Pasiuna
Mopadayon kita karon niining matag tunga sa tuig nga kinatibuk-ang komperensiya, sumala sa giplanohan ug uban sa mga mamumulong ug musika nga gipili ni Presidente Nelson human sa pipila ka bulan nga pagpangandam.
Akong minahal nga mga igsoon, magpundok kita samtang nagbangotan sa kamatayon sa atong pinangga nga si Presidente Russell M. Nelson. Namulong ako kaninyo isip ang Presidente sa Korum sa Napulog Duha, ang posisyon nga ako gipaluyohan sa matag usa sa atong ward, stake, ug kinatibuk-ang komperensiya sulod sa milabay nga pito ug tunga ka tuig.
Mopadayon kita niining matag tunga sa tuig nga kinatibuk-ang komperensiya, sumala sa giplanohan ug uban sa mga mamumulong ug musika nga gipili ni Presidente Nelson human sa pipila ka bulan nga pagpangandam. Ang mga nadugang mao lamang kini, akong pasiuna nga pagpasabot, ug ang akong pagpamulong puli ni Presidente Nelson diha sa panapos nga sesyon sa Dominggo sa hapon.
Kini ang unang higayon sulod sa mga 75 ka tuig nga ang Presidente sa Simbahan namatay pipila ka adlaw sa wala pa ang kinatibuk-ang komperensiya. Nagkinahanglan kini nga kami magplano unsaon pagpahigayon sa importante nga mga miting sa pagpangulo nga may kalabotan sa kinatibuk-ang komperensiya ingon man sa kinatibuk-ang mga sesyon sa komperensiya, sa samang higayon magtakda sa iyang lubong sa labing dali nga panahon. Si Presidente Nelson nakasabot sa bili sa kinatibuk-ang komperensiya aron sa paghatag og direksiyon ngadto sa mga Santos sa umaabot nga mga bulan. Ato siyang pasidunggan pinaagi sa pagsunod sa eskedyul sa giplanonga komperensiya nga iyang giaprobahan.
Niining panahon sa kasub-anan, nahuman na namo ang miting aron sa paghatag og pasidungog ngadto ni Presidente Russell M. Nelson sa wala pa ang atong mga miting sa kinatibuk-ang komperensiya ug dayon mitakda sa iyang lubong sa labing daling panahon human sa komperensiya. Kining tanan gibuhat uban sa pagtugot sa pamilya ni Presidente Nelson ug sa Korum sa Napulog Duha.
Tungod kay kaming tanan nga gitahasan sa pagpamulong diha sa kinatibuk-ang komperensiya gusto nga mogahin sa among gitakda nga panahon sa paghatag og personal nga pasidungog ngadto ni Presidente Nelson, among gihangyo ang tanan nga mga mamumulong sa komperensiya sa paghatag og labing mubo lang nga panahon, paggahin sa detalyadong mga pasidungog alang sa tulumanon sa lubong, nga amo nang gisugdan og plano.
Akong kaugalingon nga mubo nga pasidungog—tukma niini nga komperensiya ug sa mga pasidungog nga amo nang nahatag—mao kini: gimahal nako si Russell M. Nelson ug mas nakakat-on pa bahin sa ebanghelyo ug sa pagpangulo sa ebanghelyo gikan sa akong dugay nga pakighigala ug pakig-uban kaniya kaysa sa bisan kinsa nga lider nga akong personal nga nailhan. Siya ang atong modelo isip sulugoon ug sumusunod ni Ginoong Jesukristo. Niini nga mga butang ako magpamatuod, sa ngalan ni Jesukristo, amen.