Nga ang Tanan Mahatagan og Kaayohan

Isip miyembro sa Ang Simbahan ni Jesukristo sa mga Santos sa Ulahing mga Adlaw, napanalanginan uban sa kompanyon sa sakop sa Diosnong Kapangulohan, kita makadawat og tabang sa labing importante nga Magtutudlo. Ang Espiritu Santo nasayod sa tanang butang nagpamatuod sa kamatuoran, ug “mopahinumdom [kanato] sa tanan.” Si Presidente Russell M. Nelson balikbalik nga namulong kanato mahitungod sa kaimportante sa pagpaminaw sa tingog sa Ginoo. Siya mitudlo kanato unsaon pagdapit ang giya sa Espiritu Santo ug balikbalik nga mihangyo kanato sa pagpalambo sa atong espirituwal nga kapasidad sa pagdawat og pagpadayag.

Karon ako modapit kaninyo sa pagkosiderar sa tahas sa Espiritu Santo, ilabina sa may kalabotan sa pagkat-on sa ebanghelyo ug pagtudlo diha sa panimalay ug diha sa simbahan. Ang Espiritu Santo ihatag pinaagi sa pag-ampo nga adunay pagtuo ug samtang kita maningkamot nga takos nga magpuyo niining bililhong gasa. Ang dinasig nga manwal sa Simbahan Pagtudlo sumala sa Pamaagi sa Manluluwas naglatid sa dugang nga mga baroganan nga giestablisar sa Ginoo nga magtabang sa pagdapit sa impluwensya sa Espiritu Santo.

Usa niini nga mga baroganan mao ang pagdapit og makugihon nga pagkat-on. Sa nangagi, kita tingali naghunahuna nga ang pagtudlo usa ka higayon sa usa ka ginikanan o magtutudlo sa pagdapit sa Espiritu ngadto sa ilang kaugalingong pagpangandam ug dayon ipakigbahin ang ilang nakat-onan ngadto sa mga bata o sa mga sakop sa klase, nga ang tahas mao ang pagpaminaw. Apan mas epektibo kon kita, isip mga tigkat-on, motambong usab nga andam ug kon ang mga magtutudlo maghimo og kasinatian sa pagkat-on nga nag-awhag og personal nga pagpadayag direkta sa atong mga kasingkasing ug mga hunahuna. Dayon, samtang kita adunay mga oportunidad sa pagpakigbahin sa atong nakat-onan pinaagi sa atong pagtuon ug gikan sa Espiritu Santo, kita nagtinabangay sa usag usa nga matudloan ug malig-on. Samtang atong gamiton ang mga baroganan sa ebanghelyo, ang Espiritu mosaksi pag-usab sa katinuod niini.

Sa tanang butang, si Jesukristo ang atong hingpit nga ehemplo. Siya midapit sa matag usa kanato nga mahimong makugihon nga mga tigkat-on ug sa pag-ako sa responsibilidad sa atong kaugalingon nga mga pagpamatuod. Siya midapit sa iyang mga disipulo sa pagpangandam sa pagkat-on, sa pagpakigbahin sa ilang nakat-onan ug sa paglihok inubanan sa hugot nga pagtuo. Siya nag-ampo alang kanila, nakakita sa ilang balaanong potensiyal, naminaw kanila, ug nagtabang nila nga masayod nga sila gihigugma og gikinahanglan.

Isip mga magtutudlo, kita mas makatutok sa pag-uswag sa mga tigkat-on, sa pagtubag sa ilang mga panginahanglan, ug sa pagtabang nila nga makapalambo og espirituwal nga mga kinaiya sa pagtuon sa tibuok kinabuhi nga pagkadisipulo. Isip mga tigkat-on, kon kita mogamit sa atong kabubut-on diha sa proseso sa pagkat-on, kita nagpahibalo sa Espiritu Santo sa atong kaandam nga Iyang matudloan.

Ako mapasalamaton alang sa magtutudlo kinsa midapit kanako nga mahimong usa ka mas maayong tigkat-on. Sa dihang nagsugod ko sa kolehiyo, nasaypan nako sa paghunahuna nga ang eskwelahan usa ka butang nga lahutayon aron tugotan nga makadula sa mga sport. Usa ka adlaw, human magbasa sa usa ka papel nga akong gisulat, ang akong propesor misulti nako nga siya naghunahuna nga ako usa ka ginasahan og matukibon nga tighunahuna. Ako wala gani makasabot unsa ang gipasabot niana. Siya misulti nga uban sa mas nakatutok nga paningkamot, ako mahimong maayo nga estudyante. Wala gayod ko makahunahuna niana. Ang iyang interes, pagdasig, ug mga pagdapit nakapausab sa dagan sa akong edukasyon ug nakapanalangin pag-ayo sa akong kinabuhi.

