“Gihigugma Mo ba Ako?”
Kon gusto kita nga magpakita sa atong gugma sa Dios, angay kitang makasabot kon giunsa Niya pag-ila ang atong gugma.
Diha sa pasumbingay sa usikan nga anak, ang mas magulang nga igsoong lalaki sa sinugdanan naglisod sa pagsaulog sa dihang ang iyang manghod nga igsoong lalaki mipauli human sa panahon sa dili maayo nga mga pagpili ug “giusik-usikan niya ang iyang katigayonan pinaagi sa pagkinabuhi nga mapatuyangon.” Ang garbo sa maguwang nga lalaki ug ang iyang taas nga pagtan-aw sa kaugalingon nakapugong sa iyang paglipay sa mahinulsolon nga pagpauli sa iyang igsoon. Kita usab mahimong malabyan sa mga oportunidad sa pagpahibalo sa atong mga minahal, pinaagi sa mga pulong ug mga buhat, mahitungod sa atong sinsero nga gugma alang kanila.
Adunay daghang mahinungdanong mga panig-ingnan diha sa mga kasulatan mahitungod sa sinsero nga gugma nga gipakigbahin ug gidawat: Si Naomi ug Ruth, si Ammon ug Hari Lamoni, ang usikan nga anak ug ang iyang amahan, ang Manluluwas ug ang Iyang mga disipulo.
Kon ang gugma gawasnon nga ihatag ug sinsero nga dawaton, usa ka maayo nga binuhatan magtukmod ug laing maayong binuhatan nga magdugang og gugma tali sa tighatag ug sa tigdawat.
Ang gugma sa Dios hingpit, walay kinutoban, malungtaron, ug “labing tam-is.” Kini mopuno sa kalag sa “tumang kamaya.” Usahay maglisod kita sa pag-ila sa gugma sa Dios diha sa atong kinabuhi. Hinuon, ang atong hingpit nga mahigugmaong Amahan sa Langit lawom kaayo og tinguha nga makasinati kita sa Iyang gugma nga Siya “namulong [ngari kanato] aron nga … [kita] makasabot.” Siya mopahayag sa Iyang gugma ngari kanato sa mga paagi nga kita, matag usa, makahimo sa pag-ila. Mahimong makasinati kita sa gugma sa Dios alang kanato kon motan-aw kita sa mga katahom sa kinaiyahan, o makadawat og mga tubag sa atong mga pag-ampo, o adunay moabot nga mga hunahuna sa mga takna mismo sa panginahanglan, o makasinati og matam-is nga mga takna sa kalipay. Ang labing dakong pagpadayag sa gugma sa Langitnong Amahan alang kanato nga motuhop sa hunahuna ug sa kasingkasing sa dihang Iyang gitugotan ang Iyang Hinigugmang Anak sa paghalad sa Iyang Kaugalingon isip ang tigtubos.
Sama sa maguwang nga igsoon sa usikan nga anak, ang atong gitutokan sa kasagaran mao ang atong kaugalingon. Masobrahan ang atong pagpangita og ebidensiya sa gugma sa Dios alang kanato, ug mawad-an sa paglaom kon dili nato kini makita. Apan ang maanindot nga kasukwahian [paradox] mao nga kon mas tutokan nato ang pagpakita sa atong gugma ngadto sa Dios, mas dali kita nga makabatyag sa Iyang gugma alang kanato. Tingali kini ang hinungdan nga mitubag ang Manluluwas sa pangutana “Unsa man ang labing dakong sugo?” pinaagi niining yano ug importante nga pagdapit: “Higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna.”
Usahay ang atong pagpakita sa atong gugma niadtong atong gimahal pag-ayo dili sama sa ilang pamaagi sa pag-ila og gugma. Makapaluya kini sa tighatag sa gugma ug sa tigdawat sa gugma. Makatabang tingali ang pagpangutana niadtong atong gihigugma kon unsaon nila pag-ila sa gipadayag nga gugma. Sa samang paagi, kon gusto natong ipakita ang atong gugma sa Dios, angay natong masabtan kon unsaon Niya pag-ila sa atong gugma. Maayo gani, klaro Niyang gipakita ang pipila ka paagi diha sa mga kasulatan nga atong mapakita ang atong gugma para Kaniya.
Gihigugma Mo ba Ako Labaw sa Paghigugma Nimo Niining mga Butanga?
Sa matulun-anon nga pag-istoryahanay ni Pedro ug sa nabanhaw nga Ginoo didto sa Dagat sa Tiberias, atong makat-onan ang mga paagi nga atong mapakita ang atong gugma sa Ginoo.
“Nangutana si Jesus kang Simon Pedro, Simon, anak ni Juan, gihigugma mo ba ako labaw sa paghigugma nimo niining mga butanga? Siya mitubag, Oo, Ginoo, nasayod ka nga gihigugma ko ikaw.”
