Buhata ang Imong Bahin sa Tibuok Mong Kasingkasing

Ang akong kasinatian sa flight simulator maoy usa ka importante nga pahinumdom nga ang pagkahimong maayo sa bisan unsang butang—ang pagpalupad man, ang pagbugsay, pagpanahi, pagbugwal, o pagkahibalo—nagkinahanglan og kanunay nga pagdisiplina sa kaugalingon ug pagpraktis.

Tingali maggahin mo og daghang mga tuig sa pag-angkon og kahanas o pagpalambo og talento. Tingali maningkamot mo og maayo hangtod nga mahimong pamilyar na kaayo kini kaninyo. Apan kon naghunahuna mo nga mahimo ra nga mohunong sa pagpraktis ug pagtuon, hinay-hinay nga mawala ang inyong kahibalo ug mga abilidad nga sa una inyong naangkon pinaagi sa grabe kaayo nga paningkamot.

Parehas ra kini sa mga kahanas sa pagkat-on og pinulongan, pagpatukar og mga instrumento sa musika, ug pagpalupad og eroplano. Kini magamit usab sa pagkahimong disipulo ni Kristo.

Sa yanong pagkasulti, ang pagkadisipulo nagkinahanglan og disiplina sa kaugalingon.

Dili kini usa ka yano-yano lang nga paningkamot, ug dili kini mahitabo nga sulagma.

Ang pagtuo kang Kristo usa ka gasa, apan ang pagdawat niini usa ka pagpili nga gihunahuna og maayo nga nagkinahanglan og pasalig sa tanan natong “gahom, hunahuna, ug kusog.” Usa kini ka pagbansay sa matag adlaw. Matag oras. Nagkinahanglan kini og kanunay nga pagkat-on ug determinado nga pasalig. Ang atong pagtuo, ang atong pagkamaunongon ngadto sa Manluluwas, mahimong mas lig-on samtang sulayan kini batok sa mga oposisyon nga atong giatubang dinhi sa mortalidad. Molahutay kini tungod kay ato kining gipadayon sa pag-alima, kanunay nato kining madasigon nga gigamit, ug wala gayod kita mohunong.

Sa laing bahin, kon mapakyas kita sa paggamit sa pagtuo ug sa maka-impluwensiya nga gahom pinaagi sa paglihok niini, mahimo kitang dili na kaayo segurado sa mga butang nga sa una atong giisip nga balaan—dili na kaayo masaligon sa mga butang nga sa una atong nahibaloan nga tinuod.

Ang mga tenstasyon nga dili gayod unta makakuha sa atong pagtagad magsugod sa pagkahimong dili na kaayo makuyaw tan-awon ug mahimong mas makadani.

Ang siga sa atong pagpamatuod kagahapon makapainit lamang kanato sa mubo nga panahon. Nagkinahanglan kini og padayon nga pag-alima aron magpadayon ang mahayag nga pagsiga.

Diha sa Bag-ong Tugon, ang Manluluwas nagtudlo sa pasumbingay sa usa ka agalon nga mihatag ngadto sa matag usa sa iyang mga sulugoon og sagrado nga pagsalig—gidaghanon sa kwarta nga gitawag og mga talento. Ang mga sulugoon nga nagmakugihong migamit sa ilang mga talento nakapadaghan niini. Ang sulugoon nga milubong sa iyang talento sa kadugayan nawad-an niini.

Ang leksiyon? Ang Dios naghatag nato og mga gasa—sa kahibalo, sa abilidad, sa oportunidad—ug gusto Siya nga atong gamiton ug padak-on kini aron kini makapanalangin kanato ug makapanalangin sa uban Niyang mga anak. Dili kana mahitabo kon atong ibutang kana nga mga gasa sa ibabaw sa displihanan sama sa trophy nga atong daygon sa matag karon ug unya. Ang atong mga gasa modako ug modaghan lamang kon gamiton nato kini.

