« I te vāhi i reira te hara e fa’atupu ai i te ti’arepu, e hōpoi mai te Mesia i te hau », Liahona, Tēnuare 2026.
Nō roto mai i te Ve’a tāhepetoma a te FAP
I te vāhi i reira te hara e fa’atupu ai i te ti’arepu, e hōpoi mai te Mesia i te hau
I rōpū ato’a i te ti’arepu o te orara’a, e nehenehe te Mesia e hōpoi mai i te māramarama, te nahonaho ’e te hau i tō ’outou vairua.
Fa’ahōho’ara’a nā Kate Birch
E mea ti’arepu … ānei nō ’outou te orara’a i te tahi taime ?
E putapū tātou pā’āto’a i te tahi taime i teie nīno’a mana’o o te ti’arepu. Nā te mau tāfifira’a o te ao nei e ha’amo’e ’ōhie ia tātou ē, e mau ta’ata pae vārua tātou e ora nei i te mau tupura’a ’ohipa o te tāhuti nei—te hō’ē ’ohipa ’o tā tātou i ’ore i rave nā mua a’e nei.
E piti hōro’a temeio tā te Atua i hō mai nō tātou, te tino tāhuti ’e te ti’amāra’a. E fa’ati’a teie nā hōro’a ia tātou ’ia putapū, ’ia hia’ai ’e ’ia rave nā roto ia tātou iho. Te nātura mau, e nehenehe te mau mea e riro e mea nahonaho ’ore ’aore rā e mea pāpū ’ore, nā roto i te mau mā’itira’a ’o tā te vahine ’aore rā te tāne nātura e rave ihoā.
E rave tātou pā’āto’a i te mau hape. Terā rā ’ia ’aro ana’e tātou i te mau hara ’aore rā i te mau peu ’o tā tātou e ’ore e upo’oti’a, noa atu tā tātou mau tauto’ora’a nō te taui, e mea ’ōhie ’ia putapū i te hō’ē nīno’a mana’o o te ha’amā. Ma tō tātou pae vārua ’o te huti atu ia tātou i te ra’i ’e tō tātou pae tāhuti ’o te huti ia tātou i te ao nei, e nehenehe tātou e putapū i te hō’ē umeumera’a tāmau ’ōroto.
’Ia fa’aruru ana’e tātou i te mau ’ohipa mai te ’ōhumu, te riri, te ha’avāra’a ti’a ’ore, te fa’a’itera’a rahi i ni’a i te rāve’a ha’apararera’a, te māta’ita’ira’a i te hōho’a faufau, ’aore rā i te tahi atu mau mea, vitiviti roa te ’enemi i te fa’a’ama i te ha’amā, te tapineva ’e i te hope’a, i te ti’arepu pae vārua.
’Aua’e nō tātou, ’ua ’ite te Metua i te ao ra ’e ’o Iesu Mesia i te fa’atere i te ti’arepu.
Te ’imira’a i tōna māramarama ’o te ta’ahira’a mātāmua ïa
I te roara’a o te poietera’a—te ha’amatara’a o te mau mea ato’a tā tātou i ’ite—’ua fa’ata’ahia te ao nui nō te riro ’ei hō’ē tuha’a ti’arepu ’e te nahonaho ’ore : « Tē vai ano noa ra te fenua ’aore e faufa’a, ’e te pōuri ho’i i ni’a iho i te ’iriātai » (Genese 1:2). E fa’aha’amana’o teie ti’arepu ’e teie pōuri tia’ira’a ’ore, e nāhea te ’enemi e nehenehe ai e ha’aputapū ia tātou, ’ia hara ana’e tātou ’aore rā ’ia rave ana’e tātou i te mau mā’itira’a ’aita e tū’ati i tā tātou mau ’ohipa faufa’a. E ’oa’oa ’oia [te ’enemi] i te ha’aputapū ’ua mau tātou i roto i te herepata ’e e fa’aitoito tāmau ’ia tāpuni tātou.
