Bulahan ang mga Tigpasiugda sa Kalinaw

Maghanduraw uban nako nga ikaw usa ka ten-edyer sa Capernaum, duol sa Dagat sa Galilea, atol sa pangalagad ni Jesukristo. Ang pulong mikatap bahin sa usa ka rabbi—usa ka magtutudlo—kansang mensahe nakapatigom sa daghang pundok sa mga tawo. Ang mga tawo nagplano sa pag-adto ngadto sa usa ka bungtod nga nag-umbaw sa dagat aron maminaw Kaniya.

Mikuyog ka sa uban nga naglakaw sa abogon nga mga dalan sa Galilea. Sa imong pag-abot, ang dakong pundok sa katawhan nga nagtigom aron maminaw ni Jesus nakasurprisa nimo. Ang pipila hinay nga mihunghong, “Mesiyas.”

Naminaw ka. Ang Iyang mga pulong nakatandog sa imong kasingkasing. Sa taas nga paglakaw pauli sa panimalay, mipili ka nga magpakahilom kaysa makig-istorya.

Namalandong ka sa nindot nga mga butang—mga butang nga labaw pa bisan sa balaod ni Moises. Namulong Siya bahin sa pagpasagpa sa laing aping ug paghigugma sa imong mga kaaway. Siya misaad, “Bulahan ang mga tigpasiugda sa kalinaw: kay sila pagatawgon nga mga anak sa Dios.”

Sa imong reyalidad, samtang gibati nimo ang kabug-at sa lisod nga mga adlaw—kawalay kasegurohan ug kahadlok—ang kalinaw murag layo kaayo.

Paspas ang imong lakang; miabot ka sa balay nga naghangos. Ang imong pamilya nagtapok; nangutana ang imong amahan, “Sultihi mi unsay imong nadungog ug gibati.”

Mipakigbahin ka nga Siya midapit nimo sa pagdan-ag sa imong kahayag ngadto sa uban, sa pagtinguha sa pagkamatarong bisan kon gilutos. Ang imong tingog nagkurog samtang gisulti nimo pag-usab, “Bulahan ang mga tigpasiugda sa kalinaw: kay sila pagatawgon nga mga anak sa Dios.”

Mangutana ka, “Mahimo ba ko nga tigpasiugda og kalinaw nga ang kalibotan anaa sa kagubot, ang akong kasingkasing puno sa kahadlok, ug ang kalinaw ingon og layo kaayo?”

Ang imong amahan mitan-aw sa imong inahan ug hinay nga mitubag og, “Oo. Sugdan nato sa labing una nga dapit—sa atong kasingkasing. Dayon sa atong mga panimalay ug mga pamilya. Samtang magpraktis kita diha, ang pagpasiugda og kalinaw mokatap sa atong kadalanan ug kalungsoran.”

Paglabay sa 2,000 ka tuig. Dili na kinahanglan nga maghanduraw—kini ang atong reyalidad. Bisan og ang mga pagpamugos nga gibati sa nagtubo nga mga henerasyon karon lahi kaysa mga batan-on sa Galilea—panaglahi sa mga ideya, panaglahi sa relihiyon, pagbinaslanay, panag-away sa kadalanan, kasuko, ug pagpangataki diha sa social media—ang pareho nga mga henerasyon nag-atubang og panagbangi sa kultura ug tensiyon.

Salamat na lang, ang atong mga batan-ong lalaki ug babaye sa susamang paagi miadto ngadto sa ilang Wali-sa-Bukid nga mga gutlo: seminary, Alang sa Kalig-on sa Kabatan-onan nga mga komperensiya, ug Dali, Sunod Kanako. Dinhi nakadawat sila sa samang nagpadayon nga mga imbitasyon gikan sa Ginoo: sa pagdan-ag sa ilang kahayag ngadto sa uban, sa pagtinguha og pagkamatarong bisan kon gilutos, ug sa paghigugma sa ilang mga kaaway.

