Mapaubsanong Katawhan Nangluhod sa mga Altar
Samtang kita mohimo ug motahod sa atong mga pakigsaad, atong gibugkos ang atong kaugalingon ngadto sa Manluluwas, makaangkon og mas dako nga akses sa Iyang kaluoy, panalipod, pagbalaan, pagkaayo, ug kapahulayan.
Salamat, choir, alang sa inyong pagpamatuod pinaagi nianang bag-o nga himno.
Ang bag-ong himno sa sakramento nga “Bread of Life, Living Water” mitagbaw sa akong kalag. Usa ka linya sa himno nag-ingon, “Karon ako moduol sa altar, naghalad Kaniya sa akong masulub-ong kasingkasing.”
Mas nasabtan nako kadto nga mga pulong wala madugay human nga ang among pamilya mibiya sa Newbury Park, California, aron moserbisyo sa Utah Ogden Mission niadtong 2015. Nakadawat ko og pagdapit nga mosuroy sa Hill Air Force Base duol sa Layton, Utah. Ako wala pa sukad makaadto og base sa militar, ni ako nakahimamat og chaplain [relihiyosong lider] sa militar o kalalakin-an ug kababayen-an nga nagtrabaho aron mahatagan og kahilwasan ug proteksiyon ang ilang nasod.
Si Chaplain Harp, sama sa liboan nga uban nga boluntaryo ug propesyonal nga mga chaplain nga nagserbisyo sa mga bilanggoan, mga ospital, ug mga pasilidad sa militar sa tibuok kalibotan, nakadasig ug nakapaikag kanako. Ang kataposang gihunongan namo sa base mao ang chapel. Ako nangutana sa chaplain kon siya mipahigayon ba og mga tulumanon alang sa mga tawo nga nagtinguha nga maghunahuna, mag-ampo, mamalandong, ug magsimba. Siya miadto sa atubangan nga bungbong sa chapel ug iyang gibira ang usa ka krus gikan sa likod sa mga kurtina. Siya miingon nga gigamit niya ang krus alang sa mga tulumanon sa mga Protestante ug sa mga Katoliko. Ako nangutana kon unsa ang iyang gigamit alang sa atong mga Judeo nga kaigsoonan, ug siya miadto sa pikas nga bahin sa atubangan nga bungbong ug iyang gibira ang usa ka Bituon ni David.
Ako nangutana dayon, “Unsay imong gibuhat alang sa mga tulumanon sa mga Santos sa Ulahing mga Adlaw?” Iyang gitulod kadto nga mga simbolo ug gitudlo ang usa ka dako nga kahoy nga altar diha sa tunga-tunga sa chapel. Siya miingon nga ang mga miyembro sa Ang Simbahan ni Jesukristo sa mga Santos sa Ulahing mga Adlaw moandam ug mopanalangin sa pan ug tubig diha sa altar. Ako nangutana kon ang dako, nga mura og permanente na ang pagkabutang nga altar tangtangon ba sa dili pa ang mga tulumanon sa mga Judeo, Muslim, Katoliko, o Protestante nga kaigsoonan. Siya miingon nga ang altar magpabilin sa puwesto, aron magamit niadtong pipila ka tinuohan sa uban nga paagi.
Si Abraham nagtukod og altar, migapos ni Isaac, ug andam na sa pagsakripisyo sa iyang bugtong anak, apan gipugngan ang iyang kamot, ug siya mipahayag, sama nga ang Ginoo mipahayag, “Ania Ako”! Pila ka higayon nga ang Bantogang Ako o usa sa Iyang mga propeta miboluntaryo, “Ania Ako”?
Atol sa Iyang Wali sa Bukid, ang Manluluwas nagdapit kanato nga makig-uli sa atong mga kaigsoonan sa dili pa kita moduol sa altar. Si Pablo mitudlo nga kita “nahinloan” diha sa altar pinaagi sa Pag-ula ni Jesukristo.
Ang propeta nga si Lehi “[mibiya sa] iyang balay … ug iyang mahalon nga mga butang. … [Dayon] mitukod siya og altar … ug mihimo og halad … , ug nagpasalamat sa Ginoo.”
Ang Biblia ug ang Basahon ni Mormon nagtudlo kanato sa pagsimba sa Anak sa Dios diha sa mga altar. Ngano man?
