Presidente Russell M. Nelson: Propeta ug Apostol

Hugot nga Pagtuo sa Batan-ong Edad

Natawo si Russell M. Nelson sa Siyudad sa Salt Lake , Utah, USA, sa Septiyembre 9, 1924, ngadto ni Marion C. ug Edna Anderson Nelson. Miingon si Presidente Nelson kabahin sa iyang mga ginikanan: Gihimo nila ang gugma nga labaw nga impluwensya sa ilang panimalay. … Nag-uban kami sa pagbasa, nag-uban sa pag-awit, nag-uban sa pagdula, ug nag-uban sa pagtrabaho.”

Ang Nelson nga panimalay usa ka malipayon, mahigugmaon, matinabangong lugar. Ang edukasyon importante kaayo ngadto ni Marion ug ni Edna. Miingon si Presidente Nelson: “Sila andam sa paghimo bisan unsa nga mga sakripisyo nga gikinahanglan sa pagtabang kanamong mga anak sa pagkab-ot niana nga among gipangandoy nga mahimo ang among kaugalingon. … Wala ang ilang pag-awhag ug hingpit nga pasalig sa ka-importante sa edukasyon ug serbisyo, ang akong kinabuhi samtang kini nagpadayon dili gayod unta mahimong mao.”

Bisan tuod og ang mga ginikanan ni Russell misuporta sa iyang mga kalihokan diha sa Simbahan sila mas aktibo diha sa komunidad kay sa Simbahan. Ang batan-ong Russell naguol nga ang iyang pamilya mahimong dili gayod maselyo nga mag-uban. Bisan pa niana, siya may pagsalig nga ang Ginoo motubag sa iyang mga pag-ampo alang sa iyang pamilya. Ug human sa daghang mga katuigan, kini nahimong gitubag. Sa Marso 26, 1977, si Marion ug si Edna ug ang ilang mga anak naselyo diha sa Provo Utah Temple. Miingon si Presidente Nelson nga kini mao ang labing dako nga gasa nga gihatag sukad sa iyang mga ginikanan sa ilang pamilya.

Sa dihang batan-on pa si Russell, mihukom siya sa pagtuon og medisina. Gusto niya nga magsiksik sa wala mahibaloi, ug gusto niya ang pagserbisyo sa katawhan. Sa paghinumdom niini nga desisyon, siya miingon: “Ako nangatarongan nga ang labing nindot nga karera nga maanaa sa usa ka tawo mao kanang mahimo nga usa ka inahan. … Ang ikaduhang trabaho mao ang medisina. Diha ako makatabang sa mga tawo kada adlaw ug makatudlo kanila.”

Busa human sa paggradwar gikan sa hayiskol sa 1941, si Russell misugod og mga pagpangandam nga mga pagtuon sa medisina [premedical studies] diha sa University of Utah. Tungod sa kawalay kasigurohan nga naglibot sa Ikaduhang Gubat sa Kalibotan, gitingob ni Russell ang upat ka tuig sa pagtuon ngadto sa tulo. Nagkapuliki gayod og maayo siya sa pag-eskwela apan sa gihapon mihatag og panahon nga mahiapil sa mga dula ug ubang sosyal nga mga panghitabo. Pinaagi niining usa sa mga dula nga iyang gikahimamat ang batan-ong babaye kinsa sa kaulahian nahimo niyang asawa. Sa dihang una niyang nakita si Dantzel White nga nagbansay sa entablado, nangutana siya, “Kinsa kanang matahom nga babaye nga nag-awit sa ibabaw?”

Sa Agosto 31, 1945, si Russell ug Dantzel nagpakasal sa Salt Lake Temple. “Kini tataw nga mao lamang ang labing importante nga butang nga akong nahimo sukad,” siya namalandong sa 1982. “Siya nakahatag kanako ug panag-uban, napulo ka matahom nga mga anak, ug tanan niadtong talagsaong dili makita nga mga butang nga ikahatag sa asawa ngadto sa usa ka bana sa pagtabang kaniya sa pagpaningkamot alang sa katumanan ug pagkadili hakog.”

Sa panahon nga iyang nadawat ang iyang bachelor’s degree sa Hunyo 1945, si Russell andam na kaayo ngadto sa iyang unang tuig sa medikal nga eskwelahan, ug iyang nakompleto ang upat ka tuig nga medikal nga kurso sulod sa tulo ka tuig. Sa Agusto 1947, sa edad nga 22, iyang nakab-ot ang medikal nga degree uban sa labing taas nga mga pasidungog.

Nagasunod sa Balaang mga Balaod

Human si Dr. Nelson migradwar sa medikal nga eskwelahan, siya ug si Dantzel mibalhin ngadto sa Minnesota, USA. Didto mipasakop siya sa usa ka team sa pagsiksik sa pagpalambo og artipisyal nga makina sa kasingkasing-ba-ga. Gidisenyo sa team ug gitukod ang matag bahin niini sa ilang mga kaugalingon.

