Ang Basahon ni Mormon—Bililhong Bahandi sa Atong Panaw sa Kinabuhi
Samtang magbusog kita sa mga pulong ni Kristo nga makita diha sa Basahon ni Mormon, ang Espiritu motabang nato sa pagsabot sa mahangtorong mga kamatuoran.
Makahinumdom ba kamo og higayon kon diin adunay tawo nga mihatag og gasa kaninyo nga nakapa-usab sa inyong kinabuhi? Kining Oktubre nagtimaan sa 40 ka tuig sukad nadawat nako ang usa sa labing halangdon nga gasa sa akong kinabuhi. Sa dihang hayskul pa ko, namatikdan nako nga usa sa akong mga klasmeyt adunay kahayag nga talagsaon kompara sa ubang kabatan-onan. Ganahan ko makig-uban niya. Dayon usa ka adlaw giignan ko niya nga usa siya ka miyembro sa Ang Simbahan ni Jesukristo sa mga Santos sa Ulahing mga Adlaw. Iya dayon kong gihatagan og gasa: usa ka kopya sa Basahon ni Mormon. Iya kong gidapit nga mobasa og pipila ka mga pahina ug makigkita og duha ka amigo nga makatubag sa akong mga pangutana. Kadto nga mga amigo mao ang mga misyonaryo.
Sa dihang nakigkita ko sa mga misyonaryo, ila kong gitudloan bahin sa doktrina ni Kristo ug gihangyo nga mosunod sa pagdapit ni Moroni: “kon madawat ninyo kini nga mga butang, awhagon ko kamo nga kamo mangutana sa Dios, ang Amahan sa Kahangtoran, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, magbaton og pagtuo kang Kristo, siya mopakita sa kamatuoran niini nganha kaninyo, pinaagi sa gahom sa Espiritu Santo.” (Moroni 10:4).
Mibasa ko og daghan nga pahina sa Basahon ni Mormon ug nag-ampo. Bisan wala pa ko nakabaton og lawom nga pagsabot sa tanang butang nga gitudlo sa mga misyonaryo kanako, nabati nako sa akong kasingkasing nga akong gibasa maayo ug gikan sa Dios. Nakadawat ko og kompirmasyon sa saad ni Moroni: “Ug pinaagi sa gahom sa Espiritu Santo masayran ninyo ang kamatuoran sa tanan nga butang” (Moroni 10:5).
Human ko nabunyagan ngadto sa Ang Simbahan ni Jesukristo sa mga Santos sa Ulahing mga Adlaw, pipila sa akong mga amigo misulay og agni nako nga ang akong desisyon sayop. Apan sa matag higayon nga mag-atubang ko sa samang mga hagit, nakadawat ako og pamatuod pinaagi sa pagtuon sa mga kasulatan ug sa pag-ampo nga magpabilin nga matinud-anon sa mga pakigsaad nga akong gihimo uban sa Dios. Sukad niana, ang Basahon ni Mormon ang akong kanunay nga kauban ug nahimong bililhong bahandi sa akong mortal nga panaw sa kinabuhi.
Ang Basahon ni Mormon dili lang usa ka basahon. Kini ang lain nga tugon ni Jesukristo, gisulat sa daghang karaan nga mga propeta pinaagi sa espiritu sa pagpanagna ug pagpadayag.
Ang labing mahinungdanon nga hitabo nga nahisulat diha sa Basahon ni Mormon mao ang kinaugalingon nga pagpangalagad sa Ginoong Jesukristo taliwala sa mga Nephita human dayon sa iyang pagkabanhaw. Ang Basahon ni Mormon “nagpahimutang kini sa mga doktrina sa ebanghelyo, naglatid sa plano sa kaluwasan, ug nagpahibalo sa mga tawo unsa gayod ang kinahanglan nilang buhaton aron maangkon ang kalinaw niini nga kinabuhi ug mahangtoron nga kaluwasan sa kinabuhing moabot.” (pasiuna sa Basahon ni Mormon).