“Apan Elder Uchtdorf,” tingali moingon mo nga, “Wala akoy bisan unsa nga gasa o mga talento—walay bisan usa nga ingon niana ka mahinungdanon.” Tingali nagtan-aw mo sa uban kansang mga gasa klaro kaayo ug dalaygon ug gibati ninyo nga ordinaryo ra kaayo kamo kon itandi. Tingali nagtuo kamo nga didto sa wala pa sa mortal nga kinabuhi, sa adlaw sa pagbinahinay og dagkong mga gasa ug talento, ang inyong plato gamay ra kaayo og sulod—ilabina kon ikompara sa puno ug nag-awas nga mga plato sa uban.

Oh, nangandoy ko nga gakson kamo ug tabangan kamo nga makasabot niining mahinungdanon nga kamatuoran: Kamo usa ka bulahan nga binuhat sa kahayag; ang espiritu nga anak sa walay kataposan nga Dios! Ug kamo nagdala diha kaninyo og potensiyal nga lapas pa sa imong mahunahuna.

Sama sa gipahinumdom sa mga magbabalak, kamo miabot sa yuta “latas sa nagsunod-sunod nga mga panganod sa himaya”!

Ang inyong kagikanan balaanon, ug mao usab ang inyong padulngan. Mibiya kamo sa langit aron moanhi dinhi, apan ang langit wala gayod mobiya kaninyo!

Dili kamo ordinaryo.

Kamo adunay talagsaon nga gasa!

Sa Doktrina ug mga Pakigsaad, ang Dios mipahayag:

“Adunay daghan nga mga gasa, ug ngadto sa matag tawo gihatag ang usa ka gasa pinaagi sa Espiritu sa Dios.

“Ngadto sa uban gihatag ang usa, ug ngadto sa uban gihatag ang lain, nga ang tanan makaangkon og kaayohan pinaagi niana.”

Ang pipila sa atong mga gasa gilista diha sa mga kasulatan. Daghan ang wala malista.

Sama sa gisulti ni propeta Moroni, “Ayaw ninyo ilimod ang mga gasa sa Dios, kay kini daghan; ug naggikan kini sa sama nga Dios.” Tingali makita kini sa “lain-laing paagi … ; apan ang sama nga Dios mao ang nagbuhat sa tanan.”

Tingali tinuod nga ang atong espirituwal nga mga gasa dili kanunay nga makapasilaw, apan wala kana magpasabot nga dili kaayo kini importante. Mahimo ba nga mopakigbahin ko ninyo sa ubang espirituwal nga mga gasa nga akong nakita sa daghang mga miyembro latas sa kalibotan? Pamalandongi kon napanalanginan ba kamo og usa o mas daghan pa niini nga mga gasa sama sa:

• Pagpakita og kaluoy.

• Pagmatikod sa mga tawo nga wala namatikdan.

• Pagkaplag og rason nga malipay.

• Pagkahimong tigpasiugda sa kalinaw.

• Pagmatikod sa ginagmay nga mga milagro.

• Paghatag og sinsero nga mga pagdayeg.

• Pagkamapasayloon.

• Pagkamahinulsolon.

• Pagkamalahutayon.

• Pagpasabot sa mga butang sa yano nga paagi.

• Pagkahimong suod sa mga bata.

• Pagpaluyo sa mga lider sa Simbahan.

• Pagtabang sa uban aron makahibalo nga sila adunay labot.

Tingali dili ninyo makita kini nga mga gasa nga ipasundayag atol sa pasundayag sa talento diha sa ward. Apan manghinaot ko nga makita ninyo kon unsa kini ka bililhon ngadto sa buhat sa Ginoo ug kon sa unsang paagi tingali inyong natandog, napanalanginan, ug gani naluwas ang usa sa mga anak sa Dios pinaagi sa inyong mga gasa. Hinumdomi: “Pinaagi sa gagmay ug yanong mga butang, mahitabo ang dagkong mga butang.”

Mao nga buhaton nato ang atong gamay nga bahin.

Minahal kong kaigsoonan, minahal nga mga higala, nag-ampo ko nga ang Espiritu motabang kaninyo sa pag-ila sa mga gasa ug mga talento nga gihatag sa Dios kaninyo. Dayon, kita, sama sa matinud-anon nga mga sulugoon diha sa pasumbingay sa Ginoo, mopadaghan ug mopalambo niini.

