Paghinumdom sa Karnero

Si Kristo ang Maayong Magbalantay. Ang matag usa sa panon bililhon Kaniya. Iyang gihimong sumbanan ang pagpang-atiman sa mga karnero ug gitudlo ngari kanato ang mga kalidad sa maayong magbalantay pinaagi sa pulong ug buhat, lakip ang pagkaila sa ngalan sa imong mga karnero, paghigugma kanila, pagpangita niadtong mga nawala, pagpakaon, ug, sa kataposan, pagdala kanila nga makabalik pauli. Naglaom Siya nga kita mohimo sa sama nga butang isip Iyang ubos nga mga tigbalantay.

Makakat-on kita og daghan mahitungod sa pagpangalagad sa pamaagi sa Ginoo gikan sa karaang propeta—ug sa talagsaong tigbalantay sa karnero—si Moroni. Nagpuyo siya atol sa labihan kalisod nga mga panahon, wala gani mga cell phone, mga kompyuter, ug internet. Apan nahimo niya ang pag-ila sa mga karnero. Sa unsang paagi kini nahimo? Atong makita kini diha sa iyang pamaagi sa Moroni 6. Didto atong mabasa nga ang mga miyembro “giihap nga kauban sa katawhan sa simbahan ni Kristo; ug gikuha ang ilang mga ngalan, nga sila mahinumdoman ug maamumahan pinaagi sa maayo nga pulong sa Dios, aron magpadayon sila sa matarong nga dalan. … Ang simbahan nagtigom kanunay, sa pagpuasa ug sa pag-ampo, ug sa pagpakigsulti sa usag usa mahitungod sa kaayohan sa ilang mga kalag” (Moroni 6:4–5).

Alang ni Moroni, mahitungod kadto sa katawhan—sa mga ngalan! Iyang gibansay ang baroganan sa “pag-ihap ug pag-ila” aron ang tanan mahinumdoman. Si bisan kinsa nga naglisod o nasaag namatikdan, nagtugot sa mga Santos nga makahisgot sa ilang kaayohan diha sa mga council. Sama sa tigbalantay sa karnero kinsa mibiya sa kasiyaman ug siyam (nga luwas ug protekdado, diin segurado ako) ug giadto ang usa nga nawala (tan-awa sa Lucas 15:4–7), kita gihangyo nga kita magbantay sa atong mga panon—sa pagkamatikod ug paghinumdom ug moadto ug mohimo sa samang butang.

Isip lider sa misyon sa India, akong mahinumdoman nga nangutana sa usa ka batan-ong presidente sa branch bahin sa pipila sa iyang mga tumong alang sa sunod tuig: “Pila ka lalaki ang imong andamon nga makadawat og Melchizedek nga pagkapari?” Ang diha dayon niya nga tubag “Pito!”

Naghunahuna kon diin niya nakuha kana nga piho kaayo nga gidaghanon! Sa wala pa ko motubag, mikuha siya og piraso nga papel nga dunay numero uno hangtod sa siyete nga gisulat dapit sa kilid. Ang unang lima ka linya duna nay mga ngalan—kini nga mga tawo dapiton niya ug sa iyang elders quorum ug awhagon sa pag-angkon sa panalangin sa pagkapari sa ilang kinabuhi. Siyempre, mangutana ko unsa ang walay sulod nga ikaunom ug ikapito nga linya. “O, Presidente,” miingon siya, nga mabinationg milingo-lingo sa iyang ulo, “seguradong makabunyag kami og labing menos duha ka lalaki sa sinugdanan sa tuig og makadawat sa pagkapari dapit sa kataposan sa tuig.” Kining talagsaong lider nakasabot sa baroganan sa pag-ihap ug pag-ila.

Si Kristo miorganisar sa Iyang Simbahan sa paagi nga lisod ang paghikalimot og usa ka kalag, kay ang matag usa Iyang gipangga. Ang matag indibidwal sa usa ka ward, bisan pilay edad o kon lalaki ba o babaye, may labihan ka daghan nga tinugyanan—mga tigbalantay—kinsa gitahasan nga moatiman kanila, dala ang paghinumdom. Usa ka batan-ong lalaki, sama pananglit, gihatagan alang sa iyang kaayohan og bishopric, tigpangalagad nga mga brother, hingkod nga mga tigtambag, mga titser sa seminary, mga kapangulohan sa korum, ug dayon sa pipila, tanan nga nagsilbing panalipod, nga lig-ong gipahimutang ilawon niana nga batan-on nga masalo siya kon siya matagak. Bisan og usa lang ka net ang matukma sa pagpahimutang, kana nga batan-ong lalaki luwas, mamatikdan, ug mahinumdoman. Ug gani, sa kasagaran wala kitay makitang net nga gipahimutang. Ang mga tawo balik-balik nga mahisalaag ngadto sa gabon sa kangitngit—ug walay makamatikod. Unsaon nga mas momaayo kitang mga tigbalantay? Makakat-on kita sa pag-ihap ug pag-ila.

