Ang Maulaong Gugma ni Jesukristo

Kon kamo nakahimo og seryoso nga mga sala ug anaa sa proseso o adunay tinguha sa hingpit nga paghinulsol ug mobati sa dili masulti nga kalipay sa pagpasaylo, palihog hibaloi nga kini nga milagro naghulat kaninyo. Ang Manluluwas padayon nga nanawagan, “Duol kamo kanako.”

Ang pagpalig-on sa inyong pagtuo diha sa atong Manluluwas nga si Jesukristo, makapadasig sa tinguha sa inyong kalag nga makaila Kaniya, ug itugyan ang inyong kasingkasing ngadto Kaniya. Si Enos nangutana mahitungod sa iyang kaugalingon nga kapasayloan: “Ginoo, giunsa kini pagkahitabo?” Ang Ginoo mitubag, “Tungod sa imong pagtuo kang Kristo, kinsa wala pa nimo madungog o makita sukad.”

Ug si Moroni midugang, “Kon ilimod ninyo ang inyong kaugalingon sa tanan nga dili diosnon, ug mohigugma sa Dios sa tibuok ninyong gahom, hunahuna ug kusog, niana ang iyang grasya igo alang kaninyo.”

Ang pagpalayo gikan sa sala, pagduol ngadto sa Dios, ug pagpalig-on sa inyong pagtuo diha ni Jesukristo mao ang usa ka matahom nga sinugdanan. Mapainubsanong magtugyan sa inyong kabubut-on ngadto sa Dios naglakip sa pagsulti sa seryso nga sala ngadto sa inyong bishop o presidente sa branch, apan ang inyong hingpit nga pagpasaylo moabot gikan sa Manluluwas. Ang pagpasaylo mao ang usa ka balaanon nga gasa nga gitanyag pinaagi sa grasya ni Jesukristo.

Ang usa ka tinguha sa tinud-anay nga pagbalik ngadto sa Dios giubanan sa determinasyon nga magmatinuoron sa hingpit ngadto sa inyong Langitnong Amahan, sa inyong kaugalingon, uban niadtong kinsa nasakitan, ug uban sa inyong lider sa pagkapari. Ang Langitnong Amahan nagmaya sa inyong kadasig sa pagduol ngadto Kaniya uban sa masulub-on nga kasingkasing ug mahinulsolon nga espiritu. Ang pagbaton og mahinulsolon nga espiritu mao ang mapainubsanon nga pagtugyan sa inyong kaugalingon diha sa mga kamot sa Dios; ang pagbaton og mapainubsanon nga kasingkasing magdala unsa ang gihulagway ni Apostol Pablo nga “diosnong kasubo,” usa ka lawom nga pangandoy sa kalag nga mobalik ngadto Kaniya bisan unsa pa ang bili.

Ang inyong mga tinguha mogiya ninyo nga gusto nga moayo unsay inyong naguba. Apan, nga nakahibalo nga ang pipila ka butang nga dili ninyo maayo, nag-ampo kamo nga ang Ginoo, pinaagi sa Iyang grasya, motabang nga mamaayo kadtong nasakitan sa sangpotanan sa inyong mga aksiyon.

Ang mga sangpotanan sa seryoso nga sala ngadto sa uban sa kasagaran lisod gayod buntogon. Nagsunod ba kamo sa ehemplo sa mga anak nga lalaki ni Mosiah, kinsa, “naningkamot sa pagtul-id sa tanan nga kadaot nga ilang nahimo” Pakigsultihi kadtong inyong gitahod mahitungod sa unsay wala tingali ninyo makita.

Samtang nag-andam ko niini nga pakigpulong, nakadawat ko og email gikan sa usa ka tawo nga anaa sa proseso sa paghinulsol ug nagtinguha nga mobalik ngadto sa Simbahan. Ang iyang kanhi asawa nag-antos gihapon tungod sa pagkabungkag “sa [ilang] mahangtorong kaminyoon, [mga kalisod sa mga anak], sa pagkawala sa seguridad pinansyal, … nga dili [kaayo] makasustiner sa mga galastohan, [ug] sa grabing emosyonal nga kasakit tungod sa kasinatian gumikan sa pagbudhi.”

