Ang Pamahayag Mahitungod sa Pamilya—Mga Pulong gikan sa Dios

Kini nga kinatibuk-ang komperensiya sa Oktubre 2025 nagtimaan sa ika-30 nga anibersaryo sa pagproklama sa “Ang Pamilya: Usa ka Pamahayag ngadto sa Kalibotan.” Pinaagi sa balaan nga plano, kini nga pamahayag, inubanan sa mapadayagon nga mga pulong, gimugna aron sa “pagpadayon ug pagpalig-on sa pamilya isip sukaranan nga yunit sa katilingban.”

Ang tanan nahisakop sa usa ka pamilya, ma-inahan ka man, amahan, anak nga babaye, anak nga lalaki, apo, apohan, iyaan, uyoan, igsoong lalaki, igsoong babaye, o ig-agaw. Labing mahinungdanon, ang matag usa kanato, sama sa gisaysay sa pamahayag, “hinigugmang espiritu nga anak nga lalaki o babaye sa langitnong mga ginikanan … [adunay] kinaiya sa pagkadios ug kalagmitan nga mahimong usa ka dios.”

Sa dihang gitawag ko ngadto sa balaanon nga pagkaapostol niadtong 2015, gitambagan ko, “Kini nga pamahayag imoha na karon. Ang imong ngalan [nagtudlo ngadto sa mga pulong ‘Korum sa Napulog Duha ka Apostoles’ nga anaa sa ulohan] anaa diha. Ibutang kini sa pagbati ug itudlo kini sama nga imo kini.”

Ganahan ko sa pamahayag mahitungod sa pamilya. Ako nakapamatuod tabok sa kalibotan gikan sa Africa ngadto sa Australia ug bisan asa sa tunga-tunga niana mahitungod sa tahas sa pamilya diha sa mahangtorong plano sa Dios. Ang pamahayag adunay balaanon nga tinubdan, mao nga atoa kining hatagan og balaanong pagtahod nga angay sa mga pulong nga gikan sa Dios.

Hinumdomi, mga kaigsoonan, sama sa akong gisulti sa milabay nga komperensiya gikan niini mismo nga pulpito, “Ang mga Pulong mahinungdanon.”

Hatagan ko kamo og mga kasaysayan mahitungod sa pamahayag isip ang labing mahinungdanon nga mensahe sa atong gituohan.

Niadtong 1994, sa tuig nga wala pa mapresentar ang proklamasyon, ang Korum sa Napulog Duha ka Apostoles naghisgot kon sa unsang paagi ang katilingban ug ang mga gobiyerno nag-anam og kalayo gikan sa mga balaod sa Dios alang sa pamilya, kaminyoon, ug sa kinatawhan. “Apan kana dili mao ang kataposan sa unsay among nakita,” si Presidente Russell M. Nelson sa kadugayan mipasabot. “Among nakita ang mga paningkamot sa nagkalain-laing mga komunidad sa pagwagtang sa tanang mga sumbanan ug mga limitasyon kabahin sa sekswal nga kalihokan. Nakita namo ang kalibog kabahin sa pagkalalaki o pagkababaye. Nakita namo kining tanan nga nagsingabot.”

Ang Napulog Duha determinado sa pagpangandam og usa ka dokumento, usa ka opisyal nga pamahayag, nga maghatag og kalangkoban sa baroganan sa Simbahan mahitungod sa pamilya. Atol niana nga tuig, kini nga mga Apostol, mga manalagna nga gitawag sa Dios, nag-andam og deklarasyon mahitungod sa pamilya. Si Presidente Dallin H. Oaks mihinumdom nga mainampoon silang nagpatabang sa Ginoo kon “unsay angay [nilang] isulti ug unsaon gayod [nila] kini sa pagsulti.” Gipresentar nila kini ngadto sa Unang Kapangulohan— ni Presidente Howard W. Hunter, Presidente Gordon B. Hinckley, ug Presidente Thomas S. Monson alang sa ilang konsiderasyon.