Lain pa nga baroganan nga may kalabotan sa pagdapit sa Espiritu Santo mao ang pagtudlo sa tinuod nga doktrina. Kini nagpasabot nga ang atong pagtuon sa ebanghelyo ug mga instruksiyon naggikan sa pulong sa Dios ug nga kita dili mopasulabi o mangagpas kon unsa pa ang wala gipadayag sa Ginoo. Hinuon, atong tutokan ang mahinungdanon ug mahangtorong mga baroganan sa ebanghelyo, diin nagtugot sa Espiritu sa pagpamatuod sa kamatuoran. Usab, kita mosunod sa ehemplo sa Manluluwas. Siya miingon, “Ang akong gitudlo dili gikan kanako kondili sa Dios nga nagpadala kanako.”

Ang tinuod nga doktrina makita diha sa mga kasulatan ug sa mga pagtulun-an sa mga propeta sa modernong panahon. Ang awhag sa Ginoo nga magtuon sa mga kasulatan isip indibidwal ug isip mga pamilya ug motambong sa simbahan matag semana aron magtuon sa Iyang ebanghelyo naghatag og usa ka talagsaon nga pundasyon sa pagkat-on sa Iyang doktrina ug makadungog sa Iyang tingog. Kita nagsiksik sa mga kasulatan aron makasabot sa istorya, ang mga baroganan nga gitudlo niini, ug ang paggamit niini nga mga kamatuoran sa atong mga kinabuhi. Usa ka panalangin nga nadawat ang mga kasulatan nga magamit dayon. Hunahunaa sila Adan ug Eva, si Abinadi, ug gani ang Labawng Magtutudlo, si Jesukristo, mobisita sa atong panimalay o mga klase aron motudlo kanato. Sila makahimo kon kita magbusog sa mga pulong sa Dios. Uban sa mapadayonong paningkamot, kita makakat-on sa pagsabot ug paghigugma sa mga kasulatan ug pagsalig nga kini adunay mga tubag sa mga pangutana sa kalag.

Dihay panahon sa wala pa kami maminyo sa dihang ang akong asawa, nga si Kristi, nanglimbasog sa pagbati sa gugma sa Langitnong Amahan ug sa pagsabot sa Iyang plano alang kaniya. Samtang siya nag-ampo alang sa giya, ang usa ka impresyon miabot nga siya kinahanglan nga motambong sa institute, mao nga siya mi-enroll sa Bag-ong Tugon nga klase. Ang pamaagi sa pagtudlo sa iyang magtutudlo sa Institute gikan sa mga kasulatan, bisan sa paagi sa iyang paghawid niini, nagpakita unsa niya kamahal ang pulong sa Dios. Samtang siya nagtambong, ang Espiritu Santo naghunghong ngadto kaniya nga adunay usa ka butang sa mga kasulatan nga iyang gikinahanglan. Ang gugma sa iyang magtutudlo sa mga kasulatan ug ang mga pag-aghat sa Espiritu Santo nakahatag kaniya og tinguha nga magsugod og seryuso nga pagtuon sa pulong sa Dios—diin nahimong usa ka tibuok kinabuhi nga panaw sa halawom nga pagkakabig ug mapahinungoron nga serbisyo.

Sa kataposan, samtang ang Pagtudlo sumala sa Pamaagi sa Manluluwas nagsugyot, ang atong pagtudlo ug pagkat-on kinahanglan nga kanunayng nakatutok ni Jesukristo. Kita kanunayng mas makasulti ug mas mobalaan Kaniya ug mas magtinguha og mga oportunidad sa pagpahayag sa pagpamatuod, pasalamat, ug gugma alang Kaniya. Bisan unsa ang kahimtang, samtang kita mohinumdom Kaniya, kita makaangkon sa “iyang Espiritu uban [kanato].”

Ang usa ka paagi sa pagtutok ni Jesukristo diha sa atong pagtudlo mao ang paghatag og gibug-aton nga Siya mao ang hingpit nga ehemplo, ang representasyon ug pagpahayag sa tanan nga mga baroganan sa ebanghelyo. Bisan kon dili Siya direkta nga gihisgotan diha sa asoy sa kasulatan, mahimo gihapon kitang motudlo Kaniya isip ehemplo sa baroganan nga gitudlo. Tingali yano kitang mangutana “Makahunahuna ba kamo og panahon sa dihang si Jesukristo mipakita niini nga baroganan?”

Kita usab makatutok Kaniya pinaagi sa pagkat-on sa Iyang mga titulo, mga tahas, ug mga hiyas, nagtinguha sa pagkat-on dili lamang unsa ang Iyang gibuhat apan mas makasabot kon si kinsa usab Siya. Pananglitan, kon magtuon sa baroganan sa paghinulsol, importante kining masabtan kon unsaon sa paghinulsol. Apan mahinungdanon usab ang paghinumdom unsa ang gibuhat ni Jesukristo aron mahimong posible ang paghinulsol ug masabtan unsa ang gitudlo sa paghinulsol ngari kanato mahitungod Kaniya, mahitungod sa iyang tinuod nga kinaiyahan ug mga hiyas. Unsa ang gisulti sa atong oportunidad sa paghinulsol mahitungod sa gugma, pailob, ug kaluoy, Iyang pagtuo sa atong balaang potensiyal, Iyang kaandam sa pag-ula sa atong mga sala, ug ang kalipay nga Iyang makaplagan sa pagpasaylo? Ug ang pagsabot sa Iyang mga titulo—sama sa Kordero sa Dios, Manunubos, ug Mananambal—nagtabang nato nga makita nga ang paghinulsol mao ang Iyang imbitasyon sa paglimpyo, pag-usab, ug pag-ayo kanato. Sa pagtutok sa unsay Iyang gibuhat alang kanato ug kon unsa ang gisulti niini mahitungod kon si kinsa Siya makatabang nato nga makaangkon og “pagtuo ngadto sa paghinulsol.”