Nakadawat usab sila og makadasig nga mga pulong gikan sa buhi nga mga propeta sa Pagpahiuli: “Gikinahanglan ang mga Tigpasiugda og Kalinaw.” Mosupak nga dili masuk-anon. Ang panagbingkil ug garbo pulihan og pagpasaylo ug gugma. Mag-ugmad og makalig-on sa relasyon sa pagtinabangay ug pagsabot, dili makadaot sa relasyon sa pagdinapigay o pag-iyahay. Ug mao gihapon ang saad: “Bulahan ang mga tigpasiugda sa kalinaw: kay sila pagatawgon nga mga anak sa Dios.”

Ang mga kasingkasing sa nagtubo nga mga henerasyon karon puno sa pagpamatuod ni Jesukristo ug paglaom alang sa umaabot. Apan sila usab mangutana, “Mahimo ba ko nga tigpasiugda og kalinaw nga ang kalibotan anaa sa kagubot, ang akong kasingkasing puno sa kahadlok, ug ang kalinaw ingon og layo kaayo?”

Ang lanog nga tubag sa makausa pa oo! Hangpon nato ang mga pulong sa Manluluwas: “Ang kalinaw ibilin ko kaninyo. … Ayaw kamog kabalaka ug ayaw kahadlok.”

Karon, ang pagpasiugda og kalinaw sa gihapon magsugod sa labing una nga dapit—diha sa atong kasingkasing. Dayon diha sa mga panimalay ug mga pamilya. Samtang magpraktis kita diha, ang pagpasiugda og kalinaw mokatap ngadto sa atong kasilinganan ug mga komunidad.

Atong ikonsiderar kining tulo ka dapit diin ang moderno nga Santos sa Ulahing mga Adlaw makamugna og kalinaw.

Ang una mao diha sa atong mga kasingkasing. Usa ka makita nga elemento sa pangalagad ni Kristo nagpakita kon giunsa pagpaduol sa mga bata ngadto kaniya. Anaa diha ang timailhan. Ang pagtan-aw ngadto sa putli ug inosenteng nagpasiugda og kalinaw nga kasingkasing sa usa ka bata mahimong inspirasyon sa atong mga kasingkasing. Ania kon giunsa pagtubag sa pipila ka bata sa Primary ang “Unsa man ang tigpasiugda og kalinaw?”

Akong ipakigbahin ang ilang mga tubag gikan sa ilang kasingkasing! Si Luke miingon, “Kanunayng motabang sa uban.” Si Grace mipakigbahin kon unsa ka importante nga mopasaylo sa usag usa, bisan kon ingon og dili kini patas. Si Anna miingon, “Nakakita ko og usa ka tawo nga murag walay kadula, mao nga nakigdula ko niya.” Si Lindy namalandong nga ang pagkahimong tigpasiugda og kalinaw mao ang pagtabang sa uban. “Dayon ipadayon nimo kini. Magsige kini og padayon.” Si Liam miingon, “Dili magminaot sa mga tawo, bisan kon nagminaot sila nimo.” Si London miingon, “Kon ang usa ka tawo nanungog nimo o nagminaot nimo, ingnon nimo og, ‘Palihog hunong na.’” Si Trevor miobserbar, “Kon adunay usa na lang ka donut ang nahabilin ug kamong tanan ganahan, manghatag ka.”

Kining mga tubag sa mga bata alang nako mao ang ebidensya nga kitang tanan natawo nga adunay balaanong pagbati sa kamabination ug kaluoy. Ang ebanghelyo ni Jesukristo moamuma ug mohiusa niining balaanong mga kinaiya, lakip na sa pagpasiugda sa kalinaw, sulod sa atong mga kasingkasing, nagpanalangin nato niini nga kinabuhi ug sa sunod.

