I te taime ’a hōro’a mai ai te ra’i i te i’a

’O Peteru Mamoe (Elder Birita) tō’u i’oa ’e tē hina’aro nei au e fa’a’ite atu i te hō’ē ’ā’amu ’o tei ha’api’i iā’u, e mea nāhea te Metua i te ao ra e pāhono i te mau pure—’eiaha noa nō tātou, nā roto rā ia tātou.

I te hō’ē mahana, fātata roa tā mātou vaira’a mā’a i te pau. E raiti tā mātou e vai ra, e ’aita rā te tahi atu mea. ’Ua tūturi au i roto i te pure ’e ’ua ani i te Metua i te ao ra ’ia hōro’a mai i te au ia mātou. Ma te ha’apāpūra’a, ’ua ani au i te i’a—hō’ē ’īna’i ’ōhie e fa’a’aihia rā tā mātou mā’a. ’Ua ti’aturi au ē e hōro’a mai ’oia, ’aita roa rā vau i ’ite e nāhea ’oia ’ia rave i te reira.

I muri a’e i taua mahana ra, ’a parahi noa ai au i mua i tō mātou fare, ’ua haere mai te hō’ē ta’ata ’e te hō’ē pute tei ’ī i te i’a. Tē tāmā ra tā’u vahine i te mau ’āu’a i pīha’i iho i te ’āua, i reira iho ’ua matara te pute ’e ’ua parare haere te mau i’a nā ni’a i te repo. ’Ia hi’ohia ’ua pe’ape’a roa te ta’ata, ’ua ’oi’oi rā tā’u vāhine i te hōro’a atu iāna te hō’ē pute ’āpī. Ma te māuruuru nō tōna [te vahine] maita’i, ’ua vaiiho atu te ta’ata i tā’u vahine ’ia ha’apa’o i te i’a ’a haere ai ’oia e ti’i i tōna mau taea’e nō te tauturu.

I te ho’ira’a mai te ta’ata, ’ua hōro’a mai ’oia i tā’u vahine e piti i’a rahi ’ei ha’amāuruurura’a. E ’oa’oa rahi tō mātou ! ’Eiaha noa e i’a tā mātou nō tā mātou tāmā’ara’a, ’ua nāva’i ato’a rā nō te ’ōpere atu. ’Ua ha’aputapūhia vau ’ia ’āfa’i atu i te tahi i’a nā te hō’ē hoa ’aita e rave nei i te ’ohipa, ’o tē tūtava nei i te fa’a’amu i tōna ’utuāfare. I te taera’a atu vau i tōna fare, ’ua ’ite atu vau tei te fare ma’i tāna vahine ’e te tamari’i, ’e tē pure nei ’oia nō te hō’ē rāve’a ’ia fa’atāmā’a ia rāua.

’Ua ’ī nā mata o tō’u hoa i te roimata ’a fa’ari’i ai ’oia i te i’a. ’Ua parau mai ’oia iā’u ē, ’ua fa’aineine a’ena tāna vāhine i te uru nō tā rātou tāmā’ara’a, i teienei rā e ’āmui atu rātou i te reira i te i’a. I muri iho, ’ua ha’api’i mai au ē ’ua ’ōpere tāna vahine i te i’a nā te hō’ē vahine ’ivi ’e tāna e piti tamari’i ma’i i te fare ma’i. ’Ua pure ato’a teie vahine ’ivi nō te mā’a, ’e ’ua pāhono mai te Atua i tāna pure nā roto mai i te maita’i o vetahi ’ē.

Ma te ferurira’a i teie ’āna’ira’a ’ohipa i tupu, ’ua ninahia vau e te here o te Metua i te ao ra. ’Aita noa ’oia i pāhono i tā’u pure nō te i’a, ’ua fa’a’ohipa ato’a rā ’oia iā’u nō te pāhono i te mau pure a tō’u hoa ’e a te vahine ’ivi. ’Ua riro ’ei ha’amana’ora’a pūai ē, tē ’ohipa pinepine nei te Atua nā roto ia tātou nō te ha’amaita’i ia veatahi ’ē. I roto i te mau parau a te Fa’aora, « o tei tu’uhia atu te mea rahi ra, e mea rahi ato’a te tītauhia atu » (Luka 12:48).

’Ua ha’api’i teie ’ohipa i tupu iā’u ē, ’aita te here o te Atua i tā’ōti’ahia i tō tātou mau hina’aro o te ta’ata. Tē hi’o nei ’oia i te tupura’a ’ohipa i roto i tōna tā’āto’ara’a ’e e fa’a’ohipa ia tātou mai te mau mauiha’a i roto i tōna rima nō te ha’amaita’i i tāna mau tamari’i. Mai te reira mahana, ’ua ha’amātau vau i te pure ’eiaha noa nō tō’u iho mau hina’aro, ’oia ato’a rā nō te mau hina’aro o te feiā e ha’a’ati nei iā’u. ’Ua hi’o vau e mea nāhea te Atua i te fa’ataui i te hō’ē pure ’ōhie—mai tā’u anira’a i te i’a—’e ma te taui i te reira ’ei temeio ’o tei ha’aputapū e rave rahi orara’a.

Tē fa’a’ite pāpū nei au ē, ’ua ta’a maita’i i te Metua i te ao ra ’e ’o Iesu Mesia i tō tātou mau ’ati ’e tō tātou mau hina’aro. Tē fa’aro’o nei rāua i tā tātou mau pure, ’e tē pāhono nei rāua i te reira ma te rāve’a ’ia ha’apūai i tō tātou fa’aro’o ’e ’ia ha’amaita’i ia vetahi ’ē. ’Ia vai ineine noa tātou nō te rave mai te au i te mau muhumuhura’a tā tātou e fa’ari’i, ma te ’ite ē e nehenehe tātou e riro ’ei mauiha’a i roto i te rima o te Atua nō te fa’a’ite i tōna here ’e tāna tīa’i-māite-ra’a i te feiā e ha’a’ati nei ia tātou.

Elder ’e te tuahine Birita e tāvini nei i teienei i te hō’ē misiōni feiā pa’ari i roto i te ’āma’a Nabeina, Nabeina apato’erau i Tarawa, Tarawa i te motu nō Kiribati.