Ang Simbahan nagsuplay kanato og mga report ug mga himan sa paghimo gayod niana—aron sa paghinumdom. Ang Quarterly nga Report usa sa nag-una nga sanglitanan. Nagtugot kini nga atong maihap ug maila ang matag miyembro sa makadaghang higayon ug sa pagmatikod niadtong mga nawala o nagkinahanglan sa atong tabang ug gugma. Ang Listahan sa Aksiyon ug lnterbiyo mag-ila kinsa kadtong nagkinahanglan sa atong atensiyon karon gayod, mao usab sa report sa status sa rekomend sa templo ug uban pa. Kini nga mga tool sa pag-ihap ug pag-ila magpatutok kanato ngadto sa mga tawo. Kinsay nagkinahanglan og calling, advancement sa pagkapari, o tabang sa pagdala og ngalan sa pamilya ngadto sa templo? Kinsa ang atong tabangan nga maaandam alang sa full-time nga misyon? Kinsa ang nawala karong bulana? Kini nga mga tool makatabang kanato sa paghinumdom sa mga tawo.

May nailhan ko nga pamilya gikan sa Estados Unidos nga na-assign sa Africa. Ang labing una nilang Dominggo nga sila misulod sa nag-inusarang yunit sa Simbahan niana nga nasod, mao nga sila giabiabi sa mahinamon nga paagi. Sa kataposan niana nga buntag, ang asawa sa maong lalaki gitawag nga presidente sa Relief Society ug siya isip lider sa Young Men! Gipangutana niya ang luya kaayong tan-awon nga presidente sa branch kon pila ka batan-ong lalaki ang anaa. Kining matinud-anon, nga unang henerasyon nga lider mitudlo ngadto sa luyo sa sacrament hall ug miingon, “kadtong duha didto.” Ang maong tawo nagduhaduha, mao nga gikuha niya ang rekord sa branch sa balay, diha dayon nakita niya nga may aktuwal nga 20 ka batan-ong lalaki sa lista. Gibalik niya ang presidente sa branch ug gihangyo ang duha ka aktibo, bilingual nga young adult nga magsilbi nga iyang mga counselor ug dayon milingkod uban nila ug ang duha ka batang lalaki sa pagrebyo sa mga ngalan.

Dayon kining kugihan nga batan-ong mga lalaki nangadto sa pagtrabaho. Sulod sa misunod nga pipila ka bulan, nakit-an nila ang matag lalaki nga naa sa lista. Ngalan sa matag ngalan, kadtong nawala nga mga karnero naabiabi sa ilang mga higala napakaon sa espirituwal ug sa pisikal! Sulod sa usa ka tuig, sa tanang nilabay nga Dominggo, dunay gidaghanon nga 21 ka batan-ong lalaki nga nitambong. Salamat sa kamaayo sa batan-ong mga lalaki nga miihap ug miila.

Usa ka minahal nakong higala, nga batan-ong gradwado nga estudyante, mibalhin kauban sa iyang pamilya ngadto sa dako nga siyudad sa Amerika aron magpadayon sa iyang edukasyon. Diha dayon gitawag siya nga mangulo sa elders quorum. Nakulbaan og gamay bahin sa iyang una nga interbiyo sa presidente sa stake, determinado siyang moadto nga andam. Giingnan niya ang presidente sa stake nga duna siyay tulo ka tumong alang sa umaabot nga tuig: (1) 90 porsiyento nga pagpangalagad [ministering], (2) makahuloganon nga leksiyon sa ebanghelyo matag semana, ug (3) maayong pagkaplano nga kalihokan sa korum matag bulan.

Nagpahiyom ngadto sa akong higala, kining maalamon nga presidente sa stake nangutana, “Makangalan ka ba og dili aktibo nga sakop sa korum nga imong matabangan nga makaadto sa templo kauban sa iyang pamilya karong tuiga?” Nakalitan ang akong higala niadto. Naghunahuna siya og maayo ug nakahatag ra og usa ka ngalan. “Isulat kana,” miingon ang presidente sa stake. Dayon kining eksperyensiyado na nga lider nangutana sa mao gihapon nga pangutana katulo ka higayon—ug nahuman ang interbiyo. Kining batan-ong lalaki migawas human niana nga interbiyo nga nakakat-on og usa sa iyang labing talagsaon nga mga leksiyon sa pagpangulo ug pagpangalagad. Miadto siya sa interbiyo dala ang mga programa, mga leksiyon, ug mga kalihokan. Migawas siya nga may mga ngalan! Kadtong upat ka ngalan mao ang nahimong nag-una nga tuyo sa iyang pangalagad ug sa iya nga korum.

