’Ō vai ho’i au nō te amuamu ?

Nā Yesmin Oliveros, Zaragoza, fenua Pāniora

’Ua riro teie nā maha tauiuira’a nohora’a ’ei tāmatara’a rahi nō mātou ’ei ’utuāfare tītīhoria. Terā rā, tē tāpe’a nei mātou i te ’āuri tāpe’ara’a ma te pāpū ē, tē arata’i nei te Fatu ia mātou i te tahi ’ananahi maita’i a’e.

I te tau ha’apohera’a rā’au nō 2019, ’ua tae atu vau i te fenua Pāniora ’e tā’u mau tamari’i, e 8 matahiti ’o Aarona ’e ’o Jorge 17 matahiti ’e tōna ma’i hiparoto [autisme]. Ma tō’u noa mau moemoeā ’ōta’ahia i roto i te hō’ē vaira’a tauiha’a, ’ua tāpe’a noa vau i te Atua ’e ’ua ti’aturi hope roa vau iāna.

’Ua fa’ari’i poupou mai te hō’ē ta’ata maita’i nō Samaria ia mātou i roto i tōna fare, i reira mātou i te fa’aeara’a e piti hepetoma. Terā rā, e ’ere i te mea ’ōhie ’ia fa’ataui ia Jorge i tōna orara’a tāna i mātau. Nō tōna ma’i, tē vai ra tāna iho mau terera’a ’ohipa o tāna i mātaro. Tē vai ra i te tahi mau pō, e tūpa’ipa’i ’ōna i te mau papa’i, e ti’a ’oi’oi au ’ia ’ore ’ōna e fa’aara ia vetahi ’ē. E tūturi vau i pīha’i iho iāna ’e pure atu ai i te Fatu, ma te ha’amana’ora’a ē Isaia 41:10 : « ’Eiaha e mata’u, tei pīha’i ato’a vau ia ’oe ; ’eiaha e taiā, o vau ho’i to Atua. E fa’a’eta’eta vau ia ’oe… e tauturu vau ia ’oe : ’oia ïa, e mau vau ia ’oe i tā’u rima ’atau parau ti’a ra ».

I te piti o te hōpe’a hepetoma i te fenua Pāniora, ’ua tae mātou i te hope’ara’a o te purera’a ’ōro’a. ’Ua ha’afātata atu vau i te hō’ē tamāhine ’āpī tei pīha’i iho i te mau tamari’i Paraimere ’e ’ua fa’ata’a atu vau ē, e melo vau nō te ’Ēkālesia, ’aita rā vau i mātau i te hō’ē noa a’e ta’ata. ’Ua fa’a’ite ’oia ia mātou i te tahi atu mau melo e rave rahi.

I te mahana i muri iho, ’ua fa’ari’ihia tō mātou ti’ara’a ’ei tītīhoria nā te ’āpo’ora’a ’oire nō Zaragoza ’e ’ua ’āfa’ihia mātou i te hō’ē fare ē ’aita e pape ’aore ato’a e uira. ’Ua haere mai te ’episekōpora’a, te Sōtaiete Tauturu ’e te pupu peresibutero nō te pāroita tā mātou i fārerei a’e nei, ’e ’ua ’āfa’i mai i te tauturu, te mau ’ahu ta’oto, te mā’a ’aita e tītauhia ’ia tāmāhanahanahia, te ’ahu māhanahana ’e te tahi atu mau tao’a nō te mau mahana ato’a.

’Ua ha’amata tā’u mau tamari’i i te ha’api’ira’a, ’e ’ua ha’amata ato’a vau i tā’u ha’api’ipi’ira’a. ’Ia tae i te hora tāmā’ara’a huru fifi ri’i nō Jorge tei mātaro i te tāmā’a i te hora ’ahuru mā piti. ’Ua fa’a’ite mai tōna ’orometua iā’u ē, noa atu ’o vai te ta’ata ha’api’i, i te hora ’ahuru ma piti iho, e tātara mai Jorge i tāna mā’a ’e e ha’amata i te tāmā’a.