Sa iyang tibuok nga pagsiksik si Dr. Nelson naawhag pinaagi sa iyang pagsabot sa pagsunod sa balaang balaod. Nahibalo siya nga “tanang gingharian adunay balaod nga gihatag” (Doktrina ug mga Pakigsaad 88:36) ug nga kini milakip “gani sa panalangin sa pinitik sa kasingkasing.” Kon ang iyang team makasabot niadto nga mga balaod, sila makagamit niini sa pagpanalangin niadtong kinsa masakiton.

“Ngari kanako kini nangahulogan nga kon kita nagtrabaho, nagtuon, ug mangutana sa angay nga mga pangutana sa atong syentipiko nga mga eksperimento, makakat-on kita sa mga balaod nga nagdumala sa pinitik sa kasingkasing. Karon, nakakat-on sa pipila niadtong mga balaod, kita nahibalo nga kita makapahunong sa pinitik sa kasingkasing, makapahigayon og delikado nga mga pag-ayo diha sa nadaot nga mga balbula o mga ugat, ug dayon papitikon ang kasingkasing pag-usab.”

Human sa iyang trabaho sa makina sa kasingkasing-ba-ga, si Dr. Nelson mipadayon sa pagsiksik og mga paagi sa pagpalambo sa operasyon sa pagbukas sa dughan sa pag-opera sa kasingkasing. Sa 1955 siya mipahigayon sa unang malamposon nga pagbukas sa dughan sa pag-opera sa kasingkasing naggamit og usa ka makina sa kasingkasing-ba-ga sa Utah.

Bisan pa niini nga kalamposan, ang pagbukas sa dughan sa pag-opera sa kasingkasing sa gihapon usa ka dili pamilyar nga butang. Si Dr. Nelson nakahibalo og usa ka pamilya kinsang unang anak nga lalaki namatay sa congenital nga sakit sa kasingkasing. Karon ang anak nga babaye adunay sama nga kondisyon. Ang iyang sitwasyon grabe, apan siya misaad sa pagbuhat sa tanan nga iyang mahimo alang kaniya. Sa kaguol, human sa operasyon, ang bata namatay. Wala madugay, laing anak nga babaye gikan sa samang pamilya gidala ngadto kaniya, natawo usab nga may abnormal nga pagtubo o wala motubo nga bahin sa kasingkasing. Usab siya mipahigayon og operasyon, apan kini nga bata namatay usab. Si Dr. Nelson nasanapan sa kaguol. Misaad siya nga dili na gayod mo-opera pag-usab og kasingkasing sa tawo.

Bisan tuod siya nakigbahin sa iyang kaguol, si Dantzel maalamong misulti kaniya nga kon siya mohunong, laing tawo kinahanglang mokat-on sa unsay iya nang nahibaloan. “Dili kaha mas maayo ang pagpadayon sa pagsulay kay sa mohunong karon ug nagkinahanglan sa uban sa pag-agi sa samang kaguol sa pagkat-on sa unsay imo nang nakat-onan?”

Busa si Dr. Nelson mibalik ngadto sa laboratoryo ug sa lamesa nga operahanan ug mitrabaho gani mas grabe kay sa kaniadto. Sa kadugayan nahimo siyang usa sa nag-unang doktor sa kasingkasing sa nasod. Sa 1983 lamang—ang tuig sa wala pa siya gitawag isip usa ka Apostol—siya mipahigayon og 360 ka operasyon.

Si Dr. Nelson mipahinungod sa iyang mga talento ngadto sa pagsiksik, pagtudlo, ug pag-opera. Mialagad siya sa daghang may impluwensya nga lokal, nasyonal, ug internasyonal nga propesyonal nga mga kapasidad. Siya gipanghimatuod sa American Board of Surgery ug sa American Board of Thoracic Surgery ug dayon miserbisyo sulod sa unom ka tuig diha sa American Board of Thoracic Surgery. Si Dr. Nelson miserbisyo isip presidente sa Thoracic Surgical Directors Association, sa Society for Vascular Surgery, ug sa Utah State Medical Association. Miserbisyo usab siya isip usa ka direktor sa American Board of Thoracic Surgery.

Sa LDS Hospital miserbisyo siya isip chairman sa Division of Thoracic Surgery ug vice-chairman sa hunta sa mga gobernador. Nakadawat siya og daghang mga pasidungog, lakip ang “Citation for International Service” gikan sa American Heart Association, ug ang “Golden Plate Award” gikan sa American Academy of Achievement. Gihatagan usab siya og mga honorary professorship gikan sa tulo ka unibersidad sa People’s Republic of China.