Mga bulan lamang ang milabay, sa Marso 1995, si Presidente Hunter namatay ug si Presidente Hinckley nahimong ika-15 nga Presidente sa Simbahan. Ang pamahayag anaa na karon sa iyang mga kamot. Kanus-a ang hustong higayon sa paghimo niini nga pamahayag ngadto sa Simbahan? Kana nga panahon miabot paglabay sa unom ka bulan.

Mga adlaw sa wala pa ang Septiyembre 23 nga kinatibuk-ang miting sa Relief Society nga nag-una sa kinatibuk-ang komperensiya, si Presidente Hinckley ug ang iyang mga magtatambag nagtagbo aron makigtambag sa Kinatibuk-ang Kapangulohan sa Relief Society. Ang mga sister, sama sa Apostoles, dugay nang naghuna-huna sa mga kabalaka mahitungod sa kababayen-an ug sa mga pamilya. Gipunting nila ang umaabot nga panagtigom alang sa mga pamilya.

Si Presidente Hinckley nakatakda nga mamulong sa mga kababayen-an atol sa tigom. Dugay na siyang namalandong sa direksiyon sa iyang mga pakigpulong. Samtang naglambo ang panaghisgotanay, gihisgotan niya ang ngalan sa bag-o apan wala pa mapahibalo sa publiko nga “Ang Pamilya: Usa ka Pamahayag ngadto sa Kalibotan.” Kini ba nga tigom sa kababayen-an mao ang husto nga higayon sa paghimo sa masangpoton nga pamahayag mahitungod sa pamilya?

Ang Kinatibuk-ang Presidente sa Relief Society nga si Presidente Elaine Jack sa kadugayan mipasabot: “Wala mi mahibalo kon unsa ang pamahayag mahitungod sa pamilya niadtong panahona. … Nabantayan [namo] sumala sa ulohan, apan gibati namo nga ang bisan unsang butang mahitungod sa pamilya … mahimong positibo nga butang. … Positibo kaayo ang akong gibati nga adunay mga sakop sa Korum sa Napulog Duha nga nagadawat og pagpadayag.”

Ang miting sa Relief Society niana nga Sabado makasaysayanon. Si Presidente Hinckley mipaila sa pamahayag mahitungod sa pamilya pinaagi niini nga mga pulong: “Tungod sa daghan kaayong sayop nga katarongan nga gipakaaron-ingnon nga kamatuoran, tungod sa daghang pagpanglimbong mahitungod sa mga sumbanan ug mga hiyas, tungod sa daghang pagpang-agni ug pagpangdani nga hinay-hinay nga nakahugaw sa kalibotan, gibati namo nga mohatag og pasidaan ug mohatag og sayo nga pasidaan … mahitungod sa mga sumbanan, mga doktrina, ug naandan nga mga paagi kalabot sa pamilya nga balik-balik nga gipahayag sa mga propeta, mga manalagna, ug mga tigpadayag niini nga Simbahan sa tibuok nga kasaysayan niini.”

Gibasa dayon niya ang pamahayag sa kinatibuk-an niini. Sama sa gipamulong sa Ginoo, “Bisan pinaagi man sa akong kaugalingong tingog o pinaagi sa tingog sa akong mga sulugoon, managsama ra kini.”

Ang pamahayag nag-ingon, “Ang pamilya gi-orden sa Dios.” Ganahan ko sa katin-aw niana nga pamahayag. Ang pamahayag nagdapit kanato sa pagpuyo sa mortalidad, nga kanunayng magmanggihunahunaon sa pagkabalaan nga anaa kanato, ug sa mahatangtorong umaabot nga naghulat kanato. Si Presidente Nelson mitudlo: “Kamo literal nga espiritu nga mga anak sa Dios. … Ayaw og kasayop niini: Balaanon ang inyong potensiyal. Pinaagi sa inyong makugihon nga pagtinguha, ang Dios mohatag kaninyo og mga daklit nga panglantaw kon kinsa kamo sa umaabot.”