Adunay mga panahon nga tingali dili dayon nato makita ang mga hiyas sa Manluluwas nga nakalatid sa mga asoy sa kasulatan. Pananglitan, kon magbasa mahitungod sa pagbuhat og barko ni Nephi, tingali nakatutok lang kita ni Nephi. Apan ang pagtutok diha sa Manluluwas makatabang nato nga makita nga kini nga rekord wala gipreserbar aron itudlo kanato ang mahitungod sa kahalangdon ni Nephi apan aron sa pagpakita kanato sa kahalangdon sa Dios—nga Siya mihatag kanato og kusog sa pagsunod sa Iyang mga sugo ug moluwas kanato sa panahon sa panginahanglan.

Kita usab makatutok sa nag-unang tahas ni Jesukristo diha sa hingpit nga plano sa Langitnong Amahan sa kalipay. Kini makausab sa dagan sa atong mga kinabuhi nga makita ang atong mga kahimtang pinaagi sa mga panglantaw sa mahangturong plano sa Dios imbis nga tan-awon kini pinaagi sa mga panglantaw sa atong temporal nga mga kahimtang. Ang ebanghelyo dili listahan sa mga panginahanglan; kini ang maayong balita nga si Jesukristo mibuntog sa sala ug kamatayon. Kini pinaagi sa pag-akses sa Iyang kahibulongang grasya pinaagi sa pagtuman sa atong mga pakigsaad uban sa Dios nga kita makapuyo nga malipayon karon ug mangandam sa tibuok kinabuhi uban sa atong Amahan sa Langit sa mga kahangtoran. Samtang kita magkat-on sa pagtan-aw sa Langitnong Amahan ug sa Manluluwas diha sa mga kasulatan, kita mas makaila Kanila ug atong makita ang Ilang gugma ug impluwensya nga mas kanunay ug mas gamhanan sa atong mga kinabuhi.

Ako kanunay mahinumdom sa Espiritu nga akong nabati sa batan-on pa ko sa dihang ang among magtutudlo mitudlo mahitungod sa kataposang mga adlaw sa kinabuhi sa Manluluwas. Siya mitabang namo nga makita ang kamahinungdanon sa mga panghitabo didto sa kwarto sa itaas, sa Getsemani, sa Golgota, ug sa lubnganan nga walay sulod. Iyang gipakigbahin ang Iyang lawom nga pasalamat alang sa Manluluwas ug sa Iyang matuphanong tinguha sa pagsunod Kaniya. Ang Iyang pagtulun-an usa ka pagdapit sa Espiritu Santo sa pagpamatuod ni Jesukristo. Ang Espiritu nga akong nabati niana nga klase nakapalawom sa akong pagtuo ug nakapalambo sa akong gugma ug pasalamat alang sa Manluluwas. Ang impluwensiya niana nga magtutudlo nagpabilin ngari nako sa tibuok nakong kinabuhi. Sama sa gisulti sa lain nga magtutudlo, “Ato untang painiton ang atong mga kamot sa kalayo sa iyang hugot nga pagtuo.”

Sa atong mga panimalay ug mga miting sa Simabahan, samtang nakatutok kita ni Jesukristo, motudlo sa Iyang doktrina, ug makugihong magkat-on, kita nagdapit sa Espiritu Santo sa pagpalig-on sa atong pagtuo ni Jesukristo ug magtabang nato nga mahimong mas mahisama Niya, diin mao ang tinguha sa tanang pagtulun-an sa ebanghelyo ug pagkat-on.

Ako mapasalamaton sa mga magtutudlo sa akong kinabuhi, gikan sa maayong mga ginikanan ug lokal nga mga lider ug mga magtutudlo ngadto sa mga lalaki ug mga babaye kinsa gitawag sa pagtudlo ug pagpamatuod gikan niini nga pulpito, kinsa nagtabang nato nga masayod ug mosunod ni Jesukristo. Ug ako mapasalamaton sa Espiritu Santo, ang hingpit nga Magtutudlo. Kini pinaagi sa Espiritu Santo nga ako nasayod nga ang Langitnong Amahan nahigugma kanato ug adunay hingpit nga plano alang kanato; nga si Jesus mao ang Kristo, ang Manluluwas ug Manunubos sa kalibotan, ug nga ang Iyang ebanghelyo ug Simbahan napahiuli na. Ako mapasalamatong mopamatuod niining mga butanga sa ngalan ni Jesukristo, amen.