Gugma sa Panimalay

Sa katuigang nanglabay, ang pamilyang Nelson mitubo sa paglakip og siyam ka anak nga mga babaye ug usa ka anak nga lalaki. Uban sa iyang nagkapuliki nga eskedyul ug daghang responsibilidad, si Russell dili sa kanunay anaa sa panimalay uban sa iyang pamilya. Apan ang iyang asawa, si Dantzel, miingon kabahin kaniya, “Kon siya anaa sa panimalay, anaa siya sa panimalay!” Ang pamilya wala gayod magduhaduha sa iyang gugma alang kanila.

Ang panimalay nga Nelson puno sa musika, katawa, ug serbisyo. Ilang gisiguro ang pagtuon sa mga kasulatan ug sa pagbaton og family home evening nga mag-uban. Mobiyahe sila nga magsakay og sakyanan ug motan-aw og mga dula sa bola nga mag-uban.

Sila ni Russell ug Dantzel mipadako sa ilang pamilya uban sa gugma ug pagpailob. Sa panagsang mga okasyon, si Russell mobarog sa hagdanan sa paghangyo sa iyang anak nga mga babaye, “Mahimo ba mga babaye palihog og pagamay sa inyong mga tingog; adunay mga tawo kansang mga kinabuhi nag-agad sa inyong amahan nga makatulog og maayo!”

Tungod kay siya kanunay mibiyahe ngadto sa medikal nga mga miting, siya sa kasagaran modala og dili mominos sa usa ka sakop sa pamilya uban kaniya, sa pagsiguro nga siya makapabiling suod ngadto sa tanan niyang mga anak. Usa ka lider sa Simbahan makausa misulti kaniya nga ang ingon nga paagi usa ka “maalamong pamuhunan.” Ingon nga gisulti ni Presidente Nelson: Sa tibuok kong kinabuhi, ako adunay daghang titulo, lakip ang doktor, kapitan, propesor, ug elder. Apan ang titulo nga akong labing gitahod mao kadtong sa pagkabana, pagkaamahan, ug pagkaapohan.”

Samtang nagtubo ang pamilya ug ang mga anak mibalhin sa layo, nakakaplag sila og mga paagi sa pagpabilin nga suod. Gisugdan nila ang Balita sa mga Nelson [Nelson News], usa ka binulan nga papel nga adunay artikulo gikan sa matag sakop sa pamilya ug usa ka kalendaryo sa importante nga mga hitabo sa pamilya. Ug sa matag bulan sila adunay usa ka panihapon sa pamilya ug salo-salo sa pagsaulog sa tanang adlaw nga natawhan ug mga anibersaryo atol sa bulan. Kadtong kinsa dili makatambong kanunay nahibalo nga sila gihinumdoman.

Bisan pa sa mapugsanong eskedyul isip usa ka tinahod kaayo nga tig-opera, si Dr. Nelson nagbutang sa iyang pamilya ug sa pagserbisyo sa Simbahan og una. Sa wala pa matawag isip usa ka Apostol, siya miserbisyo isip usa ka presidente sa stake, regional representative, ug Kinatibuk-ang Presidente sa Sunday School.

Sa dihang gitawag ug gi-set ni Elder Spencer W. Kimball (1895–1985) si Dr. Nelson gawas nga isip usa ka presidente sa stake sa 1964, nangomedya si Elder Kimball, “Ang tanan nga among gi-interbiyo dinhi nag-ingon nga basin ikaw husto, apan ikaw walay panahon. Anaa ka na bay panahon?”

“Wala ako mahibalo mahitungod niana,” mitubag si Russell, “apan ako adunay hugot nga pagtuo!”

Si Russell misalig sa pagsulti ni Elder Kimball nga usa sa iyang labing dako nga kabug-at mao ang hagit sa pagpahigayon og mga operasyon sa pagpuli sa labing dako nga mga balbola sa ugat sa lawas gikan sa kasingkasing [aortic valves]. Gidaghanon sa nangamatay sa pag-opera taas, ug ang matag pasyente nagkinahanglan og daghang oras ug gani mga adlaw sa personal nga pag-atiman.

“Diha sa panalangin nga iyang gilitok diha sa akong ulo nianang adlawa,” gihinumdoman ni Presidente Nelson, “siya piho nga mipanalangin kanako nga ang among gidaghanon sa nangamatay sa operasyon sa dakong ugat sa lawas mapakunhod, ug nga dili na ang paagi mahimong magpaut-ot sa akong panahon ug enerhiya nga sama sa nangagi. “Pagkasunod tuig, ang panahon nga gikinahanglan sa operasyon mi kunhod, ug ako aduna nay panahon nga gikinahanglan sa pagserbisyo niana ug sa ubang mga calling,” miingon si Dr. Nelson. Sa tinuod, ang among gidaghanon sa nangamatay mikunhod sama sa karon—nga ubos kaayo ug madawat, masagubang nga gidaghanon. Pagkatalagsaon, kana mao gayod ang operasyon nga akong gihimo alang ni Presidente Kimball walo ka tuig human niana.”