Sa dihang gipresentar kini, ang pamahayag wala mahiuyon sa mga panglantaw sa kalibotan. Wala kaniadto. Wala karon. Adunay uban nga nangita og sayop sa pamahayag mahitungod sa pamilya, kaminyoon, ug sekso. Ang uban misugyot nga bakwion sa Simbahan, usbon, o gani ibaliwala ang pamahayag.

Kini nga pamahayag mahitungod sa pamilya, sama sa gipahayag ni Presidente Hinckley, doktrina, mga kaigsoonan. Ang mga baroganan wala molapas apan hingpit nga nagsubay sa mga pamaagi sa Ginoo ug sa Iyang dalan sa pakigsaad. Ang mga pagtulun-an diha sa pamahayag gipadayag ni Ginoong Jesukristo ngadto sa Iyang Apostoles kaniadto ug karon. Kini ang Iyang Simbahan; Iyang gi-establisar ang mga kamatuoran nga atong gipuy-an.

Ang uban kaninyo tingali mamalandong sa pamahayag ug moingon, “Dili ni makatabang nako.” “Murag wala kini pagbati.” “Dili ingon niana ang akong pamilya.” “Wala ko mohaom niini.”

Kadtong dunay mga kabalaka, hibaloi nga mga anak kamo sa langitnong mga ginikanan, kabahin kamo sa pamilya sa inyong Amahan sa Langit. Walay lain nga mas nakaila kaninyo o mas lawom nga nagmahal kaninyo kay Kaniya. Duol Kaniya, ibubo ang inyong kasingkasing ngadto Kaniya; salig Kaniya ug sa Iyang mga saad. Kamo adunay pamilya diha sa inyong Manluluwas, si Jesukristo, kinsa naghigugma kaninyo. Mianhi siya sa kalibotan aron sa pagtubos sa atong mga sala ug pagpas-an sa kabug-aton sa atong mga kasaypanan ug sa atong bati kaayo nga mga adlaw. Nakasabot siya unsay inyong giatubang ug gibati. Duol Kaniya; salig nga Iyang ipadala ang Espiritu Santo aron makig-uban kaninyo, mobayaw kaninyo, ug mogiya kaninyo. Batia ang Ilang gugma nga “mokaylap sa tibuok kalibotan diha sa mga kasingkasing sa mga anak sa mga tawo; … kini ang labing madanihon labaw sa tanang butang … ug makalipay kaayo sa kalag.”

Ang tanang Apostoles sa Ginoo nagmahal kaayo kaninyo. Nag-ampo kami alang kaninyo ug nangayo sa giya sa Ginoo para kaninyo. Ayaw kamo pagbiya kanamo. Nagpuyo kamo sa mahagitong mga panahon diin ang kaaway nagtinguha sa pag-angkon kaninyo. Ayaw pagpadala. Ug kon nadala mo, balik diri. Ang among mga kamot nagkab-ot kaninyo, ingon man usab ang uban nga naghigugma kaninyo.

Ang pamahayag namulong, “Ang mga ginikanan adunay sagrado nga katungdanan sa pag-amuma sa ilang mga anak sa paghigugma ug sa pagkamatarong.” Ang Basahon ni Mormon naghatag og ikaduhang pagsaksi niini nga kamatuoran. Sa unang bersikulo niini nga unang kapitulo, atong mabasa “Ako, si Nephi, tungod kay natawo sa matarong nga mga ginikanan.” Pila man kanato ang nagsugod og basa sa Basahon ni Mormon—ug nagsugod sa makadaghang higayon—ug niana nga proseso nakasag-ulo na niini nga mga pulong? Itanom kini sa kasingkasing.

