Pakig-uli ngadto sa Dios

Dihang nagtuon ko sa mga kasulatan, nakasugat ko og mga pulong nga nakapa-interes nako, una sa tanan kay kini adunay espesyal nga kahulogan nga resulta sa akong mga kasinatian sa kinabuhi. Migahin ko sa akong panarbaho isip eksperto [forensic] nga accountant. Niana nga kasinatian, ang pulong nga i-reconcile nakakuha sa akong atensiyon dihang nagbasa ko sa mga kasulatan. Ang akong trabaho mao ang pag-reconcile sa gireport nga mga kantidad ngadto sa mga rekord sa pinansiyal pinaagi sa paggamit sa accounting, pag-awdit, ug sa mga kahanas sa pag-imbestiga. Sa lahi nga pagkasulti, ang akong tumong mao ang pagtukma sa mga pinansiyal nga report sa orihinal nga mga dokumento sa pinansiyal sa pagseguro sa katukma ug pagkabalido. Naghimo ako og makugihong paningkamot sa pagsulbad sa mga sayop, ug komon ra nga mogahin og dakong panahon sa pagsulbad bisan sa gamay kaayong mga sayop.

Si Apostol Pablo mihangyo sa mga Taga-Corinto nga “makig-uli sa Dios.” Ang pagpakig-uli sa Dios nagpasabot nga dad-on og balik ngadto sa panag-uyon sa Dios o pagpahiuli sa relasyon ngadto sa Dios nga namansahan o naguba tungod sa atong mga sala o mga buhat. Sa yano nga paagi, ang pagpakig-uli sa Dios nagpasabot sa pagpahaom sa atong kabubut-on ug mga buhat ngadto sa kabubut-on sa Dios o, segun sa gitudlo ni Presidente Russell M. Nelson, nga ipatigbabaw ang Dios labaw sa tanan sa atong kinabuhi.

Segun sa gitudlo sa mga kasulatan, gawasnon kita sa paglihok alang sa atong mga kaugalingon, “sa pagpili sa dalan sa walay kataposan nga kamatayon o sa dalan sa kinabuhing dayon.” Apan kon dili kita magkugi, kini nga kagawasan sa paglihok alang sa atong mga kaugalingon tingali mosangpot sa pagtipas gikan sa kabubut-on sa Dios.

Si propeta Jacob mitudlo nga kon atong makita nga kita wala na mahiangay o kita mitipas na gikan sa Dios, ang bugtong paagi nga kita makipag-uli mao ang “pakig-uli sa [Dios] pinaagi sa pag-ula ni Kristo.” Kinahanglan nga atong hibaloan nga ang pagpakig-uli mag-agad sa kaluoy, nagpasabot nga ang manggiloy-ong buhat ni Jesukristo sa pag-ula naghimong posible sa pakig-uli.

Kon mamalandong kamo sa kaugalingon ninyong kinabuhi, paghunahuna og panahon dihang gibati ninyo nga layo kamo sa Langitnong Amahan kay kamo mipalayo Kaniya. Sama pananglit, tingali nagkaminos ang inyong kakugi sa inyong mga pag-ampo Kaniya o pagtuman sa Iyang mga sugo. Sama sa atong pagpili sa pagpalayo sa atong kaugalingon gikan sa Dios, kinahanglan kitang mopili nga mopasiugda sa paningkamot sa pagpakig-uli. Gipasabot gayod sa Ginoo ang atong responsibilidad dihang miingon Siya, “Paduol kamo kanako ug ako mopaduol kaninyo; pagkugi kamo sa pagpangita kanako ug kamo makakaplag kanako; pangayo, ug kamo makadawat; tuktok, ug kini pagaablihan nganha kaninyo.”

Giunsa kita sa pagtabang sa Manluluwas nga mapahiuli ug makipag-uli niining importante nga relasyon? Alang kanako, nakahimo ko og dakong pag-uswag sa akong panaw sa pagpakig-uli sa Dios dihang akong gisunod ang tambag ni Presidente Nelson ug maghinulsol sa matag adlaw. Ang hinungdan mao nga ang pagpakig-uli nagpasabot sa pagpahiuli sa naguba nga relasyon, ilabi na tali sa Dios ug sa katawhan, pinaagi sa pagtangtang sa babag sa sala.

