Лиахона
Хаа дуудсан ч би явах болно
2026 оны 1-р сарын Лиахона

“Хаа дуудсан ч би явах болно,” Лиахона, 2026 оны 1-р сар

Газар бүрийн гэгээнтнүүд

Хаа дуудсан ч би явах болно

Скотт Хэйлс

Сүмийн түүхийн хэлтэс

Тэрээр гэр орноо орхин, сэргээгдсэн сайн мэдээг номлохоор далайг гаталж, гэрээндээ үнэнч байсаар 26 насандаа өөд болжээ.

Эмма Пурсэлл болон бусад номлогчийн гэрэл зураг

Эмма Пурсэлл (эхний эгнээнд) болон Самоа номлолын бусад номлогч, 1902 оны 10-р сар

1901 оны 5-р сарын 5-нд 17 настай Эмма Пурсэлл Самоад үйлчлэх номлолын дуудлага хүлээн авав. Тэрээр ерөнхийлөгч Лорэнзо Снөүд бичсэн захидалдаа “Миний хичээл зүтгэл бүр Их Эзэний ажлыг урагшлуулахад зориулагдах болно гэдгийг би батлан хэлж байна” гээд цааш нь: “Би хэзээ ч, хаана ч боломж олдох бүрийд сайн мэдээний зарчмуудыг үргэлж баяртайяа хамгаална” гэж амлажээ.

Номлолд үйлчлэхээр бэлтгэж байхдаа Эммад өөрийг нь юу хүлээж байгаа талаар төсөөлөл ч байсангүй. Тэр бусад номлогчдоосоо өвөрмөц нэгэн байсан. Сүм дөнгөж гурван жилийн өмнөөс ганц бие эмэгтэйчүүдийг бүрэн цагийн номлогчоор дуудаж эхлээд байв. Тухайн үед тэр номлолд дуудагдсан хамгийн залуу номлогч байлаа.

Мөн тэрээр бүрэн цагийн номлолд үйлчлэх болсон анхны самоа эмэгтэй байсан юм. Хэдийгээр тэр Солт Лэйк Ситид амьдардаг байсан ч Самоагийн Уполу арлын зүүн үзүүрт орших Малаэла тосгонд төржээ. 12 настайдаа тэр гэр орон, гэр бүлээ орхин, 8047 км-ийн зайд орших Юта руу сургуульд сурахаар явсан.

Таван жилийн дараа Самоа руу буцах болсон нь Эммагийн хувьд сэтгэл догдлуулам бас түгшмээр байсан нь гарцаагүй. Тэр өөрийгөө сүнслэг байдлын хувьд бэлтгэхийн тулд Солт Лэйкийн ариун сүмд хишгээ хүртжээ. Өнөөгийн номлогчдын адил тэр Бурхантай ариун нандин гэрээнүүд байгуулж, итгэлтэй байдлаараа дамжуулан адислагдана гэсэн амлалтыг хүлээн авсан юм.

Мөн түүний түүхээс Их Эзэнд үйлчлэхдээ тэдгээр гэрээгээ сахихын тулд чадах бүхнээ хийснийг харж болно.

Уполугаас Юта руу явж, буцаж ирсэн нь

Эмма 1883 оны 6-р сарын 26-нд Вилиаму, Матафуа Пурсэлл хоёрын долоо дахь хүүхэд болон мэндэлжээ. Түүний гэр бүл Малаэла болон үүний ойролцоо амьдардаг цөөхөн евронез (хагас европ, хагас полинез) гэр бүлийн нэг байв. Ээж нь Уполугийн баруун хойд зүгт орших Саваи арлаас гаралтай аж. Түүний аав 1834 оны үед Самоад ирж, самоа эмэгтэйтэй гэрлэж, Малаэлад суурьшсан англи хүний хүү байжээ.

