Mapahiyomon nga mga Panagway ug Mapasalamaton nga mga Kasingkasing
Ang katalagsaon sa atong mga Santos didto sa Africa mas nakita pa gani samtang ilang giatubang ang mga hagit sa kinabuhi ug ang gipangayo sa nagtubo nga Simbahan.
Kapin lang gamay sa tuig ang milabay, na-release ko sa akong buluhaton diha sa Kapangulohan sa Seventy, usa ka kausaban nga gipahibalo dinhi sa kinatibuk-ang komperensiya. Tungod kay ang akong ngalan gibasa duol ngadto sa ngalan sa mga General authority nahimong emeritus, daghan ang nagdahom nga natapos na usab ang akong panahon sa pagserbisyo. Pagkahuman sa komperensiya, nadawat nako ang daghang mensahe sa pagpasalamat ug maayong panghinaot alang sa sunod nga hugna sa akong kinabuhi. Ang uban mitanyag pa gani sa pagpalit sa akong balay didto sa Amihanang Salt Lake. Nindot nga makita nga adunay mingawon nako ug sa pagkasayod usab nga dili na mi maglisod sa pagbaligya sa among panimalay kon ako mahuman na. Apan wala pa mahuman.
Ang akong bag-ong buluhaton midala ni Monica ug nako ngadto sa matahom nga Africa, diin ang Simbahan nagmauswagon. Kini nahimong usa ka panalangin ang moserbisyo sa mga matinud-anong mga Santos didto sa Habagatang Area sa Africa ug mosaksi sa gugma sa Ginoo alang kanila. Makadasig nga makita ang mga henerasyon sa mga pamilya sa tanang kaagi, lakip sa daghang malamposon ug edukadong mga miyembro sa Simbahan nga nagpahinungod sa ilang panahon ug mga talento sa pagserbisyo sa uban.
Sa samang higayon, nasayod sa domograpiya sa rehiyon, daghang tawo nga arangan og panginabuhi mipasakop sa Simbahan ug nausab ang ilang mga kinabuhi pinaagi sa mga panalangin sa ilang kamatinud-anon ngadto sa ikapulo ug sa mga oportunidad nga pang-edukasyon nga gitanyag pinaagi sa Simbahan. Ang mga programa sama sa Molampos sa Pag-Eskwela, EnglishConnect, BYU–Pathway Tibuok Kalibotan, ug ang Perpetual Education Fund [Makanunayong Pundo sa Edukasyon] nagpanalangin sa daghang kinabuhi, ilabina, niadtong nagtubo nga henerasyon.
Si Presidente James E. Faust sa makausa namahayag, “Gikasulti na nga kining simbahan wala nagkinahanglan nga modani og talagsaong katawhan apan sa kasagaran mohimo sa ordinaryong katawhan nga mahimong talagsaon.”
Ang katalagsaon sa atong mga Santos didto sa Africa mas nakita pa gani samtang ilang giatubang ang mga hagit sa kinabuhi ug ang gipangayo sa nagtubo nga Simbahan. Sila kanunay nga miatubang niini nga adunay positibo nga kinaiya. Maayo kaayo nilang napakita ang naila nga pagtulon-angikan ni Presidente Russell M. Nelson:
“Ang kalipay nga atong gibati dili kaayo konektado sa mga sirkumstansya sa atong kinabuhi apan konektado kaayo sa gitutokan sa atong kinabuhi.
“Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi.”
Sila nakakaplag sa hingpit nga kalipay bisan pa man sa ilang mga hagit. Sila nakakat-on nga ang atong relasyon sa Manluluwas makapagahom nato sa pag-atubang sa mga kalisdanan nga adunay mapahiyomon nga mga panagway ug mapasalamaton nga mga kasingkasing.
Tugoti ko nga mopakigbahin sa akong mga kasinatian uban niining mga matinud-anong mga Santos kinsa nagpakita niining mga baroganan, sugod sa Mozambique.
Mozambique
Pipila ka buwan ang milabay, nagdumala ko og usa ka komperensiya sa stake nga usa pa ka tuig ang edad ug may 10 na ka yunit. Kapin sa 2,000 ka tawo ang mipuno sa gamay nga chapel ug tulo ka tulda nga gipahimutang sa gawas. Ang presidente sa stake 31 anyos, iyang asawa 26, ug sila dunay duha ka anak. Siya nangulo niining nagtubo ug mahagiton nga stake nga walay reklamo—mapahiyomon nga panagway ug mapasalamaton nga kasingkasing lamang.
