Pagdala sa Ngalan ni Jesukristo

Niadtong 2018, sa University of Utah, usa ka espesyal nga pagkapropesor ang gihimo nga gitawag og “Dr. Russell M. Nelson and Dantzel W. Nelson Presidential Chair in Cardiothoracic Surgery”—ang cardio, nagpasabot nga “kasingkasing,” ug ang thoracic, nagpasabot nga “dughan.” Nagpasidungog kini sa importante nga buhat ni Presidente Nelson isip usa ka doktor sa kasingkasing ug sa suporta nga iyang nadawat gikan sa iyang namatay nga asawa nga si Dantzel. Kini nga pagkapropesor gibayran sa usa ka pundo nga molungtad og dugay. Ang indibidwal nga napili niini nga matang sa halangdon nga pagkapropesor makadawat og ganti, suporta sa suweldo, ug mga pundo sa pagsiksik.

Ang unang doktor nga napili nga maghupot sa pagkapropesor mao si Dr. Craig H. Selzman, usa ka hanas nga doktor sa kasingkasing kinsa dili miyembro sa simbahan. Sa seremonya sa paghatag og ganti niini nga pagkapropesor ngadto ni Dr. Selzman, daghang importante nga bisita ang nanambong, lakip ni Presidente Nelson ug sa iyang asawa, si Sister Wendy W. Nelson. Atol sa miting, si Presidente Nelson namulong nga mapainubsanon sa iyang pagsugod sa panarbaho sa pag-opera.

Dayon si Dr. Selzman mipakigbahin unsay gipasabot ngadto kaniya nga matudlo niini nga pagkapropesor. Siya misaysay nga upat ka adlaw sa sayo pa, human sa tibuok adlaw diha sa lawak nga operahanan, nadiskobrehan niya nga usa sa iyang mga pasyente kinahanglan nga operahan pag-usab. Siya gikapoy ug gisapot, nakahibalo nga siya mogahin og laing gabii didto sa ospital.

Niining gabhiona, si Dr. Selzman adunay makapausab sa kinabuhi nga panag-istoryahanay sa iyang kaugalingon. Niana nga higayon, siya naghunahuna “Sa Biyernes, itudlo ako ngadto sa pagkapropesor nga nganlan sunod ni Dr. Nelson. Siya nailhan kanunay nga usa ka tawo nga makapugong sa iyang emosyon, motagad sa tanan uban ang pagtahod, ug dili gayod mawad-an sa iyang pasensya. Karon nga ang akong ngalan malambigit sa iyaha, kinahanglan ko nga maningkamot nga mas mahisama kaniya.” Si Dr. Selzman usa ka masinaboton na kaayo nga doktor. Apan gusto siya nga mahimong mas maayo pa.

Kaniadto, ang iyang grupo sa pag-opera tingali nakahibalo sa iyang kakapoy ug kahimangod tungod kay tingali gipakita niya kini sa iyang kinaiya ug tono sa tingog. Apan sa kwarto sa operahanan nianang gabhiona, si Dr. Selzman mihimo og dakong paningamot nga mosuporta ug mosabot sa iyang ka team. Siya mibati nga nakahimo kini og kalainan ug determinado nga mopadayon nga maningkamot nga mahimong sama ni Dr. Nelson.

Paglabay sa lima ka tuig, si Presidente Nelson midonar sa iyang propesyonal nga mga papeles ngadto sa University of Utah. Ang mga halangdong tawo gikan sa unibersidad miabot aron pormal nga mopasalamat ni Presidente Nelson. Atol niini nga kalihokan, si Dr. Selzman namulong pag-usab. Naghisgot bahin sa mga inisyal sa ngalan ni Presidente Nelson, nga RMN, siya miingon, “Adunay mga kinaiya si ‘RMN’ nga karon gipaningkamotan nga sundon sa mga tawo sa University of Utah.”

Sa makasapot nga mga sitwasyon, si Dr. Selzman mipasabot, “Akong gibuhat unsay atong itudlo karon nga buhaton sa atong mga trainee—motutok, dili na kaayo maghunahuna sa nahitabo, ug mobuhat sa labing maayo nga inyong mahimo. Kini nga mga kinaiya anaa kanato kada adlaw. Kita mohatag og mga lapel pin ngadto sa matag sakop sa dibisyon ug sa matag bag-o nga trainee. Sa ubos sa pin mao ang mga letra nga ‘RMN.’ Ang mga kinaiya ni RMN mao ang pundasyon sa atong pagbansay; itudlo nato kini ngadto sa tanan.” Si Dr. Selzman miusab sa iyang kanhi kinaiya ug mga pangandoy tungod kay ang iyang ngalan nalambigit na karon ngadto ni Presidente Nelson.

Kining sunod-sunod nga mga panghitabo naglakip ni Dr. Selzman nakapahimo nako sa pagpangutana sa akong kaugalingon, “Nausab na gyod ko sukad ang akong ngalan nalambigit na sa ngalan ni Jesukristo? Nadala ba nako ang Kristohanong mga kinaiya isip usa ka resulta? Tinud-anay ba akong naningkamot nga mahimong mas sama Kaniya?”