Өөрсдийн охин мэт үзэж ханддаг байсан хожмын үеийн гэгээнтэн хос Жон, Нанави Розэнквист хоёртой хамт амьдарч байхдаа Эмма сэргээгдсэн сайн мэдээний тухай анх олж мэдсэн байж мэдэх юм. 1895 оны 11-р сарын 3-нд тэрээр 12 настайдаа баптисм хүртжээ. Уг ёслолд оролцсон нэгэн номлогч баптисмын үед сүнсийг хүчтэй мэдэрснээ гэрчилсэн байдаг.

Хэдэн сарын дараа Самоагийн номлолын ерөнхийлөгч Жон В.Бэк Эмма болон бусад самоа хүүхдүүдийг сургуульд сургахаар Юта руу явуулах зөвшөөрлийг Тэргүүн зөвлөлөөс хүлээн авчээ. Эмма ерөнхийлөгч Бэк болон бусад номлогчийн хамт Уполугийн төв боомт Апиагаас 1896 оны 4-р сарын 23-нд хөдлөв. Төрсөн эцэг, эх нь түүнийг явахыг зөвшөөрсөн ч нулимс дуслуулан үдэн гаргажээ.

Эмма уурын усан онгоцоор болон төмөр замаар зорчиж, Солт Лэйк Ситид хүрэх гэж бараг гурван долоо хоног зарцуулав. Энэ хот Уполу дахь тосгоноос нь хавьгүй том, гудамжнууд нь хөл хөдөлгөөн ихтэй, дасал болоогүй дуу чимээ ихтэй байсан болохоор тэрээр цочирдсон нь гарцаагүй. Тэр үед Ютад полинез оршин суугчид харьцангуй цөөхөн байдаг байжээ. Ихэнхдээ тэр өөртэй нь адил төрхтэй хэн нэгнийг бараг олж хардаггүй байв.

Эмма Ютад Солт Лэйк Ситигийн 13-р тойрогт амьдарч, Сүмийн эзэмшдэг сургуульд сайн боловсрол эзэмшиж, Самоа номлолоос буцаж ирсэн номлогчидтой холбоотой байдаг байлаа. Бишоп нь түүний чадавхыг бүр эртнээс олж хараад эх орондоо номлолд үйлчлэхээр бэлтгэхийг зөвлөжээ.

Эмма түүний үгийг чин сэтгэлээсээ хүлээн авч, 1901 оны эхээр дуудлага нь ирэхэд тэр бэлэн болсон байв.

Малаэлад үйлчилсэн нь

1901 оны 7-р сарын 25-нд Уполуд буцаж ирэхдээ Эмма боомтын зогсоол дээр хүлээж байгаа аавыгаа хараад баярлажээ. Гэрээсээ яваад Эмма самоа хэлээр чөлөөтэй ярьж чадахаа больсон байв. Харин нэгэн цуглаан дээр түүнээс хаалтын залбирал хэлэхийг хүсэхэд Сүнс түүнд сүнслэгээр нөлөөлж, тэр төрөлх хэлээрээ залбирчээ.

Эмма өөрийн төрсөн нутаг Малаэлад үйлчлэхээр томилогдсон ба Сүм тэнд 1896 оноос хойш сургууль ажиллуулж байв. Эмма эмэгтэй суралцагчдад заах ажлыг хариуцах болжээ. Тэр бас Малаэла салбарын Залуу эмэгтэйчүүдийн хамтын хөгжлийн холбоо буюу одоогийн Залуу эмэгтэйчүүдийн ангийг удирдаж байв. Тэр ням гарагт бас долоо хоногийн турш бусад номлогчтой мөр зэрэгцэн номлож, заадаг байлаа.

Эхэндээ арал дээрх Эммагийн гэр бүлийн зарим гишүүн түүний ажлыг эсэргүүцэж, Сүмийг орхихыг ятгадаг байж. Номлолын ерөнхийлөгч Виллиам Г.Сийрсийн хэлснээр, Эмма эсэргүүцлийг үл хайхран “сонголтоо хамгаалж,” гэрээгээ сахихаар эргэлт буцалтгүй шийдсэн байв.

