Ang Tan-awon sa Ginoo mao ang Kasingkasing
Ang tanang gikinahanglan sa Dios aron sa pagtuman sa Iyang mga katuyoan ug sa pagtabang kanato nga mahimo kita sa gusto Niya nga kita mamahimo mao ang matag usa kanato tinud-anay nga mahigugma Kaniya.
Dihang gisugo sa pagpili og bag-ong hari sa Israel gikan sa mga anak nga lalaki ni Jesse, si propeta Samuel, samtang nagtan-aw sa kinamagulangang anak ni Jesse, si Eliab, mituaw sa kahinam, “Nagtuo siya nga ang diha sa iyang atubangan mao ang pinili sa Ginoo.” Apan si Eliab dili mao ang pinili nga sulugoon sa Ginoo. Ang Manluluwas mipasidaan ni Samuel: “Ayaw pagtan-aw sa iyang panagway o sa iyang pamarog kay dili siya maoy akong pinili. Ang akong paghukom dili sama sa paghukom sa tawo kay ang tan-awon sa tawo mao ang panagway apan ang tan-awon sa Ginoo mao ang kasingkasing.”
Samtang si David dili kaayo lig-on sa pisikal o labing hanas sa iyang mga igsoong lalaki, ang iyang kasingkasing lig-on sa panan-aw sa Dios. Siya nagmahal sa Dios sa tibuok niyang kasingkasing ug adunay lawom nga tinguha sa pagsunod Kaniya. Siya adunay dili matarog nga pagtuo diha sa gugma, gahom, ug sa gisaad nga mga panalangin sa Dios, ingon nga iyang gipakita sa ulahi sa dihang siya walay kahadlok nga nakig-away ug mipildi kang Goliat uban sa tabang sa Ginoo.
Kini nga istorya nagtudlo kanato sa tanang gikinahanglan sa Dios aron sa pagtuman sa Iyang mga katuyoan ug sa pagtabang kanato nga mahimo kita sa gusto Niya nga kita mamahimo mao ang matag usa kanato tinud-anay nga mahigugma Kaniya. Ngadto sa usa ka abogado, Siya misugo, “Higugmaa ang Ginoo nga imong Dios sa tibuok mong kasingkasing.” Ngadto ni Propeta Joseph Smith, Siya miingon, “Tan-awa ang Ginoo nagkinahanglan sa kasingkasing ug usa ka andam nga hunahuna.” Ug ngadto sa mga Nephita, ang nabanhaw nga Manluluwas milugway sa Iyang pagdapit: “Kamo mohalad og sakripisyo ngari kanako nga usa ka masulub-on nga kasingkasing ug mahinulsolon nga espiritu .”
Ngano kaha? Ang Manluluwas nagtudlo nga kon tinud-anay kita nga nahigugma Kaniya, tungod sa Iyang maulaong sakripisyo kita mapanalanginan uban sa kalig-on ug sa espirituhanong mga gasa nga atong gikinahanglan aron sa pagbuntog sa atong mortal nga mga hagit, pagbatok sa tentasyon, pagdawat og direksiyon ug pagsabot, ug pagbati sa hingpit nga kalipay ug kalinaw sa atong mga kinabuhi. “Gikan sa gagmay nga mga butang magagikan ang dagko.” Siya miingon nga Siya “[makahimo sa] mahuyang nga mga butang nga malig-on ngadto kanila” ug mopanalangin kanato sa tanan nga atong gikinahanglan aron magmalamposon niining mortal nga kinabuhi ug aron makadawat sa kinabuhing dayon. “Bulahan ang putli og kasingkasing,” Siya miingon, “kay makakita sila sa Dios.”
Ako nagtuo nga mao kini ang rason, bisan parte lang, nga si Jesukristo kasagaran mikoreher sa magtutudlo sa balaod ug mga Pareseo atol sa Iyang mortal nga mga pagpangalagad. Bisan makugihong naghupot sa Iyang balaod, ila kining gibuhat sa sayop nga mga rason. Siya mibuyag kanila, nag-ingon, “Kining mga tawhana nagpasidungog kanako sa pulong lamang, apan ang ilang kasingkasing layo kanako.”
