“Pagpabalik sa mga Kasingkasing ngadto ni Jesukristo,” Liahona, Nob. 2025.
Alang sa Kalig-on sa mga Kabatan-onan Naghinumdom
Pagpabalik sa mga Kasingkasing ngadto ni Jesukristo
Paghinumdom ni Presidente Russell M. Nelson
Sa dihang si Presidente Russell M. Nelson usa ka batan-ong lalaki naghunahuna unsa nga karera ang kuhaon, nahibalo siya og usa ka butang nga labing tinuod—gusto siya nga motabang og mga tawo. Sa wala madugay siya nahimong usa ka nabantog sa kalibotan nga tig-opera sa kasingkasing ug nakapahigayon og daghang pag-abli sa dughan aron makita ang problema sa kasingkasing [open heart operation] nga mapalig-on ang mga kasingkasing ug mapataas ang kinabuhi.
Isip usa ka Apostol ug ika-17 nga Presidente sa Ang Simbahan ni Jesukristo sa mga Santos sa Ulahing mga Adlaw, si Presidente Nelson nakatandog sa mga kasingkasing sa katawhan sa tibuok kalibotan pinaagi sa pagliso niini ngadto ni Jesukristo pinaagi sa iyang mga pagtulun-an, serbisyo, ug gugma.
Giniyahan sa Espirituhanong Paagi
Gipuy-an ni Presidente Nelson ang iyang kinabuhi sa paagi nga siya napanalanginan og espirituhanong paggiya. Atol sa usa ka operasyon, gibantayan niya og maayo ang usa ka pasyente ug gibati ang walay kasigurohan kon unsaon sa pagpadayon. Dayon iyang gibati ang Espiritu Santo nga naggiya kaniya ngadto sa hingpit nga malamposong operasyon.
Gitudlo ni Presidente Nelson nga ang espirituhanong paggiya anaa alang sa tanan. Miingon siya, “Kon kita tinuoray nga modawat sa Espiritu Santo ug magkat-on sa pag-ila ug pagsabot sa Iyang mga pag-aghat, magiyahan kita sa mga sitwasyon nga dagko ug gagmay.”
Presidente Nelson nagtimbaya sa kabatan-onan sa Fiji kaniadtong Mayo 2019.
Pagpundok sa Israel ug ang Dalan sa Pakigsaad
Isip propeta sa ulahing mga adlaw, si Presidente Nelson mitudlo nga ang pagpundok sa Israel mao ang labing importante nga buhat nga nagpanghitabo sa yuta karon, ug nga ang kabatan-onan sa tanang dapit mahimong usa ka dakong bahin niini pinaagi sa pagpalista “diha sa batalyon sa Ginoo sa pagtabang og pundok sa Israel.”
Si Presidente Russell M. Nelson mitudlo: “Bisan kanus-a nga mobuhat kamo og bisan unsa sa pagtabang ni bisan kinsa—sa matag habig sa tabil—naghimo og usa ka lakang nga mopadulong sa paghimo og mga pakigsaad sa Dios ug sa pagdawat sa ilang mahinungdanong mga ordinansa sa bunyag ug templo, nagtabang kamo sa pagpundok sa Israel. Ingon lang niana ka yano.”
Gitudlo usab ni Presidente Nelson nga ang pagpabilin diha sa dalan sa pakigsaad modala “sa tanang espirituhanong panalangin ug pribilehiyo nga mahimong maanaa sa mga lalaki, mga babaye, ug mga bata bisan asa.”
Hugot nga Pagtuo sa Umaabot
Sa usa ka samok nga kalibotan, si Presidente Nelson sa gihapon mipabilin og positibo nga kinaiya. “Malaumon ako mahitungod sa kaugmaon,” miingon siya. Mapuno kini og mga oportunidad alang sa matag usa kanato.”
Kini nga panglantaw sa kinabuhi nagagikan sa iyang hugot nga pagtuo. Siya mitudlo, “Ang hugot nga pagtuo diha ni Jesukristo mao ang kinadak-ang gahom nga atong magamit niini nga kinabuhi.”
Sa dihang si Presidente Nelson nahimong Presidente sa Simbahan, miingon siya: “Akong ipahayag ang akong debosyon ngadto sa Dios nga atong Mahangtorong Amahan ug sa Iyang Anak, si Jesukristo. Nakaila ako Kanila, naghigugma Kanila, ug mopasalig sa pag-alagad Kanila—ug kaninyo—sa matag ginhawa nga nahabilin sa akong kinabuhi.”
Hingpit siya nga mipasidungog niana nga saad. Isip resulta, ang Simbahan—ug ang kalibotan—napanalanginan.