Ang usa sa akong paborito nga mga panultihon diha sa pamahayag mao kini: “Ang kalipay diha sa kinabuhi sa pamilya labaw nga makab-ot kon gipasikad diha sa mga pagtulun-an ni … Ginoong Jesukristo.”

Kinsa ang dili gusto nga malipay?

Ug unsa man ang mga pagtulun-an ni Jesukristo? Sa gihapon, anaa sa pamahayag: “Hugot nga pagtuo, pag-ampo, paghinulsol, pagpasaylo, pagtahod, gugma, kaluoy, buhat, ug maayong makalingaw nga mga kalihokan.”

Kinsang kinabuhi ang dili mahimong mas maayo pinaagi sa paggamit niining mahinungdanong mga baroganan? Walay usa kanato nga makahimo sa hingpit; apan makasunod kita sa maalamon nga mga pulong ni Presidente Hinckley: “Buhata ang labing maayo nimong mahimo.”

Atong mabasa diha sa pamahayag, “Ang mga amahan mao ang mangulo sa ilang mga pamilya pinaagi sa gugma ug sa pagkamatarong,” ug ang “mga inahan mao ang [mag-atiman] sa ilang mga anak.” Ang pagdumala wala magpasabot nga modominar ug ang pag-atiman wala magpasabot nga ikaduha lamang nga tahas. Ang Dios naghatag sa lalaki ug babaye og managlahi apan patas nga mahinungdanong mga tahas nga mohingpit sa usag-usa.

Tugoti ko nga mopakigbahin og personal nga istorya.

Ang akong asawa ug ako nakakat-on sa mas maayong pagtinabangay isip patas nga magkauban human niadtong usa ka adlaw nga nakahukom ko sa paghimo og importanteng desisyon nga wala mokonsulta kaniya. Ang akong gibuhat nakasorpresa niya, nakapakurat niya, ug mibutang kaniya sa lisod nga sitwasyon. Pagkahuman, miagbay siya nako ug lig-on nga miingon, “Ron, palihog, ayaw na gayod kana buhata kanako pag-usab.” Kanunay na kaming magkasinabot sukad niadto.

Atong makita diha sa pamahayag mahitungod sa pamilya: “Ang mga amahan ug mga inahan adunay katungdanan sa pagtabang sa usag usa ingon nga magkauban.”

Ang patas usa ka pulong nga mahinungdanon. Latas sa katuigan samtang si Sister Rasband ug ako nagtinabangay sa pagtuman sa gihulagway sa pamahayag nga “atong sagrado nga mga katungdanan,” nakamugna mi og patas sa katungdanan nga kaminyoon. Samtang ang matag usa sa among mga anak nagminyo na karon, si Sister Rasband ug ako nagpadayon sa pagtambag kanila ug sa ilang mga kapikas kon unsaon nga mahimong patas nga magkauban.

Kon magpakabuhi kita nga ang atong mga mata nakatutok sa himaya sa Dios, magatahod kita sa usag usa ug magasuporta sa usag-usa. Kanang balaanon nga mga sundanan sa pagkamatarong mogiya kanato ngadto sa kalig-on sa atong indibiduwal nga mga kinabuhi, sa atong mga pamilya, ug katilingban.

Ang atong Langitnong Amahan naghatag kanato sa pamahayag mahitungod sa pamilya aron makatabang kanato nga magiyahan pabalik ngadto Kaniya, makatabang nato nga makakat-on ug mapuno sa gugma, kalig-on, katuyoan, ug mahangtorong pagsabot. Sa tibuok nakong kalag, mohangyo ko kaninyo nga magpakabuhi nga duol Kaniya ug sa Iyang Hinigugmang Anak. Mosaad ko nga kon buhaton ninyo kini, ang Espiritu modasig ug mogiya kaninyo ug motabang kaninyo nga mobati diha sa inyong kasingkasing sa ilang mga saad sa kalinaw nga “dili matugkad sa tawo.” Sa ngalan ni Jesukristo, amen.