Lakaw ug Buhata ang Sama sa Iyang Gibuhat

Niadtong mga 91 BC, si Ammon, usa ka misyonaryo diha sa Basahon ni Mormon, mipaila sa iyang kaugalingon ngadto ni Hari Lamoni nga nag-ingon, “akong tinguha nga mopuyo taliwala niini nga katawhan sulod sa usa ka panahon; … [ug] ako mahimo nimong sulugoon.” Tungod sa iyang pagserbisyo ngadto sa hari, si Ammon gihatagan og oportunidad nga “makapamulong nga walay kahadlok, …ug [misulti ni Hari Lamoni] sa unsa nga gahom” nga iyang gihimo ang iyang pagserbisyo. Agig balos, misaad ang hari nga “bisan unsa ang gusto ni [Ammon] … ihatag [sa hari].” Ang bugtong hangyo ni Ammon mao nga maminaw ang hari sa mensahe sa ebanghelyo ni Jesukristo. Ang pagserbisyo ni Ammon miresulta sa “pagdala og kaliboan ka kalag ngadto sa paghinulsol.”

Sa atong panahon, ang pagserbisyo nagpadayon sa paggiya sa uban ngadto sa ebanghelyo. Si Sister Bevan nagserbisyo isip magtutudlo nga misyonaryo sa dihang misugod nga nakasinati siya og mga problema sa panglawas nga nagkinahanglan nga mopauli siya aron matambalan. Imbes nga ma-release, nakapadayon siya sa pagserbisyo isip pangserbisyo nga misyonaryo gikan sa iyang panimalay.

Samtang nagsuroy sa usa ka parke, siya ug ang iyang higala mibati nga makigsulti sa usa ka inahan nga adunay upat ka gagmay nga mga anak, apan nagpanuko sila ug ang pamilya mibiya sakay sa sakyanan. Pagkasunod adlaw, mibalik sila sa parke, nag-ampo nga moadto kini nga pamilya. Milagro gyod, ang inahan naglingkod sa samang dapit nga iyang gilingkoran sa miaging adlaw. Niining higayona si Sister Bevan ug ang iyang higala miduol sa inahan, nakig-ila-ila niya, ug nahibaloan nga nagkinahanglan diay kaayo siya og temporal nga tabang. Mihatag sila og tabang ug dayon midapit niya sa pagkat-on mahitungod sa ebanghelyo.

Tungod niana nga serbisyo ug imbitasyon, ang inahan ug ang iyang kamaguwangan nga anak nabunyagan, gisundan sa ikaduha gikan sa kamagulangan sa pagkasunod nga tuig. Nagpabilin sila nga aktibo hangtod karon. Si Sister Bevan nasayod nga kini nga kasinatian dinasig sa balaanon nga paagi, ug kini “nagpamatuod ngadto [kaniya] nga [siya] anaa sa eksaktong dapit diin gikinahanglan [siya] sa Dios nga maanaa.”

Sama ni Ammon ug ni Sister Bevan, kita “makapakita [kita] og maayong mga panig-ingnan ngadto kanila” ug sila magtinguha nga mahibalo sa “hinungdan sa paglaom nga anaa [kanato].”

Si Jesus midapit kanato nga “lakaw, ug buhata ang sama sa iyang gibuhat.”

Si Presidente Russell M. Nelson nanawagan sa “matag takos, makahimo nga batan-ong lalaki sa pagpangandam ug pagserbisyo sa misyon” ug sa tanang makahimo nga batan-ong mga babaye sa “pag-ampo aron masayod kon ang Ginoo buot ba nga moserbisyo [siya] og misyon.” Misaad siya nga ang “inyong desisyon sa pagserbisyo og misyon, pangsangyaw man o pangserbisyo nga misyon, makapanalangin kaninyo ug sa daghan pang uban.” Ang pangserbisyo nga mga misyon miusab sa kahulogan sa pulong nga makahimo. Karon ang matag takos nga batan-ong lalaki ug batan-ong babaye nga nagtinguha sa pagserbisyo og full-time nga misyon alang sa Ginoo makabuhat niini, gawas lang sa gamay ra kaayo nga mga eksepsion.