Samtang si Presidente Kimball nagserbisyo isip Akting Presidente sa Korum sa Napulog Duha ka Apostoles, nag-antos siya og grabe kaayo nga mga problema sa kasingkasing ug nahibalo nga siya mahimong mamatay. Sa 1972 si Presidente Kimball ug ang Unang Kapangulohan nakigkita ni Dr. Nelson alang sa medikal nga tambag. Tungod sa edad ni Presidente Kimball, si Dr. Nelson dili makarekomendar sa gikinahanglan nga operasyon.

Miuyon si Presidente Kimball, nag-ingon, “Ako tigulang nga tawo ug andam nga mamatay.”

Niini nga higayon, si Presidente Harold B. Lee (1899–1973) mibarog, gihapak ang talad-sulatanan, ug miingon, “Spencer, ikaw gitawag! Dili ikaw mamatay! Ikaw kinahanglang mobuhat sa tanan nga imong kinahanglang buhaton aron sa pag-amuma sa imong kaugalingon ug magpadyon sa pagpakabuhi.” Busa mihukom si Presidente Kimball nga magpaopera.

Sa wala pa ang operasyon, ang Unang Kapangulohan mihatag ni Dr. Nelson og usa ka panalangin, nagsiguro kaniya nga ang operasyon mamaayo ang dagan ug nga dili siya kinahanglang mahadlok sa iyang kaugalingong kakulangan, tungod kay siya “gibuhi sa Ginoo sa pagpahigayon niini nga operasyon.”

Ang operasyon walay sipyat, ug si Dr. Nelson nahibalo nga iyang utang ang kalamposan ngadto sa Ginoo. Sa nahuman na ang operasyon, nadawat niya ang usa ka gamhanang pagbati nga ang tawo nga bag-ohay pa lamang niya nga gi-operahan mahimong Presidente sa Simbahan.

Sa dihang si Presidente Kimball gi-orden isip ang bag-ong Presidente sa Simbahan sa 1973, si Dr. Nelson misulat nagsiguro kaniya isip iyang tig-opera nga ang kahimsog dili mopugong kaniya sa iyang bag-ong calling. Kini usa lamang sa daghang panahon nga siya nakahimo sa pagpanalangin sa Korum sa Napulog Duha ka Apostoles sa iyang kabatid isip usa ka doktor.

Sa Abril 7, 1984, si Dr. Nelson nahimong Elder Nelson sa dihang si Presidente Spencer W. Kimball mitawag kaniya nga mahimong usa ka sakop sa Korum sa Napulog Duha ka Apostoles. Ang iyang calling ingon ka nakapahikurat ngadto sa iyang pamilya nga usa sa anak nga babaye, kinsa mabdos niana nga panahon, nahimong nagbati. Gipasidungog ni Elder Nelson ang pahibalo kabahin sa calling sa “pagtabang” sa pagpaanak sa ika-22 nga apo ni Nelson.

Walay pagsapayan sa iyang malukpanon kaayong pagbansay ug kasinatian isip usa ka doktor, si Elder Nelson nahibalo nga ang labing dako nga gahom nagagikan sa Dios ug nga ang labing dako nga trabaho mao ang pagkaanaa sa serbisyo Kaniya.

“Ang mga tawo gamay kaayo og mabuhat sa ilang mga kaugalingon sa pag-ayo sa masakiton o huyang nga mga lawas,” miingon si Elder Nelson. “Uban sa edukasyon sila makabuhat og gamay pa, uban sa bag-ong medikal nga mga kurso ug pagbansay, gamay pa gihapon ang mahimo. Ang tinuod nga gahom sa pag-ayo, bisan pa niana, usa ka gasa gikan sa Dios.”

Wala madugay human matawag si Elder Nelson isip usa ka Apostol, usa ka report gihatag diha sa miting sa mga propeyonal nga tig-opera nga si Dr. Nelson dili na mangopera sa kasingkasing ”tungod kay ang iyang simbahan mihimo kaniya nga ‘usa ka santos.”’

Sa dihang giistorya kini ni Elder Nelson, siya mipasabot nga “pipila sayop nga naghunahuna nga [ang pulong nga santos] nagpasabot og paghimaya o kahingpitan. Dili ingon niana! Ang santos mao ang usa ka tumutoo ni Kristo ug nahibalo sa Iyang hingpit nga gugma. … Ang usa ka santos nagserbisyo sa uban, nahibalo nga kon mas magserbisyo ang tawo, mas dako pa ang oportunidad alang sa Espiritu sa pagbalaan ug pagputli.”

