’Ia noa’a te huru Atua

I roto i te ’āpo’ora’a hou te tāhuti nei, ’ua vauvau mai te Metua i te ao ra i tāna mau tamari’i vārua i tāna fa’anahora’a nō tō rātou haerera’a mure ’ore i mua ’e tō rātou ’oa’oa.

« E hāmani tātou i te hō’ē fenua ’ei vāhi orara’a nō rātou ;

« ’E e tāmata tātou ia rātou i reira, ’ia ’ite tātou e ha’apa’o ānei rātou i te mau mea ato’a tā te Fatu tō rātou Atua e fa’aue ia rātou ra ;

« ’E ’o rātou ’o tē ha’apa’o i tō rātou ’āi’a mātāmua e fa’arahihia ïa tā rātou ; ’e ’o tē ’ore e ha’apa’o i tō rātou ’āi’a mātāmua e ’ore ïa e fa’ari’i i te hanahana i roto i te bāsileia tei reira rātou ’o tei ha’apa’o i tō rātou ’āi’a mātāmua ; ’e ’o rātou ’o tē ha’apa’o i te piti o tō rātou ’āi’a e fa’arahihia ïa te hanahana i ni’a i tō rātou upo’o a muri ē a muri noa atu ».

« ’E ’ua nā ’ō a’era te Fatu : ’O vai tā’u e tono ? ’E ’ua pāhono mai ra te hō’ē tei au i te Tamaiti a te Ta’ata : Teie au, ’a tono iā’u. ’E ’ua pāhono mai ra te tahi, nā ’ō mai ra : Teie au, ’a tono iā’u. ’E ’ua parau atu ra te Fatu : E tono vau i tō mua ra.

« ’E ’ua riri roa a’era te piti, ’e ’aore atu ra i ha’apa’o i tōna ’āi’a mātāmua ; ’e, i taua mahana ra, e rave rahi tei pe’e atu iāna ».(Aberahama 3:24–28).

’A hi’o na, hō’ē ana’e fa’anahora’a tei vauvauhia i roto i te ’āpo’ora’a hou te tāhuti nei—te fa’anahora’a a te Metua. ’Aita tō tātou Metua i te ao ra i ui i te uira’a ē : « E aha tā tātou e rave ? » ’Aita ’oia i ani i te mana’o, te mau arata’ira’a, ’aore rā te mana’o ’āpī. ’Aita, ’ua vauvau mai rā ’oia i te mau tuha’a tumu o tāna fa’anahora’a ’e ’ua ui mai : « ’O vai tā’u e tono ? » Te tumu mau o tāna uira’a, ’ua fa’atumuhia ïa i ni’a i te ta’ata e tono atu nō te rave i te mau tuha’a ’e te mau tītaura’a o tāna fa’anahora’a.

’Ua fa’ata’a-ato’a-hia te mau fa’ahope’ara’a o te ’orurehau a te ’enemi i roto i te mau pāpa’ira’a mo’a.

« Nō reira, nō te mea ē ’ua ’ōrurehau Sātane iā’u, ’e ’ua tītau ’ia ha’amou i te ti’amāra’a o te ta’ata, ’o tā’u […] i hōro’a nōna ra, ’e ’oia ato’a, ’ia hōro’a atu vau i tō’u iho mana iāna […] i fa’aue ai au ’ia hurihia ’oia i raro ;

« ’E ’ua riro ’oia ’o Sātane, oia ïa […] te diabolo, te metua o te mau ha’avare ato’a, ’ia ha’avare ’e ’ia ha’amatapō i te ta’ata, ’e ’ia arata’i ia rātou ’ei tītī ’ia au i tōna ra hina’aro, ’oia ho’i ia rātou ato’a ’o tē ’ore e fa’aro’o i tō’u nei reo » (Mose 4:3–4 ; reta tei fa’ahuru-’ē-hia).

’Aita Lucifero i vauvau i te hō’ē fa’anahora’a tei ha’apaehia e te rahira’a o te feiā i ’āmui mai i roto i te ’āpo’ora’a hou te tāhuti nei. E ’ere ’oia i te hō’ē ta’ata maita’i ’o tei pau i te hō’ē mā’itira’a. ’Ua ’ōrurehau ’oia ! Nā te te’ote’o, te ahaaha ’e te ’ā’au pipiri i tūra’i i tāna ’ōrurehau i te fa’anahora’a a te Metua.