Бас тэр бусад номлогчтой хэрхэн харьцахаа мэддэг байв. Нэг удаа өглөөний цайны үеэр хоёр ахлагч наргиан болгож түүний уух гэж байсан наргил модны самрын шүүсийг усаар сольжээ. Энэ тоглоом шоглоом Эммагийн “урмыг хугалсан” ч тэрээр элсэн чихрийн оронд давсаар бүрсэн наргил модны самраар ахлагчдыг дайлж хариу барьсан гэдэг.

Иймэрхүү тоглоом шоглоомыг эс тооцвол, номлогчид “Пурсэлл эгчийг” ихэд хүндэлдэг байв. Нэгэн номлогч түүнийг “үүргийнхээ ба дуудлагынхаа сүнсээр дүүрэн” байгааг анзаарчээ. Өөр нэг ахлагч түүний сайхан сэтгэлд талархаж захидал бичсэн байдаг. Эмма нэг удаа замын хажууд хэдэн гадил үлдээж явсны ачаар уг ахлагч хамтрагчтайгаа хамт тэдгээрийг идэн замдаа өлсөөгүй аж.

Тэрээр санваарын эрх мэдэл, Мормоны Ном, сайн мэдээний бусад сэдвээр номлож байсныг баримтууд харуулдаг. Иосеф Смитийн амьдрал, номлолын талаар Эммагийн заахыг сонссон нэгэн номлогч “Түүний хэлсэн үгс надад үнэхээр таалагдсан бөгөөд ярьж дуусахад нь би харамссан” гэж бичжээ.

Харамсалтай нь Эмма номлолынхоо төгсгөлд зааны хөл өвчнөөр өвчилж, хугацаанаасаа өмнө чөлөөлөгдсөн байна. Сургуулийн эмэгтэйчүүд, охид түүнийг Юта руу буцаж байгааг дуулаад уйлцгаасан гэдэг. Малаэла салбар сургаалыг сүүлийн удаа номлох боломжийг түүнд олгож үдэлтийн цуглаан зохион байгуулжээ. Тэрээр “итгэл төгс ярьж, сайн мэдээнд үнэнч байхыг бүгдэд ухуулсан” нь цуглааны тэмдэглэлд үлдсэн байдаг.

Үнэнч үйлчлэлийн өв

Эмма амьдралынхаа үлдсэн хугацаанд сайн мэдээнд болон гэрээнүүддээ үнэнч хэвээр үлдсэн юм. Ютад буцаж очоод тэрээр үргэлжлүүлэн боловсрол эзэмшиж, муж дахь Полинезийн нийгэмлэгийн ажилд оролцож, самоа хэл дээрх анхны хожмын үеийн гэгээнтнүүдийн дууллыг гаргахад зөвлөхөөр ажиллаж байжээ. Тэр бас Хэнри Кахалэману гэдэг хавай гаралтай гэгээнтэнтэй танилцан, түүнтэй 1907 оны 1-р сарын 31-нд Солт Лэйкийн ариун сүмд гэрлэсэн байна.

Гурван жилийн дараа Эмма 26 насандаа өөд болсон ба түүнийг Солт Лэйк Ситигээс баруун тийш 97 км зайд орших полинез гэгээнтнүүдийн суурин Иосэпад оршуулжээ. Түүний амьдрал богинохон байсан ч Есүс Христийн сэргээгдсэн сайн мэдээнд үнэнч байсан нь дэлхий даяарх гэгээнтнүүдэд, ялангуяа өнөөдөр ч үйлчлэх дуудлагад хариулж байгаа залуу эмэгтэйчүүдэд хүчирхэг үлгэр жишээ болон үлдсэн юм.

Эх сурвалж

  1. Лорэнзо Снөүд бичсэн Эмма Пурсэллийн захидал, 1901 оны 5-р сарын 5, First Presidency missionary calls and recommendations, 1877–1918, Солт Лэйк Сити, Сүмийн түүхийн номын сан

  2. Матью Макбрайд, “‘Female Brethren’: Gender Dynamics in a Newly Integrated Missionary Force, 1898–1915,” Journal of Mormon History, 44-р боть, д. 4 (2018 оны 10-р сар), 40-67-г үзнэ үү.