Kini usa ka maligdong nga pahinumdom sa tanan Niyang mga disipulo nga dili lang kini mahitungod kon unsa atong gibuhat—atong mga pulong ug mga aksiyon—apan usab kon nganong atong buhaton unsa ang gisugo kanato ni Jesukristo nga buhaton—ang atong mga tinguha ug mga motibo. Siya miingon, “Kay ako, ang Ginoo, mohukom sa tanang tawo sumala sa ilang mga binuhatan, sumala sa tinguha sa ilang mga kasingkasing.” Ang atong Langitnong Amahan nagtinguha sa Iyang mga anak og sobra pa kay sa pagsunod ug sa pagserbisyo lang. Siya gusto nga mobuhat kita niadto nga mga butang nga adunay tinuod nga katuyoan tungod kay kita nahigugma Kaniya sa tibuok natong kasingkasing. Siya gusto nga kita magtinguha nga mamahimong sama Kaniya.
Karon, kon ang espirituhanong nga kahimsog sa atong mga kasingkasing mao ang nag-unang gikabalak-an sa Manluluwas—unsa ang Iyang gipangita sa tinuod nga disipulo—unsaon nato sa pagsusi ang atong mga kasingkasing ug pagkasayod kon kini nahiuyon ba sa panan-aw sa Dios?
Bag-ohay lang, samtang ang akong asawa ug ako nauli gikan sa among misyon sa Portugal, kami gipaubos sa daghang mga pag-eksamin sa kahimsog aron matimbang-timbang ang among pisikal nga kondisyon. Ang pipila niini nga pag-eksamin nakatutok sa kahimsog sa among kasingkasing—sama sa mga pag-eksamin sa dugo, echocardiograms, ug mga stress test. Ako nagtuo nga ang Manluluwas naghatag usab kanato og usa ka hut-ong sa espirituhanon nga mga pag-eksamin nga atong magamit sa pagsukod sa atong espirituwal nga kondisyon. Tugoti ko nga mopakigbahin og pipila kaninyo.
Pagtimbangtimbang sa Inyong Kasingkasing Gamit ang Espirituhanong Pagsusi
Una, ang Atong Tutokan, mga Prayoridad, ug mga Motibo
“Kay hain gani ang inyong bahandi, atua usab didto ang inyong kasingkasing,” mitudlo si Jesus. Ang usa ka bahandi mao ang butang nga bililhon alang kanato, butang nga atong gipahinungdan sa atong paningkamot ug pagtagad. Asa kita mopili sa paggahin sa atong panahon ug pagtutok sa atong pagtagad, ingon man usab sa unsay nagdasig kanato sa pagbuhat sa unsay atong gibuhat, klaro nga nagpakita sa aspeto sa atong mga kasingkasing. Ang Manluluwas mipasidaan nga samtang daghan ang gitawag Niya, gamay ra ang napili “tungod kay gipahimutang nila sa hilabihan ang ilang mga kasingkasing diha sa mga butang niini nga kalibotan, ug [sila] nagtinguha sa mga pasidungog sa mga tawo.” Ako bang gihimong prayoridad ang Manluluwas sa akong kinabuhi? Ang akong mata bug-os ba sa Iyang himaya sa tanan nakong gibuhat?
Ikaduha, ang Atong Kaandam sa Pagsunod sa mga Sugo sa Dios
Sa tibuok kasulatan, ang Ginoo ug ang Iyang mga propeta miila sa garbo ug sa pagkamasinupakon nga adunay tig-a og kasinkasing. Si Nephi miawhag sa iyang mga igsoong lalaki, nag-ingon: “Nganong kamo dili man motuman sa mga sugo sa Ginoo? Nganong kamo kinahanglan paman malaglag, tungod sa katig-a sa inyong mga kasingkasing?” Ngadto sa mga Santos sa Missouri, ang Ginoo mipasidaan, “Apan siya nga dili mobuhat sa bisan unsang butang gawas kon siya mandoan, ug modawat sa mando nga maduhaduhaon ang kasingkasing, ug mosunod niini uban ang pagkatapolan, ang mao panghimaraoton.” Bisan pa man ang Manluluwas wala magdahom nga hingpit nga sundon Iyang mga sugo, Iyang gipangayo nga kita magtinguha ug maningkamot sa pagsunod niini sa tibuok natong mga kasingkasing.