Ang atong unang mga ginikanan, si Adan ug Eva, nagtukod ug nagsimba diha sa mga altar. Human nga sila gipapahawa sa Tanaman sa Eden ug nagsimba sa “daghang adlaw,” usa ka anghel ang mibisita ug nangutana og makatandog nga pangutana nga mahimong mapangutana sa matag usa kanato: “Nganong naghalad ka og mga sakripisyo ngadto sa Ginoo?”
Si Adan mitubag, “Wala ako masayod.”
Ang tubag sa anghel ngadto sa mapaubsanong pag-angkon ni Adan makapahingangha: “Kini … usa ka pagkasama sa sakripisyo sa Bugtong Anak sa Amahan. … Mao nga, buhaton mo ang tanan nga imong buhaton pinaagi sa ngalan sa Anak, ug ikaw maghinulsol ug motawag sa Dios pinaagi sa ngalan sa Anak hangtod sa kahangtoran.”
Ang lamesa sa sakramento ug ang mga altar sa templo nagsimbolo sa sakripisyo ni Jesukristo ug sa Iyang walay kataposan nga Pag-ula.
Samtang kita mohimo ug motahod sa atong mga pakigsaad, modawat sa mga ordinansa sa sakramento diha sa simbahan ug sa pagtuga ug pagselyo diha sa templo, atong gibugkos ang atong mga kaugalingon ngadto sa Manluluwas, makaangkon og mas dugang nga akses sa Iyang kaluoy, panalipod, pagkahinlo, pagkaayo, ug kapahulayan.
Kaluoy ug Panalipod Pinaagi sa mga Pakigsaad
Isip usa ka 15-anyos nga batan-ong lalaki, nangutana ko sa akong papa kon mahimo ba nga dili ko motambong og miting sa sakramento—bisan usa lang ka Dominggo sa Enero alang sa usa ka espesyal nga dula sa American football. Siya miingon nga igo na ang akong pangedaron aron mohimo niana nga pagpili alang sa akong kaugalingon ug mihangyo nako nga ikonsiderar ang usa ka tambag. Siya miingon, “Kon ikaw mopili nga dili motambong og kausa sa sakramento, mas sayon na kaayo nga mopili nga dili na usab motambong og balik.”
Kon ang Manluluwas mao ang bantogang tigsumpay, nan ang kaaway mao ang tigbulag. Siya, si Satanas, motental nato nga ipahimulag ang atong kaugalingon gikan sa atong gipahinungod nga mga dapit sa pagsimba ug gikan sa panalipod ni Jesukristo. Kon kita mosimba sa Manluluwas, kita makadawat sa “gahom sa pagbuntog sa kinaiyanhong pamaagi sa kalibotan.” Kon kita mogahin og panahon sa pagpakighiusa Niya, kita adunay saad nga “maluwas gikan ni Satanas.” “Dayon, kon kita motuman sa atong mga pakigsaad, Siya motuga nato sa Iyang … makapalig-on nga gahom.” Ah, giampingan gayod nako og maayo ang kasinatian nga makighiusa sa Manluluwas pinaagi sa mga pakigsaad nga gihimo diha sa balaan nga mga altar.
Ang pagpalambo og panabot sa mahangtorong Pag-ula sa Manluluwas pagtulun-an human sa usa ka pagtulun-an, sugo human sa usa ka sugo, maghatag og espirituhanong panalipod batok sa mga tentasyon sa kaaway. Ang batan-on nga Elder Jaggi sa Mexico, Zuster [Sister] Jaggi sa Belgium, ug ubang misyonaryo sa tibuok kalibotan mas labing seguro nga makita ang ilang mga higala nga makaangkon sa mga panalangin nga mabunyagan ug makadawat sa gasa sa Espiritu Santo kon ang ilang mga higala motambong sa miting sa sakramento sulod sa unang semana sa ilang paghimamat.
Ang usa ka young adult sa Tonga o Samoa mas labing seguro nga maselyo diha sa balay sa Ginoo kon siya nangandam ug nakadawat sa iyang pagtuga pagkahuman dayon sa iyang gradwasyon sa eskwelahan. Diha sa pagtuga, ang mga miyembro gidapit sa pagkinabuhi, pagsunod, ug pagtuman sa lima ka balaod nga naghatag sa ilang kinabuhi og gahom ug panalipod. Samtang kita mohimo og mga pakigsaad ngadto sa Ginoo, usa ka pagbinaslanay nga relasyon ang maumol. Atong mapakita ang atong pag-unong ug paghigugma Kaniya. Ang atong kalig-on ug gahom molambo sa matag saad nga gihimo ug gituman.