Siya mipakigbahin nako sa unsang paagi nga ang lider sa pagkapari “mibati sa [paghangyo kaniya] nga mainampoong mokonsiderar unsa [pa ang iyang mahimo alang sa iyang kanhi asawa ug mga anak].” Uban sa pagtugot, akong ipakigbahin ang kabahin sa iyang email:

“Ako [unang] naghunahuna sa [kwarta] nga akong gihatag sa akong asawa sa mando sa diborsyo dako-dako na, apan ang akong presidente sa branch miawhag nako sa pagpuasa ug pag-ampo mahitungod niini. …

“Sa sinugdanan, naglisod ko sa ideya sa paghimo pa og dugang nga pagpahiuli. Tungod kay ang akong mga sala dili pinansiyal, naghunahuna ko unsa kaha nga ‘dako-dako nga pagpahiuli’ ang tinud-anay nga gipasabot… [apan] nakaamgo ko nga dili lang bahin sa kwarta.

“Ang akong mga lider sa pagkapari nakigkita sa [akong kanhi asawa] ug sa akong mga anak ug nakahibalo nga sila naglisod gihapon ug wala pa maulii. …

“Ang akong bag-ong tumong mao ang pagpadayon inubanan sa hugot nga pagtuo. … Ako yanong mipadayag sa akong tinguha sa pagtabang nga dili magpaabot og balos. … Ako nakahukom sa [pagpadala sa akong kanhi asawa og piho nga kantidad] kada sweldo, sa dakong porsyon sa akong nahibilin nga sweldo. Sa wala pa mohimo sa unang bayad, ang Ginoo [midasig sa akong hunahuna nga kinahanglan ko] nga mobayad og [doble niana nga kantidad].

“Akong nakat-onan nga ang pagpahiuli dili lamang mahitungod sa kwarta. Kini mahitungod sa mapainubsanong pagpahinungod sa akong kinabuhi ngadto sa Ginoo. … Ang kwarta mao ang pagtabang sa pagpuli unsay akong gikuha gikan sa akong pamilya tungod sa dili nako maayo nga mga pagpili. Mahitungod kini sa paghimo ug pagtuman sa mga saad nga dili magpaabot og bisan unsa nga balos ug pagtabang kaniya nga dili mabalaka sa mga balayranan aron siya mahimong magtinguha sa Espiritu.”

Ang inyong mga paningkamot sa pagpahiuli unsay inyong naguba tingali walay kalabotan sa kwarta, apan samtang kamo mapainubsanon nga mangamuyo sa Ginoo, inyong makapalagan nga aduna pay daghan nga inyong mahimo.

Samtang kamo magtinguha sa Iyang kapasayloan, magmapailobon samtang maghulat kamo sa Iyang hingpit nga pagtugot. Ikonsiderar kini nga kasulatan:

“Sila … nagpaubos sa ilang mga kaugalingon gani ngadto sa kinahiladman sa pagkamapainubsanon; ug … nangamuyo sila sa hilabihan ngadto sa Dios; oo, gani sa tanan nga adlaw. … [Apan] ang Ginoo dugay nga mitubag sa ilang pangamuyo tungod sa ilang mga sayop nga binuhatan.”

“Bisan pa niana ang Ginoo mitubag sa ilang mga pangamuyo, ug misugod … sa pagpagaan sa ilang mga palas-anon; … ug … nagsugod sila sa pag-uswag sa yuta.”

Pagmapailobon kay ang Ginoo mohatag kaninyo sa Iyang panalangin ug pagtugot sa hinayhinay.

