Ang Ginoo Nagpadali sa Iyang Buhat

Si Charles Dickens naila nga misugod sa iyang nobela nga The Tale of Two Cities uban sa pagdeklarar nga “Mao kadto ang labing maayo nga panahon ug labing ngil-ad nga panahon.” Sa pagsabot, Ingon usab niana sa atong panahon karon.

Kita nagpuyo sa gubot nga panahon nga [ang] “tibuok yuta nagkaguliyang.” Ang pahimangno ni Presidente Russell M. Nelson, isip mga sumusunod ni Jesukristo, nga mahimong tigpasiugda sa kalinaw gihatagan og gibug-aton karong buntag ni Elder Gary E. Stevenson. Importante kini nga bahin sa pagpasiugda og panaghiusa, kalinaw, ug pagkaayo alang “sa labing grabe nga mga panahon.”

Apan kita nagpuyo usab sa “labing maayong panahon,” nga mao ang akong hatagan og gibug-aton. Ang Ginoo, sa pasiuna sa Doktrina ug mga Pakigsaad, seksiyon 1, mipahayag, ang kahingpitan sa ebanghelyo “mapahayag … hangtod sa kinatumyan sa kalibotan.” Ang Ginoo nagpadali gayod sa Iyang buhat sa atong panahon. Kita kinahanglan nga magmapasalamaton gayod alang sa pagpadali, nga nahitabo ug mahitabo pa bisan niining mahagiton nga mga panahon. Kita nagpuyo sa usa ka panahon nga ang mga sumusunod sa Ginoo adunay pribilihiyo sa pagpaminaw sa Iyang tingog ug pagsanong inubanan sa bukas nga mga kasingkasing ug mga hunahuna. Ang mga miyembro sa Ang Simbahan ni Jesukristo sa mga Santos sa Ulahing mga Adlaw, nga mapasaligon ngadto sa Manluluwas ug sa Iyang mga sugo, nakakita og katuyoan ug dakong personal nga kalinaw.

Sa lainlaing mga panahon sa kasaysayan sa Simbahan, dihay mahinungdanong pagdaghan niadtong kinsa misulod sa dalan sa pakigsaad. Ang usa sa mao nga panahon nahitabo tali sa 1837 ug 1850. Ang pipila sa unang mga Apostol sa gipahiuli nga Simbahan sa Ginoo nagserbisyo og mga misyon sa United Kingdom. Kini nga mga misyon miresulta sa liboan nga mipasakop sa Simbahan, ug pagka-1850 dihay mas daghang miyembro sa Simbahan nga nagpuyo sa United Kingdom kay sa Estados Unidos. Niana nga higayon, ang Ginoo misugo niini nga mga Santos nga magpundok didto sa Utah. Ang dinaghan nga paglalin nahitabo, ang pipila gisuportahan pinaagi sa Perpetual Emigrating Fund.

Ako ganahan sa istorya sa pag-abot sa daghan kaayong kinabig ngadto sa Walog sa Salt Lake gikan sa England ug Wales niadtong 1852. Ang grupo gisugat sa Unang Kapangulohan sa bukana sa Emigration Canyon, nga giubanan sa Banda ni Kapitan Pitt. Ang Deseret News mihulagway kanila nga “usa ka banda sa mga magpapanaw [lakip] sa mga babaye ug mga bata, naglakaw, nainitan sa adlaw, ug nasugamak sa klima, apan dili magul-anon, ang ilang mga kasingkasing malaumon ug positibo, nga yanong nakita sa ilang malipayon ug sadya nga mga panagway.”

Samtang sila “miagi sa Lugar sa Templo, … samtang liboan ka lalaki, mga babaye ug mga bata, nagpundok gikan sa lain-laing bahin sa siyudad, sa paghiusa sa mahimayaon ug malipayon nga pagtimbaya.” Si Presidente Brigham Young namulong ngadto kanila: “Hinaot nga ang Ginoong Dios sa Israel mopanalangin ninyo. … Kami nag-ampo alang kaninyo sa kanunay, liboan sa pag-ampo ang nahalad alang kaninyo, kada adlaw, ngadto Kaniya nga mimando kanato sa pagpundok sa Israel, pagluwas sa katawhan pinaagi sa pagsangyaw sa ebanghelyo, ug sa pag-andam kanila alang sa pag-anhi sa Mesiyas.”

