E pure i roto i tō’u ’ā’au

Faʼahōho’araʼa nā Allen Garns

I tō’u haerera’a i te ha’api’ira’a tuatahi, ’ua hōro’a noa na tō’u metua vahine nā’u i te mā’a nō te avatea, ē ’āpā mai i ni’a i tō’u rae, ma te fa’aha’amana’o iā’u, « ’a rave maita’i tā ’oe ’ohipa i teie mahana, ’e ’a ha’amana’o i te pure i roto i tō ’oe ’ā’au ». I te mau po’ipo’i ato’a ’ua nā reira noa ’ōna, ē tae roa atu i te ha’api’ira’a tuarua.

O terā tāna parau hope’a iā’u nā mua a’e vau e pa’uma atu ai i ni’a i te manureva nō te haere i tā’u misiōni e piti matahiti i Florida, « tāpe’a noa i te hō’ē pure i roto i tō ’ā’au ». Nō tō’u mātau i te fa’aro’ora’a i taua parau ra ’aita atu ra vau i tau’a fa’ahou i te reira ’a tupu ai au i te rahi. ’Ua mana’o vau ē, e parau teie nō tōna u’i tā rātou i mātau ’ia parau mai te huru ra, « ’Ia maita’i i teie mahana ».

’Ei misiōnare rave tāmau, ’ua ha’api’i mai au i te paraparau i te tahi reo pāniora ’a tāvini ai au i Miami, Florida, Fenua Marite. ’Ua ’itehia mai iā’u ē, e hōho’a maita’i tō’u mau hoa ’āpī, e rave rahi nō Cuba ’e nō Puerto Rico, i tō’u māmā. Pauroa te mau ’utuāfare tā mātou i fārerei na, e parau rātou ia mātou i teie parau maita’i ’ia haere ana’e mātou : « Vaya con Dios » (’Ia pe’e te Atua ia ’outou).

I reira vau i te māramaramara’a i te aura’a o te parau a tō’u metua vahine, ’ua ha’amata vau i te ’imi i te mau rāve’a ’ia tāpe’a i te hō’ē pure i roto i tō’u ’ā’au. ’A nā reira ai au, ’ua tupu tō’u māuruuru i te rahi nō te Metua i te ao ra ’e i tāna Tamaiti, ’o Iesu Mesia. ’Ua tae iā’u ’ia fa’a’oroma’i i roto i te mau taime tāmatara’a ’e te hepohepo. ’Ua fa’ari’i au i te hō’ē here rahi a’e nō tō’u nā metua ’e te tahi māuruuru fāito ’ore nō te mau tusia tā rāua i rave nō’u.

I te hō’ē mahana, ’ua tai’o vau nō ni’a i te tere o te Fa’aora i te ’āti Nephi i muri a’e i tōna ti’afa’ahoura’a. I te piti o te mahana nō Tōna tere i reira, « ’ua fa’aue atura ’oia i tāna mau pipi ’ia pure ». I tō rātou purera’a, ’ua pure ato’a te Fa’aora, ma te parau i te mau « parau rahi ’e te māere ». I tōna fa’aotira’a, ’ua fa’aue ’oia i te naho’a ta’ata « ’eiaha rātou e fa’aea i te pure i roto i tō rātou ’ā’au » (3 Nephi 19:17, 34; 20:1).

Hō’ē rāve’a nō te rave i te reira ’o te ferurira’a ïa i te pure mai te hō’ē vaira’a hōho’a e ha’ati rā i tā tātou mau ’ohipa i te mau mahana ato’a. Nā taua vaira’a ra o te pure, ’āpitihia i te here ’e te ’ā’au mehara, e tauturu ia tātou ’ia fa’atumu i ni’a i te Fa’aora ’e ’ia ha’apa’o i tā tātou mau fafaura’a.

Tē māuruuru nei au nō te parau a’o a tō’u metua vahine i te mau mahana ato’a « ’eiaha e fa’aea i te pure » i roto i tō’u ’ā’au. ’Ua taui rahi roa te reira i tō’u orara’a.