Sa kasinatian ni Dr. Selzman, makita nato ang dili mominos lima nga kapareha sa proseso nga diin kita modala diha sa atong mga kaugalingon sa ngalan ni Jesukristo. Bisan og kana nga proseso magsugod sa bunyag, dili kini kompleto hangtod kita mas putli ug balaan ug nahimong mas sama Kaniya.

Ang unang kapareha mao ang pag-ila. Si Dr. Selzman ngadto sa Nelson professorship nakalambigit sa iyang ngalan nga ni Presidente Nelson, ug si Dr. Selzman nagsugod nga mailhan uban ni Presidente Nelson. Kon kita modala nganhi sa atong kaugalingon sa ngalan ni Jesukristo, atong gilambigit ang atong ngalan ngadto sa Iyang ngalan. Kita mailhan uban Kaniya. Kita malipayong nga mailhan isip Kristiyano. Kita moila sa Manluluwas ug mobarog nga kita kabahin sa Iyang simbahan.

Susama sa pag-ila mao ang laing kapareha—paghinumdom. Sa dihang si Dr. Selzman moadto sa iyang opisina, ang iyang mga mata mapunting ngadto sa medalyon nga iyang nadawat sa dihang gitudlo siya ngadto sa Nelson professorship. Kini nga medalyon nagpahinumdom kaniya kada adlaw sa mga kinaiya ni RMN. Alang kanato, ang pag-ambit sa sakramento matag semana nagtabang nato sa paghinumdom ni Jesukristo sa tibuok semana. Samtang kita moambit sa sakramento, atong gihimo agi og handomanan sa bili nga Iyang gibayad sa pagtubos kanato. Mobag-o kita sa atong pakigsaad sa paghinumdom Kaniya, moila kita sa Iyang kahalangdon, ug magpasalamat sa Iyang kamaayo. Balik-balik natong ilhon nga pinaagi lamang ug pinaagi sa Iyang grasya nga kita maluwas gikan sa pisikal ug espirituwal nga kamatayon.

Ang paghinumdom nagpasabot nga kita mosunod sa tambag nga gihatag sa propeta sa Basahon ni Mormon nga si Alma. Kita “mohimo sa tanan [natong] buluhaton para sa Ginoo, ug bisan asa [kita padulong, kita] mohimo niini kauban ang Ginoo; … [kita] mohimo [nga] tanan [natong] hunahuna mapunting ngadto sa Ginoo; … [ug kita] mohimo sa mga pagbati sa [atong mga kasingkasing] maiya sa Ginoo sa kahangtoran.” Bisan kon kita okupado sa ubang butang, kita magpabilin nga mahunahunaon Kaniya, sama nga atong hinumdoman ang atong kaugalingon nga mga ngalan, bisan unsa pay lain nga atong gitutokan.

Ang kalamboan sa paghinumdom unsa ang nahimo sa Manluluwas alang nato mao ang ikatulo nga kapareha—pagsunod. Si Dr. Selzman nagsugod sa pagsunod ni Presidente Nelson ug sa mga kinaiya ni RMN. Ako nagtuo nga ang mga kinaiya ni Presidente Nelson usa lang ka yanong pagpakita sa iyang tibuok kinabuhi nga pagkadisipulo ni Jesukristo. Alang kanato, kon mas moila kita ug mahinumdom ni Jesukristo, mas gusto kita nga mahimong sama Kaniya. Isip Iyang mga disipulo, kita mag-usab alang sa mas maayo kon kita nakatutok diha Kaniya, labaw pa kaysa kon kita motutok sa atong mga kaugalingon. Kita maningkamot nga mahimong sama Kaniya ug magtinguha nga mapanalanginan sa Iyang mga hiyas. Kita mainitong mag-ampo aron mapuno sa gugma nga putli, ang tiunay nga gugma ni Kristo.

Sama sa gitudlo ni Presidente Nelson niadtong Abril: “Ang gugmang putli nahimong kabahin sa atong kinaiyahan, mawala ang pagbati sa pagpakaulaw sa uban. Kita mohunong sa paghukom sa uban. Magbaton kita og gugmang putli alang niadtong gikan sa tanang matang sa kinabuhi. Ang gugmang putli ngadto sa tanang … mahinungdanon sa atong pag-uswag. Ang gugmang putli mao ang pundasyon sa diosnon nga kinaiya.” Kauban sa gugmang putli, kita magtinguha sa, “pag-ugmad, … ug pagpalapad” sa ubang espirituwal nga mga gasa gikan sa Manluluwas, lakip sa hiyas, kaligdong, pailob, pagpaubos, ug kakugi.