Sa panahon sa Ginoo, mabati ninyo ang Iyang tingog nga nagsulti ninyo, “Kining mga butanga dili na mosamok kanimo.” Moabot ang adlaw, kon kamo mopadayon sa pagduol ngadto sa Manluluwas, ang inyong Langitnong Amahan “[mo]tangtang sa mga kasaypanan gikan sa [inyong kasingkasing], pinaagi sa matarong nga mga buhat sa iyang Anak.”

Alang ninyo nga sa walay kaangayan nasakitan tungod sa seryoso nga mga sala sa uban, gusto kong mopakigbahin sa gugma ug kaluoy sa Manluluwas, sa Iyang kahupayan ug kalinaw.

Ang kasubo nga inyong gibati, ang sakit sa kasingkasing, ang pagkawala, ang grabing emosyonal nga kasakit sa pagbudhi, ang pagkausab sa inyong kinabuhi samtang gihunahuna ninyo kini—ihatag nako kaninyo ang akong bug-os nga kaseguroan, ang Manluluwas nakaila ninyo ug nahigugma ninyo. Duol Kaniya. Siya ang inyong kahupayan ug kalig-on; Siya mopadala sa Iyang mga anghel aron sa pagtabang kaninyo. Kanus-a mawala ang inyong kasakit, mawagtang ang inyong kaguol, malimtan ang dili maayong mga handomanan? Wala ko kahibalo. Apan kini ang akong nahibaloan: Siya adunay gahom sa pagpuli sa nawala kaninyo ug nagdala kalipay inay kagul-anan.

Ang atong mga kaigsoonan sa Grand Blanc, Michigan, inubanan sa ilang walay paglubad nga pagtuo ni Jesukristo, sa ilang kaisog ug pagkadili hakog, nga modawat ug makadawat, sa umaabot nga mga semana ug mga bulan, og buhong nga dili hitupngan nga gugma ug kalinaw gikan sa Manluluwas.

Samtang magpadayon kamo sa pagbutang sa inyong pagsalig Kaniya, ang mga panganod sa kangitngit ug makaguol nga pagbakho sa kagabhion mausab ngadto sa nagbuhagay nga mga luha sa kalipay ug kalinaw sa kahayag sa kabuntagon. “Mahimong kalipay ang inyong kaguol. … Ug ang kalipay walay [usa] ang makakuha gikan kaninyo.” Kana nga gutlo moabot. Mopamatuod ko nga kini moabot.

Ang maulaong gugma ni Jesukristo makita diha sa labing malisod nga mga sitwasyon, apan kitang tanan kanunay nga magkinahanglan sa maulaong grasya sa atong Manluluwas. Si Presidente Dallin H. Oaks mitudlo: “Tungod sa Iyang maulaong kasinatian sa mortalidad, ang atong Manluluwas makahimo sa paghupay, pag-ayo, ug paglig-on sa tanang katawhan bisan asa, apan ako nagtuo nga Iya lamang kanang buhaton niadtong nagtinguha ug nangayo sa Iyang panabang. Si Apostol Santiago mitudlo, ‘Ipahiubos ninyo ang inyong kaugalingon sa atubangan sa Ginoo, ug siya magatuboy kaninyo’ (Santiago 4:10). Mahimo kitang angayan nianang panalangin kon motuo kita Kaniya ug mag-ampo alang sa Iyang panabang.”

Ako nakadawat og pagtugot gikan sa akong minahal nga higala ug emeritus nga Kinatibuk-ang Awtoridad, si Elder Robert E. Wells, nga karon 97 anyos na, sa pagpakigbahin sa iyang kasinatian nga labaw na sa 60 ka tuig ang milabay:

Samtang nagpuyo didto sa Paraguay niadtong 1960 ug empleyado isip usa ka internasyonal nga banker, si Robert Wells, kaniadto 32 anyos, namatyan sa iyang asawa, nga si Meryl, nga piloto sa duha sa lain-laing eroplano, naglupad pauli gikan sa Uruguay ngadto sa Paraguay. Nakasugat og baga nga mga panganod, si Robert ug Meryl nawad-an og biswal ug kontak sa radyo sa usag usa. Daling nakatugpa si Robert, diin subo niyang nahibaloan nga ang eroplano sa iyang asawa nahagsa. Ang iyang asawa ug ang duha ka higala nga nagsakay uban kaniya wala mabuhi. Ang iyang mga anak, nga didto sa balay sa Asuncion, nag-edad og siete, singko, ug dos.