Ingon nga nakaserbisyo sulod sa 31 ka tuig isip usa ka sakop sa Korum sa Napulog Duha ka Apostoles, si Elder Nelson na set apart isip Presidente sa korum kaniadtong Hulyo 2015, human sa pagkamatay ni Presidente Boyd K. Packer.

Diha sa usa ka komperensiya nga pakigpulong, miingon si Presidente Nelson makausa nga ang “kinabuhi wala himoa nga mahimong sayon. … Ang kadaogan moabot lamang ngadto niadtong kinsa mosugakod sa hugot nga pagtuo nga magpabilin diha sa dalan—ang higpit ug pig-ot nga agianan.”

Sa iyang kinabuhi, si Presidente Nelson sa tinuod dihay iyang bahin sa mga hagit. Sa 1991 ang iyang anak nga babaye si Emily nahiling nga adunay kanser. Sa wala madugay, ang iyang asawa nahiling nga adunay kanser sa parte sa lawas nga moaway sa mga kagaw [lymphoma]. Samtang si Dantzel sa kadugayan naayo, si Emily namatay human sa dugay nga pakigbisog sa sakit.

Dayon, sa 2005 si Dantzel dali ug wala damha namatay. Diha sa kinatibuk-ang komperensiya human sa iyang pagkamatay, miingon si Presidente Nelson: “Si Dantzel dili lamang usa ka gihigugma ug mahigugmaon nga kauban. Siya usa ka magtutudlo: pinaagi sa iyang bililhong ehemplo, gitudlo niya ang hugot nga pagtuo, hiyas, pagkamasulundon, ug kalooy. Mitudlo siya kanako kon unsaon sa pagpaminaw ug sa paghigugma. Tungod kaniya, ako nahibalo sa tanang mga panalangin nga moabot ngadto sa usa ka bana, amahan, ug apohan nga lalaki.”

Lain nga makaguol nga hitabo nahitabo sayo sa 2019, sa dihang ang kinabuhi sa ikaduhang anak nga babaye, si Wendy, namatay sa kanser. “Ang atong mga luha sa kasubo mahimong mga luha sa pagpaabot samtang makaangkon kita og mahangturong panglantaw,” miingon si Presidente Nelson diha sa iyang lubong.

Kanunay mipakigbahin si Presidente Nelson sa iyang pagpamatuod kabahin sa panaghiusa tali sa mga siyensya nga siya nahibalo pag-ayo ug sa Paglalang ug sa langitnong plano nga iyang gipanghimatuod. Kon mamulong mahitungod sa mga kahibulongan sa tawhanong lawas, miingon siya: “Pipila sa katawhan sayop sa paghunahuna nga kining talagsaong pisikal nga mga hiyas nahitabo pinaagi sa sulagma o resulta sa dakong hitabo sa usa ka dapit. Pangutan-a ang imong kaugalingon, “Ang pagsulbong sa imprintahanan makamugna ba og usa ka diksyonaryo?’” Ang iyang edukasyon ug propesyonal nga mga kasinatian misuporta hinoon sa iyang espirituhanong mga pagtuo sa pagbalanse niini nga mga ideya.

Makanunayon siyang mamulong mahitungod sa iyang pagrespito alang sa pagkababaye ug sa kalig-on sa mga babaye diha sa ebanghelyo. Nakigbahin siya kon unsa ang iyang nakat-onan gikan ni Eva mahitungod sa pagkapari ug sa panag-uban sa bana ug asawa. Giawhag niya ang mga miyembro sa pagsabot kon “sa unsang paagi ang mga lalaki ug mga babaye nagdawat sa labing importante nga ordinansa diha sa balay sa Ginoo nga nag-uban ug sa managsama nga paagi.” Diha sa Oktubre 2015 nga pakigpulong sa komperensiya, gihangyo niya ang mga babaye sa Simbahan sa “pag-abante! Angkona ang inyong tukma ug importanteng dapit diha sa inyong panimalay, diha sa inyong komunidad, ug diha sa gingharian sa Dios—labaw pa kay sa inyong nabuhat kaniadto.”

Sa 2006 giminyoan ni Presidente Nelson si Wendy L. Watson, usa ka propesor ug propesyonal nga tigtambag sa kaminyoon ug sa pamilya. Diha sa 2009 nga Tibuok Kalibotan nga Kongreso sa mga Pamilya [World Congress of Families] diin siya ug si Wendy namulong, miingon siya, “Ako nahibalo usab kon unsa kining mapanalanginan pag-usab sa akong Langitnong Amahan sa pagminyo sa ikaduhang higayon, usab ngadto sa usa ka babaye nga maluluy-on ug manggihatagon og espiritu, kinsa sa makausa na usab mihingpit sa sirkulo sa akong pamilya.” Nag-uban si Presidente ug Sister Nelson mibiyahe sa kalibotan diha sa gipahinungod nga serbisyo.