Ang pagsunod ni Jesukristo modala nato ngadto sa ikaupat nga kapareha—mohiusa ngadto sa Iyang mga katuyoan. Kita moapil Kaniya sa Iyang buhat. Isip usa ka doktor, si Dr. Nelson usa ka magtutudlo, usa ka tig-ayo, ug usa ka tigsiksik. Ang lapel pin nga gigamit sa dibisyon ni Dr. Selzman naghatag og gibug-aton niini nga mga paningkamot, naghatag og kaimportante sa mga pulong pagtudlo, pag-ayo, ug pagdiskobre. Alang nato, ang usa ka bahin sa pagdala diha sa atong mga kaugalingon sa ngalan ni Jesukristo naglakip sa pagkaandam, adunay katuyoan, ug sa madasigong paagi mohiusa sa atong mga tumong ngadto sa Iyang mga tumong. Kita moapil Kaniya sa Iyang buhat kon kita “mahigugma, mopakigbahin, ug modapit.” Kita moapil Kaniya sa Iyang buhat kon kita mangalagad ngadto sa uban, ilabi na sa anaa sa kakuyaw ug niadtong kinsa nasamdan, naguba, o nadaot sa ilang yutan-ong mga kasinatian.

Kita mas hingpit nga modala diha sa atong mga kaugalingon sa ngalan ni Jesukristo pinaagi sa pag-ila, paghinumdom, pagsunod, ug paghiusa. Ang paghimo niining upat modala nato ngadto sa ikalima nga kapareha—pag-angkon og gahom. Kita maka-acess sa gahom sa Dios ug mga panalangin sa atong mga kinabuhi. Ang Nelson nga professorship naghatag ni Dr. Selzman og pag-ila ug mga pundo sa suporta nga iyang gigamit sa pag-usab sa kultura sa iyang dibisyon. Siya migamit niini nga “pagtuga sa gahom” aron sa pagtabang sa uban. Sa susama nga paagi, kon kita modala diha sa atong mga kaugalingon sa ngalan sa Manluluwas, ang atong Langitnong Amahan mopanalangin nato sa Iyang gahom sa pagtabang nato nga matuman ang atong misyon dinhi sa pagkamortal.

Samtang kita mohimo og dugang nga mga pakigsaad ngadto sa Dios, gidala nato sa atong mga kaugalingon sa mas hingpit ang ngalan ni Jesukristo. Isip resulta, ang Dios mopanalangin nato sa Iyang gahom. Sama sa gitudlo ni Presidente Nelson: “Ang matag tawo nga mohimo og mga pakigsaad diha sa mga bunyaganan ug diha sa mga templo—ug motuman niini—nakapadugang og agianan ngadto sa gahom ni Jesukristo. … Ang ganti sa pagtuman sa mga pakigsaad sa Dios mao ang langitnong gahom … gahom nga mas makapalig-on kanato sa pagpakigbatok sa atong mga pagsulay, mga tintasyon, ug mga kasakit.”

Kita mahimong mas madawaton sa espirituwal nga paagi. Kita mas maisogon sa pag-atubang sa ingon og imposible nga mga sitwasyon. Kita mas malig-on sa atong determinasyon sa pagsunod ni Jesukristo. Kita mas dali nga maghinulsol ug mobalik ngadto Kaniya kon kita makalapas. Kita mahimong mas maayo sa pagpakigbahin sa Iyang ebanghelyo gamit ang iyang gahom ug awtoridad. Kita motabang niadtong nanginahanglan samtang dili mohukom. Kita mopadayon nga makabaton og kapasayloan sa atong mga sala. Kita makabaton og kalinaw, magmalipayon ug kanunay nga magmaya. Ang Iyang himaya moliyok kanato, ug ang Iyang mga anghel magbantay kanato.

Ang Manluluwas modapit kanato, “Aron makaadto kamo sa Amahan pinaagi sa akong ngalan, ug sa tukmang panahon makadawat sa iyang kahingpitan.” Moawhag ko nga inyo kining buhaton. Duol ngadto sa atong Langitnong Amahan. Modala diha sa inyong mga kaugalingon sa ngalan ni Jesukristo. Magpaila Kaniya. Kanunay nga mahinumdom Kaniya. Maningkamot nga mahimong sama Kaniya. Apil Kaniya sa Iyang buhat. Dawata ang iyang gahom ug mga panalangin sa inyong kinabuhi. Ipatik ang Iyang ngalan diha sa inyong kasingkasing, pinaagi sa pagkaandam ug adunay katuyoan. Kini maghatag ninyo og “dungog” sa atubangan sa Dios ug makapasarang ninyo sa adbokasiya sa Manluluwas alang kaninyo. Kamo mahimaya nga tigpanunod sa gingharian sa atong Amahan sa Langit, usa ka isig ka manununod sa Iyang Unang Natawo, ang atong hinigugma nga Manluluwas ug Manunubos.

Siya buhi. Nasayod gayod ako niini. Siya nahigugma kaninyo. Siya mihatag sa Iyang kinabuhi alang kaninyo. Siya nangamuyo kaninyo nga moduol ngadto sa Amahan pinaagi Kaniya. Sa ngalan ni Jesukristo, amen.