Si Elder Wells naghisgot sa iyang kaguol:

“Walay pulong nga igo nga ihulagway sa kasakit nga mipuno kanako, nawala ang akong abilidad sa paghunahuna og klaro o mobati nga normal. Dili makahunong sa paghilak tungod sa mga pagbati sa kaguol. Ang nakagrabe pa, samtang ang akong hunahuna misulay sa pag-atubang sa makalaglag nga pagkaamgo sa pagkamatay sa akong asawa, akong nakita ang akong kaugalingon nga nakasinati og dakong pagbati nga sad-an nga ako ang responsable sa paghagsa.”

Gimahayan ni Robert ang iyang kaugalingon sa wala pagsusi og maayo sa eroplano ug sa wala paghatag sa iyang asawa og igong mga panudlo sa instrumento sa pagpalupad. Siya mibati nga sad-an sa pagpasagad.

Miingon si Robert:

“Ang akong hunahuna anaa sa ngitngit nga panahon.… Kini maoy akong gihimo—[alang sa mga bata,] walay laing rason.”

“Ako … nawad-an sa akong tinguha sa pagpadayon.”

Miabot ang panahon, nga si Robert napanalanginan og lawom nga espirituwal nga kasinatian. Iyang giasoy pag-usab:

“Usa ka gabii, paglabay sa mga usa ka tuig, samtang nagluhod sa pag-ampo, usa ka milagro ang nahitabo. Samtang nag-ampo ug nangamuyo sa akong Langitnong Amahan, gibati nako nga ingon og ang Manluluwas miabot diha sa akong kiliran ug ako nakadungog og klaro nga tingog nga nagsulti niini nga mga pulong sa akong kalag ug sa akong mga dunggan: ‘Robert, ang akong maulaong sakripisyo mibayad sa imong mga sala ug sa imong mga sayop. Ang imong asawa mipasaylo nimo. Ang imong mga higala mipasaylo nimo. Akong pagaanon ang imong gipas-an. …’

“Sukad niana, ang kabug-at sa pagbati [ug kaguol] kahibulongang nawala gikan kanako. Naluwas ko! Nakasabot dayon ko sa malukpanon nga gahom sa Pag-ula sa Manluluwas ug … nga kini magamit direkta ngari kanako. … Ako … nakasinati og kahayag ug kamaya nga wala nako sukad mahibaloi. … Ako gihatagan sa wala nako hagoi nga gasa—ang gasa sa Ginoo nga grasya. … Ako dili angayan niini—wala akoy gihimo aron makaangkon niini, apan gihatag gihapon Niya kini kanako.”

Mga kaigsoonan, hinaot ang matag usa nato “pagabalaanon diha ni Kristo tungod sa grasya sa Dios, pinaagi sa pagpaagas sa dugo ni Kristo, … [mahimong] balaan, nga walay lama.”

Ako mopamatuod sa gugma, sa kaluoy ug sa grasya sa atong Manluluwas ug Manunubos. Siya buhi. Kita Iyaha; kita mga anak sa pakigsaad. Samtang kita motuo Kaniya, mosunod Kaniya, ug mosalig Kaniya, Siya mobayaw kanato gikan sa atong mga kasubo ug sa atong mga sala. Dayon, lapas niining mortal nga kinabuhi, sa balay sa Amahan, kita magpuyo uban Kaniya hangtod sa hangtod. Sa ngalan ni Jesukristo, amen.