Ang mahinungdanon nga mga pulong niining pangutana sa Ginoo mao ang “Gihigugma mo ba ako labaw pa niining mga butanga?” Atong mapakita ang atong gugma sa Ginoo kon ato Siyang ipatigbabaw kaysa “niini” ug ang “niini” mahimong si bisan kinsa, bisan unsa nga kalihokan, o bisan unsa nga mopuli Kaniya gikan sa pagkahimong labing importante nga impluwensiya sa atong kinabuhi.
Wala gayoy igong panahon sa usa ka adlaw, sa usa ka semana, sa usa ka bulan, o sa usa ka tuig aron mabuhat ang tanan nga atong gusto o gikinahanglan nga malampos. Kabahin sa pagsulay sa mortalidad mao ang paggamit sa bililhon nga kapanguhaan sa oras sa labing importante alang sa atong mahangtorong kaayohan ug ang pagbiya sa mga butang nga dili kaayo importante.
Si Presidente Russell M. Nelson miingon: “Ang pangutana alang sa matag usa kanato … managsama. … Andam ba kamo nga tugotan ang Dios nga maoy mahimong labing importante nga impluwensiya sa inyong kinabuhi? Tugotan ba ninyo ang Iyang mga pulong, Iyang mga sugo, ug Iyang mga pakigsaad nga moimpluwensya sa inyong buhaton matag adlaw? Tugotan ba ninyo ang Iyang tingog nga maoy prayoridad kay sa bisan unsa pang uban? Andam ba kamo nga himoon ang bisan unsa nga Iyang ipabuhat kaninyo nga mas importante kay sa bisan unsang ambisyon? Andam ba kamo nga ipatuhop ang inyong kabubut-on ngadto sa Iyang kabubut-on?” Makapakita kita sa atong pagkadisipulo ug sa atong gugma sa Dios kon ato Siyang buhaton nga maoy labing taas nato nga prayoridad.
Pakan-a ang Akong mga Karnero
Sa sunod nga bersikulo niini gihapon nga panaghisgotanay ni Pedro ug sa Manluluwas, makat-onan nato ang laing paagi sa pag-ila sa Ginoo sa atong pagpadayag og gugma: “[Ang Ginoo] miingon na usab kaniya [sa ikaduhang higayon], Simon, anak ni Juan, gihigugma mo ba ako? Si Simon mitubag pag-usab, Oo, Ginoo, nasayod ka nga gihigugma ko ikaw. Si Jesus miingon kaniya, “Atimana ang akong mga karnero.”
Atong mapakita ang atong gugma sa Langitnong Amahan kon kita moserbisyo, maminaw, mohigugma, mobayaw, ug mangalagad sa Iyang mga anak. Kana nga serbisyo mahimong sama ka yano sa tinuoray nga pagtan-aw sa uban sa walay pagpanghukom. Sa ika- 76 nga seksiyon sa Doktrina ug mga Pakigsaad, masiplatan nato ang kinaiya niadtong makapanunod sa celestial nga himaya: “Nakakita sila, ug nakahibalo sa tanan nga butang.” Ilang gitan-aw ang uban sama sa pagtan-aw sa Dios ngadto kanila, ug Siya nagtan-aw kanila kon unsa sila sa umaabot, nga adunay mahimayaon nga balaanong potensiyal.
Human mahiuli gikan sa akong misyon, ako ang midumala sa negosyo sa pag-atiman sa mga nataran nga gisugdan sa akong igsoong lalaki ug nako niadtong mga tin-edyer pa kami. Bisi usab kaayo ko sa akong pagtuon sa unibersidad. Usa niana ka semana sa tingpamulak, ang kusog nga ulan ug ang nagsingabot nga kataposang eksam nakapaluya ug nakapaulahi nako sa akong trabahoon sa nataran.
Sa tunga-tunga sa semana mihayag ang kalangitan, ug nagplano ko nga apason ang akong trabaho sa nataran pagkahuman sa klase. Apan sa pag-abot nako sa balay, wala na ang akong trak ug mga gamitonon. Nakuryoso, akong giadto ang nakaeskedyul nga mga nataran, ang matag usa niini maanindot na kaayo nga pagkaputol. Didto sa kataposan nga nataran nga naa sa eskedyul, akong nakita ang akong manghod nga lalaki nga naglakaw sunod sa mower. Nakakita siya nako, mipahiyom, ug miwarawara. Napuno sa pasalamat, ako siyang gigakos ug gipasalamatan. Ang iyang makahuloganon nga buhat sa serbisyo nakapalig-on kaayo sa akong gugma ug kamatinud-anon ngadto niya. Ang pagserbisyo sa usag-usa maoy usa ka dili masayop nga paagi sa pagpakita sa atong gugma sa Dios ug sa Iyang Hinigugma nga Anak.
