’Ua ri’ari’a vau i te paraparau atu i tō’u ’episekōpo—mai te aha ra tōna huru ?

I te ha’amatara’a, ’aita vau i tāu’a i te reira. ’Ua fa’ariro vau i te mau ture a te ’Ēkālesia e mea ’eta’eta. ’Ua haere noa vau i te purera’a, i roto roa rā iā’u, ’ua ’ite au iā’u iho e mea ti’amā ’ore ’e ’ua fa’aea vau i te rave i te ’ōro’a mo’a e rave rahi ’āva’e te maoro.

I muri iho ’ua tupu mai te ma’i CŌVĪ-19, ma te tāpe’a i tā’u mau ’ohipara’a ato’a. Fātata i terā iho ā mau taime, ’ua ha’api’i mai au i te hō’ē ’ohipa fa’aataata : E mea fa’a’amuhia vau. ’Aita roa atu tō’u nā metua i parau mai a’e iā’u, ’e ’ua fa’aruru vau i te hō’ē fifi ri’i nō te ihota’ata.

’Ua putapū vau i te ātera’a i te mau mea ato’a ’o tā’u i ti’aturi nā. ’Ua ’ite au ē e ti’a iā’u ’ia ’ite fa’ahou mai ē ’o vai mau vau. I te hope’a ’a ho’i ai au i te fare, ’ua fa’a’ite au i te mau mea ato’a i tō’u nā metua—tae noa atu i te mau mā’itira’a ’o tā’u i rave. ’Āhiri i te tama’ira’a mai iā’u, ’ua pāhono mai rāua ma te here. ’Ua fa’aha’amana’o mai rāua iā’u ’o vai mau vau : tā rāua tamaiti ’e te hō’ē tamaiti here mau nā te Atua.

’Ua hina’aro vau e taui. ’Ua fa’aitoito tō’u nā metua iā’u ’ia paraparau atu i tō’u ’episekōpo, ’ia ha’amata i te ’ohipa tau maoro o te tātarahapa, ’e ’ia tūru’i i ni’a i te mana tāra’ehara a te Fa’aora.

’Ua taiā rā vau ! ’Ua pe’ape’a vau ’ia fa’autu’ahia ’aore rā ’ia ha’avāhia nō tā’u mau mā’itira’a. Te ti’aroa, ’aita vau e tāu’a i te mea tā te ta’ata e mana’o nō’u, terā ra tō’u ’episekōpo e ta’ata fa’ahiahia mau, ’e ’aita vau i hina’aro e fa’a’oto iāna ma te fa’a’itera’a iāna i te mea tā’u i rave.

Mai tā Elder Scott D. Whiting nō te Hitu ’Ahuru rā i ha’api’i : « ’Eiaha e tāpuni atu ia ’outou i te feiā ’o te here ’e ’o te turu ia ’outou ; e horo atu rā ia rātou ra. E nehenehe te mau ’episekōpo, te mau peresideni ’āma’a, ’e te feiā fa’atere maita’i e tauturu ia ’outou ’ia noa’a te mana fa’aora o te Tāra’ehara a Iesu Mesia ».

« Tē mau nei te mau ’episekōpo i te mau tāviri o te autahu’ara’a nō te mono i te Fatu i roto i te tauturura’a i te mau melo o te ’Ēkālesia ’ia tātarahapa ». ’Āhiti i te fa’arurura’a i te ha’avāra’a ’eta’eta ’a paraparau ai au iāna, ’ua putapū vau i te tāmāhanahana i roto i te piha tōro’a a tō’u ’episekōpo. ’Ua ’ite a’era vau ē, ’ua ti’aturi te Fatu iāna nō te tauturu iā’u, ’e ’ua ’ite au i roto iā’u e nehenehe ato’a vau e ti’aturi iāna.

’Ua fa’aitoito mai tō’u ’episekōpo iā’u ’ia ha’api’i rahi mai nō ni’a i te Fa’aora ’e tāna tāra’ehara ma te fa’ananeara’a i te mau peu pae vārua. E fārerei mai te au vau i tō’u ’episekōpo, ’e e niuniu mai ’oia iā’u i te mau hepetoma ato’a nō te ’ite i te parau ’āpī nō’u. E putapū vau i te here mau i te mau taime ato’a e paraparau vau iāna.

I te pae hope’a, nā roto i te tauturu a tō’u ’episekōpo, ’ua fa’aātea ’ē vau iā’u i te mau ’ino i roto i tō’u orara’a. Noa atu rā, ’ua taiā ri’i au i te rave fa’ahou i te ’ōro’a mo’a. ’Ua ti’amā mau ānei au—i muri a’e i te mau ’ohipa ato’a ’o tā’u i rave ?

’Ua ha’apāpū mai rā tō’u ’episekōpo iā’u. ’Ua fa’aha’amana’o mai ’oia iā’u ē ’aita e tītauhia iā’u ’ia maita’i roa—maoti rā ’ia ineine noa. ’Ua rave au mai tā’u e nehenehe, ’e ’ua ’ite te Fa’aora i te reira ’e e tāmau noa ’oia i te fa’a’ore mai i tā’u hapa, ’a tūru’i ai au i ni’a i tāna hōro’a o te tātarahapa.

’Ua ha’api’i iho nei te tuahine Tamara W. Runia, tauturu hō’ē i roto i te Peresidenira’a Rahi o te Feiā ’Āpī Tamāhine, « te haerera’a i te Mesia, ’o te paraura’a ïa ē, ‘e ti’a ānei ia ’oe ’ia tauturu mai iā’u ?’ ma te ti’aturi, i te ha’apāpūra’a i fa’a’itehia mai ē, tē fa’atoro tāmau nei tōna nā rima ia ’oe ».

I muri a’e i teie ’ohipa i tupu, ’ua ha’amata vau i te fa’a’āpī i tā’u mau fafaura’a nā roto i te ’ōro’a mo’a ma te ti’aturi. ’Ua ’ite au iā’u iho mai te hō’ē ta’ata ’āpī, ma te hō’ē mana’o ’āpī ’o vai mau vau ’e te mea tā’u e nehenehe e rave nā roto i te tauturu a te Fatu. ’Ua tāvini ato’a vau i te hō’ē misiōni, nō te mea i muri a’e i tō’u ’itera’a e mea nāhea te hōro’a o te fa’aorara’a a te Fa’aora i te tauira’a i tō’u orara’a, ’ua hina’aro vau e tauturu ia vetahi ’ē ’ia ’ite mai i te tīa’ira’a o tāna [te Fatu] e hōro’a nei iā’u i te mau mahana ato’a.

E ’ere te mau fa’auera’a i te mea ’eta’eta—tē vai nei te reira nō te mea tē hina’aro nei te Atua ’ia manuia tātou, ’ia tupu tātou i te rahi ’e ’ia ’ape i te marei o te hara. Te pū o te ’evanelia a Iesu Mesia ’o tōna ïa here ’e tō te Metua i te ao ra nō tātou. Nō te mea ’ua ora nā vau i taua here maita’i roa ra, tē tūtava nei au ’ia riro hau atu mai ia rāua te huru.

’Ua fa’a’ī tā rāua hōro’a o te tātarahapa i tō’u orara’a i te ’oa’oa.