Sa diwa nianang sadya nga okasyon, tugoti ko sa makausa pa nga moseguro sa tanang bag-ong kinabig ug niadtong mibalik na sa Simbahan sa Ginoo: Kami nahigugma kaninyo, kami nagkinahanglan kaninyo; ang Ginoo nagkinahanglan kaninyo. Dili tingali kami makaabi-abi ninyo gamit ang mga banda, apan kami nag-ampo nga ang mga panalangin sa langit moabot sa inyong mga paningkamot sa pag-uswag diha sa dalan sa pakigsaad nga modala ngadto sa Dios nga Amahan ug ni Jesukristo sa celestial nga gingharian.

Adunay klaro nga ebidensya nga ang pagtuo diha ni Jesukristo nagkadaghan sa atong panahon. Sa Ang Simbahan ni Jesukristo sa mga Santos sa Ulahing mga Adlaw, adunay talagsaon nga pagdaghan sa kinabig ug partisipasyon sa kinabig. Sa milabay nga 36 ka bulan, dul-an sa 900,000 ka kinabig ang mipasakop sa Simbahan. Kini nga mga kinabig naglangkob sa 5 ka porsento sa total nga mga miyembro sa Simbahan. Atong gitimbaya ang bag-ong mga miyembro uban sa bukas nga mga bukton ug dakong pagpasalamat sa dalan nga inyong gipili.

Kining 900,000 ka kinabig sa milabay nga 36 ka bulan milabaw sa total nga mga miyembro sa Simbahan sa ika-110 nga anibersaryo niadtong 1940, nga labaw lang og gamay sa 860,000 ka miyembro. Kini mao ang tuig nga sila si Elder Jeffrey R. Holland, Elder Dieter F. Uchtdorf, ug ako natawo.

Kining talagsaon nga bag-ong mga kinabig naggikan sa tanang bahin sa kalibotan. Sa unang unom ka bulan niining tuiga, ang mga pagkakabig misaka sa labaw sa 20 ka porsento kaysa sa miaging tuig sa Europe, Africa, Asia, sa Pacific, ug Latin America. Sa Estados Unidos nakita nato ang 17 ka porsento nga pagsaka. Ang buhat sa Ginoo nagpadayon sa pag-uswag sa gamahanang mga paagi. Kining nagsaka nga gidaghanon mao ang klaro nga saksi nga ang ebanghelyo nagtandog og mga kasingkasing ug nag-usab og mga kinabuhi bisan asa.

Sa atong panahon, kining bililhon nga mga kinabig dili na magpundok sa sentro nga dapit. Tungod sa pagtuo ug pagpahinungod sa mga miyembro sa Simbahan, ang mga kapanguhaan anaa aron sa pagsuporta sa mga kongregasyon—sa pagtukod og mga chapel ug mga templo—sa tibuok kalibotan. Uban sa gikinahanglan nga mga yawe sa pagkapari ug sa mga kapanguhaan nga gihatag, ang makaluwas nga mga ordinansa anaa na karon sa kadaghanang bahin sa kalibotan.

Bisan asa pa kita magpuyo, ang kasamtangan nga mga miyembro kinahanglan nga motimbaya sa gatosan sa kaliboan ka bag-ong miyembro sama sa atong gihimo sa English ug Welsh nga mga Santos nga akong gihulagway gikan sa sayong bahin sa atong kasaysayan. Ganahan ko sa pakigpulong ni Elder Gerrit W. Gong niini nga sesyon diin mitudlo siya nga walay usa nga maglingkod nga mag-inusara sa emosyonal o espirituwal nga paagi.

Ang atong sagrado nga katungdanan mao ang pagdawat ug pag-abi-abi sa bag-o ug sa mibalik nga mga miyembro. Samtang ang Ginoo nagpadali sa Iyang buhat, kita kinahanglan nga mohigugma, moamuma, ug moserbisyo niadtong kinsa modawat sa Iyang ebanghelyo. Kita makatukod og Zion nga katawhan, diin kita “usa sa kasingkasing ug usa sa hunahuna, ug [nagpuyo] sa pagkamatarong.” Aron mahiusa kauban sa Ginoo, kita kinahanglan nga maghiusa sa atubangan sa Ginoo. Ang tanang miyembro, bisan kanus-a nabunyagan mopakigbahin og responsibilidad sa pag-abi-abi sa uban.

