E ’ere te tātarahapa i te upo’oti’a-noa-ra’a i ni’a i te hara

Hou tā’u misiōni, e ’ere tō’u orara’a i te mea maita’i roa, e mea maita’i rā. ’Ua au roa vau te fare ha’api’ira’a tuatoru ’e nō fa’atupu noa mai nei au i te auhoara’a maita’i roa a’e ’o tā’u i ’ore nā i fa’ari’i a’enei. ʼUa ’oa’oa roa vau.

’Ua ’ite au ē te tāvinira’a i te hō’ē misiōni e mea fifi ïa. Noa atu ra ’ua fa’ari’i au i teie tīa’ira’a ē, te tāvinira’a i te hō’ē misiōni e riro ’ei 18 ’āva’e maita’i roa a’e o tō’u orara’a—ma te mau fifi tanotano noa.

E ono ’āva’e rā i muri mai, ’ua riro te fa’aipoipora’a o tō’u hoa ’ei tuha’a hōpe’a roa i roto i te hō’ē tāpura o te mau mea fifi ’o tā’u i ’ore i mana’o. Te haerera’a i te hō’ē fenua ’e’ē ’e te ha’api’ira’a mai i te hō’ē reo ’āpī, ’ua fa’atupu mai te ’ōmo’era’a ’e te pe’ape’a i roto iā’u. Te pāto’ira’a i te ’ohipa i tupu ’ei tuha’a nō te orara’a misiōnare e mea rohirohi roa ïa i te pae ferurira’a. Te parau mau, ’ua hina’aro vau e ho’i i te fare.

’Ua rohirohi ’e ’ua fa’a’erehia vau, ’e ’aita vau e mana’o nei ē tē hōro’a mai nei te Atua iā’u i te tīa’ira’a ’e te ’oa’oa ’o tā’u e hina’aro rahi nei. I muri a’e roa mai i te tāmatara’a i te tahi atu mau rāve’a, ’ua fāriu atu vau i ni’a i te hō’ē parau fafau nō roto mai i tō’u ha’amaitaira’a pātereāreha ē : e putapū vau i te here o te Metua i te ao ra nā roto mai i te mau pāpa’ira’a mo’a.

’A ’imi ai au i te mau pāpa’ira’a mo’a, ’ua ’ite au iā’u iho i te nati-hōhonu-ra’a-hia i te ’ā’amu o Eva. ’Ua ti’avaruhia ’oia i te paradaiso ’e ’ua ’āfa’ihia i roto i te hō’ē mēdēbara pōiri ’e te ano roa, ’o te mea ïa o tā’u i putapū. Mai te reira ato’a tō’u ’itera’a, nō roto mai te tauira’a o Eva i te hō’ē mā’itira’a pāpū maita’i. ’Ua uiui au iā’u iho ’ua tātarahapa ānei ’oia i tāna mā’itira’a, mai tā’u e ha’amata nei i te tātarahapa i tā’u mā’itira’a ’ia tāvini.

Terā rā, e hi’ora’a ātea pa’ari maita’i a’e tō Eva i tō’u. Noa atu ē ’ua ’ere ’oia fātata i te mau mea ato’a, i tōna ra ha’api’ira’a mai ē e Fa’aora tōna, ’ua « ’oa’oa ’oia, i te nā ’ōra’a ē : ’Āhiri ’aita tāua i ’ōfati i te ture, … ’aore ato’a tāua e ’ite i te maita’i ’e te ’ino, ’e te ’oa’oa o tō tāua fa’aorara’a » (Mose 5:11).

’Aita ’oia i tātarahapa i tāna mā’itira’a. ’Ua māuruuru roa ’oia nō te reira ! Noa atu ’ua ti’avaruhia ’oia ’e ’o Adamu i te paradaiso, e mea marū a’e te ’oa’oa ’ia fa’aorahia i te māuiui o tōna ’erera’a. Inaha, e au ra ē ’ua hōpoi rahi fa’ahou mai te fa’aorara’a i te ’oa’oa hau a’e iāna, i te mea ē ’aita roa e tītauhia iāna ’ia fa’aorahia.