Usa sa labing importanteng mga pagpakig-uli nga atong mabasa diha sa mga kasulatan mao ang kang Enos. Pipila ka butang sa iyang kinabuhi wala mahisubay sa Dios. Gihimo niyang ehemplo ang pagsalig sa Pag-ula ni Jesukristo sa pagpakig-uli sa Dios. Gipasabot niya ang iyang tinguha sa paghinulsol, iyang pagpaubos, iyang tumong, ug iyang determinasyon. Ang iyang pagpakig-uli sa Dios namatud-an dihang usa ka tingog miabot kaniya, nag-ingon, “Enos, ang imong mga sala gipasaylo na ug mapanalanginan ka.” Namatikdan ni Enos ang epekto niana nga paghinulsol ug sa pagpakig-uli diha kaniya dihang miingon siya, “Ug ako, si Enos, nasayod nga ang Dios dili mamakak, busa ang akong kahasol nawala sa hingpit.”

Ang pagpakig-uli dili lamang magdala og kahupayan gikan sa mga pagbati sa kahasol apan usab sa kalinaw sa sulod kanato ug sa uban. Moayo kini sa mga relasyon, mopahumok sa mga kasingkasing, ug molig-on sa atong pagkadisipulo, magdala og nagtubo nga pagsalig sa Dios. Ang nagdala kanako og talagsaong paglaom ug kamasaligon mao ang lahi nga bunga sa pagpakig-uli nga gihulagway ni Enos dihang miingon siya, “Ug human nga ako si Enos nakadungog niining mga pulonga, ang akong pagtuo sa Ginoo nagsugod sa pagkadili matarog.”

Sa bata pa ko, ang papa ni mama dunay dakong prutasan sa cherry. Duna koy oportunidad nga makatrabaho sa prutasan, kasagaran sa ting-init atol sa ting-ani sa mga cherry. Sa gamay pa kaayo ko nga bata, akong nakita nga ang akong ikatabang mao nga tunolan ko sa balde ug dayon dad-on sa ibabaw sa kahoy aron kuhaon ang mga cherry.

Ang pag-ani sa mga cherry dako og kausaban dihang ang akong lolo nakapalit og makina nga gitawag og cherry shaker. Kini nga makina mohakop sa punoan sa kahoy ug moyugyog niini, aron mangatagak ang mga cherry gikan sa kahoy ngadto sa gipahimutang nga mga net nga mosalo sa mga cherry. Akong nabantayan nga kon ang makina nga pangyugyog magsugod sa pag-uyog sa kahoy, hapit tanang cherry mangatagak sulod sa mga segundo. Akong nabantayan usab nga dili igsapayan kon ang kahoy giyugyog ba sulod sa 10 ka segundo o usa ka minuto, ang ubang cherry dili matagak. Tinuod nga wala kini mangatagak bisan sa pagyugyog.

Ang pagyugyog sa mga cherry aron mangatagak posible tungod sa paggawas sa ethylene. Kini nga hormone mohimo sa layer sa mga cells sa tunga sa sanga sa cherry ug sa kahoy nga mohuyang. Mao nga, ang sanga sa hinog na nga cherry mas dali rang maipo gikan sa kahoy tungod sa nahuyang nga koneksiyon.

Diha sa mga kasulatan, atong nakat-onan nga ang sanga ni Jesse usa ka simbolo alang sa Mesiyas, si Jesukristo, kinsa gitagna nga moabot gikan sa kaliwat ni Jesse, nga amahan ni Haring David. Sama nga ang ethylene mopahuyang sa koneksiyon sa sanga sa hinog na nga cherry, ang kamasinupakon, mga pagduhaduha, ug mga kahadlok mopahuyang sa atong koneksiyon gikan sa Sanga ni Jesse, o Jesukristo, magtugot nga kita dali rang mayugyog ug mabulag gikan Kaniya. Sama tingali sa atong kamatinud-anon, angay nga magbantay kita batok sa pagkahuyang sa atong koneksiyon kang Jesukristo.

