Sa Ilang Kaugalingon Sila ang mga Tighukom

Ang labing importante nga mga katuyoan sa plano sa Amahan sa kalipay mao ang paghatag sa Iyang espiritu nga mga anak og mga oportunidad sa pagdawat og pisikal nga lawas, sa pagkat-on sa “maayo gikan sa daotan” pinaagi sa mortal nga kasinatian, sa pagtubo sa espirituhanong paagi, ug sa pag-uswag sa kahangtoran.

Ang unsay gihisgotan sa Doktrina ug mga Pakigsaad isip “moral nga kabubut-on” mao ang sentro sa plano sa Dios sa pagpahinabo sa pagka-imortal ug sa kinabuhi nga dayon sa Iyang mga anak nga lalaki ug mga anak nga babaye. Kini nga mahinungdanon nga baroganan gihulagway usab diha sa mga kasulatan isip kabubut-on ug ang kagawasan sa pagpili ug sa paglihok.

Ang termino nga “moral nga kabubut-on” makapalamdag. Ang mga kapulong sa pulong nga “moral” naglakip sa “maayo,” “matinuoron,” ug “mahiyason.” Ang mga kapulong sa pulong nga kabubut-on naglakip sa “aksiyon,” “kalihokan,” ug “buhat.” Busa, ang “moral nga kabubut-on” masabtan isip abilidad ug pribilihiyo sa pagpili ug paglihok alang sa atong kaugalingon sa mga paagi nga maayo, matinuoron, mahiyason, ug matinud-anon.

Ang mga linalang sa Dios naglakip sa “mga butang nga makalihok ug mga butang nga palihokon.” Ug ang moral nga kabubut-on mao ang balaanong gidisenyo nga “gahom sa paglihok nga gawasnon” nga maghatag og gahom kanato isip mga anak sa Dios nga mahimong mga tinugyanan sa paglihok ug dili lang yano nga mga butang nga palihokon.

Ang yuta gilalang isip usa ka dapit diin ang mga anak sa Langitnong Amahan mapamatud-an kon “mobuhat ba sila sa tanang butang bisan unsa ang isugo sa Ginoo nga ilang Dios ngadto kanila.” Usa ka nag-unang katuyoan sa Paglalang ug sa atong mortal nga kinabuhi mao ang paghatag kanato sa kahigayonan nga molihok ug mahimong unsa ang gidapit sa Ginoo nga kita mamahimo.

Ang Ginoo mitudlo ni Enoch:

“Tan-awa kining imong kaigsoonan; sila ang mga binuhat sa akong kaugalingong mga kamot, ug gihatagan ko sila sa ilang kahibalo, sa adlaw nga gilalang ko sila; ug didto sa Tanaman sa Eden, gihatag nako sa tawo ang iyang kabubut-on;

“Ug gisultihan nako ang imong kaigsoonan, ug mihatag usab sa sugo, nga maghigugmaay sila sa usag usa, ug nga kinahanglan nga mopili sila kanako, nga ilang Amahan.”

Ang mahinungdanon nga mga katuyoan alang sa paggamit sa kabubut-on mao nga maghigugmaay sa usag usa ug mopili sa Dios. Ug kining duha ka katuyoan nahiuyon gayod sa una ug ikaduha nga dagko nga mga sugo sa paghigugma sa Dios sa tibuok natong kasingkasing, kalag, ug hunahuna, ug sa paghigugma sa atong isigkatawo sama sa atong kaugalingon.

Hunahunaa nga kita gisugo—wala lamang gipahimangnoan o gitambagan apan gisugo—sa paggamit sa atong kabubut-on sa paghigugma sa usag usa ug sa pagpili sa Dios. Mosugyot ko nga diha sa mga kasulatan, ang makapausab nga pulong nga “moral” dili lamang usa ka pungway [adjective] apan tingali usa usab ka balaanong direktiba kon sa unsang paagi kinahanglang gamiton ang atong kabubut-on.

Ang pamilyar nga himno giulohan og “Pilia ang Matarong” tungod sa usa ka rason. Wala kita napanalanginan og moral nga kabubut-on sa pagbuhat sa bisan unsay atong gusto bisan kanus-a nato gusto. Hinuon, sumala sa plano sa Amahan, kita nakadawat og moral nga kabubut-on sa pagpangita ug paglihok sumala sa mahangtorong kamatuoran. Isip “mga tinugyanan sa [atong] mga kaugalingon,” kita kinahanglan nga matinguhaon nga moapil sa maayo nga mga katuyoan, “mobuhat og daghang butang pinaagi sa [atong] kaugalingong gawasnon nga kabubut-on, ug magpahinabo sa daghan nga pagkamatarong.”