Terā rā mai tā te tuahine Tamara W. Runia, tauturu hō’ē i roto i te Peresidenira’a rahi o te Feiā ’Āpī Tamāhine, i ha’api’i : « Tē hōro’a nei Iesu Mesia i te māramarama i te feiā e pārahi ra i roto i te pōiri. Nō reira, i taua mau mahana ra ’ia fa’aro’o ana’e ’outou i terā reo ’ia parau mai ia ’outou ’ia tāpuni, ’ia tāpuni ’outou ana’e i roto i te hō’ē piha pōuri, tē tītau nei au ia ’outou ’ia fa’aitoito ’e ’ia ti’aturi i te Mesia ! Haere i mua ’e ’a fa’a’ama i te mōrī—tō tātou ti’aturira’a i te vi’ivi’i ’ore hope roa ».
I raro a’e i te arata’ira’a a te Atua, i te roara’a o te poietera’a, te ’ohipa mātāmua tā Iesu Mesia i rave nō te tīahi i te ti’arepu o te pōiri, ’o te hōpoira’a mai ïa i te māramarama (hi’o Genese 1:3 ; Mose 2:2–5). Mai reira, ’ua fa’anaho ’oia i te mau tūha’a ti’arepu tāta’itahi o te māteria, mai te ra’i āteatea ē tae roa i te huero iti ha’iha’i roa a’e.
Mai te mea ’ua nehenehe iāna ’ia fa’anaho i te ao nui, ’a feruri na i te ’ohipa e nehenehe e tupu ’ia fāriu ana’e ’outou i ni’a i tāna Tamaiti nō te fa’ari’i i te fa’aorara’a ’e te mana fa’aora i te mau mahana ato’a. ’Ia putapū ana’e ’outou i te teimaha o tō ’outou mau ’arora’a ’e te pōiri o te ao nei, te tītaura’a i te māramarama o te Mesia ’o te ta’ahira’a mātāmua ïa ē tae atu ai i te hau ’e i te fa’anahora’a hanahana.
I muri iho, ’a ha’amana’o ʼo vai ʼoutou
I muri a’e te ra’i ’e te fenua i te fa’anahohia ’e i te fa’anehenehehia, ’ua fa’aineine te Metua i te ao ra i te ’ē’a nō tāna mau tamari’i vairua ’ia haere mai i te fenua nei ’e fa’ari’i i te mau tino tāhuti. I te roara’a rā o tō tātou tau i te fenua nei, tē ’ohipa itoito nei te ’enemi ’ia mo’ehia ia tātou ’o vai tātou.
E nehenehe tātou e ’ite tātou i tāna mau tauto’ora’a nō te fa’aātea ia tātou i tō tātou ihota’ata hanahana, i te taime ’a paraparau ai te Atua i te peropheta Mose ’e ’a fa’a’ite ai i te ’ite iāna. I roto te Mose 1, tē parau nei te Atua ia Mose ma tōna i’oa ’e ma te pi’i pinepine iāna tāna tamaiti.
I te revara’a atu rā te Atua, fā mai ra Sātane ’e pi’i mai ra ia Mose te « tamaiti a te ta’ata nei » (Mose 1:12), ma te fa’ahema iāna ’ia ha’amo’e ’o vai mau ’oia.
Tē hina’aro nei Sātane ’ia mo’ehia ia tātou ’o vai mau tātou. E topata ri’i mai ’oia i te fea’a i roto i tō tātou ’aravihi ’ia taui. Tē hina’aro nei ’oia ’ia ti’aturi tātou ē, e mau tāne ’e e mau vahine nātura tātou, te taui ’ore ’e e vai tāmau noa.
Tē fa’aha’amana’o mai nei rā Elder Patrick Kearon, nō te pupu nō te Tino ’Ahuru Ma Piti ’āpōsetolo, ia tātou : « E ti’a ia ’outou ’ia haere mai i te Mesia ma te ti’aturi i tōna hāmani maita’i ’e te here, ’e ’ia fa’ari’i i te tā’āto’ara’a o tāna mau tao’a hōro’a o te ’oa’oa, te hau, te tīa’ira’a, te māramarama, te parau mau, te heheura’a, te ’ite ’e te pa’ari. … E tamāhine herehia ’outou nā te Atua, e tamaiti poihere ’outou nā te Atua, ’e ’ua hōro’a ’oia ia ’outou i tāna Tamaiti mo’a ’e te maita’i roa a’e nō te fa’aora ia ’outou, nō te fa’ati’a ia ’outou ’e nō te ha’amo’a ia ’outou ».