  3. Олонд танигдсан эмэгтэй номлогчдын жагсаалтыг үзнэ үү, Susa Young Gates хэвлэл, ойролцоогоор 1870–1933, 6–9, Сүмийн түүхийн номын сан.

  4. Эмма Пурсэлл номлогчийн угийн бичгийн маягт, Missionary Department missionary papers, 1888–1928, Сүмийн түүхийн номын сан; Виллиам Г.Сийрсийн тэмдэглэл, 1901 оны 7-р сарын 6, 25, Сүмийн түүхийн номын сан; “In Far Samoa,” Juvenile Instructor, 1902 оны 12-р сарын 15, 759–760-ыг тус тус үзнэ үү.

  5. Salt Lake Temple, Endowments of the Living, 1893–1956 (бичил хальс), 0,184,068, х. 41, Солт Лэйк хот дахь FamilySearch номын сан; Виллиам Г.Сийрсийн тэмдэглэл, 1901 оны 7-р сарын 25-ыг тус тус үзнэ үү.

  6. Жэймс Э.Талмэйж, The House of the Lord: A Study of Holy Sanctuaries Ancient and Modern (1912), х. 100-г үзнэ үү.

  7. FamilySearch.org, Samoa, baptisms, 1863–1940 дахь “Register of British Subjects Residing in the Samoa Islands,” 209–211-ийг үзнэ үү. Малаэла дахь евронез гэр бүлүүдэд Вилиаму ба Матафуа Пурсэлл, Томас Пурсэлл, Жон ба Нанави Розэнквист нарын гэр бүлүүд ордог.

  8. Эдвард Нэд Пурсэллийн нас барсан тухай мэдэгдэл болон эмгэнэлийг Samoa Times and South Sea Gazette, 1879 оны 6-р сарын 28, 2-оос үзнэ үү.

  9. Жөүсэф Квиннийн тэмдэглэл, 1895 оны 9-р сарын 17 ба 11-р сарын 3, Сүмийн түүхийн номын сангаас үзнэ үү.

  10. Эмма Пурсэлл номлогчийн угийн бичгийн маягт; Жөүсэф Квиннийгийн тэмдэглэл, 1895 оны 11-р сарын 3-ыг үзнэ үү.

  11. Жон В.Бэкийн Тэргүүн зөвлөлд бичсэн захидал, 1896 оны 2-р сарын 25, Сүмийн түүхийн номын сан; Samoa Mission general minutes, 1888–1970 дахь “Samoa Mission Historical Record,” боть 3, 1892–1896, 1896 оны 4-р сарын 18, Сүмийн түүхийн номын сангаас тус тус үзнэ үү.

  12. “Samoan Mission Historical Record,” боть 3, 1892–1896, 1896 оны 4-р сарын 23; Жөүсэф Квиннийгийн тэмдэглэл, 1896 оны 4-р сарын 23-ыг тус тус үзнэ үү.

  13. Эмма Солт Лэйк Ситид 1896 оны 5-р сарын 12-нд иржээ (Жөүсэф Х.Дийнийн тэмдэглэл, 1896 оны 5-р сарын 12–13, Сүмийн түүхийн номын сан).

  14. Missionary Department missionary registers, 1860–1959, 1901 оны 6-р сарын 14, боть С, хуудас 143, мөр 204, Сүмийн түүхийн номын сан; “In Far Samoa,” 759; “Ward Entertainments,” Salt Lake Tribune 759; 1901 оны 6-р сарын 5

  15. 1901 оны 5-р сарын 5-нд Лорэнзо Снөүд бичсэн Эмма Пурсэллийн захидлыг үзнэ үү.

  16. Чарлз Ворникийн тэмдэглэл, 1901 оны 7-р сарын 25; Виллиам Г.Сийрсийн тэмдэглэл, 1901 оны 7-р сарын 25-ыг Сүмийн түүхийн номын сангаас үзнэ үү.