Si Elder Holgado maoy usa ka ehemplo sa makahimo sa pagserbisyo bisan pa man sa personal nga mga kahimtang. Natawo siya nga adunay talagsaong genetic disorder, nga nakapugong niya sa pag-alagad isip magtudlo nga misyonaryo. Si Elder Holgado gitawag isip usa ka pangserbisyo nga misyonaryo ug mibulontaryo sa bishop’s storehouse, diin mitabang siya sa gatosan ka tawo aron makadawat sa tabang nga ilang gikinahanglan. Tigbutang siya og mga stock sa displihanan, tigsulod sa mga utanon sa sudlanan, ug tigpisat sa mga cardboard nga mga karton.

Samtang namulong si Elder Holgado sa miting sa sakramento human sa iyang misyon, mipakigbahin siya nga “ang Dios nagkinahanglan og pangserbisyo nga mga misyonaryo. Nagkinahanglan Siya og mga tawo nga mohigugma ug moalagad sa uban. Kini nga mga tawo magbutang og toilet paper, magputos sa broccoli, magpanday og mga furniture, ug maayong motagad sa mga tawo.”

Wala kinahanglana nga aduna kay assignment sa pagserbisyo o magsul-ob og name tag aron makabuhat og maayo. Ang matag buhat sa pagserbisyo pagailhon sa Manluluwas. Makahimo kita sa pagtabang sa uban aron moduol ni Kristo pinaagi sa pagserbisyo nga adunay mahigugmaong kabuotan. Makapangalagad kitang tanan pinaagi sa ngalan ni Kristo ngadto sa usa ka tawo pinaagi sa gahom sa Espiritu Santo ug magpakabuhi isip mga ehemplo sa pagbaton og pagtuo diha ni Jesukristo. Ang pagserbisyo motugot nato sa pagpresentar sa atong kaugalingon isip buhi nga mga halad nga madawat sa Dios.

Si Jesus midapit kanato nga “lakaw, ug buhata ang sama sa iyang gibuhat.”

Usa ka batan-ong misyonaryo nga gibalhin gikan sa tigtudlo nga assignment ngadto sa pangserbisyo nga assignment ang nakigbisog sa pipila ka personal nga mga hagit nga miresulta sa iyang pagpanginahanglan sa makaayo nga gahom ni Kristo. Ang mahalaron nga serbisyo midala niana nga gahom ngadto sa iyang kinabuhi. Miingon siya, “Gibati nako nga sa panahon nga nanglimbasog ko, gibati nako si Kristo nga mibayaw nako. Adunay espesyal nga butang mahitungod sa pagkakita Kaniya nga nanalangin sa mga tawo pinaagi sa pundohanan sa pagkaon, sulod sa templo, ug pinaagi sa Iyang ebanghelyo.”

Kini nga elder hinay-hinay nga mibati og lawom nga kalipay, ug ang iyang bag-ong napalgan nga kadasig mipanalangin niya ug sa iyang pamilya. Ang Espiritu misulod sa ilang panimalay sa mas abunda nga paagi, mitambong sila sa templo nga magkauban sa mas kanunay, ug si Kristo nahimong mas mahinungdanon nga tumong sa ilang pamilya. Kini nga misyonaryo nagtuo nga si Kristo miluwas sa iyang kinabuhi ug mipanalangin sa iyang pamilya pinaagi sa pagserbisyo.

Si Presidente Nelson nagtudlo, “Ang tinguha sa pagserbisyo ug paglig-on sa uban nagbarog isip simbolo sa kaandam sa tawo nga mamaayo” pinaagi sa matubsanon nga gahom sa Manluluwas.

Si Jesus midapit kanato nga “lakaw, ug buhata ang sama sa iyang gibuhat.”