Pamalandong ug Paghinlo
Kon kita mapainubsanon ug simbolikanhong moluhod diha sa mga altar sa Ginoo, kini mao ang usa ka oportunidad alang sa pagpamalandong, “mipugong sa garbo sa [atong] mga kasingkasing, … [magpaubos sa atong kaugalingon] sa atubangan sa Dios.” Sa dili pa ko mokuyog sa akong mga higala isip usa ka batan-on, ang akong inahan kanunay nga moingon, “Hinumdomi kon kinsa ka, ug pagpahibalo kon mauli na ka.” May mga gabii dili ko makapahibalo kay dugay kaayo kong makauli sa balay. Ako nagbasol nga wala makahimo niadtong importante nga pagpakighinabi ni Mama.
Karon ako naghinam-hinam sa pagpakigkonektar sa Langitnong Amahan. Sa akong inadlaw-adlaw nga sumbanan sa pagsimba, moluhod ko aron mag-ampo, kilid sa akong higdaanan o nagpundok uban sa pamilya, ug akong gihanduraw ang akong kaugalingon nga nagluhod sa mga altar, namalandong ug nagsusi sa akong kinabuhi. Naghunahuna ko sa sakramento, gani tibuok nga mga piraso sa pan, gipikas-pikas alang kanato, matag usa simbolo sa nabali nga lawas sa Manluluwas. Napahinumdoman ko sa panudlo ni Presidente Dallin H. Oaks nga “matag piraso sa pan talagsaon, sama nga ang mga indibidwal nga moambit niini kay talagsaon.” Sa higayon nga ako moluhod sa pag-ampo, ako maghunahuna kon unsaon nako paghatag ngadto sa Dios ang akong kabubut-on.
Si Elder David A. Bednar mitudlo nga ang ordinansa sa sakramento usa ka balaan ug binalik-balik nga pagdapit nga sinserong maghinulsol ug mabag-o sa espirituhanong paagi. Ang pag-ambit sa sakramento, sa kaugalingon niini, dili makapasaylo sa mga sala. Apan kon tinuoray kitang mangandam ug moapil niining balaan nga ordinansa uban sa mapainubsanong kasingkasing ug mahinulsolong espiritu, nan ang saad nga kita kanunayng makabaton sa Espiritu sa Ginoo maanaa kanato. Ug pinaagi sa makabalaang gahom sa Espiritu Santo isip padayon natong kompanyon, kita kanunayng makabaton og kapasayloan sa atong mga sala.”
Sa dihang si Amy ug ako naghinumdom sa among mga kasinatian sa kinabuhi, among gisaulog ang gasa sa hingpit nga gugma ug sakripisyo ni Jesukristo. Amo usab nga nakita kon giunsa ni Satanas pagpagawas sa iyang kasuko. Unsaon nato sa pagbuntog ang mahukmanon nga mga tinan-awan, kabalaka, depresyon, kanser, diabetes, pagpang-bully diha sa online, gikawat nga kailhanan, wala madayon nga pagmabdos, ang pagkawala sa usa ka anak, igsoong lalaki, ug amahan? Tungod kay gikuha ni Jesus ang mapait nga kupa sa pagpangurog, ang kupa sa kasuko—alang nako, alang sa akong pamilya, alang kanatong tanan!
Getsemane, ni Adam Abram, sa maayong kabubut-on sa altusfineart.com © 2025
Ang “mapait nga kupa” nga Iyang giinom diha sa Tanaman sa Getsemani ug ang Iyang pag-antos nga “gidugangan pa” diha sa krus sa Kalbaryo nakatugot kanato nga makahangyo diha sa mga altar sa Ginoo alang sa pagkaayo gikan sa lisod nga mga kasinatian, pagkaayo gikan sa posibilidad nga mahimong walay batasan, mapintas o masuk-anon ug pagkaayo gikan sa mga kasinatian nga nakahimo sa uban nga mangurog diha sa mga altar sa Ginoo ug “pagabalaanon pinaagi sa pagdawat sa Espiritu Santo,” kanunay.