Ang unang edisyon sa Basahon ni Mormon: Lain nga Tugon ni Jesukristo gimantala diha sa usa ka gamay nga lungsod sa estado sa New York sa Marso 1830. Si Propeta Joseph Smith 23 anyos lamang sa dihang nahuman niya og hubad ang basahon niadtong 1829. Nahuman niya og hubad ang hapit tibuok nga basahon nga wala moabot og 75 ka adlaw, og ang pag-imprinta miabot og mga pito ka bulan.
Sa pagkakaron, gibanabana nga 80,000 ka full-time nga mga misyonaryo sa kapin sa 150 ka nasod nagserbisyo isip mga boluntaryo, nagpahinungod sa ilang mga kinabuhi aron mosaksi nga ang Basahon ni Mormon tinuod ug kini nagpamatuod ni Jesukristo.
Sa pinakabag-o nga seminar alang sa bag-ong mga presidente sa misyon sa Hunyo niining tuig, si Presidente Russell M. Nelson mipakigbahin ug mahinungdanon nga pagpamatuod sa Basahon ni Mormon: “Ang Basahon ni Mormon mao … ang pulong sa Dios. Kini nagtudlo sa doktrina ni Kristo ug mas gipasabot ang Pag-ula sa Manluluwas kay sa ubang basahon.”
Gusto ko mohatag og tulo ka sugyot nga makatabang nga molawom ang atong pagkakabig ngadto ni Jesukristo pinaagi sa pagtuon sa Basahon ni Mormon:
1. Magmakugihon ug Magmakanunayon sa Inyong Inadlaw nga Pagtuon
Sama ni Alma ug sa mga anak nga lalaki ni Mosiah, kinahanglan nga “makugihon [kitang] m[o]siksik sa mga kasulatan, aron [kita] makahibalo sa pulong sa Dios” ug magmalig-on sa kamatuoran (Alma 17:2).
Samtang nagserbiyo isip mga lider sa Georgia Atlanta Mission, ako ug akong asawa midasig sa matag misyonaryo nga magtuon sa Basahon ni Mormon sa dili moubos og 30 minutos kada adlaw. Kana nga pasalig mipalambo sa among pagtuo ug mitabang namo sa pagtinguha ug pagdahom og mga milagro.
Posible nga human sa misyon kita walay igong oras sa pagtuon sa kasulatan matag adlaw, apan ako mosaad nga kon kamo sinsero nga mohatag og prayoridad sa pagtuon sa Basahon ni Mormon matag adlaw, kamo makakaplag og mas dakong espirituhanong kusog ug pagsalig sa Ginoo ug sa Iyang mga saad.
2. Himoa ang Inyong Pagtuon nga Mas Makahuloganon Pinaagi sa Pagpakabusog sa mga Pulong ni Kristo
Si Nephi mitudlo, “Pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton” (2 Nephi 32:3).
Ang pagpakabusog nagpasabot og labaw pa sa pagbasa—kini ang pagtilaw, paghunahuna, ug paghimo. Samtang magtuon kamo sa Basahon ni Mormon, paghunahuna og mga paagi nga inyong pagtuon sa kasulatan mas makahuloganon. Sama pananglit:
-
Paggamit og mga tabang sa pagtuon nga anaa sa Librarya sa Ebanghelyo nga app.
-
Pag-ila sa mahangtorong mga kamatuoran nga makatabang nato sa pagsabot sa plano sa Dios ug modasig nato sa paghimo ug pagsunod sa mga pakigsaad uban atong Langitnong Amahan.
-
Markahi ang mahinungdanon nga mga hugpong sa mga pulong ug irekord ang inyong mga impresyon aron sa pagpreserbar sa unsay inyong nakat-onan sa inyong pagtuon.
Ang Basahon ni Mormon adunay gahom sa pagtubag sa mga pangutana sa atong mga kalag. Si Nephi miingon, “Kay ako mipahisama sa tanan nga mga kasulatan ngari kanato, nga kini unta mahimo alang sa atong kaayohan ug sa atong pagkat-on” (1 Nephi 19:23).