Ang iya usa ka tinuod nga tibuok kalibotan nga pagpangalagad. Gipahinungod niya ang Sapporo Japan Temple, ang Concepción Chile Temple, ug ang Rome Italy Temple ug miapil sa ubang mga pagpahinungod sa mga templo sa tibuok kalibotan, lakip ang Payson Utah Temple, ang Kyiv Ukraine Temple, ug ang Accra Ghana Temple. Gipahinungod usab niya ang Life Sciences Building sa Brigham Young University sa Abril 2015. Gipahinungod niya ang 31 ka nasod alang sa pagsangyaw sa ebanghelyo. Mitabang siya sa pagdala sa ebanghelyo ngadto sa mga nasod sa Silangang Uropa ug atol sa iyang pangalagad nakakita og dili mokubos sa 30 ka mga nasod nga opisyal nga miila sa Simbahan.

Bisan asa siya mibiyahe, mipahinungod si Presidente Nelson og espesyal nga pagtagad ngadto sa kabataan. Samtang namulong ngadto sa usa ka kongregasyon nga labaw sa 4,000 ka mga miyembro sa Simbahan nga nagpundok sa British Columbia, Canada, siya naghinam-hinam sa pagtan-aw sa kabataan nga gipalingkod taliwala sa ilang mga pamilya. Atol sa iyang pakigpulong, gihangyo niya ang kabataan sa pagbarog diha sa ilang mga lingkoranan ug sa pagwarawara sa ilang mga bukton. Mipahiyom si Presidente Nelson samtang ang mga bata miguho taliwala sa pundok sa mga tawo ug miwarawara nga mahinamon. “Oy Oo,” miingon siya. “Karon makakita ako kaninyo.” Ang iyang pagkamaluluy-on ug kahayag miabot sa minilyon ka mga kabataan sa tibuok kalibotan—sa dagko og edad ug sa batan-on.

Ang paagi nga si Presidente Nelson mipuyo sa iyang kinabuhi mao ang labing dako nga saksi ug testamento sa Manluluwas nga iyang ikahatag.

Usa sa mga higayon niini miabot sa dihang ang iyang kaubang Apostol nga si Elder Joseph B, Wirthlin (1917–2008) mihatag sa usa sa iyang kataposan nga mga pakigpulong sa komperensiya. Namulong si Elder Wirthlin mahitungod sa gugmang putli ug gugma alang sa uban isip ang kinaiya nga kinahanglang mopaila kanato isip Santos sa Ulahing mga Adlaw. Samtang siya namulong, misugod siya sa pagkurog nga dili mapugngan, ug si Elder Nelson sa hinay miduol ug miagbay kaniya ug misuporta kaniya ngadto sa nahibilin niya nga pakigpulong. Kini usa ka gamhanan, hilom nga sermon sa gugma nga kinahanglang atong ipakita sa uban.

“Akong nakat-onan sa dugay na nga panahon nga magmasulundon ngadto niadtong kahibulongan, hinay nga mga hinagawhaw sa Espiritu—kadtong kusog nga mga pag-aghat sa pagsunod sa tambag,” miingon si Presidente Nelson. “Ilabi ka bug-at kini nga mahibaloan nga, samtang kita kontento sa mao gihapon nga sitwasyon sa kinabuhi, ang Ginoo maghimo og usa ka butang kanato nga lapas sa atong gihambin nga imahinasyon. Tanan nga iyang gikinahanglan kanato mao ang pag-andam sa atong mga kaugalingon—sa pagsulay og tarong sa atong mga pagkadili hingpit ug sa paglugwaysa kada adlaw nga mahimong usa ka tawo nga mas labaw kay sa kita sa laing bahin mahimo.”

Si Presidente Nelson kanunay mihatag og pagtagad ngadto niadtong kusog nga mga pag-aghat. Ang duha ka gagmay nga batang mga babaye nga iyang naoperahan apan napakyas sa pagluwas, sayo sa iyang karera, nakabug-at pag-ayo sa iyang hunahuna sulod sa katuigan, ilabi na sa dihang iyang nahibaloan nga ang pamilya mipabiling naglagot kaniya ug ngadto sa Simbahan. Sulod sa hapit 60 ka tuig siya nagbangutan sa panumdoman sa maong pagkawala ug kagul-anan alang sa pamilya. Gisulayan niya sa makadaghang higayon sa pagkontak kanila, wala magmalamposon.

Nianang 2015, gipukaw siya sa gabii sa pagbati sa presensya sa duha ka gagmay nga batang babaye nga mikab-ot nganha kaniya. Gihulagway niya kini niini nga paagi: “Bisan kon og dili sa akto nga nakita o nadungog sila, gibati nako ang ilang presensya. Sa espirituhanong paagi, akong nadungog nako ang ilang pangamuyo. Ang ilang mensahe mubo ug klaro: “Brother Nelson, kami wala pa ma-sealed ni bisan kinsa! Mahimo ba nimo kaming matabangan?’”