Sa usa ka interbyo uban sa patriyarka, akong nahibaloan nga ang iyang asawa grabe nga nasakit, ug siya naglisod sa pagsangkap alang sa pag-atiman sa iyang asawa. Human sa pagtagad sa problema uban sa presidente sa stake, mihatag kami og panalangin sa pagkapari ngadto sa asawa. Nagpakisayod ko sa patriyarka kon pila ka partiyarkal nga panalangin ang iyang mahatag sa kasagaran.
“Walo ngadto sa napulo,” miingon siya.
Nangutana ko, “kada buwan?”
Mitubag siya, “Kada semana!” Mitambag ko niya nga ang pagbuhat sa ingon ana ka daghan kada semana dili maalamon.
“Elder Godoy,” miingon siya, “padayon silang moabot kada semana, lakip ang bag-ong mga miyembro ug daghang batan-on.” Usab, walay reklamo—mapahiyomon nga panagway ug mapasalamaton nga kasingkasing lamang.
Human sa Sabado sa gabii nga sesyon sa komperensiya sa stake, dihang nagpadulong ko sa akong hotel, nakabantay ko og mga tawo nga namalit og pagkaon daplin sa karsada sa lawom nang gabii. Nangutana ko sa drayber nganong gibuhat nila kini nga ngitngit naman kaayo nga unta mabuhat man nila kinisa adlawan pa. Mitubag siya nga sila nagtrabaho sa adlawan pa aron makakwarta aron makabuhat sa pagpamalit human sa pagtrabaho.
“Aww, motrabaho sila karon aron makakaon inig ka ugma,” miingon ko.
Apan iyang kong gikurihian: “Dili, nagtrabaho sila sa adlawan pa aron makakaon karong gabii.” Nanghinaot ko nga ang atong mga miyembro unta maanaa sa mas maayo nga sitwasyon, apan gikompirmar niya nga daghan ang nag-atubang og susama nga mga hagit diha nianang dapita sa nasod. Pagkasunod buntag, atol sa among Dominggo nga sesyon ug bag-ong nasayod sa ilang mga kahimtang, mas natandog pa gyod ko sa ilang mapahiyomon nga mga panagway ug mapasalamaton nga mga kasingkasing.
Zambia
Padulong ngadto sa miting sa Dominggo, ang presidente sa stake ug ako nakakita og magtiayon nga naglakaw sa karsada dunay dala nga masuso ug duha ka gagmayng bata. Mihunong mi aron motanyag nila sa pagsakay. Nasuprisa sila ug nalipay. Dihang nangutana ko kon unsa kalay-on ang kinahanglan nilang baktason aron makaabot sa chapel, ang amahan mitubag nga mokabat pa og 45 minutos ngadto sa usa ka oras, depende sa kapaspason sa mga bata. Ilaha kining gisagubang nga panaw pangadto ug pabalik, kada Dominggo, nga walay reklamo—mapahiyomon nga mga panagway ug mapasalamaton nga mga kasingkasing lamang.
Malawi
Usa ka Dominggo sa wala pa ang komperensiya sa stake, mibisita ko sa duha ka branch nga naggamit sa pampubliko nga eskwelahan isip mga meetinghouse. Nahikurat ko sa kamapaubsanon ug kaligdong nga mga kahimtang sa mga bilding, nga nagkulang gani sa pipila ka nag-unang importanteng kagamitan. Sa akong pakighimamat sa pipila ka mga miyembro didto, nangandam ko nga mangayo og pasaylo tungod sa kakulangan sa kondisyon sa ilang meetinghouse, apan sila malipayon nga adunay dapit nga kapundokan nga duol ra, nalikayan ang naandan nga pagbaktas og layo. Usab, walay reklamo—mapahiyomon nga mga panagway ug mapasalamaton nga mga kasingkasing lamang.
Zimbabwe
Human sa usa ka pagbansay sa pagpangulo atol sa Sabado, ang presidente sa stake midala nako ngadto sa mga tulumanon sa Dominggo nga gipahigayon sa usa ka inabangan nga balay. Adunay 240 ka tawo nga nanambong. Dayon ang bishop mipaila sa 10 ka bag-ong miyembro nga nabunyagan nianang semanaha. Ang kongregasyon mipuno sa duha ka gagmay nga kwarto, ang ubang miyembro usab nanglingkod sa gawas sa bilding, nagtan-aw sa miting diha sa bintana ug sa mga pultahan. Usab, walay reklamo—mapahiyomon nga mga panagway ug mapasalamaton nga mga kasingkasing lamang.
