Paghinumdom ni Presidente Nelson

Duha ka adlaw human matapos ang kinatibuk-ang komperensiya, ang mga lider sa Simbahan ug mga sakop sa pamilya midayeg ni Presidente Russell M. Nelson isip usa ka mahigugmaong amahan ug bana, mahal nga higala, mahalaron nga disipulo ni Ginoong Jesukristo, ug dinasig nga propeta sa Dios.

Ang kinabuhi ni Presidente Nelson “nagsaksi sa iyang mapasaligon nga pagpamatuod isip usa ka propeta ug sulugoon ni Ginoong Jesukristo,” matod ni Presidente Dallin H. Oaks atol sa seremonya sa haya alang ni Presidente Nelson niadtong Oktubre 7, 2025, diha sa Conference Center. Si Presidente Oaks mitawag ni Presidente Nelson, kinsa malinawon nga namatay sa balay niadtong Septiyembre 27, 2025, “ang akong suod nga higala ug labing epektibo nga magtutudlo.”

Si Presidente Oaks mitawag usab ni Presidente Nelson “usa sa labing gamhanan nga mga misyonaryo sa Israel nga naglihok.” Miingon siya, “Ang iyang pahiyom, ang kadasig sa iyang tingog, ug ang gahom sa iyang presensya milukmay og mga kasingkasing” sa mga lider sa nasod ug tinuohan.

Si Presidente Oaks ug lima ka laing mamumulong mipasidungog ni Presidente Nelson alang sa iyang gugma, pagserbisyo, ug dedikasyon ngadto ni Ginoong Jesukristo ug sa mga anak sa Dios sa tibuok kalibotan.

Uban sa laing mga mamumulong, nagpasalamat siya ni Sister Wendy Watson Nelson sa pag-atiman ug sa pagsuporta ni Presidente Nelson atol sa ilang 19 ka tuig nga kaminyoon. Mipadayag usab siya og pasalamat ngadto sa kanhi asawa ni Presidente Nelson, si Dantzel White Nelson, ug sa ilang 10 ka anak alang sa ilang pagkamatinud-anon sa “unsay iyang gisangyaw ug gipuy-an.”

Si Elder Henry B. Eyring, kinsa nagserbisyo uban ni Presidente Oaks ug ni Presidente Nelson sa Unang Kapangulohan, mipamatuod sa mapanagnaong tawag ni Presidente Nelson ug sa iyang abillidad ug tinguha sa pagpanalangin sa uban.

“Samtang nagserbisyo ko sa iyang kiliran diha sa Unang Kapangulohan, sugod Sa Enero 2018, nahimo kong personal nga saksi sa kamatuoran nga ang Ginoo nagdasig sa iyang propeta,” miingon si Elder Eyring. “Mapasalamaton ko nga nakaila ni Presidente Russell M. Nelson.”

Sa ilang mga pakigpulong sila si Elder Jeffrey R. Holland sa Korum sa Napulog Duha ka Apostoles ug si Presidente Camille N. Johnson, Kinatibuk-ang Presidente sa Relief Society, midayeg ni Presidente Nelson sa iyang kanunay nga pagkamabination ngadto sa mga tawo diha sa sulod ug gawas sa Simbahan.

“Nakabaton og oportunidad sa pagkakita niya nga nahigugma sa mga tawo ug ang mga tawo nahigugma kaniya nakahimo sa labing maanindot nga mga handoman,” miingon si Elder Holland. Nahinumdom siya ni Presidente Nelson isip “ang tighupay ug tig-awhag sa mga kasingkasing.”

Si Presidente Johnson midugang, “Si Presidente Nelson sa tinuod miusab sa kalibotan pinaagi sa pag-impluwensya sa usa ka tawo sa usa ka higayon, ug siya midapit nato sa pagbuhat sa ingon pinaagi sa paggamit sa gahom sa Dios isip mga babaye ug mga lalaki sa pakigsaad.”

Duha sa anak ni Presidente Nelson, sila si Laurie N. Marsh ug Russell M. Nelson Jr., miingon nga ang ilang amahan nagpuyo nga malipayon tungod kay gisentro niya ang iyang kinabuhi diha sa Manluluwas nga si Jesukristo ug mihatag og prayoridad sa pagpangalagad sa uban.

“Kami gipadako sa usa ka panimalay nga nakasentro sa Manluluwas ug puno sa kalipay,” miingon si Sister Marsh. Miingon siya nga ang tumong sa pamilya mao ang mahangtorong pamilya.

Midugang si Brother Nelson nga ang iyang amahan nagkugi sa iyang pagserbisyo. “Si Presidente Nelson nagpakita nato pinaagi sa personal nga ehemplo nga walay ‘pagpahulay’ sa iyang bersyon sa Pagpahiuli.” Miingon siya sa dihang gitawag sa pagpangulo sa Simbahan, ang iyang amahan nanumpa nga moserbisyo sa Amahan ug sa Anak hangtod sa adlaw sa iyang kamatayon. “Gibuhat gayod niya kana.”

Si Marjorie N. Lowder ug si Gloria N. Irion, mga anak nga babaye ni Presidente Nelson, mihalad og mga pag-ampo diha sa tulumanon. Ang The Tabernacle Choir at Temple Square midalit sa musika.

Ang lubong ni Presidente Nelson misunod dayon human sa pagdayeg nga gihimo agi og pasidungog kaniya niadtong Oktubre 1 ug sibya gikan sa Tabernacle sa Temple Square. Si Presidente Oaks, sila si Elder Holland ug Eyring, Tigdumalang Bishop Gérald Caussé, Elder Carl B. Cook sa Kapangulohan sa Seventy, ug Kinatibuk-ang Presidente sa Primary nga si Susan H. Porter mihalad og mga pagdayeg, mipakigbahin og malumo nga personal nga mga kasinatian uban ni Presidente Nelson ug sa ilang mga pagbati mahitungod sa iyang sulundon nga kinabuhi, sama kang Kristo nga pangalagad, ug dinasig nga mga pagtulun-an.

Sa iyang pagdayeg, si Presidente Oaks mitawag ni Presidente Nelson nga “usa ka propeta sa gugma” kinsa “misangyaw sa ebanghelyo sa gugma.”

Alang sa dugang pa mahitungod sa kinabuhi ug pangalagad ni Presidente Nelson, tan-awa sa Sa Paghandom: Presidente Russell M. Nelson, 1924–2025, nga gimantala sa Nobiyembre 2025 nga mga magasin sa Simbahan.