota. ’Ua ’ite au ē, ’ua riro tā’u tāvinira’a ’ei ’ē’a nō te fa’aorara’a ’e nō te ha’afātata atu iā’u i te Metua i te ao ra.

’A feruri ai au i tō’u pārahia’a i te piāna, ’ua ’ite au ē, ’aita vau i ha’uti o vau ana’e. ’Ua putapū roa vau i te mana ’e te aroha ’o Iesu Mesia—e ’ohipa pae vārua tei tae mai nō te mea tē tāvini rā vau iāna. ’Ua ’ite au ē, tei reira noa ’oia nō te turu ’e nō te ha’apūai ia tātou mai te mea e hina’aro mau tō tātou ’ia tāvini iāna.