Tē fa’ata’a nei te fa’anahora’a i te mau ’ohipa a te Metua ’e a te Tamaiti ’o tē ha’amatara nō te mau ta’ata ato’a i te mau ha’amaita’ira’a o te ora mure ’ore.

Te ’evanelia a Iesu Mesia ’o te rāve’a ïa e nehenehe ai tātou e fa’ari’i i te mau ha’amaita’ira’a i fafauhia i roto i te fa’anahora’a a te Atua, ’oia ho’i te ha’api’ira’a tumu, te mau parau tumu, te mau ’ōro’a ’e te mau fafaura’a tei tītau-roa-hia i te mau tāne ’e i te mau vahine ’ia ti’aturi ’e ’ia pe’e. « ’Aita roa atu e i’oa i raro a’e i te ra’i nei e ora ai te ta’ata nei, maori rā ’o Iesu Mesia » (2 Nephi 25:20). ’Oia mau, ’o te Fatu Iesu Mesia « te ’ē’a, te parau mau ’e te ora : ’aore roa e ta’ata e tae i te Metua ra, maori rā ’ei [iāna] » (Ioane 14:6 ; reta tei fa’ahuru-’ē-hia).

Tē fa’ata’a nei te peresideni Russell M. Nelson :

« I tītauhia nō te fa’anahora’a te Poietera’a, ’e i tītau-ato’a-hia atu ra te Hi’ara’a ’e te Tāra’ehara. ’O teie nā tuha’a tumu e toru i roto i te fa’anahora’a. Nō roto mai i te Atua te poietera’a o te hō’ē paraneta paradaiso. ’Ua tae mai te tāhuti ’e te pohe i roto i te ao nei, nā roto i te hi’ara’a o Adamu [hi’o 2 Nephi 2:25 ; Mose 6:48]. ’Ua fa’afāna’ohia mai te tāhuti ’ore ’e te rāve’a nō te ora mure ’ore nā roto i te tāra’ehara a Iesu Mesia [hi’o 2 Nephi 2:21–28] […]

« […] E haere mai tātou i te fenua nei nō te hō’ē tau poto, ma te fa’a’oroma’i i tō tātou mau tāmatara’a ’e te mau fifi, ’e ma te fa’aineine i te haere i mua ’e i ni’a a’e, i te ho’ira’a hanahana [hi’o Salamo 116:15 ; Alama 42:8]. E riro mau tō tātou mau mana’o ’e tā tātou mau ’ohipa [i te tāhuti nei] ’ei ’ohipa ma te tumu mau mai te mea ’ua māramarama tātou i te fa’anahora’a a te Atua, ’e ’ua māuruuru ’e ’ua ha’apa’o i tāna mau fa’auera’a » [hi’o Te Ha’api’ira’a Tumu ’e te mau Fafaura’a 59:20–21] ».

E ha’api’i mai tātou i te mau parau mau faufa’a rahi nā roto i te ’itera’a ’e te ’imi-māite-ra’a e aha te mau i’oa e rave rahi nō te fa’anahora’a a te Metua i roto i te Buka a Moromona : Te tahi fa’ahou ’ite nō Iesu Mesia. ’Ei hi’ora’a, ’a feruri i te mau i’oa tei mā’itihia i muri nei ’ei hi’ora’a :

« Te ’ōpuara’a aroha a Tei Hamani » (2 Nephi 9:6).

« Te ’ōpuara’a a tō tātou Atua » (2 Nephi 9:13).

« Te ’ōpuara’a nō te fa’aorara’a » (Iaroma 1:2 ; Alama 24:14).

« Te ’ōpuara’a nō te fa’aorara’a [tāra’ehara] » (Alama 12:25, 26, 30, 32, 33 ; 42:11, 13).

« Te ’ōpuara’a nō te fa’aho’ira’a mai » (Alama 41:2).

« Te ’ōpuara’a nō te ’oa’oa » (Alama 42:16).

« Te ’ōpuara’a rahi nō te aroha » (Alama 42:31).