Si Sister Patricia Holland miingon, “Ang akong hugot nga pag-ampo alang kaninyo ug alang sa akong kaugalingon karon mao nga kita hingpit nga motugyan, mobutang sa atong mga kaugalingon diha sa altar sa mga saad ug kalinaw sa Dios bisan asa pa man kita ug bisan unsa pa ang atong nabuhat.”
Usa ka Dapit sa Pagkaayo ug Kapahulayan
Kon kita moadto sa altar, wala kita magdawat og ganti; kita nagkat-on mahitungod sa Tighatag sa Gasa. Niana nga pagkat-on ug pagkabugkos sa pakigsaad moabot ang pagkaayo. Si Nephi miingon, “Gipuno niya ako sa iyang gugma, gani hangtod sa pagkaugdaw sa akong unod.” Ug ang atong mahigugmaong Manluluwas midapit, “Dili ba kamo mobalik na ngari kanako karon, ug maghinulsol sa inyong mga sala, ug makabig, nga aron ako moayo kaninyo?”
Sa dihang ang among duha ka kinamagulangang anak nga mga babaye, si Mackenzie ug Emma, gagmay pa, usa sa ilang paborito nga istorya mao ang The Chronicles of Narnia: The Lion, the Witch and the Wardrobe. Kaming tanan nahigugma sa liyon, si Aslan. Usa sa among labing halandomon nga mga gabii sa pagbasa sa libro mao kadtong higayon nga ang bantogan nga liyon mihatag sa iyang kinabuhi alang ni Edmund. Halandomon tungod kay ang mga ginikanan ug ang mga anak nga babaye naghilak samtang ang kinabuhi sa liyon gikutlo sa Witch diha sa Lamesa nga Bato. Halandomon tungod kay ang paglaom nagpadayon, bisan pa man sa trahedya, hangtod nga ang makapahingangha nahitabo. Mga singgit sa kalipay milanog nianang gamay nga lawak sa dihang si Aslan nabanhaw ug miingon, “Kon ang [Witch nakahibalo sa tinuod nga kahulogan sa sakripisyo], … siya makahibalo nga kon ang andam nga biktima kinsa wala makahimo og pagluib [namatay] isip puli sa maluibon, ang [Bato] nga Lamesa moliki, ug ang kamatayon mismo [mosugod sa pagkalma].”
Si Jesukristo moayo sa tanang samad. Si Jesukristo mihimong posible nga mabuhi pag-usab.
Sa iyang pakigpulong sa Oktubre 2022 nga kinatibuk-ang komperensiya, si Presidente Russell M. Nelson mihulagway sa usa ka grupo nga nag-tour nga miabot para sa open house sa templo. Usa ka batang lalaki anaa didto. Si Presidente Nelson mitudlo:
“Sa dihang ang tour group misulod sa kwarto sa pagtuga, ang gamay nga bata mitudlo sa altar, diin ang mga tawo moluhod aron mohimo og mga pakigsaad uban sa Dios, ug miingon, ‘Oy, nindot kana. Dinhi mao ang lugar alang sa mga tawo nga makapahulay sa ilang pagsulod sa templo.’
“… Siya tingali walay ideya mahitungod sa direkta nga koneksyon tali sa paghimo og pakigsaad uban sa Dios diha sa templo ug sa talagsaon nga saad sa Manluluwas:
“‘Duol kanako, kamong tanan nga nagbudlay ug nabug-atan, ug papahulayon ko kamo.
“‘Isangon ninyo ang akong yugo diha kaninyo, ug pagtuon kamo gikan kanako; … ug makakaplag kamog pahulay alang sa inyong mga kalag.
“‘Kay sayon ang akong yugo, ug gaan ang akong palas-anon’ [Mateo 11:28–30].”
“Ang Anak sa Tawo walay dapit nga kapahulayan,” apan Siya midapit sa Iyang mga disipulo, ikaw ug ako ngadto sa kan-anan sa sakramento aron mopahulay uban Niya didto. Kon ang “mapaubsanong katawhan mangluhod diha sa altar,” ang kalinaw mopatigbabaw. Ang mga bukton sa Manluluwas gituyhad; ang Iyang lamesa giladlad. Duol ug simbaha ang anak sa Dios diha sa Iyang balaan nga mga altar. Sa ngalan ni Jesukristo, amen.