Te hōpe’a hepetoma o te ’āfa misiōni tei taui i te mau mea ato’a.

’Aita vau i hina’aro e haere.

E mea ’ōhie roa. E 16 matahiti tō’u ’e tē paraparau nei te tā’āto’ara’a nō teie « hōpe’a hopetoma o te ’āfa misiōni » tei fa’atuphia e tā mātou titi. ’Aita vau e ’ite nei i te faufa’a. ’Aita vau i fa’anaho e tāvini i te hō’ē misiōni, ’aita i te reira taime, ’aita roa atu.

’Ua hina’aro mau tō’u māmā ’ia haere atu vau. ’Ua fa’aitoito mai tō’u feiā fa’atere iā’u. ’Ua parau mai rātou, « Tyra, e hō’ē noa hōpe’a hopetoma te reira ! » I te reira ato’a, ’aita i fa’a’ume iā’u. I te pō nā mua, ’ua ta’i au. ’Ua parau vau iā’u iho, « nō te aha vau i rave ai i te reira iā’u iho ? »

’Ua parau noa atu vau ’ē nō te ’ore e ha’ape’ape’a i te ta’ata. I roto rā i tō’u ’ā’au, ’ua tai’o a’ena vau i te hora e tae roa i te hope’a.

I te ha’amatara’a, e ’ere roa te reira i te mea ’ino. ’Ua ’āmui atu mātou i roto i te mau piha, te fa’a’ohipara’a i te ha’api’ira’a ’e ’o tei ’āpitihia atu i te mau misiōnare nō te mau tuha’a ’imira’a māite. Tē ha’amana’o nei au i te ferurira’a « nā reira, e nehenehe au e ore fa’ahou mai i te reira ». Tēra rā ’aita ā vau i fa’aō iā’u i te pae manava. ’Ua parau vau iā’u iho, « tei i’ō nei noa vau ’ia ’ore te ta’ata e ha’ape’ape’a mai iā’u ».

I muri iho tae mai nei te piti o te mahana.

’O te tuahine Fale tō’u hoa ’āpiti. ’Ua haere māua i te ’oire—i pīha’i noa i te fare tāpe’ara’a pere’o’o auahi o te fare ’oire - nō te fārereira’a nā ni’a i te purūmu. ’Ua pe’e au iāna ’a fa’aea ai ’oia ’e ’a paraparau ai i te hō’ē ta’ata nō te fa’anahora’a o te fa’aorara’a. ’Ua ti’a vau i pīha’i iho iāna, ma te ha’amā ’e te māmū, i te ferurira’a, « nāna teie ’ohipa, e ’ere nā’u ».

’Ua taui rā te tahi ’ohipa.

’Ua hi’o mai ’oia iā’u i rōpū i te ’āparaura’a ’e ’ua tā’iri’iri i te upo’o, e au ra nā’u te taime. ’Ua hāmama vau i tō’u vaha…, ’e ’ua matara noa mai tō’u ’itera’a pāpū ! ’Aita roa vau i feruri a’e i te mea tā’u i parau. ’Ua parau noa vau.

’E e mea pūai mau te Vārua.

’Ua ha’aputapū ’oia iā’u i te reira taime. E 16 matahiti tō’u, e ti’a ra i rōpū i te hō’ē purūmu māniania, e paraparau ra nō Iesu Mesia i te hō’ē ta’ata ’e’ē, ’e nō te taime mātāmua roa e rave rahi matahiti, e au ra iā’u tei reira vau i te vāhi mau e ti’a iā’u ’ia vai.

’Aita teie nīno’a mana’o i mo’e ’Ua ’āpiti mai te reira iā’u i te hōpe’a hepetoma tā’āto’a. I te taime ha’api’ira’a ato’a, i te pure pupu ato’a, i te ’āparaura’a ’evanelia ato’a ’e te mau ta’ata ’e’ē—’ua putapū vau mai te hō’ē ’ohipa ’ōroto iā’u e ara ra.

…’Ua ho’i au i te fare i taua hōpe’a hepetoma ra ma te tauihia.

’Aita vau i parau ’oi’oi i te reira i te tā’āto’ara’a, i roto rā i tō’u ’ā’au, ’ua ’ite au. ’Ua ha’amata vau i te haere nā muri i te mau tuahine rave tāmau i te hepetoma ato’a. ’Ua hina’aro vau ’ia putapū fa’ahou i taua Vārua ra—teie tumu o te ’ōpuara’a. ’Oia mau, ’ua ha’amata vau i te ’ohipa i ni’a i tā’u mau pu’e parau misiōni.

E 19 matahiti tō’u i teienei, i teie matahiti e 20 matahiti ïa. Tē ha’api’i nei au i te ti’a’aura’a nō te ’ōpuara’a nō te patura’a fare i te UTS ’e tē tāvini nei au ’ei ti’a’au nō te FAP i roto i tā’u pāroita. ’Ua ’āmui ato’a vau i roto i te ’āmuira’a 2025 nō te Ta’atira’a nō Auterāria o te ha’api’ira’a nō Patifita, ’e ’ua ha’api’i mai au i te fa’aō atu i tō’u fa’aro’o i tō’u tōro’a ’e i tā’u tā’ere’a, ’e tē ti’aturi nei i te tauturu ’ia fa’a’ite fa’ahou atu ā i tāna ’evanelia.

’Aita ā vau i haere atu ra i te misiōni—e haere rā vau. E mea ri’ari’a noa ā teie fa’aotira’a, e mea mo’a ato’a rā te reira. ’E i te mau mahana ato’a, ’ua tupu pūai noa tō’u ’itera’a pāpū.

Te taime ’a ’ite mau ai au i te reira—e aha te aura’a nō’u te ’āfa misiōni—i te taime ’a ho’i ai au i te fare, ’o vau ana’e, i te pāpa’ira’a i roto i tā’u buka ’ā’amu. ’Ua ha’amata vau i te ta’i. ’Ua putapū hōhunu roa vau i te Vārua. I reira tō’u ’itera’a ē, te mau heheura’a tā’u i fa’ari’i e mea mau ïa. ’Ua paraparau mai ’oia iā’u. ’E ’ua fa’aro’o atu vau iāna.

’Ua ’ite au ē te mau mea ato’a tā’u i nehenehe e rave—te manuia ato’a, te ta’ahira’a i mua ato’a—nō tāna ïa tāra’ehara ’e nō tōna here. Tē ti’aturi nei au ē e riro vau ’ei hō’ē pou nō te tīa’ira’a nō vetahi ’ē, nō te mea ’ua ha’aputapū ’oia i tō’u orara’a. E nō reira, hau atu i te mau mea ato’a, e hina’aro vau e tāvini.