E tauturu teie mau i’oa tāta’itahi ia tātou ’ia māramarama maita’i a’e i te mau parau fafau faufa’a rahi o te fa’anahora’a a te Metua ’e e fa’arahi i tā tātou hi’ora’a ātea nō ni’a i te mau ’ōpuara’a ’e te aura’a o tō tātou orara’a tāhuti nei.

E ’ite-rahi-hia ē, te i’oa tei fa’a’ohipa-pinepine-hia nō te fa’ata’a i te fa’anahora’a a te Atua i roto i te Buka a Moromona, e fa’atumu ïa i ni’a i te fa’aorara’a tei fa’atupuhia e te tāra’ehara a Iesu Mesia.

’Ua parau Alama : « ’Āhiri ē ’aita te ’ōpuara’a nō te fa’aorara’a, ’o tei ha’apa’ohia mai te ha’amatara’a mai ā o te ao nei, ’aita roa ïa e ti’afa’ahoura’a nō te feiā pohe ; ’āre’a rā tē vai ra te hō’ē ’ōpuara’a nō te fa’aorara’a i ha’apa’ohia, ’e nā te reira e fa’atupu i te ti’afa’ahoura’a o te feiā pohe ra » (Alama 12:25).

’Ua nā ’ō ato’a ’oia : « ’Ia ha’amata i te ti’aturi i te Tamaiti a te Atua ē, e haere mai ’oia nō te fa’aora i tōna ra mau ta’ata, ’e e ha’amāuiuihia ’oia ’e e pohe ho’i nō te ha’amatara i tā rātou mau hara ; ’e e ti’afa’ahou mai ’oia mai te pohe mai, ’ia tupu te ti’afa’ahoura’a, ’e e ti’a atu te mau ta’ata ato’a i mua iāna, ’ia ha’avāhia i te mahana hope’a ’e te mahana ha’avāra’a, mai te au i tā rātou mau ’ohipa » (Alama 33:22).

E mea tano i tō tātou vairua ’ia ’oru ma te māuruuru i te ferurira’a i te fa’anahora’a rahi a te Atua nō te fa’aorara’a, nō te tāra’ehara, nō te fa’aho’i-fa’ahou-ra’a, nō te aroha ’e nō te ’oa’oa. E hōro’a mai te ’itera’a i tāna fa’anahora’a i te hō’ē hi’ora’a ātea faufa’a rahi, ma te ha’amaita’i i tō tātou mau taime ’oa’oa, ’e ma te ha’apūai ia tātou nō te upo’oti’a i tō tātou mau fifi ’e mau ’ati.

Tē hia’ai pūai nei te Metua i te ao ra ’ia ho’i tātou iāna ra. Tē ani nei ’oia ’e ’ua parau fafau ho’i i te mau ha’amaita’ira’a, e’ita roa rā ’oia e fa’ahepo ’aore rā e fa’ari’ari’a ’aore rā e ’ōpani i tā tātou fa’a’ohipara’a i te ti’amāra’a mōrare tāna i hōro’a ia tātou. Tītau-roa-hia ia tātou ’ia ’ohipa ’e ’ia mā’iti i te ho’i atu iāna ra ma te pe’era’a i te hi’ora’a o tāna Tamaiti Here.

His Hand Is Stretched Out Still [Tē toro noa ra tōna rima i tōna rima], nā Elizabeth Thayer

« ’Ua fa’aineinehia te ’ē’a, ’e ’ia hi’o noa atu tātou, e ora ïa tātou ē a muri noa atu » (Alama 37:46 ; reta tei fa’ahuru-’ē-hia).

Tē fa’a’ite pāpū nei au ma te ’oa’oa ē, ’o te Metua i te ao ra te tumu nō te fa’anahora’a hanahana nō tāna mau tamari’i. ’O Iesu Mesia tō tātou Tāra’ehara ’e tō tātou Fa’aora. ’E nā ni’a i tō’u ti’ara’a e hō’ē o te mau ’āpōsetolo a te Fatu o te mau mahana hope’a nei, tē fa’a’ite nei au ē, ’o ’oia mau iho ā « te ’ē’a, te parau mau ’e te ora » (Ioane 14:6 ; reta tei fa’ahuru-’ē-hia).