Kon ikaw o ang usa ka sakop sa inyong pamilya mapanalanginan sa tawag isip pangserbisyo nga misyonaryo, usa kana ka panahon sa pagsaulog. Ang inyong pamilya karon aduna nay pinili nga representante ni Ginoong Jesukristo nga nagpuyo sa inyong panimalay. Kana makausab kaninyong tanan alang sa kaayohan. Dili angay nga adunay pagkadismaya sa bisan unsa nga tawag sa pagserbisyo. Mokanta kita sa, “Moadto ako sa pagbuot mo” ug “Ang gusto mo himoon ko.” Ania ang usa ka oportunidad sa pagpakita nga matinud-anon kita sa unsay atong isulti!

Ngadto sa tanan kaninyo nga nagserbisyo, ug ilabi na sa 4,000 nga batan-on nga mga pangserbisyo nga mga misyonaryo, gihigugma namo kamo! Kon ang mga misyonaryo nga gitahasan sa buluhaton sa pagtudlo mao ang baba sa Ginoo, nan kamo, mga pangserbisyo nga mga misyonaryo, mao ang mga kamot sa Ginoo, ug dili kamo mga ikaduha lamang klase [second-class] nga mga misyonaryo. Ang matag usa kaninyo mahinungdanon sa pagpundok sa Israel. Si Presidente Nelson nagtudlo nga “bisan kanus-a nga mohimo kamo sa bisan unsa nga butang nga makatabang ni bisan kinsa … sa paghimo ug pagtuman sa ilang mga pakigsaad sa Dios, nagtabang kita sa pagpundok sa Israel.”

Kamong pangserbisyo nga mga misyonaryo nagpundok sa Israel sa daghan kaayong mga paagi, ug ang inyong serbisyo makapausab og mga kinabuhi. Kasagaran dili mo masayod kinsa ang nakadawat og benepisyo sa inyong serbisyo, apan nahibalo ang Dios. Hinumdomi kanunay nga “sa matag higayon nga [nagserbisyo] kamo alang sa usa sa labing ubos … kamo [nagserbisyo Kaniya].” Nadungog namo ang inyong mga tingog samtang nagboluntaryo kamo sa mga call center sa Simbahan, nakita namo ang inyong mga pahiyom samtag nagtabang kamo sa mga organisasyon sa komunidad; ug gibati namo ang inyong kahayag samtang nagserbisyo kamo sa mga templo sa tibuok kalibotan. Inyong gipakaon ang gigutom, gisininaan ang hubo, ug gipainom ang giuhaw.

Kitang tanan kinahanglan nga molakaw, ug mobuhat sama sa iyang gibuhat.

Ang pagserbisyo adunay gahom sa pag-abli sa mga kasingkasing ngadto sa ebanghelyo ug motugot kanatong tanan sa paghatag sa atong tibuok nga kalag ngadto ni Kristo. Mousab kini sa atong mga kasingkasing aron mahimong mas sama Kaniya, ug pinaagi sa maong proseso, atong matabangan ang uban nga mahimong mas maayo. Si Presidente Nelson sa makausa nangutana, “Niini nga kalibotan nga gihampak og espirituwal nga pagkadunot, ang usa ka indibidwal … makahimo ba og kalainan?” Ang iyang tubag, “Oo! … ‘Ang katawhan sa Ginoo sa pakigsaad,, … gisangkapan … sa gahom sa Dios sa dakong himaya’ … makabayaw sa kinabuhi sa tanang katawhan.” Pinaagi sa serbisyo atong giusab ang mga kasingkasing—ug ang kalibotan.

Si Kristo “miadto sa tanang dapit ug naghimog mga maayong butang.” Nangalagad Siya sa masakiton, mihatag og panan-aw sa buta, ug mibisita sa mga gidaog-daog. Nagluto siya og pagkaon, mitabang sa kumbira sa kasal, ug mipakaon sa liboan nga gigutom. Samtang moserbisyo kita pinaagi sa ngalan ni Kristo ngadto sa usa ka tawo, madugangan ang atong pagkabalaan ug mahimong angayan sa gasa sa kinabuhing dayon. Buhi si Jesukristo. Siya ang ako ug inyong Manluluwas. Siya ang atong Manunubos. Siya ang atong dakong ehemplo sa pagpangalagad. Ako modapit sa matag usa kanato sa paglakaw ug sa pagbuhat sama sa iyang gibuhat. Sa ngalan ni Jesukristo, amen.