Isip lider sa misyon, nakabisita ko og usa sa akong mga branch usa ka Dominggo sa buntag. Akong namatikdan nga ang presidente sa branch sige og kuha og papel gikan sa iyang bulsa ug mosulat diha niini. Mihukom ko sa pagpangutana bahin niadto human sa panapos nga pag-ampo. Dihang natapos na ang miting, ug sa wala pa ko makapangutana bahin sa kard, ang branch mission lider nagdali ngadto sa podium, diin siya gihatag kaniya ang papel. Dali nakong gisusi kining mahinamon nga lider sa iyang sinemana nga missionary coordination meeting sa branch. Sa wala pa sila magsugod, gikuha niya ang papel gikan sa iyang bulsa. Puno kini sa mga ngalan sa mga miyembro nga wala motambong og miting sa sakramento. Sulod sa pipila ka minuto, ang matag sakop sa konseho mipili og usa ka ngalan o duha, nga nagsaad nga mobisita nila niana gayod nga adlaw sa pagseguro nga OK ra sila ug sa pagpahibalo nga makamingaw nga wala sila. Karon mao kana ang pag-ihap ug pag-ila.

Nakahinumdom ko nga dunay district, nga mga oras ang sakay sa jet gikan sa kinadul-an nga templo, diin ang paghupot kanunay og aktibo nga rekomend mao ang taas nga prayoridad, bisan og ang tinuod lagmit kining dili gayod magamit. Sa matag unang Dominggo sa bulan, ang mga lider mogamit sa ilang pang-ihap nga himan [tools] aron sa pag-ihap sa ilang mga natugahan [endowed] nga mga miyembro. Kon makita nila nga ang usa ka rekomend hapit na mo-expire, ang executive secretary mo-eskedyul og interbiyo sa pagbag-o. Ang mga tawo nga ni-expire na ang mga rekomend mahatagan og tambag, dayon tabangan sila nga makabalik sa dalan sa pakigsaad. Nangutana ko kon pila sa ilang natugahan nang mga miyembro ang dunay aktibo nga rekomend. Ang tubag makahingangha nga 98.6 ka porsiyento. Dihang gipangutana mahitungod sa unom nga ni-expire nga rekomend, ang mga lider nakahimo sa pagtumbok sa mga ngalan ug mihulagway ngari nako sa mga paningkamot nga gihimo nga sila ilang mapasimba og balik!

Pipila ka tuig ang milabay, ang akong pamilya mibalik sa Estados Unidos. Mahinamon kaming mosimba dinhi human sa 26 ka talagsaong katuigan nga naa sa mas gagmay, mas lagyo nga mga yunit. Gitawag ako isip ward missionary. Duna kami talagsaong lider sa misyon sa ward ug naghimo kami og makahinam nga mga butang ug pagtudlo og talagsaong mga tawo. Gihangyo ko nga motambong og miting sa konseho sa ward aron moobserba ug makakuha sa ilang tabang bahin sa mga higala nga among gitabangan. Natingala ko nga ang tanan nga gihisgotan mao ang umaabot nga kalihokan sa ward. Pagkahuman akong giduol ang among lider sa misyon sa ward ug miingon nga wala siya makahigayon sa pagbalik ug pagreport sa among mga tawo. Iyang tubag? “O, wala gyod ko ka report.”

Gikomparar ko kana sa usa ka miting sa konseho sa branch sa Lahore, Pakistan, nga akong natambongan mga semana lang ang milabay. Kining gamay nga grupo nanglingkod libot sa gamay nga lamesa, ug ang tanan nga ilang gihisgotan mao ang mga tawo. Mga ngalan. Ang matag lider moreport sa ilang pagkatinugyanan ug sa mga indibidwal ug mga pamilya nga gusto nilang matabangan. Ang tanan dunay kahigayonan nga mopakigbahin sa ilang mga hunahuna sa labing maayong mga paagi nga ilang mapanalanginan kadtong mga gihisgotan. Mga plano gihimo ug mga assignment gipanghatag. Kaanindot nga leksiyon nga moihap ug moila gamit ang ngalan gikan sa atong unang henerasyon nga mga igsoong lalaki ug mga babaye.

Dinhi sa Simbahan ni Jesukristo, gihatagan kita og instruksiyon sa nangaging mga propeta ug sa karon nga mga propeta—ug sa sundanan nga gitakda sa atong Manluluwas—kon unsaon sa pagpangalagad. Kuhaon nato ang mga ngalan, atong hinumdoman, ug atong hisgotan ang kabahin sa kaayohan sa ilang mga kalag. Ang mga lider nga mohimo niini dili gayod mahutdan sa mga aytem sa agenda sa ilang mga miting sa konseho! Ang baroganan sa pag-ihap ug pag-ila epektibo gayod. Mao kini ang pamaagi sa Ginoo. Makahimo kita og maayo. Ngadto sa Dios, kinsa maoy naglalang sa uniberso ug nagmando sa tanan, kini nga buhat—Iyang buhat ug himaya—labihan ka personal. Ug mao nga mag-agad ra gayod kanato, isip mga instrumento sa Iyang mga kamot diha sa Iyang talagsaon nga buhat sa kaluwasan ug kahimayaan. Ang mga milagro makita sa kinabuhi sa mga tawo. Sa ngalan ni Jesukristo, amen.