Ilhon sa Iyang Kamot sa Tanang Butang
Mapakita usab nato ang atong gugma sa Dios pinaagi sa pagbaton og mapasalamaton nga kasingkasing. Ang Ginoo miingon, “Walay butang nga ang tawo makapasilo sa Dios, … gawas niadtong dili mokompisal sa iyang sayop sa tanang butang,.” Atong mapakita ang atong gugma sa Dios pinaagi sa pagpasidungog Kaniya isip ang tinubdan sa tanang maayo nga butang sa atong kinabuhi.
Sa sayo nga bahin sa pagsugod og kompaniya, ang akong kauban sa negosyo ug ako mag-ampo nga matinguhaon sa dili pa magsugod ang importante nga mga miting, mangayo og tabang sa Langitnong Amahan. Sa tanang higayon, ang Dios mitubag sa among mga pag-ampo, ug maayo ang dagan sa among mga miting. Human sa usa ka miting, ang akong kauban sa negosyo misulti nga paspas kaayo mi nga mangayo apan hinay nga mopasalamat. Sukad niadto, gihimo namong kinaiya ang paghalad og sinsero nga mga pag-ampo sa pasalamat, nag-ila sa kamot sa Ginoo sa among mga kalamposan. Among gipakita ang among gugma sa Dios pinaagi sa “mapasalamaton nga kinaiya.”
Kon Nahigugma Kamo Kanako, Tumana Ninyo Ang Akong Mga Sugo
Ang laing paagi sa pagpakita sa atong gugma sa Langitnong Amahan ug sa Iyang Hinigugma nga Anak mao ang pagpili sa pagsunod Kanila. Ang Manluluwas miingon, “Kon nahigugma kamo kanako, tumana ninyo ang akong mga sugo.” Kini nga matang sa pagkamasulundon dili buta ug dili usab pinugos apan sinsero ug matinguhaon nga pagpadayag sa gugma. Ang Langitnong Amahan gusto nga gustohon nato ang mahimong masulundon. Si Sister Tamara W. Runia mitawag niini nga “mahigugmaon nga pagsunod.” Miingon siya, “Bisan pa og wala kitay hingpit nga pagkamasulundon apan, kita mosulay og mahigugmaon nga pagkamasulundon karon, mopili sa pagpabilin, balik ug balik-balik, tungod kay kita nahigugma Kaniya.”
Ang Langitnong Amahan naghatag kanato og kabubut-on aron sa pagdasig nato nga gustohon ang pagsunod Kaniya. Ang Iyang buhat ug himaya dili lamang ang pagpahitabo sa atong kinabuhing dayon apan naglakip usab sa paglaom nga ang atong labing dakong tinguha mao ang pagbalik ngadto Kaniya. Apan, dili gayod Siya mopugos kanato sa pagsunod. Diha sa Himno nga “Hibaloi, Nga ang Kalag May Kagawasan,” mokanta kita:
Isip mga lider sa misyon, ang akong asawa, si Christina, ug ako nadasig sa daghan kaayong mga misyonaryo nga mipili nga magmasulundon, dili lang tungod kay sumbanan kini sa mga misyonaryo apan tungod kay gusto sila nga mopakita sa ilang gugma sa Ginoo pinaagi sa mapainubsanon nga pagpili nga morepresentar Kaniya.
Si Elder Dale G. Renlund miingon: “Ang tumong sa atong Langitnong Amahan sa pagkaginikanan dili ang pagpabuhat sa Iyang mga anak sa unsay matarong; kini ang pagpapili sa Iyang mga anak sa pagbuhat sa matarong ug sa kataposan mahimong sama Kaniya. Kon gusto lamang Niya nga magmasulundon kita, mogamit Siya og diha-diha dayon nga mga ganti ug mga silot aron sa pag-impluwensya sa atong mga kinaiya.” Mapakita nato ang atong gugma sa Dios kon pilion nato ang pagsunod Kaniya.
Ang atong Langitnong Amahan ug ang atong Manluluwas makaila sa atong mga pagpadayag sa gugma alang Kanila kon ato Silang unahon sa atong kinabuhi, moserbisyo sa usag-usa, mapasalamaton nga moila sa matag panalangin nga nagagikan Kanila, ug mopili sa pagtuman ug pagsunod Kanila.
Ako mopamatuod nga ang matag usa kanato tinuod gayod nga anak sa Dios, ug Siya nahigugma kanato sa hingpit. Ako mopamatuod nga nagtinguha Siya nga kita makasinati sa Iyang gugma sa mga paagi nga atong maila ug masabtan. Ug ang matahom nga kasukwahian [paradox] mao nga kita makasinati sa Iyang gugma alang kanato sa mas lawom pa nga paagi samtang kita mopakita sa atong gugma alang Kaniya. Sa ngalan ni Jesukristo, amen.