  17. Виллиам Т.Огдэны тэмдэглэл, 1901 оны 7-р сарын 8, Сүмийн түүхийн номын сангаас үзнэ үү.

  18. Виллиам Г.Сийрсийн тэмдэглэл, 1901 оны 8-р сарын 9; “Some Samoan Sunday Schools,” Juvenile Instructor, 1901 оны 9-р сарын 1, 524-ийг үзнэ үү.

  19. Вилфорд В.Эмэригийн тэмдэглэл, 1902 оны 3-р сарын 19, Сүмийн түүхийн номын сангаас үзнэ үү.

  20. Malaela Branch general minutes, 1897–1969, 1903 оны 1-р сарын 28-аас 6-р сарын 3-ны өдөр, Сүмийн түүхийн номын сангаас үзнэ үү.

  21. Эмма Пурсэллийн заасан зүйлсийг Malaela Branch general minutes, 1897–1969 болон Вилфорд В.Эмэригийн тэмдэглэлээс харж болно.

  22. Виллиам Г.Сийрсийн тэмдэглэл, 1901 оны 7-р сарын 30-аас 8-р сарын 3, 8-р сарын 8-ыг үзнэ үү.

  23. Вилфорд В.Эмэригийн тэмдэглэл, 1902 оны 4-р сарын 1-ийг үзнэ үү.

  24. Виллиам Т.Огдэний тэмдэглэл, 1901 оны 7-р сарын 5-ыг үзнэ үү.

  25. Вилфорд В.Эмэригийн тэмдэглэл, 1902 оны 8-р сарын 31-ийг үзнэ үү.

  26. Malaela Branch general minutes, 1897–1969, 1903 оны 2-р сарын 5, 15, 19, 26; 1903 оны 3-р сарын 8 ба 15; 1903 оны 4-р сарын 16, 26; 1903 оны 5-р сарын 10-ыг тус тус үзнэ үү.

  27. Вилфорд В.Эмэригийн тэмдэглэл, 1903 оны 2-р сарын 26-г үзнэ үү.

  28. Вилфорд В.Эмэригийн тэмдэглэл, 1903 оны 2-р сарын 25; Мартин Ф. Сандэрсийн Иосеф Ф. Смитэд бичсэн захидал, 1903 оны 3-р сарын 29, Сүмийн түүхийн номын сан; Malaela Branch general minutes, 1897–1969, 1903 оны 2-р сарын 25-ыг үзнэ үү.

  29. Malaela Branch general minutes, 1897–1969, 1903 оны 6-р сарын 17, 19-ийг үзнэ үү.

  30. Malaela Branch general minutesл, 1897–1969, 1903 оны 6-р сарын 18

  31. “The Sophomores,” The Gold and Blue, Oct. 23, 1905, 12; “Maoris Cook in Native Fashion,” Salt Lake Tribune, Aug. 29, 1906, 12; “Ward Entertainments,” Deseret News, Mar. 30, 1905, 5; Ф.Юүжини Моррисын Тэргүүн зөвлөлд илгээсэн захидал, 1903 оны 10-р сарын 16, захидал (Мартин Ф. Сандэрс), 1903 оны 8-р сараас 12-р сар, Сүмийн түүхийн номын сан; “Kaysville Kinks,” Davis County Clipper, Aug. 14, 1903, 1-ийг тус тус үзнэ үү.

  32. Хэнри Кахалэману, Эмма Эстэр Пурсэлл нарын гэрлэлтийн гэрчилгээ, 1907 оны 1-р сарын 31, Юта, Солт Лэйк, Америкийн Нэгдсэн Улсын бүртгэл, FamilySearch.org-оос үзнэ үү. FamilySearch-д 1907 оны 1-р сарын 31-нийг Эмма, Хэнри хоёрын “эхнэр буюу нөхөртэйгөө лацдан холбогдох” өдөр болгон жагсаалтад оруулсан байгааг анхаараарай.

  33. “Эмма Эстэр Пурсэлл,” Church History Biographical Database, history.churchofjesuschrist.org/chd-ыг үзнэ үү.