Ikatulo, ang Atong Kakugi sa Pagtuon sa mga Kasulatan ug sa Pagtinguha sa Pagpadayag
Ang Ginoo mipahimangno kang Oliver Cowdery nga “tipigi sama sa bahandi kini nga mga pulong diha sa imong kasingkasing.” Kita gidapit sa pagsiksik nga makugihon sa mga kasulatan ug, pinaagi sa gahom sa Espiritu Santo, tinguhaa nga makabaton og panabot ug pagsaksi sa katinuod sa ebanghelyo diha sa atong mga kasingkasing.
Ang propeta nga si Abinadi mibuyag sa mga pari sa daotan nga Hari nga si Noah sa wala pagbuhat niana, nag-ingon, “Wala ninyo gamita ang inyong mga kasingkasing aron sa pagsabot; busa, wala kamo magmaalamon.” Ako ba naghimo og sinsero nga paningkamot sa pagtuon sa mga kasulatan kada adlaw ug sa paggamit sa akong kasingkasing sa pagsabot niini pinaagi sa pag-ampo?
Ikaupat, ang Atong mga Hunahuna ug mga Pulong
Ang Manluluwas mitudlo nga “gikan sa iyang kasingkasing magagula ang mga daotang hunahuna” ug nga “unsa gani ang nakapuno sa kasingkasing mao usab ang isulti sa baba.” Ang kalidad sa atong mga hunahuna ug mga pulong mao ang maayong timailhan sa kaputli sa atong mga kasingkasing. Ako ba daghan kaayog negatibong mga hunahuna mahitungod sa mga aksiyon sa uban o mga motibo, o bisan mahitungod sa akong kaugalingon? Ako ba mohusga dayon ug mokondena sa uban? Ako ba nagpasumangil o nangatarongan sa akong mga sayop? Ug unsa kaha akong mga pulong? Nagbayaw ba kini ug nagdasig niadtong anaa sa akong palibot? O kini nakahimo ba og panagsumpaki ug kasuko?
Human makompleto ang akong pisikal nga mga pag-eksamin, ang akong doktor misulti nako, sa kinatibuk-an, himsog ang akong kasingkasing—apan adunay pipila ka problema nga angayang hatagan og pagtagad karon, sa dili pa kini mahimong seryoso. Siya dayon miresita og pipila ka pag-usab sa estilo sa kinabuhi. Sa samang paagi, samtang kamo mopahigayon niining espirituhanong pagsukod sa inyong kasingkasing ug nakabantay og pipila ka negatibong mga sintomas nga nagsugod sa pagsulod, palihog ayaw kataranta! Ang Manluluwas naghatag og maayo kaayong tambal sa espirituhanon aron sa pagtabang kaninyo. Siya gani misaad nga mohatag kaninyo og bag-o nga kasingkasing! Ania ang pipila ka aksiyon nga mahimong mopalambo sa inyong espirituhanong kalig-on sa kasingkasing.
Pagpalambo sa Espirituhanon nga Kahimsog sa Inyong Kasingkasing
Una, Palig-ona ang Inyong Relasyon kang Kristo
Samtang kita mogahin sa atong oras matag adlaw sa pagpaduol ngadto ni Kristo, ang atong kasingkasing mausab. Ang matag adlaw nga pagtuon sa mga kasulatan, inubanan sa sinsero nga pag-ampo ug regular nga pagpuasa, mopalambo sa inyong gugma alang sa Manluluwas ug mopalig-on sa inyong pagtuo ug tinguha sa paghinulsol ug mapainubsanong motugyan sa inyong kasingkasing ngadto sa Dios. Ikonsiderar kini nga ehemplo gikan ni Nephi: “Mao nga, nangamuyo ako sa Ginoo; ug tan-awa siya mipabatyag kanako, ug mipahumok sa akong kasingkasing nga ako mituo sa tanan nga pulong nga gilitok sa akong amahan.”
Samtang kita nagpadayon sa pag-amuma sa liso sa hugot nga pagtuo pinaagi sa atong matarong nga mga tinguha ug mga lihok, kita makasinati sa sama nga pagkahimaya sa atong kasingkasing sama sa mga Nephita: “Nagpuasa sila ug nag-ampo kanunay, ug nag-anam sa pagkalig-on sa ilang kamapaubsanon, ug nag-anam sa pagkamakanunayon sa pagtuo diha kang Kristo, hangtod nga napuno sa kalipay ug kahupayan ang ilang mga kalag, oo, gani sa paglimpyo ug pagbalaan sa ilang mga kasingkasing, diin nga pagbalaan miabot tungod sa ilang pagtugyan sa ilang mga kasingkasing ngadto sa Dios.”