Ang mahangtoron nga kaimportante sa moral nga kabubut-on gihatagan og gibug-aton diha sa asoy sa kasulatan sa konseho sa wala pa dinhi sa yuta. Si Lucifer mirebelde batok sa plano sa Amahan alang sa Iyang mga anak ug nagtinguha sa paglaglag sa gahom sa independente nga aksiyon. Mahinungdanon kaayo, ang pagsupak sa yawa direktang nakatutok sa baroganan sa moral nga kabubut-on.

Ang Dios mipasabot, “Mao nga, tungod … si Satanas misukol nako, ug nagtinguha sa pagguba sa kabubut-on sa tawo, … misugo ako nga siya isalikway.”

Ang hakog nga laraw sa kaaway mao ang matangtangan ang mga anak sa Dios sa kapasidad aron mahimong “mga tinugyanan sa ilang mga kaugalingon” kinsa makahimo diha sa pagkamatarong. Ang Iyang katuyoan mao ang pagtugyan sa mga anak sa Langitnong Amahan nga mahimong mga butang nga palihokon lamang.

Si Presidente Dallin H. Oaks mihatag og gibug-aton nga ang ebanghelyo ni Jesukristo nagdapit kanato nga mahibalo og usa ka butang ug mahimong usa ka butang pinaagi sa matarong nga paggamit sa moral nga kabubut-on. Miingon siya:

“Daghang Biblia ug modernong mga kasulatan naghisgot sa kataposang paghukom diin ang tanang mga tawo pagagantihan sumala sa ilang mga binuhatan o mga tinguha sa ilang mga kasingkasing. Apan ang ubang mga kasulatan mopadako niini nga kita pagahukman pinaagi sa kahimtang nga atong nakab-ot.

“Si propeta Nephi mihulagway sa Kataposang Paghukom base sa unsa na kita nga nahimo: ‘Ug kon ang ilang binuhatan mga hugaw sigurado gayod nga sila hugaw; ug kon sila hugaw sigurado nga sila dili makapuyo sa gingharian sa Dios’ [1 Nephi 15:33]. Si Moroni mipahayag, ‘Siya nga mahugaw magpabilin nga mahugaw sa gihapon; ug siya nga matarong magpabilin nga matarong sa gihapon’ [Mormon 9:14].”

Si Presidente Oaks mipadayon: “Gumikan niana nga mga pagtulun-an atong maingon nga ang Kataposang Paghukom dili lamang usa ka pagtimbang-timbang sa suma total sa maayo ug daotan nga mga buhat—unsay atong binuhatan. Kini maoy usa ka pagdawat sa kataposang sangpotanan sa atong mga buhat ug mga hunahuna—kon unsa ang atong nakab-ot.”

Ang atong mga buhat ug mga tinguha lamang dili ug dili mahimo makaluwas kanato. “Human sa tanan nga atong mabuhat,” kita mapasig-uli ngadto sa Dios pinaagi lamang sa kaluoy ug grasya nga anaa pinaagi sa walay kinutoban ug walay kataposan nga maulaong sakripisyo sa Manluluwas.

Si Alma mipahayag, “Sugdi ang pagtuo sa Anak sa Dios, nga siya moanhi sa pagtubos sa iyang katawhan, ug nga siya mag-antos ug mamatay aron sa pag-ula sa ilang mga sala; ug nga siya mobangon pag-usab gikan sa mga patay, nga mao ang magpahitabo sa pagkabanhaw, nga ang tanan nga tawo mobarog sa iyang atubangan, aron hukman sa kataposan ug sa adlaw sa paghukom, sumala sa ilang mga buhat.”

“Nagatuo [kita] nga pinaagi sa Pag-ula ni Kristo, ang tanang tawo maluwas, pinaagi sa pagkamasulundon sa mga balaod ug sa mga ordinansa sa Ebanghelyo.” Pagkadako sa atong panginahanglan nga magmapasalamaton nga ang atong mga sala ug daotan nga mga binuhatan dili mobarog isip usa ka pagpamatuod batok kanato kon kita tinuod nga “matawo pag-usab,” magpakita og hugot nga pagtuo sa Manunubos, maghinulsol nga “kinasingkasing” ug “sa tinuod nga katuyoan,” ug “molahutay hangtod sa kataposan.”

Daghan kanato mahimong magdahom nga ang atong pagpakita sa atubangan sa hukmanan sa Mahangtoron nga Maghuhukom mahimong susama sa paghusay diha sa usa ka kalibotanon nga korte sa balaod. Usa ka maghuhukom ang mangulo. Ang ebidensiya ipakita. Usa ka hukom ang ipakanaog. Ug lagmit dili kita sigurado ug magmahadlokon hangtod mahibal-an nato ang kataposan nga sangpotanan. Apan ako nagtuo nga ang ingon nga paghulagway dili tukma.

Lahi apan may kalabotan sa mortal nga mga kahadlok nga kasagaran natong masinati mao ang unsay gihulagway sa mga kasulatan isip ang “diosnong kahadlok” o “ang pagbaton og kahadlok sa Ginoo.” Dili sama sa kalibotanong kahadlok nga makaingon og alarma ug kakulba, ang diosnong kahadlok nagdapit sa atong kinabuhi og kalinaw, kasegurohan, ug pagsalig.