Ang akong tambag ngadto sa mga miyembro sa Simbahan mao ang paggakos niining bililhon, pinili nga mga tawo nga midawat sa ebanghelyo ni Jesukristo.

Si Presidente Gordon B. Hinckley mitudlo kanato nga ang matag bag-ong kinabig nagkinahanglan og “usa ka higala, usa ka responsibilidad, ug pag-amuma pinaagi ‘sa maayo nga pulong sa Dios’ (6:4).” Kita mahimong apil sa mga higala nga moseguro nga kining bag-ong mga kinabig nga nahisakop sila ug dili lang mga bisita. Kita makatabang nila sa pagsabot nga sila mga disipulo ni Jesukristo kinsa makapangalagad ngadto sa uban ug modawat og mga calling sa pagserbisyo. Ang batan-ong mga kinabig kinahanglan nga mokonsiderar nga moserbisyo og full-time nga misyon. Ang tanan kinahanglan nga determinado nga maningkamot nga magpuyo og kinabuhi nga sama ni Kristo.

Daghan ang nagpasakop sa Simbahan uban sa dakong personal nga sakripisyo ug nagkinahanglan gayod kaayo sa gugma ug suporta sa ilang isig ka mga Santos.

Ngadto niadtong bag-o o mibalik sa pagtuo, adunay mga hagit nga inyong atubangon. Pagmapailobon sa inyong kaugalingon. Ang mga misyonaryo mitudlo ninyo sa doktrina nga mahinungdanon ug mipasabot sa mga pakigsaad ug mga ordinansa sa gingharian, nga gilatid diha sa mga kasulatan ug sa Isangyaw ang Akong Ebanghelyo.

Ang pagdawat sa mga ordinansa ug mga pakigsaad ug pagsunod sa mga sugo mahinungdanon. Tutoki ang mga pakigsaad nga gikinahanglan alang sa kahimayaan. Ang ebanghelyo makapahimo sa kahimayaan nga posible, nga nagkinahanglan sa paghimo ug pagtuman sa sagrado nga mga pakigsaad uban sa Dios. Gawas sa bunyag, kompirmasyon, ug pagtugyan sa Melchizedek nga Pagkapari alang sa mga lalaki, ang mga pakigsaad nga atong sudlan ipahigayon sulod sa templo. Alang sa mga patay, ang matag usa niining makaluwas nga mga ordinansa ipahigayon lamang sulod sa templo. Mao nga, ang pag-andam sa imong kaugalingon alang sa templo kinahanglan nga usa ka dinalian nga tumong.

Kamo usahay mobati nga dili igo ang inyong nahibaloan. Ang kahibalo sa ebanghelyo usa ka dakong panalangin nga maangkon sa hinay-hinay sa paglabay sa panahon, apan kini dili usa ka makaluwas nga ordinansa. Ang ebanghelyo dili usa ka testing sa kahibalo. Hinuon, si Presidente Nelson misaad: “Kon mainampuon kamo nga magtuon sa Basahon ni Mormon kada adlaw makahimo kamo og mas maayong mga desisyon—kada adlaw. … Kon mamalandong kamo unsay inyong gitun-an, ang mga bintana sa langit ablihan, ug makadawat kamo sa mga tubag sa inyong mga pangutana ug direksyon sa inyong kinabuhi.”

Agi og dugang, matag tuig gipuli-puli sa kurikulom sa Simbahan sa mga miting sa Dominggo nga maghisgot gamit ang Daang Tugon, Bag-ong Tugon, Basahon ni Mormon, ug Doktrina ug mga Pakigsaad. Paglabay sa panahon kamo mobati nga mas masaligon samtang ang inyong kahibalo sa ebanghelyo motubo. Ang regular nga pagtuon sa mga kasulatan mopanalangin ug mopalambo sa inyong mga kinabuhi pinaagi sa pagpalig-on sa inyong pagkakabig ngadto sa ebanghelyo ni Jesukristo.

Ang pagkat-on sa putli nga doktrina ni Jesukristo mao ang tibuok kinabuhi nga paningkamot, sa pagsabot sa doktrina ug sa pagpakabuhi nga sama ni Kristo. Ang mahinungdanong mga pakigsaad naghatag og usa ka paagi nga atong gihulagway nga dalan sa pakigsaad. Kini nga mga baroganan puno sa gahom nga gitudlo ni Presidente Nelson. Ang tanang miyembro, ilabi na sa bag-o ug mibalik nga mga miyembro, mapanalanginan pinaagi sa pagtuon ug pagsagop sa iyang mapanagnaon nga mga mensahe bahin sa mga pakigsaad ug sa dalan sa pakigsaad.