Ikaduha, mag-ugmad og pagpasiugda sa kalinaw diha sa atong mga panimalay pinaagi sa paggamit sa sundanan sa Ginoo sa pag-impluwensya sa atong mga relasyon sa usag usa: sa pagdani, sa pagkamainantoson, sa kalumo, sa pagkamabination, sa kaaghop, ug sa tiunay nga paghigugma.

Ania ang makapadasig nga istorya nga nagpakita kon giunsa sa pamilya paghimo sa pagpasiugda sa kalinaw nga usa ka kalihokan sa pamilya, nagpraktis niini nga mga baroganan.

Ang mga anak niini nga pamilya nanlimbasog sa ilang relasyon ngadto sa usa ka hamtong nga ang kinaiya kanunay nga nagmug-ot, mapahitas-on, ug dali masuko. Ang mga bata, nasakitan ug nasagmuyo, naghunahuna nga ang bugtong paagi sa pagsulbad mao ang pagsunod nianang sama nga bati nga kinaiya.

Usa ka gabii, ang pamilya bukas nga naghisgot mahitungod sa tensiyon ug sa negatibong epekto niini. Ug dayon mitumaw ang ideya—dili lang solusyon apan usa ka eksperimento.

Imbes ang tubag dili motingog o mosingka, ang mga anak mobuhat og butang nga wala damha: motubag sila nga mabination. Dili lang kalma nga pagtahod apan tinuoray, kinasingkasing nga pagpahayag og mabinationg mga pulong ug kamanggihunahunaon, bisan unsaon pa sila pagtratar agi og balos. Ang tanan miuyon nga sulayan kini sa gitakda nga panahon, human niana magpundok sila og balik ug mamalandong.

Bisan kon ang uban nagpanagana sa sinugdanan, mapasaligon sila sa plano uban sa tinuoray nga mga kasingkasing.

Unsay sunod nga nahitabo nindot kaayo.

Ang dili mahigalaon nga panagsultihanay misugod sa pagkamahigalaon. Ang mga pahiyom mipuli sa pagmug-ot. Ang hamtong, kanhi suplado ug mapintas, misugod og kausab. Ang mga bata, nalig-on sa ilang pagpili sa pagdumala uban sa gugma, nagmalipayon sa kausaban. Ang kausaban tinuoray gayod nga ang giplano nga miting wala na gayod kinahanglana. Ang kamabination naghimo sa hilom nga buhat niini.

Nianang higayona, ang tinuod nga kasuod sa panaghigalaay namugna, nagdasig sa tanan. Aron mahimong mga tigpasiugda sa kalinaw, kita mopasaylo sa uban ug tinuoray nga molig-on sa uban imbes moguba nila.

Ikatulo, pagpasiugda og kalinaw diha sa atong mga komunidad. Sa gubot nga katuigan sa Ikaduhang Gubat sa Kalibotan, si Elder John A. Widtsoe mitudlo: “Ang bugtong paagi sa pag-ugmad og malinawon nga komunidad mao ang pag-ugmad og mga lalaki ug babaye kinsa mga nahigugma ug mga tigpasiugda og kalinaw. Ang matag indibidwal, pinaagi niana nga doktrina ni Kristo … naghupot diha sa iyang mga kamot sa kalinaw sa [tibuok] kalibotan.”

Ang mosunod nga istorya sa matahom nga paagi naghulagway niana nga pagtulun-an.

Pipila ka tuig ang milabay, duha ka lalaki—usa ka Muslim nga imam ug usa ka Kristiyano nga pastor gikan sa Nigeria—nagbarog sa magkaatbang nga habig sa sakit nga panaglahi sa relihiyon. Matag usa nag-antos sa hilabihan. Apan, pinaagi sa makaayo nga gahom sa pagpasaylo, mipili sila nga maghiusa sa paglakaw sa dalan.

Si Imam Muhammad Ashafa ug si Pastor James Wuye nahimong managhigala ug sa wala damha nagtambayayong alang sa kalinaw. Nagtambayayong silang miestablisar og usa ka sentro nga kapamalandongan sa managlahi og tinuohan. Karon nagtudlo sila sa uban nga ang kasilag pulihan og paglaom. Isip kaduha na nga napili sa Nobel Peace Prize, bag-ohay lang nahimo sila nga labing una nga nakadawat sa Commonwealth Peace Prize.

