Gisulayan ug Gilig-on diha ni Kristo

Minahal nakong kaigsoonan, akong gibati ang gugma sa Ginoo samtang kita nagkauban. Ako mapaubsanon nga mamulong kaninyo. Ako nag-ampo nga ang Espiritu modala ngadto sa inyong mga kasingkasing sa unsay gusto sa Ginoo nga inyong madungog, nga mas labaw pa sa mga pulong nga akong isulti.

Sa mas bata pa ko nagtinguha ko nga makat-on og physics ug mathematics sa akong mga tuig sa kolehiyo. Gibati nako nga nabug-atan. Ako misugod sa pagbati nga ako misulay sa pagkat-on og usa ka butang nga lisod alang nako nga makat-onan. Samtang mas nabug-atan ko, mas niminos ang akong gibati nga kalig-on aron magpadayon nga maninguha. Ang akong kadismaya mipabati nako nga ang akong mga paningkamot hapit walay kapuslanan. Misugod ko sa paghunahuna nga moatras, nga mobuhat og usa ka butang nga mas sayon.

Mibati ko og kaluya. Samtang nag-ampo ko, nabati nako ang hilom nga kaseguradohan gikan sa Ginoo. Ako mibati Niya nga miingon sa akong hunahuna, “Ikaw gisulayan nako, apan Ako anaa usab uban nimo.”

Ako wala makahibalo kaniadto unsay buot ipasabot niadto nga mga pulong. Apan nakahibalo ko kon unsa ang buhaton—naningkamot ko.

Pinaagi sa pagpamalandong ug pagbuhat atol sa misunod nga mga tuig, ako nakasabot niining mensahe sa pagdasig diha sa mga kasulatan: “May kalig-on ako sa pagsagubang sa tanan tungod sa gahom nga gihatag kanako ni Kristo.”

Ako nakat-on nga ang akong pakigbisog sa physics sa tinud-anay usa ka gasa gikan sa Ginoo. Siya nagtudlo nako nga uban sa Iyang tabang, ako makahimo sa mga butang nga mura og imposible kon ako adunay pagtuo nga Siya anaa aron motabang nako. Pinaagi niini nga gasa, ang Ginoo milihok aron sulayan ug lig-onon ko.

Ang pulong nga sulayan daghan og kahulogan. Ang pagsulay sa usa ka butang dili lamang ang pagsukod niini. Kini mao ang pagpadugang sa kalig-on niini. Ang pagsulay sa usa ka piraso nga asero mao ang pagbawog niini. Kainit, kabug-at, ug presyur ang gidugang hangtod nga ang tinuod niini nga kalidad mapalambo ug mapadayag. Ang asero wala mapahuyang pinaagi sa pagsulay. Gani, kini nahimong usa ka butang nga masaligan, usa ka butang nga igo ang kalig-on aron makadaog sa mas dako nga mga palas-onon.

Ang Ginoo mosulay nato sa sama gayod nga paagi aron sa paglig-on kanato. Kana nga pagsulay dili moabot sa mga higayon sa kasayon o kaharuhay. Kini moabot sa mga higayon kon kita mobati nga giinat nga lapas sa atong gihunahuna nga makaya nato. Ang Ginoo nagtudlo nga kita kinahanglan nga magpadayon sa paglambo ug dili kapoyon sa atong mga paningkamot, nga kita dili mohunong, nga kita magpadayon nga maninguha.

Kon kita magpadayon sa pagbaton og pagtuo ni Jesukristo—bisan kon ang mga butang tingali mabati nga imposible nganha nato sa pagka karon—kita mahimong mas lig-on sa espirituhanon nga paagi. Ang balaan nga mga talaan sa kasulatan mipasabot niini nga kamatuoran.

Ang propeta nga si Moroni, pananglitan, gisulayan ug gilig-on sa sama niana nga paagi. Siya mipuyo sa iyang kataposang mga tuig nga nag-inusara. Siya misulat nga siya walay mga higala, nga ang iyang amahan gipatay, nga ang iyang katawhan gilaglag. Siya gipangita niadtong mga nagtinguha sa iyang kinabuhi.