Kon kamo maghimo og tumong sa takos nga pagdawat sa matag pakigsaad nga gikinahanglan alang sa kahimayaan, kamo anaa sa dalan nga padulong sa celestial nga gingharian. Ang templo ug mga ordinansa sa templo kinahanglan mao gayod ang atong tutokan. Kadaghanan sa mga pakigsaad anaa sa matag indibidwal. Ang usa ka pakigsaad, mahangtorong kaminyoon, naglakip sa paghiusa sa inyong mga paningkamot uban sa usa ka kompanyon. Ang atong tumong kinahanglan mao ang pagpangita nianang mahangtorong kompanyon.

Hinuon, ayaw pagkawala sa paglaom kon ang mahangtorong kaminyoon dili posible niining higayona. Ang mga propeta nagtudlo nga walay panalangin nga ihikaw gikan sa matinud-anong mga miyembro nga nagtuman sa mga sugo. Usa sa propeta sa Basahon ni Mormon, si Hari Benjamin, nindot kaayo niya nga pagkasulti: “Niadtong nagsunod sa mga sugo sa Dios. … bulahan sila sa tanang butang, … ug kon … [magpabilin] silang matinud-anon hangtod sa kataposan … makapuyo sila uban sa Dios sa kahimtang nga walay kataposang kalipay.”

Inyong mahibaloan, kon wala pa ninyo mahibaloi, nga ang mga miyembro dili perpekto. Ang gipadayag nga doktrina miklaro niini nga sa atong pagpuyo dinhi sa yuta, kita makahimo og mga sayop. Kita nagpuyo sa dili perpekto ug napukan nga kalibotan, dili celestial nga kalibotan. Kini nga kinabuhi mao ang panahon sa pagsulay, uban sa kanunay nga mga oportunidad sa paghinulsol ug pagmatuod sa atong mga kaugalingon.

Kitang tanan mobati nga dili igo samtang kita maningkamot nga mahimong sama ni Jesukristo. Ang Iyang Pag-ula nagtugot nato sa paghinulsol matag adlaw kon kita makasala. Sama ni Nephi, laing propeta sa Basahon ni Mormon, miingon: “Kinahanglan nga [kita] mopadayon sa unahan uban ang pagkamakanunayon diha kang Kristo, magbaton og hingpit nga kahayag sa paglaom, ug gugma sa Dios ug sa tanang tawo. Mao nga, kon kamo mopadayon sa unahan, magpakabusog sa pulong ni Kristo, ug molahutay hangtod sa kataposan, tan-awa, sa ingon niana miingon ang Amahan: Makabaton kamo og kinabuhing dayon.”

Samtang kita mamalandong sa mga hagit sa atong panahon, kinahanglan nga hinumdoman nato nga ang Manluluwas, atol sa Iyang yutan-ong pangalagad, nagpuyo usab sa gubot ug bayolente nga panahon. Ang Iyang gitutokan dili ang politikanhon nga mga hagit sa panahon; kondili ang pagkahingpit sa mga Santos.

Ang pagsunod sa Manluluwas ug sa Iyang doktrina ug mga pagtulun-an wala gayod sukad mahimong sayon sa usa ka kalibotan nga kanunay anaa sa kaguliyang. Dili kadto sayon alang sa Manluluwas sa mausabon nga kalibotan atol sa iyang mortal nga pagpuyo, dili sayon alang sa atong unang mga lider ug mga miyembro, ug dili sayon alang kanato. Maayo gani, ang buhi nga mga propeta naghatag og giya nga atong gikinahanglan alang sa atong panahon. Si Presidente Dallin H. Oaks mopadayon nianang gamhanan nga legasiya.

Ako mopamatuod nga ang doktrina sa Simbahan ni Jesukristo mahangtoron ug tinuod. Ako mohatag sa akong segurado ug piho nga saksi nga si Jesukristo buhi ug tungod sa Iyang Pag-ula, kita mahimong makig-uban Kaniya. Sa sagradong ngalan ni Jesukristo, amen.