Si Presidente Nelson makausa misulay pag-usab sa pagkontak sa nagpabiling buhi nga amahan ug sa manghod nga igsoong lalaki, ug niini nga higayon siya nagmalamposon. Mapainubsanon siyang miluhod sa atubangan sa amahan, namulong sa pangamuyo sa anak nga mga babaye, ug mitanyag sa pagpahigayon sa mga ordinansa sa pagselyo. Siya mipahibalo nga ang panahon ug ang paningkamot gikinahanglan, gumikan nga ang amahan ug ang igsoon nga lalaki wala pay pagtuga. Uban sa Espiritu nga mabati diha sa kwarto, ang amahan ug ang igsoong lalaki miuyon sa paghimo sa gikinahanglang mga pagpangandam. Si Presidente Nelson sa wala madugay mihilak sa kalipay sa dihang siya nakapahigayon sa mga pagselyo alang sa pamilya diha sa Payson Utah Temple.

Sa dihang si Presidente Thomas S. Monson (1927–2018) namatay sayo sa Enero 2018, ang Korum sa Napulog Duha nagtagbo nga mainampoon sa pagdawat og direksiyon gikan sa Ginoo alang sa calling sa usa ka bag-ong propeta. Si Russell M. Nelson na-set apart sa Enero 14, 2018, isip ang propeta ug ika-17 nga Presidente sa Ang Simbahan ni Jesukristo sa mga Santos sa Ulahing mga Adlaw.

Mihimo siya sa iyang unang pamahayag sa publiko isip Presidente gikan sa sibay sa Salt Lake Temple, diin siya miawhag sa mga miyembro sa Simbahan sa “pagpabilin diha sa dalan sa pakigsaad” ug mihatag niining gamhanan nga saad: “Ang inyong pasalig nga mosunod sa Manluluwas pinaagi sa paghimo og mga pakigsaad uban Kaniya ug dayon sa pagtuman niadto nga mga pakigsaad moabli sa pultahan ngadto sa matag espirituhanong mga panalangin ug pribilehiyo nga anaa sa mga lalaki, mga babaye, ug mga bata sa bisan asa.”

Siya mipahayag nga ang bag-ong Unang Kapangulohan gusto “namong mosugod nga maghunahuna sa tumong,” nagpasabot nga “ang tumong nga gipaningkamotan sa matag usa nato mao ang matugahan og gahom diha sa balay sa Ginoo, ma-seal isip mga pamilya, matinud-anon ngadto sa mga pakigsaad nga gihimo diha sa templo nga maghimo kanato nga takos sa labing mahinungdanong gasa sa Dios—ang kinabuhing dayon.”

Nagpasabot pag-usab ngadto sa dalan sa pakigsaad, siya midapit niadtong kinsa mibiya sa makadiyot nga mibalik, nagpasalig kanila nga “adunay luna alang kaninyo dinhi, sa Simbahan sa Ginoo.”

Ang mga miyembro sa Simbahan dugay nga makalimot sa kahinam sa unang kinatibuk-ang komperensiya nga gidumala ni Presidente Nelson isip propeta ug Presidente. Dinhi niini nga komperensiya, si Presidente Nelson mipahibalo nga ang halangdong mga pari ug mga elder sa matag ward pagatipunon ngadto sa usa ka korum “aron mas epektibo ang pagpatuman sa buhat sa Ginoo.” Mipahibalo usab siya sa pagtapos sa home ug visiting teaching ug sa pagtukod og “usa ka mas bag-o, mas balaan nga paagi sa pag-amuma ug pagpangalagad sa uban, “usa ka kausaban nga mosugod og usa ka “bag-ong kapitulo sa kasaysayan sa Simbahan.” Ug sa pagtapos sa komperensiya, si Presidente Nelson mipahibalo og pito ka bag-ong templo.

Si Elder Jeffrey R. Holland sa Korum sa Napulog Duha ka Apostoles ingon og namulong alang sa tanan sa dihang siya misunod sa ikaduhang pahibalo ni Presidente Nelson: Ang labing halandumon nga mga higayon sa kinabuhi mao kadtong diin kita mobati sa kalit-kalit sa pagpadayag. Presidente Nelson, ako wala mahibalo kon pila pa ‘kalit-kalit” ang among madumala niining kataposan sa semana.”

Ang nagpadayon nga pagpadayag mipadayon sa pag-ila sa pangalagad ni Presidente Nelson isip propeta , manalagna , ug tigpadayag. Human sa unang komperensiya, si Presidente Nelson ug ang iyang asawa, si Wendy, mibiyahe libot sa kalibotan nakigmiting ug nagtudlo sa mga miyembro sa Simbahan, lakip niadtong mga dapit diin ang mga templo nga bag-ohay pa lamang niya nga gipahibalo pagatukuron.