Moabot ang adlaw nga kita mobarog sa atubangan sa atong maluluy-on nga Amahan sa Langit aron mohatag og subay sa atong pagkatinugyanan. Gusto Siya nga mahibalo kon unsa ang atong gibuhat sa mga gasa nga Iyang gihatag kanato—ilabi na gayod, kon giunsa nato kini paggamit aron mopanalangin sa Iyang mga anak. Nahibalo ang Dios kon kinsa gayod kita, kon kinsa nga klase sa pagkatawo ang Iyang giplanohan nga mahimong kita sa umaabot, ug mao nga taas ang Iyang gilaoman gikan kanato.

Apan wala Siya maglaom nga mohimo kita og talagsaon, bayanihon, ug gamhanan pa sa tawo nga mga kalamposan aron moabot kita dihang dapita. Dinhi sa kalibotan nga Iyang gihimo, ang paglambo mahitabo sa hinay-hinay ug sa mapailobon nga paagi—apan usab makanunayon ug mapadayonon.

Hinumdomi, si Jesukristo mao ang mihimo sa gamhanan pa sa tawo nga bahin sa dihang gibuntog Niya ang kamatayon ug ang sala.

Ang atong bahin mao ang pagsunod ni Kristo. Atong bahin ang pagpalayo sa sala, pagduol ngadto sa Manluluwas, ug paglakaw sumala sa Iyang paagi, usa ka lakang sa matag higayon. Samtang mobuhat kita niini, nga makugihon ug matinud-anon, kita sa kataposan mosalikway sa mga gapos sa pagkadili hingpit ug mga kasipyatan ug hinay-hinay nga malimpyo, hangtod nianang hingpit nga adlaw nga kita mahingpit diha ni Kristo.

Kini nga mga panalangin atong makab-ot. Ang mga saad giandam na. Ang pultahan giablihan og dako. Atong pagpili ang pagsulod ug pagsugod.

Tingali gamay ra ang sinugdanan. Apan OK ra kana.

Kon huyang ang pagtuo, sugdi pinaagi sa paglaom diha ni Kristo Jesus ug sa Iyang gahom sa paglimpyo ug pagputli.

Ang atong Amahan naghangyo nga atong atubangon kini nga hagit sa pagtuo ug pagkadisipulo dili isip mga yano-yano lang nga mga torista apan isip bug-os og kasingkasing nga mga tumotuo kinsa mibiya sa Babilon ug mibutang sa ilang mga kasingkasing, mga hunahuna, ug mga lakang ngadto sa Zion.

Nahibalo kita nga ang atong mga paningkamot lamang dili makahimo kanato nga celestial. Apan makahimo kini kanato nga matinud-anon ug mapasaligon ngadto ni Jesukristo, ug Siya makahimo kanato nga celestial.

Tungod sa atong minahal nga Manluluwas, walay butang nga gitawag nga walay kadaogan nga sitwasyon. Kon atong ibutang ang atong paglaom ug pagtuo diha Kaniya, ang atong kadaogan maseguro. Misaad Siya kanato nga makagamit sa Iyang kalig-on, sa Iyang gahom, ug sa Iyang abunda nga grasya. Sa hinay-hinay, sa ginagmay, mas mapaduol kita ngadto nianang hingpit nga adlaw nga mabuhi kita uban Kaniya ug sa atong mga minahal diha sa mahangtoron nga himaya.

Aron moabot diha, kinahanglan atong buhaton ang atong bahin karong adlawa ug sa matag adlaw. Mapasalamaton kita sa mga lakang nga atong nahimo kagahapon, apan dili kita mohunong diha. Ug nahibalo kita nga layo pa ang atong adtoan, hinay-hinay, apan dili nato kana tugotan nga makapaluya kanato.

Mao kana ang kamatuoran kon si kinsa kita—isip mga sumosunod ni Kristo.

Akong awhagon ug panalanginan ang matag miyembro sa Simbahan, ug sa tanan nga nagtinguha nga mahimong kabahin niini, nga mosalig sa Manluluwas ug magmadasigon, sa mapailobon ug makugihon, sa pagbuhat sa inyong bahin sa tibuok ninyong kasingkasing—aron ang inyong kalipay mahingpit ug, usa unya ka adlaw, inyong madawat ang tanan nga anaa sa Amahan. Niini ako mopamatuod sa ngalan ni Jesukristo, amen.