’Ia taui ana’e te Atua i te ’oto ’ei ’oa’oa

’O Le Van N’gon Yolann tō’u i’oa. E 14 matahiti tō’u, te matahiapo i roto i tō’u ’utuāfare. E hō’ē teina tō’u ’e hō’ē tuahine iti ’o tei pohe i te hō’ē ’e te ’āfara’a o tōna matahiti i te hō’ē ma’i fifi rahi.

Hou te fānaura’a o tō’u tuahine iti, ’ua fa’aara mai te mau taote ia mātou ē, e ma’i māfatu tupu ’ē tōna ’e e ora noa mai ’oia nō te tahi tau hora noa. Ma te fa’aro’ora’a i teie parau ’āpī, ’ua tūturi au ’e tō’u ’utuāfare nō te pure, ma te ani i te Fatu ’ia nehenehe ia mātou e tāpe’a ri’i a’e mai iāna mā’a taime roa ri’i. I te mau pō ato’a, ’ua tāmau noa mātou i te rave i teie ā anira’a.

I te 13 nō Fepuāre, ’ua fānau mai tō’u māmā i tō’u tuahine iti. ’Ua tere te mau hora, ’e tē vai noa ra ’oia ia mātou ra. ’Ua tere te mau mahana ’e te mau hepetoma, ’ua vai noa ’oia i pīha’i iho ia mātou. ’Aita te mau taote i ’ite e nāhea i te fa’ata’a mai i teie temeio.

I te roara’a e 18 ’āva’e, ’ua hōpoi mai tō’u tuahine iti i te ’oa’oa rahi i tō mātou ’utuāfare. ’Ua poihere mātou i te mahana tāta’itahi ’a pārahi mai ai ’oia ia mātou ra.

I muri iho, i te 28 nō ’Ātete 2020, ’ua pohe tō’u tuahine iti. ’Ua ano-roa-hia vau—’ua māuiui rahi roa tō’u māfatu, ’e ’aita roa vau e hina’aro e fa’ari’i i tōna pohera’a. ’Aita roa vau i hina’aro e fa’a’ite i te ta’ata i tō’u māuiui rahi, ’aita ato’a e parau i te mea tā’u e putapū nei.

’Ua tītauhia iā’u i te taime nō te hāro’aro’a, ma te mārū noa rā ’ua ha’amata vau i te hi’o ē, ’ua pāhono te Fatu i tā mātou mau pure ’Ua hōro’a mai ’oia ia mātou teie tao’a rahi 18 ’āva’e—hau atu i te taime tā te mau taote i parau mai ia mātou. ’E i muri iho te tahi atu ’ohipa hau atu i te fa’ahiahia tei tupu.

I te 28 nō ’Ātete 2022—piti mātahiti pāpū maita’i i muri a’e te pohera’a tō’u tuahine iti—’ua bāpetizohia tō’u pāpā. ’Ua ’oa’oa roa vau i te ravera’a ’oia i teie fa’aotira’a, i muri a’e i te rirora’a ’ei hoa nō te ’Ēkālesia e 15 matahiti te roa. ’Ua putapū roa tōna ’ā’au i te hi’ora’a i te temeio nō te orara’a o tō’u tuahine iti. ’Ua ti’a iāna i te taui i teie tai’o mahana māuiui rahi—te 28 nō ’Ātete—’ei mahana ’oa’oa nō tō mātou ’utuāfare.

I teie mahana, tē fa’aineine nei tō’u nā metua, tō’u teina ’e ’o vau nei nō te tomo i roto i te fare o te Fatu, ’ia tā’atihia mātou ’e tō’u tuahine iti ’e ’ia riro ’ei ’utuāfare mure ’ore. ’Ua māramarama vau i teienei ē e ’ere te pohera’a o tō’u tuahine iti i te hope’a—’o te ha’amatara’a rā o tō mātou tere i te ao mure ’ore.

’Ua ’ite au tē ora nei te Atua ’e nā roto i tāna Tamaiti ’o Iesu Mesia, e nehenehe tātou pā’āto’a e ha’apūaihia i roto i te mau ’ati ’e te mau tāmatara’a tā tātou e fa’aruru nei (Philipi 4:13).