Apan si Moroni wala mawagtangi og paglaom. Hinuon, iyang gikulit ang iyang pagpamatuod ni Jesukristo diha sa mga palid alang sa katawhan nga dili na niya maabtan, lakip na ngadto sa mga sumusunod sa katawhan nga nagtinguha sa pagpatay niya. Siya misulat alang kanato. Siya nakahibalo nga ang uban mobiay-biay sa iyang mga pulong. Siya nakahibalo nga ang uban mosalikway niini. Apan nagpadayon siya sa pagsulat.

Sa iyang pagsulay, ang pagtuo ni Moroni napalambo ug nalig-on. Kini nahimong mas putli. Ang iyang mga pulong nagdala sa gahom sa usa ka tawo nga matinud-anong milahutay hangtod sa kataposan. Atong mabati kana nga gahom samtang basahon nato ang iyang pagpamatuod:

“Karon ako, si Moroni, mosulat og gamay nga sa akong tan-aw maayo; ug mosulat ako ngadto sa akong kaigsoonan nga mga Lamanita; ug manghinaot ko nga masayran nila nga kapin sa upat ka gatos ug kawhaan na ka tuig ang milabay sukad ang timailhan gikahatag bahin sa pag-anhi ni Kristo.

“Ug selyohan ko kini nga mga talaan, human ako makapamulong sa pipila ka pulong agi og pag-awhag kaninyo.

“Tan-awa, awhagon ko kamo nga kon kamo mobasa niini nga mga butang, kon kaalam man sa Dios nga kini inyo gayod nga basahon, nga kamo makahinumdom unsa ka maluluy-on ang Ginoo ngadto sa katawhan, gikan sa paglalang ni Adan bisan hangtod sa panahon nga kamo makadawat niini nga mga butang, ug pamalandonga kini sa inyong mga kasingkasing.

“Ug kon madawat ninyo kini nga mga butang, awhagon ko kamo nga kamo mangutana sa Dios, ang Amahan sa Kahangtoran, sa ngalan ni Kristo, kon kini nga mga butang dili ba tinuod; ug kon kamo mangutana sa kinasingkasing, uban sa tinuod nga katuyoan, magbaton og pagtuo kang Kristo, siya mopakita sa kamatuoran niini nganha kaninyo, pinaagi sa gahom sa Espiritu Santo.

“Ug pinaagi sa gahom sa Espiritu Santo masayran ninyo ang kamatuoran sa tanan nga butang.”

Ang pagpamatuod ni Moroni napalambo diha sa pag-inusara, apan kini midan-ag sa kahayag aron mogiya sa tanang henerasyon nga pangitaon ang atong Amahan sa Langit ug ang Manluluwas nga si Jesukristo.

Lain nga propeta sa Basahon ni Mormon, si Jacob, gisulayan ug gilig-on isip usa ka bata kinsa nakasinati og mga kasakit ug tumang kasubo. Apan ang iyang amahan, si Lehi, mitudlo niya nga ang Dios mopanalangin niya pinaagi sa iyang mga pagsulay.

“Ug tan-awa, sa imong pagkabata giantos nimo ang mga kasakit ug hilabihan nga kasubo, tungod sa kabangis sa imong mga igsuong lalaki.

“Bisan pa niana, Jacob, akong kamagulangan nga anak sa kamingawan, ikaw nasayod sa pagkatalagsaon sa Dios; ug ipahinungod niya ang imong mga kasakit alang sa imong kaayohan.

“Mao nga, ang imong kalag mabulahan, ug magpuyo ikaw nga luwas uban sa imong igsuong lalaki nga si Nephi; ug ang imong mga adlaw igahin sa pagpangalagad sa imong Dios. Mao nga, sayod ako nga ikaw natubos na, tungod sa pagkamatarong sa imong Manunubos; kay imong nasabtan nga sa kahingpitan sa panahon moanhi siya nga magdala sa kaluwasan ngadto sa katawhan.”

Ang Propeta Joseph Smith nakasinati sa ingon nga pagsulay ug paglig-on sa dihang anaa siya sa Bilanggoan sa Liberty. Diha sa kadak-on sa iyang pagbangotan, ang Propeta Joseph mituaw:

“O Dios, hain ka ba? …

“Hangtod kanus-a nimo gamiton ang imong kamot?”