Te fa’aorara’a ’o te hō’ē ïa mea e ’ore roa Sātane e fana’o. ’E ’ia tūru’i ana’e tātou i ni’a i tō tātou ihota’ata pae vārua, e nehenehe tātou e parau, mai tā Mose i nā reira :
« ’O vai ’oe ? Inaha ho’i, e tamaiti ho’i au nā te Atua, ’e tō’u nei hōho’a, mai tō tāna Fānau tahi ïa. …
« ’A haere ’ē atu ’oe, e Sātane ; ’eiaha e ha’avare mai iā’u ; ’ua parau mai ho’i te Atua iā’u nei ē : Tō ’oe hōho’a, mai tō tā’u Fānau tahi ïa » (Mose 1:13, 16).
Mai te mea e au ra e mea ti’arepu te orara’a, ’a fa’aea. ’A ha’amana’o i tō ’outou ihota’ata hanahana. ’A vaiiho i teie parau mau, ’oia ho’i e tamari’i herehia ’outou nā te Atua, ’ia huti atu ia ’outou i te ra’i. ’A fāriu i ni’a ia Iesu Mesia, ’ia tauturu mai ’oia ia ’outou ’ia fa’anaho maita’i i tō ’outou vairua.
I te hōpe’a, ’a vaiiho i te Mesia ’ia fāriro i te ti’arepu ’ei hau
I te tō Adamu ’e ’o Eva fa’aru’era’a i te ’ō i ’Edene, te fa’a’ōhiera’a ’o tā rāua i tāmau noa nā i te ’ite i reira, ’ua monohia e te hō’ē ao mo’emo’e ’e te ’ārumaruma. ’Ua parau fafau rā te Metua i te ao ra ē, e nehenehe rāua e ’ite mai i te hau nō te mea ’ua fa’aineine ’oia i te hō’ē Fa’aora nō te fa’aora ia rāua i tā rāua mau hara ’e i te mau ’oto (hi’o Mose 5:7–10).
’Ia putapā ana’e ’outou i te teimaha o te tāhuti nei, ’a ha’amana’o i teie parau mau : ’Ua ’ite te Metua i te ao ra ē, e fa’aruru tātou i te mau fa’ahemara’a, e rave tātou i te hape ’e e hara i te roara’a o teie tere ho’ira’a iāna ra—e tuha’a te reira mau mea ato’a nō te fa’anahora’a.
Nā roto ia Iesu Mesia, e nehenehe noa te Metua i te ao ra e tauturu ia tātou ’ia tūra’i ’ē i te mau mana o te pōiri i roto i te orara’a ’e ’ia mono i te reira i te māramarama. Noa atu te rahira’a taime tō tātou hapera’a, maoti tō tātou Fa’aora, e nehenehe tātou e taui i te ti’arepu i te hau ’ōroto, ’ia tātarahapa ana’e tātou.
’Ua fa’a’ite pāpū te peresideni Russell M. Nelson :
« E ha’apūai [Iesu Mesia] ia ’outou. E ha’amaita’i ’oia ia ’outou i te hau, ’oia ato’a i rōpū i te ti’arepu. …
« ’Ua rave Iesu Mesia i ni’a iāna iho tā ’outou mau hara, tō ’outou mau māuiui, tō ’outou mau ’oto, ’e tō ’outou mau paruparu. ’Aita e tītauhia ia ʼoutou ’ia amo i te reira ’outou ana’e ! E fa’a’ore ’oia i tā ’outou hara ’ia tātarahapa ’outou. E ha’amaita’i ’oia ia ’outou i te mau mea e hina’arohia e ’outou. E rapa’au ’oia i tō ’outou vairua pēpē ».
Noa atu te huru o tō ’outou mau arora’a, ’ia fāriu ana’e ’outou i ni’a i te Metua i te ao ra ’e ia Iesu Mesia nō te tauturu, e nehenehe rāua e fa’aho’i mai i te mea tei pau, e fa’ati’amā ia ’outou i te ti’arepu o te mau hara ’e te mau fa’ahemara’a, ’e e fa’anehenehe i tō ’outou orara’a.
’Ua nā reira rāua ’e e nā reira fa’ahou ’e fa’ahou ā.