Ang matarong nga kahadlok naglukop sa lawom nga pagbati sa diosnong pagtahod ug pagdayeg alang ni Ginoong Jesukristo, pagkamasulundon sa Iyang mga sugo, pagpaabot sa Kataposang Paghukom, ug hustisya diha sa Iyang kamot. Ang diosnong kahadlok resulta sa husto nga pagsabot sa balaang kinaiyahan ug misyon sa Manunubos, ang pagkaandam sa pagtugyan sa atong kabubut-on ngadto sa Iyang kabubut-on, ug kahibalo nga ang matag lalaki ug babaye may tulubagon sa iyang kaugalingong mga tinguha, mga hunahuna, mga pulong, ug mga buhat sa Adlaw sa Paghukom.

Ang kahadlok diha sa Ginoo dili mao ang maduhaduhaon nga kakulba mahitungod sa pag-atubang diha sa Iyang presensiya aron pagahukman. Hinuon, kini mao ang paglaom sa kataposan nga pag-ila mahitungod sa atong mga kaugalingon sa “mga butang ingon nga sila gayod mao” ug “ingon nga sila gayod mahimo.”

Ang matag tawo kinsa nabuhi, kinsa buhi karon, ug mabuhi pa dinhi sa yuta “pagadad-on aron mobarog sa atubangan sa hukmanan sa Dios, aron mohukom kaniya sumala sa ilang mga buhat kon sila maayo o kon sila daotan.”

Kon ang atong mga tinguha nahimong alang sa pagkamatarong ug ang atong mga buhat maayo—buot pasabot nagpakita kita og hugot nga pagtuo ni Jesukristo, naghimo ug mituman sa mga pakigsaad ngadto sa Dios, ug naghinulsol sa atong mga sala—nan ang hukmanan makapahimuot. Sama sa gipahayag ni Enos, kita “mobarog sa … atubangan [sa Manunubos]; ug unya [atong] makita ang iyang panagway sa kahinangop.” Ug sa kataposan nga adlaw kita “pagagantihan … sa pagkamatarong.”

Sa laing bahin, kon ang atong mga tinguha daotan ug ang atong mga buhat malaw-ay, nan ang paghukom mahimong hinungdan sa kalisang. Kita makabaton og “hingpit nga kahibalo,” usa ka “matin-aw nga panumdoman,” ug usa ka “tin-aw nga salabotan sa [atong] kaugalingong sala.” “Kita dili makaako sa pagtan-aw sa atong Dios; ug kita mahinangop sa kalipay kon kita makamando sa dagkong mga bato ug sa kabukiran sa pagdat-og kanato aron tagoon kita gikan sa iyang atubangan.” Ug sa kataposang adlaw kita “[makaangkon sa atong] ganti sa pagkadaotan.”

Sa kataposan, kita ang atong kaugalingon nga mga maghuhukom. Walay usa ang kinahanglang mosulti kon asa kita moadto. Sa presensiya sa Ginoo, atong ilhon kon unsay atong gipili nga mamahimo sa mortalidad ug masayod sa atong kaugalingon kon asa kita angay mahisakop sa kahangtoran.

Ang pagsabot nga ang Kataposang Paghukom mahimong makapahimuot dili usa ka panalangin nga gitagana lamang alang ni Moroni.

Si Alma mihulagway sa gisaad nga mga panalangin nga anaa sa matag mapahinungoron nga disipulo sa Manluluwas. Miingon siya:

“Ang kahulogan sa pulong nga pagpahiuli mao ang pagpabalik og usab sa daotan alang sa daotan, o kalibotanon alang sa kalibotanon, o yawan-on alang sa yawan-on—maayo alang niana nga maayo; matarong alang niana nga matarong; makiangayon alang niana nga makiangayon; maluluy-on alang niana nga maluluy-on.

“…Makigsabot nga makiangayon,ug mohukom nga matarong, ug mobuhat og maayo sa kanunay; ug kon buhaton nimo kining tanan nga butang nan madawat nimo ang imong ganti; oo, maangkon nimo ang kaluoy nga ipahiuli og balik diha kanimo; maangkon nimo ang hustisya nga ipahiuli og balik diha kanimo; maangkon nimo ang matarong nga paghukom nga ipahiuli og balik diha kanimo; ug maangkon nimo ang maayo nga iganti balik diha kanimo.”

Ako malipayon nga mosaksi nga si Jesukristo mao ang atong buhi nga Manluluwas. Ang saad ni Alma tinuod ug magamit kaninyo ug kanako—karon, ugma, ug alang sa tanang kahangtoran. Niini ako mopamatuod sa sagradong ngalan ni Ginoong Jesukristo, amen.