Nakita sa Ginoo diha sa pag-antos ni Joseph ang makabalaan nga epekto sa iyang paglahutay niini sa dihang Siya mitubag:

“Akong anak, kalinaw nganha sa imong kalag; ang imong kalisdanan ug ang imong mga kasakitan sulod lamang sa mubo nga higayon;

“Ug dayon, kon ikaw molahutay pag-ayo, ang Dios mobayaw kanimo sa kahitas-an; ikaw magmadaogon ibabaw sa imong tanang kaaway.”

Ang labing dakong ehemplo sa pagsulay ug paglig-on nahitabo pinaagi sa Pag-ula sa Manluluwas. Siya midala nganha Niya sa mga sala sa kalibotan. Siya mipas-an sa atong mga kasakit ug sa atong mga kasubo. Siya miinom sa pait nga kopa. Siya nagpakita og pagkamatinud-anon sa matag higayon.

Tungod sa Iyang mahimayaong Pag-ula, si Jesukristo makalig-on kanato sa atong mga panahon sa pagsulay. Siya kahibalo unsaon sa pagtabang nato tungod kay nabati Niya ang tanang hagit nga atong mabati diha sa mortalidad. “Siya modala diha kaniya sa mga sakit ug mga balatian sa iyang katawhan … aron iyang masayran sumala sa unod unsaon sa pagtabang ang iyang katawhan sumala sa ilang mga kahuyang.”

Atong nakat-onan nga samtang anaa sa Tanaman sa Getsemane, ang Manluluwas mihangyo sa Amahan kon ang pagsulay mahimo ba nga kuhaon gikan Kaniya—apan dayon Siya miingon usab nga kon kini pagbuot sa Amahan, nan ang Manluluwas mobuhat niini. Sa laing pagkasulti, ang Manluluwas mipas-an gani sa pagduda ug kawalay kaseguradohan, apan Siya adunay pagtuo sa Iyang Langitnong Amahan.

Mga kaigsoonan, ang inyong pagsulay ug paglig-on tingali dili sama sa kang Moroni o kang Jacob o kang Propeta Joseph. Apan mahitabo kini. Tingali kini hilom nga moabot, pinaagi sa mga pagsulay sa kinabuhi sa pamilya. Kini tingali moabot pinaagi sa sakit o pagkadismaya o kasubo o pag-inusara.

Ako mohatag sa akong pagsaksi nga kini nga mga higayon dili ebidensya nga kamo gibiyaan sa Ginoo. Kondili, kini ebidensya nga Siya igo nga nahigugma ninyo aron moputli ug molig-on ninyo. Siya naghimo ninyo nga makabaton og igong kusog aron mopas-an sa gibug-aton sa kinabuhing dayon.

Kon kita magpabiling matinud-anon sa atong pagserbisyo, ang Ginoo moputli kanato. Siya mopalig-on kanato. Ug sa umaabot nga adlaw kita maghunahuna sa nangagi ug makita nga kadto nga mga pagsulay ebidensya sa Iyang gugma. Atong makita nga siya naghulma nato aron makabarog uban Niya diha sa kahimayaan. Sama sa gipahayag sa Apostoles sa Ginoo nga si Pablo sa kataposan sa iyang kaugalingong kinabuhi, “Gihimo ko kutob sa akong maabot ang pagpakiglumba ug natapos ko gayod kini. Giampingan ko ang akong pagtuo.”

Ako mopamatuod nga ang Dios nakaila kaninyo. Nakahibalo Siya sa mga pagsulay nga inyong giatubang. Siya nag-uban kaninyo. Siya dili mosalikway kaninyo. Ako mosaksi nga si Jesukristo mao ang Anak sa Dios. Siya ang atong kalig-on, atong Manunubos, atong paglaom. Kon kita mosalig Niya, Siya mohimo sa atong espirituhanong gahom nga sama sa gidak-on sa matag pagsulay nga kita gitawag nga mopas-an. Sa ingon niana ako mopamatuod sa sagradong ngalan ni Jesukristo, amen.