Ako moawhag ninyo sa pagbusog sa mga pulong ni Kristo, ug moabli kini sa pultahan ngadto sa pagpadayag ug mopakita ninyo kon unsay kinahanglan ninyong buhaton sa lainlaing mga sirkumstansiya sa inyong kinabuhi aron mas mapaduol Kaniya.
3. Ipadayag Inyong Pagpamatuod sa Kamatuoran sa Basahon ni Mormon
Sama nga si Lehi mitinguha nga ipakigbahin ang bunga sa kahoy sa kinabuhi uban iyang pamilya (tan-awa sa 1 Nephi 8:12), kon makabaton kita og pagpamatuod sa Basahon ni Mormon, molambo ang atong tinguha nga ipakigbahin ang kalipay nga naggikan sa pagkahibalo sa ebanghelyo ni Jesukristo.
Usa sa among mga misyonaryo, si Sister Benson, nga ania uban nato niini nga sesyon, mipakigbahin nako sa iyang tinguha nga motabang sa iyang manghod nga lalaki. Niana nga panahon, iyang igsoong lalaki nangandam sa pag-eskwela sa kolehiyo ug dili segurado sa pagserbisyo og misyon. Nakadawat ko og impresyon nga imbitahon si Sister Benson sa pagbasa sa Basahon ni Mormon sulod sa pinakaunang upat ka bulan sa iyang misyon, pagmarka sa iyang paborito nga mga kasulatan, ug dayon ipadala kana nga kopya ngadto sa iyang igsoong lalaki.
Gipadala ni Sister Benson ang minarkahan nga kopya sa Basahon ni Mormon ug giimbita iyang manghod sa pagbasa niini matag gabii. Sa kadugayan siya mipakigbahin nako: “Sa wala pa ko magmisyon, ang akong igsoong lalaki dili segurado kon gusto ba niya nga moserbisyo og full-time nga misyon. Hinayhinay, sa paglabay sa panahon, samtang iyang gibasa ang Basahon ni Mormon, iyang nakaplagan ang nagtubo nga kalipay sa iyang kinabuhi ug misugod sa paghunahuna sa pagserbisyo og misyon.”
Duha ka semana sa wala pa mahuman ni Sister Benson ang iyang misyon, ang iyang igsoong lalaki nakadawat sa iyang mission call. Karon nagserbisyo siya sa Mexico Tuxtla Gutierrez Mission. Pinaagi sa Basahon ni Mormon, si Elder Benson mitan-aw sa iyang kinabuhi nga may espirituhanong pagsabot, nga midasig niya nga mohimo og desisyon nga moserbisyo sa Ginoo ug mosalig nga ang tanan mamaayo ra. Kana nga desisyon usa ka milagro—naimpluwensyahan sa gahom sa mga pulong ni Kristo.
Mga minahal nga kaisgoonan, ako nagdasig sa matag usa kaninyo sa pagpalawom sa inyong pagtuon sa Basahon ni Mormon. Ako nakahibalo nga samtang magbusog kita sa mga pulong ni Kristo nga makita diha sa Basahon ni Mormon, ang Espiritu motabang nato sa pagsabot sa mahangtorong mga kamatuoran ug mopakigbahin sa atong pagpamatuod nga may kombiksyon ngadto niadtong giandam sa Ginoo nga makadungog sa Iyang mensahe. Ang Ginoo mitudlo, “Ang akong pinili makadungog sa akong tingog ug dili magpatig-a sa ilang mga kasingkasing” (Doktrina ug mga Pakigsaad 29:7). Ako mopamatuod nga katong mangutana sa Dios inubanan sa hugot nga pagtuo makaangkon og pagpamatuod sa kamatuoran ug kabalaan sa Basahon ni Mormon pinaagi sa gahom sa Espiritu Santo. Niini ako mopamatuod sa ngalan ni Jesukristo, amen.