« E ha’apae ato’a vau i te mā’a »

’Ua riro teie nā maha tauiuira’a nohora’a ’ei tāmatara’a rahi nō mātou. ’Ua pure tu’utu’u ’ore vau ’ia vai pūai noa, ’e i te tahi mau taime ē ta’i vau ’o vau ana’e i tō’u pae. Tau hepetoma, ’aita te ta’oto e rāva’i. I muri a’e e rave rahi mahana i te ’imi-noa-ra’a i te ’ohipa, ’ua ha’amaita’ihia vau i tā’u ’imira’a, e ’ohipa ha’apa’o i te hō’ē vahine ’āpī tei ro’ohia i te ma’i māriri ’aita’ata nō te roro. I muri a’e i te ’ohipa, e ti’i vau i tā’u mau tamari’i, e tauturu ia rātou i tā rātou ha’api’ira’a, ’e i muri iho, e rave au i tā’u ha’api’ipi’ira’a.

’Ua aupuru vau i teie vahine ’āpī fa’ahiahia roa nō te hō’ē matahiti, ē tae roa i te taime ’a fa’aru’e mai ai ’oia i te 48ra’a o tōna matahiti, ma te vaiiho mai e piti tamari’i na’ina’i. ’Ia feruri au i te huru o tōna orara’a, ’ua uiui vau iā’u iho : « ’Ō vai ho’i au nō te amuamu ? » ’Ua hōro’a mai teie aupurura’a iāna i te pāhonora’a i tā mātou mau hina’aro ’e ’ua fa’a’ī te reira i tō’u vārua i te māuruuru i tō’u Metua i te ao ra.

I te mau mahana ato’a i te fare, e tai’o mātou i te mau pāpa’ira’a mo’a, e pure, ’e e ha’amau i te tahi mau ’ohipa e au nō Jorge ’ia ’ore ’oia e ha’ape’ape’a. I te ’ōmuara’a o te matahiti 2024, ’ua fa’aineine mātou ia mātou iho nō te tomo i roto i te hiero nō Madrid i te fenua Pāniora. Nō te ha’afātata atu ā i te Metua i te ao ra, ’ua tae te mana’o iā’u ē, e ti’a ia mātou ’ia ha’apae i te mā’a ’ei hō’ē ’utuāfare. ’Ua fa’ari’i ’o Aarona, ’e i te po’ipo’i a’e ’ua parau mai ’o Jorge iā’u, « e māmā, i teie mahana e ha’apae ato’a vau i te mā’a ». E taime ’oa’oa fāito ’ore teie nō’u.

te ta’ata pāpa’i ’e tōna ’utuāfare i mua i te hiero — « Nō te ha’afātata atu ā i te Metua i te ao ra ’a ha’amata ai mātou i tā mātou fa’aineinera’a nō te haere i te hiero nō Madrid i te fenua Pāniora, ’ua puta mai te mana’o e ti’a ia mātou ’ia ha’apae i te mā’a ’ei ’utuāfare », tē nā reira rā ’o Yesmin. « ’Ua parau mai ’o Jorge iā’u, ‘e māmā, i teie mahana, e ha’apae ato’a vau i te mā’a.’ E taime ’oa’oa fāito ’ore teie nō’u ».

Mai te taime mātou i haere ai i te hiero, ’ua maita’i mai te ma’i ’o Jorge. ’Ua roa’a iāna ’ia taui tāna mau hora i mātauhia. I te mahana mā’a, e fa’aineine ’ōna i tōna ’ahu purera’a nō te ’ōpere i te ’ōro’a i te mahana Sābati. ’Ua maita’i ato’a mai tāna ha’api’ira’a.

I teie mahana, ’ua roa’a ia mātou ’ia fa’aora ia mātou iho, ’aua’e maoti te pāturura’a a te hō’ē Metua i te ao ra here mau. ’Ua fa’ati’a fa’ahou mai Iesu Mesia ia mātou mai ni’a mai i te rehu auahi (hi’o Isaia 61:3). Nā roto i te ’aufaura’a i tā mātou tuha’a ’ahuru, ’ua fa’ari’i mātou e rave rahi mau ha’amaita’ira’a. E tāpe’a pāpū mātou i te ’āuri arata’i (hi’o 1 Nephi 8:24, 30; 11:25; 15:23) ma te pāpū ē e nu’u mātou i mua i te hō’ē ’ananahi maita’i a’e.