E arata’i mau ā te Fatu iā’u

Faʼahōho’araʼa nā Allen Garns

’Ua pa’ari mai au i roto i te hīmene ’e ma te fa’a’atihia i te pehe. Tā’u moemoeā rahi roa’a i tō’u ’āpīra’a ’o te rirora’a ïa ’ei ta’ata hīmene tuiro’o. ’Ua manuia ato’a vau e rave rahi na tāta’ura’a hīmene. I te tahi rā taime i roto i tō’u orara’a, ’ua ’ite au i te hō’ē ’erera’a nō ni’a i te ’ōpuara’a a te Atua nō’u hau i te ro’o ’e te fa’atietiera’a a vetahi ’ē.

’Ua tauturu te fa’ari’ira’a i te ’evanelia a Iesu Mesia i roto i tō’u orara’a ’ia roa’a te fa’aro’o i te mau taime pāpū ’ore. ’Ua tauturu ato’a te reira iā’u ’ia hāro’aro’a ē, ’ua hina’aro te Metua i te ao ra ’ia fa’a’ohipa vau i te tārēni tāna i hōro’a mai iā’u nō te ha’afātata atu ā iāna ’e nō te fa’ahanahana iāna.

Noa atu ’ua vaiiho vau i tā’u i moemoeā na, ’ua tae mai te mana’o ē, e tāmau noa vau i te hīmene ’e e ha’api’ipi’i i te pehe.

I te 25ra’a o tō’u matahiti, ’ua oti tā’u ha’api’ira’a pāpa’i hōho’a fare ’e ’ua nā roto ato’a vau i te BYU–Pathway Worldwide [nā te ao ato’a nei] ’e Brigham Young University–Idaho, ’ua tauturu te reira iā’u ’ia ha’amaita’i i tō’u ’aravihi i te paraparau i te reo Peretāne.

I muri iho e temeio tei tupu.

’Ua fa’ari’i au i te hō’ē tītaura’a manihini ’ia hīmene i roto i te pupu hīmene nō te Fare menemene nā te ao nei nō te ’ohipa misiōnare. ’Aita vau i ’ite i terā iho taime, te mau ha’api’ipi’ira’a tā’u i rave i nā rahira’a matahiti, e fa’aineinera’a ana’e terā iā’u nō teie taime. Teie tītaura’a, ’ua riro ïa ’ei pāhonora’a i tā’u mau pure ’e tō’u mau hina’aro. ’Ua ’ite te Metua i te ao ra i te hope’ara’a mai te ha’amatara’a mai ’e ’ua fa’ati’a iā’u ’ia hīmene nā muri i te pupu hīmene a te Fare menemene nō Temple Square i te ’āmuira’a rahi nō ’Ātopa 2024.

Nā roto i teie ’ohipa i tupu, e nehenehe tā’u e fa’a’ite pāpū i te mana arata’i a te Vārua Maita’i, ma te fa’a’oroma’i ’e te ti’aturira’a ē, e ’ōpuara’a tā te Atua, noa atu ’aita tātou e māramarama maita’i i taua ’ōpuara’a ra. Mai tei fafauhia ia tātou, « E ’ere paha te ’ē’a vitiviti i te mea māramarama noa, e nehenehe rā tātou e pe’e i te Fa’aora ma te fa’aro’o ē, e hope tō tātou tere ma te nehenehe ’e te hanahana, nō te mea nāna e arata’i ia tātou ma te hau i te vāhi e ti’a ai ia tātou e vai ».

Nō ’outou e ’imi noa nei i tō ’outou ’ē’a i mua, nō te ’ite i te ’ohipa tā te Fatu i fa’aineine nō ’outou tei hau atu i tā ’outou e nehenehe e feruri. Mai te mea e pe’e tātou iāna, e fa’ari’i tātou i te mea tāna i fa’aineine nō tātou. E’ita paha te ’ē’a i te mea pāpū ’e e mea huru fifi paha te orara’a, tē fa’atupu noa nei rā te Fatu i te mau temeio nō tāna mau tamari’i.

’Ua ha’api’i mai au ē, e mea nā roto i te fa’aro’o, te ha’apa’o maita’i, te fa’a’oroma’i ’e te pure, te Fatu e arata’i ai iā’u.