Ikaduha, Ipahiuyon ang Inyong Kabubut-on ngadto sa Iyang Kabubut-on
Ang Manluluwas mitudlo, “Kon nahigugma kamo kanako, tumana ninyo ang akong mga sugo.” Siya nagdapit kanato sa pagpakita sa atong gugma pinaagi sa paghimo ug paghupot sa mga pakigsaad diha Kaniya. Samtang kita naningkamot matag adlaw sa paghupot sa Iyang mga sugo, sinsero nga naghinulsol gikan sa atong mga sala, ug sa pagpreserbar pinaagi sa pagdala sa Iyang ngalan ngari kanato ug pagpahiuyon sa atong kabubut-on ngadto sa Iyaha, kita mahimong mapanalanginan sa kanunay nga pagkauban sa Espiritu Santo.
Si Nephi nagpamatuod, “Nahibalo ako nga kon inyong sundon ang Anak, uban sa bug-os nga katuyoan sa kasingkasing, sa walay pagpakaaron-ingnon ug walay pagpanglimbong atubangan sa Dios, apan sa tinuod nga katuyoan, maghinulsol sa inyong mga sala, magsaksi sa Amahan nga kamo andam nga modala diha kaninyo sa ngalan ni Kristo, pinaagi sa bunyag … , niana inyong madawat ang Espiritu Santo.” Ang Espiritu Santo mogiya kaninyo ug motabang kaninyo nga masayod sa kabubut-on sa Ginoo ug makahimo og maayo nga mga pagpili.
Kataposan, Pagserbisyo sa Dios ug sa Uban sa Tibuok Ninyong Kasingkasing
Ang Manluluwas nagdapit kanatong tanan nga “moalagad kaniya sa tibuok ninyong kasingkasing.” Kon kita mopili sa pagbuhat sa matag butang nga gisugo sa Ginoo kanato nga buhaton—sama sa paghupot sa mga sugo, pag-ambit sa sakramento, pagsimba diha sa templo, ug pagserbisyo sa uban—sa sinsero nga kasingkasing ug adunay tinuod nga tinguha, matag buhat sa pagserbisyo ug pagsimba nahimong gamhanang espirituhanong kasinatian nga makapalig-on sa atong hugot nga pagtuo ug pagpamatuod ug mopuno sa atong mga kasingkasing uban sa hingpit nga kalipay ug gugma sa Dios ug sa atong isigkatawo.
Ang pangutana ni propeta Alma naglanog gihapon karon: “Kamo ba sa espirituhanong paagi natawo ba sa Dios? Nakadawat ba kamo sa iyang hitsura diha sa inyong mga panagway? Nakasinati ba kamo niining dako nga kausaban diha sa inyong mga kasingkasing?”
Mga kaigsoonan, ako modapit kaninyo sa paghatag sa inyong tibuok kasingkasing ngadto sa Manluluwas karon. Himoa ang matag lihok sa pagsimba ug pagserbisyo nga mahimong sinsero ug tinuyo. Ipadaplin ang mga makabalda sa kalibotan ug maningkamot nga adunay makahuloganon nga oras alang sa Ginoo matag adlaw sa inyong mga kinabuhi. Maghinulsol ug balik ngadto Kaniya sa tibuok ninyong kasingkasing, ug Siya mopasaylo kaninyo ug mogakos kaninyo sa mga kamot sa Iyang gugma. Ayaw pangitaa ang mga katigayonan niining kalibotana, apan himoa ang inyong mata nga bug-os ngadto sa Iyang himaya ug tinguhaa ang maayong mga butang. Siya nasayod sa inyong mga hunahuna ug sa tinguha sa inyong kasingkasing, ug samtang kamo moduol Kaniya, Siya mopanalangin kaninyo og kusog, pagsalig, kalinaw, ug hingpit nga kalipay niini nga kinabuhi ug usa ka dapit sa Iyang celestial nga gingharian sa tanang kahangtoran.
Ako nasayod nga si Jesukristo buhi. Siya ang atong Manunubos. Ug Siya nahigugma kaninyo ug kanako uban sa tibuok Niyang kasingkasing. Sa ngalan ni Jesukristo, amen.