E mea nāhea te reira e ti’a ai ?

E mana’o paha tātou ē, ’ua riro noa te tātarahapa ’ei tūmāra’a i te mau hara ’e te mau peu ’ino i roto i tō tātou orara’a. E nehenehe teie ravera’a nō te tūmāra’a e riro ’ei mea fifi ’e te māuiui i te tahi taime, ’o te fa’ati’a i te hōro’ara’a ’ōhie noa i te hō’ē tāpa’ora’a ’aita i te ta’o.

E ’ere noa rā te tātarahapa i te rirora’a ’ei ta’ata hara iti mai. ’Oia ato’a i te rirora’a hau atu mai te Mesia te huru.

Te fāriura’a i ni’a iāna—te tauira’a i tō tātou huru ’e te fa’atū’atira’a i tō tātou hi’ora’a ātea ’e tōna—’o te hō’ē ato’a ïa huru o te tātarahapara’a.

’Ua ’ite a’era vau ē i roto i tō’u riri ’e tō’u vai-’ōtahi-ra’a, ’ua piriha’o roa tō’u hi’ora’a ātea. ’Ua tūtonu rahi roa vau i ni’a i te mea tā’u i ’ere, ē ’aita vau i ’ite i te mea ’o tā’u i noa’a : hō’ē aura’a fātata roa ’e tō’u Fa’aora.

’Ua ’ite a’era vau ē e ti’a iā’u ’ia tātarahapa nō tō’u huru ’ino. ’Ua tītau te reira i te taime, terā rā ’a tāparu ai au i te tauturu a tō’u Fa’aora, ’ua ha’apāpūhia mai iā’u ē « i roto i teie orara’a e roa’a iā’u te ’oa’oa » (Mose 5:10).

Tē ’oto noa nei ā vau i te ma’irira’a i te fa’aipoipora’a o tō’u hoa, i roto rā i te tau, ’ua pāhono mai te Fatu i tā’u mau pure. ’Ua ’oa’oa roa vau nō tō’u hoa, ’e ’ua ’ite mai au i te ’oa’oa rahi i roto i tō’u ’itera’a pāpū ē, tē hi’o ’e tē here mau nei te Metua i te ao ra i tāna mau tamari’i tāta’itahi. ’Ua noa’a iā’u hau roa atu ā i te mea ’o tā’u i ’ere.

’Ua ha’api’i te tuahine Kristin M. Yee, tauturu piti i roto i te Peresidenira’a Rahi o te Sōtaiete Tauturu, « e fa’ati’a te tātarahapara’a ia tātou ’ia putapū i te here o te Atua ’e ’ia mātau iāna ’e ’ia here iāna ma te rāve’a e’ita roa tātou e ’ite i nā mua a’enei ».

Maoti te tātarahapa, ’ua ’ite au i teienei ē ’a ha’afātata ai au i te Mesia, « e fa’ariro ’oia i [tō’u] mēdēbara mai ia Edene, ’e [tō’u] vāhi pāpāmarō mai te ’ō a Iehova ra ; e ’itea te ’oa’oa ’e te pōpou i roto iāna » (Isaia 51:3).

I tō’u ho’ira’a mai nā tā’u misiōni, ’aita vau i ho’i i te paradaiso. ’Ua riro te orara’a i muri mai i te misiōni ’ei hō’ē mēdēbara ’āpī nō’u ’ia fa’a’apu. E ’ere i te mea ’ōhie, ’e i te tahi taime tē mihi noa nei ā vau i tō’u orara’a hou te misiōni.

’Ua ’ite rā vau ē maoti te Mesia, e hōhonu atu ā tō’u ’oa’oa i roto i te ’itera’a i tō’u fa’aorara’a.