Sa Doktrina ug mga Pakigsaad, bisan ang mga matinud-anon gipasidan-an nga: “Apan adunay kalagmitan nga ang tawo mawad-an sa grasya ug mobiya gikan sa buhi nga Dios.” Ang Ginoo mipadayon, “Oo, … gani himoa nga kadtong kinsa gibalaan mopatalinghog usab.” Aron malikay sa pagkapukan, ang Ginoo mitambag, “Busa himoa nga ang simbahan mopatalinghog ug mag-ampo kanunay, tingali unya og mahulog sila sa tentasyon.”

Ang usa tingali mohisama sa kahimtang nga dali rang matarog sa unsay gihulagway sa kasulatan nga nagkahinog na alang sa kalaglagan, nga adunay naghulat nga sangpotanan tungod sa mga gihimo. Ang mga pulong magamit usab sa mas klarong pagpasabot sa kahimtang sa pagkadunot, pagkadaot, o pagkunhod nga maghimo sa butang nga dali rang mahagsa o maguba.

Unsay ipasabot niini nga pagkahinog? Nagpasabot ba kini nga kita moabot sa punto nga kita dili na makahimo og kausaban? Dili, sa akong hunahuna nagpasabot kini nga kita moabot sa punto nga kita dili andam nga mag-usab. Ang panagang sa pagkahimong hinog alang sa kalaglagan mao ang pagbuhat sa mga butang nga makapalig-on sa atong koneksiyon ni Jesukristo. Segun sa gihisgotan, ang paghinulsol nagdala ni Enos sa punto sa dili matarog nga pagtuo. Adunay kalig-on sa paghinulsol—padayon, dihadiha, ug kanunay nga paghinulsol. Segun sa gitudlo ni Presidente Nelson kanato, “Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag-adlaw nga paghatag og gibug-aton sa paghinulsol.”

Agig dugang aron masangyaw ang paghinulsol, si propeta Jacob mitudlo nga ang pagkakita sa kamot sa Dios sa atong kinabuhi, pagpangita ug pagdawat og pagpadayag, ug pagpaminaw sa Dios kon Siya mamulong sa tanan makatabang aron kita dili matarog. Si Jacob mitudlo usab, “Busa, nangita kami sa mga propeta, ug aduna kami daghang pagpadayag ug espiritu sa pagpanagna; ug kay aduna kami sa tanan niini nga mga pagpamatuod naangkon namo ang usa ka paglaom, ug ang among pagtuo dili na matarog.” Ang pagpaminaw ug paglihok sa mga pulong ug mga pagdapit sa mga propeta ug mga apostoles makapuno ngari kanato og paglaom, kamasaligon, ug kalig-on, nga mosangpot sa atong pagtuo nga mahimong walay pagkatarog.

Akong nakat-onan nga ang tinguha sa pagpakig-uli sa Dios kinahanglan nga ubanan og tinguha sa paghinulsol. Ang paghinulsol ug pagsinati sa mga panalangin sa Pag-ula ni Jesukristo mosangpot sa pagtuo nga walay pagkatarog. Ang walay pagkatarog nga pagtuo mosangpot sa tinguha nga kanunayng makig-uli sa Dios. Usa kini ka gatuyoktuyok, o balikbalik, nga kinaiya.

Mga kaigsoonan, dapiton ko kamo sa pagpakig-uli sa Dios pinaagi sa Pag-ula ni Jesukristo. Mopamatuod ko nga ang paghimo ug pagtuman sa mga pakigsaad magpalig-on sa atong koneksiyon sa Manluluwas, nga malikay sa pagkahimong hinog alang sa kalaglagan. Mopamatuod ko nga kini nga pagpakig-uli sa Dios, pinaagi sa Pag-ula ni Jesukristo, mogiya kanato ngadto sa pagtuo nga walay pagkatarog.

Nasayod ko nga ang Langitnong Amahan nahigugma kaninyo ug kanako, ug Iyang gipadala ang Iyang Hinigugmang Anak, si Jesukristo, aron mahimo natong Manluluwas, Manunubos, ug talagsaon nga Tigpakig-uli. Mopamatuod ko bahin ni Jesukristo ug mohimo niini sa ngalan ni Jesukristo, amen.