Kining kanhi nga magkaaway nagkuyog na karon sa pagbiyahe sa pagtukod pag-usab sa unsay nahugno, buhi nga mga saksi nga ang imbitasyon sa Manluluwas nga mahimong mga tigpasiugda sa kalinaw dili lang posible—kini gamhanan.

Kon kita masayod sa himaya sa Dios, niana “dili kita maghunahuna nga pasakitan ang usag usa, apan magpakabuhi nga malinawon.” Sa atong mga kongregasyon ug sa atong mga komunidad, hinaot nga atong pilion ang pagtan-aw sa usag usa isip mga anak sa Dios.

Sa kinatibuk-an, ako motanyag og imbitasyon. Ang pagpasiugda sa kalinaw nagkinahanglan og aksiyon—unsa man kaha kana, alang sa matag usa nato, sugod ugma? Mahimo ba ninyong ikonsiderar ang usa ka semana, tulo ka lakang nga plano sa pagkahimong tigpasiugda sa kalinaw?

1. Usa ka panimalay nga walay panagbingkil: Kon ang panagbingkil magsugod, hunong og kadali ug mosugod pagsulti og mabination nga mga pulong ug mga buhat.

2. Digital nga pagpalig-on sa relasyon: Sa dili pa mo-post, mo-reply, o mokomentaryo sa online, pangutana, Makalig-on ba kini sa relasyon? Kon dili, hunong. Ayaw i-send. Hinuon, mopakigbahin og kaayohan. Mosangyaw og kalinaw sa dapit nga aduna ang kasilag.

3. Moayo ug maghiusa pag-usab: Matag sakop sa pamilya mahimong mangita sa nagkaproblema nga relasyon aron mangayo og pasaylo, mangalagad, moayo, ug maghiusa pag-usab.

Mga pipila na ka bulan sukad nga akong gibati ang dili malimod nga impresyon nga misangpot niini nga mensahe: “Bulahan ang mga Tigpasiugda sa Kalinaw.” Sa pagtapos, akong ipakigbahin ang akong mga impresyon nga akong gibati sa akong kasingkasing hangtod karon.

Ang pagpasiugda sa kalinaw usa ka Kristohanon nga hiyas. Ang mga tigpasiugda sa kalinaw usahay mahinganlan og kulang sa kaalam o huyang—gikan sa tanang habig. Apan, ang pagkahimong tigpasiugda sa kalinaw dili pagkahimong huyang apan pagkahimong lig-on sa paagi nga dili masabtan sa kalibotan. Ang pagpasiugda sa kalinaw nagkinahanglan og kaisog ug pag-uyon-uyon apan wala magkinahanglan nga isakripisyo ang baroganan. Ang pagpasiugda sa kalinaw mao ang pagdumala uban sa bukas nga kasingkasing, dili sirado nga hunahuna. Kini mao ang pagduol sa usag usa sa mahigalaong paagi, dili sa masuk-anon nga paagi. Ang pagpasiugda sa kalinaw dili usa ka bag-ong butang, bag-ong balita. Gitudlo kini ni Jesukristo mismo, diha sa Biblia ug sa Basahon ni Mormon. Ang pagpasiugda sa kalinaw gitudlo sa moderno nga mga propeta sukad pa sa labing sayo nga bahin sa mga adlaw sa Pagpahiuli hangtod karon.

Kita nagtuman sa atong balaanong tahas isip mga anak sa mahigugmaong Langitnong Amahan kon kita maningkamot nga mahimong mga tigpasiugda sa kalinaw. Ako mopamatuod ni Jesukristo, nga mao ang Prinsipe sa Kalinaw, ang Anak sa buhi nga Dios, sa ngalan ni Jesukristo, amen.