Lesotho
Mibisita ko niining matahom nga gamayng nasod, nga naila usab isip “ang gingharian sa bukid,” aron makita ang usa ka distrito sa Simbahan nga nangandam aron mamahimong stake. Human sa Sabado nga mga miting, mitambong ko og tulumanon sa Dominggo didto sa usa sa ilang mga branch sa usa ka inabangan nga balay. Ang kwarto sa sakramento niawas, may mga tawo nga namarog sa gawas sa pultahan aron moapil. Akong gisultihan ang presidente sa branch nga nagkinahanglan siya og usa ka mas dako nga balay. Sa akong kasorpresa, mipahibalo siya nako nga katunga ra ni sa iyang mga miyembro. Ang laing katunga motambong sa ikaduha nga miting sa sakramento. Usab, walay reklamo—mapahiyomon nga mga panagway ug mapasalamaton nga mga kasingkasing lamang.
Mibalik ko sa Lesotho human niana tungod sa grabe nga aksidente nga nalambigit ang pipila sa atong mga kabatan-onan, nahisgotan na ni Elder D. Todd Christofferson ganina. Sa dihang akong gibisita ang mga pamilya ug mga lider, akong gidahoman ang mingaw nga palibot. Apan, nakasugat ko og lig-on ug andam nga mga Santos nga nagsugakod sa ilang kahimtang sa usa ka makabayaw ug makadasig nga paagi.
Si Mpho Anicia Nku, 14, usa ka biktima nga nakasugakod sa aksidente niining litrato, maayong mihulagway niini sa iyang kaugalingong mga pulong: “Salig ni Jesus ug kanunayng motan-aw kaniya, tungod kay pinaagi Kaniya kamo makakaplag og kalinaw, ug Siya motabang kaninyo diha sa proseso sa pagkaayo.”
Kini mga pipila lang ka ehemplo diin kita makakita sa ilang positibo nga panglantaw tungod kay ilang gisentro ang ilang mga kinabuhi diha sa ebanghelyo ni Jesukristo. Sila nasayod asa makakaplag og tabang ug paglaom.
Ang Makaayo nga Gahom sa Manluluwas
Nganong ang Manluluwas makaabag man kanila ug kanato sa bisan unsa nga mga kahimtang sa atong kinabuhi? Ang tubag sa pangutana makita sa mga kasulatan:
“Ug magpadayon siya, mag-antos sa mga sakit ug mga kasakit ug mga pagtintal sa matag matang. …
“… Ug siya modala diha kaniya … sa ilang mga kahuyang, aron ang iyang kasingkasing mapuno sa kaluoy, … aron iyang masayran … unsaon pagtabang ang iyang mga katawhan sumala sa ilang mga kahuyang.”
Sama sa gitudlo ni Elder David A. Bednar, walay pisikal nga kasakit, grabeng kaguol, o kahuyang nga atong masinati nga ang Manluluwas wala masayod. “Kamo ug ako sa panahon sa kahuyang mahimong makatuaw, ‘Walay nakasabot [kon unsa ang akong naagian]. …’ Walay binuha, tingali, nga nasayon. Apan ang Anak sa Dios hingpit nga nasayod ug nakasabot.” Ug ngano? Tungod kay “Siya mibati ug mipas-an sa atong mga palas-anon una pa kay kanato.”
Ako motapos sa akong pagpamatuod sa mga pulong ni Kristo nga makita diha sa Mateo 11:
“Umari kamo kanako, kamong tanan nga nabudlay ug nabug-atan, ug papahulayon ko kamo.
“Isangon ninyo ang akong yugo diha kaninyo, ug pagtuon kamo gikan kanako; kay ako maaghop ug mapaubsanon sa kasingkasing: ug makakaplag kamog pahulay alang sa inyong mga kalag.
“Kay masayon ang akong yugo, ug magaan ang akong luwan.”
Sama niadtong mga Santos sa Africa, ako nasayod nga kini nga saad tinuod. Kini tinuod didto, ug kini tinuod bisan asa. Niini ako mopamatuod sa ngalan ni Jesukristo, amen.