Sa usa ka tibuok kalibotan nga debosyonal, siya ug si Sister Nelson mitawag sa kabatan-onan sa Simbahan sa pag-apil sa “labing dako nga hagit, ang labing dako nga kawsa, ug ang labing dako nga buhat sa yuta,” ang pagpundok sa Israel.

Wala magdugay, mipagawas siya og usa ka pamahayag mahitungod sa importansiya sa paggamit sa hustong ngalan sa Simbahan, usa ka paghatag og gibug-aton, miingon siya, nga “ang Ginoo midasig sa akong hunahuna.”

Sa Oktubre 2018 nga kinatibuk-ang komperensiya, si Presidente Nelson mipatigbabaw pa og dugang sa importansiya sa paggamit sa tibuok ngalan sa Simbahan. Mipahibalo usab siya sa usa ka gibag-o nga gihatagan og gibug-aton sa pagtudlo sa ebanghelyo ug pagkat-on diha sa panimalay, nagpahayag nga “panahon na alang sa usa ka sentro sa panimalay nga Simbahan, gisuportahan sa unsa ang gipangbuhat sulod sa atong branch, ward, ug stake nga mga gambalay [building].” Kini nga sentro sa panimalay, gisuportahan sa Simbahan nga plano nagmubo sa tulo ka oras nga eskedyul sa Dominggo ngadto sa duha ka oras ug mipaila og bag-o nga kurikulom alang sa mga indibidwal ug mga pamilya sa pagtuon sa panimalay. Sa pagtapos sa komperensiya, si Presidente Nelson mipahibalo og 12 pa ka templo—ang labing daghan nga templo nga gipahibalo sukad sa usa ka panahon.

Isip propeta, si Presidente Nelson mipakita kanato kon unsa ang gipasabot sa pagtinguha sa kabubut-on sa Ginoo ug sa paglihok og dali sa pagpadayag, ug siya miawhag sa tanan nga mga miyembro sa Simbahan sa pagbuhat sa sama:

“Giawhag ko kamo nga palapdan pa ang inyong kasamtangang espiritwal nga abilidad sa pagdawat og personal nga pagpadayag. …

“… Aduna pay daghang gusto sa inyong Amahan sa Langit nga inyong mahibaloan. …

“… Ako nagsaad nga samtang kamo magpadayon nga magmasulundon, … pagatagaan kamo sa kahibalo ug pagsabot nga inyong gipangita. Ang matag panalangin nga ang Ginoo aduna alang kaninyo—gani mga milagro—mosunod.”

Diha sa iyang unang komperensiya isip usa ka Apostol, si Elder Nelson midangop ngadto sa mga pakigsaad nga iyang gihimo diha sa templo, nag-ingon: “Ako manghimatuod pag-usab niana nga saad, sa paghatag sa tanan nga ako aduna ngadto sa pagtukod sa gingharian sa Dios dinhi sa yuta. Sa pagdawat niini nga tawag, nahibalo nga ang mga hagit, mga sugo, ug mga yawe ihatag ug nga mga paghampak sa ingon niana moabot, akong ihatag ang akong paningkamot, akong enerhiya, ug ang akong tanan.”

Mga tuig milabay ug duha ka adlaw human ma-set apart isip ang propeta, si Presidente Nelson mihatag og usa ka samang saad, nag-ingon: “ Akong ipahayag ang akong debosyon ngadto sa Dios nga atong Mahangtorong Amahan ug ngadto sa Iyang Anak, si Jesukristo. Nakaila ako Kanila, naghigugma Kanila, ug mopasalig sa pag-alagad Kanila—ug kaninyo—sa matag ginhawa nga nahabilin sa akong kinabuhi.”

Gihuptan ni Presidente Nelson kini nga sagradong saad hangtod sa kataposan. Kini tataw ngadto sa tanan kinsa nakaila kaniya o nakadungog kaniya nga namulong nga siya sa hingpit nga masaligon nga ang pagkamasulundon ngadto sa Ginoo nagsiguro sa mga panalangin sa Ginoo. Si Presidente Nelson usa ka tinuod nga dalaygong tighupot sa pakigsaad. Gihuptan niya ang iyang “mga pakigsaad uban ang katukma.”

Sa kinatibuk-ang komperensiya miingon makausa si Presidente Nelson, “Sa inyong paglakaw diha sa dalan sa Ginoo sa pagkamatarong, kamo mapanalanginan nga mopadayon diha sa Iyang pagkamaayo ug mahimong kahayag ug manluluwas ngadto sa Iyang katawhan.”

Ang kinabuhi ni Presidente Russell M. Nelson mahimo ug mopadyon nga mahimong ingon nga usa ka kahayag.