Walay Maglingkod nga Mag-inusara

Sulod sa 50 ka tuig, nagtuon ko sa kultura, lakip sa kultura sa ebanghelyo. Nagsugod ko sa fortune cookies.

Sa Chinatown sa San Francisco, ang mga panihapon sa pamilya Gong natapos sa usa ka fortune cookie ug sa usa ka maalamon nga panultihon sama sa “Ang usa ka panaw sa liboan ka milya magsugod sa usa ka lakang.”

Isip usa ka young adult, mihimo ko og mga fortune cookie. Nagsul-ob og puti nga algodon nga mga guwantes, gipilo nako ug giporma ang lingin nga mga cookie nga init pa gikan sa oven.

Sa akong katingala, nahibaloan nako nga ang mga fortune cookie dili orihinal nga bahin sa kultura sa China. Aron mailhan ang kultura sa Chinese, Amerikano, ug European nga fortune cookie, nangita ko og mga fortune cookie diha sa daghang mga kontinente—sama ra nga ang usa mogamit og daghang mga lokasyon aron matumbok ang lokasyon sa usa ka sunog sa lasang. Ang Chinese nga mga restawran sa San Francisco, Los Angeles, ug New York nagdalit og mga fortune cookie, apan wala nagdalit niadtong anaa sa Beijing, London, o Sydney. Ang mga Amerikano lamang ang nagsaulog sa National Fortune Cookie Day. Ang Chinese nga mga pahinumdom lamang ang nagtanyag sa “Authentic American Fortune Cookies.”

Ang mga fortune cookie usa ka makalingaw, yano nga ehemplo. Apan ang samang baroganan sa pagtandi sa mga binuhatan diha sa lainlaing kultural nga mga kahimtang makatabang kanato sa pag-ila sa kultura sa ebanghelyo. Ug karon ang Ginoo nag-abli og bag-ong mga oportunidad sa pagkat-on sa kultura sa ebanghelyo samtang ang pasumbingay sa Basahon ni Mormon ug ang sambingay nga mga panagna sa Bag-ong Tugon natuman.

Bisan asa ang mga tawo mobalhin. Ang United Nations nag-report sa 281 ka milyon nga internasyonal nga mga migrante. Kini mao ang 128 ka milyon nga dugang nga mga indibidwal kay sa niadtong 1990 ug sobra sa katulohon ang 1970 nga mga banabana. Bisan asa, mas daghan kaysa kaniadto nga mga kinabig ang nakakaplag sa Ang Simbahan ni Jesukristo sa mga Santos sa Ulahing mga Adlaw. Matag adlawng Igpapahulay, ang mga miyembro ug mga higala gikan sa 195 ka nasod nga natawhan ug mga teritoryo magtigom diha sa 31,916 ka kongregasyon sa Simbahan. Kita nagsulti og 125 ka pinulongan.

Bag-ohay lang, sa Albania, North Macedonia, Kosovo, Switzerland, ug Germany, nasaksihan nako ang bag-ong mga miyembro nga nagtuman sa pasumbingay sa Basahon ni Mormon sa kahoy nga oliba. Diha sa Jacob 5, ang Ginoo sa ubasan ug ang iyang mga sulugoon milig-on sa gamot ug sa mga sanga sa kahoy nga oliba pinaagi sa pagpundok ug pagsumbak niadtong gikan sa nagkadaiyang mga dapit. Karon ang mga anak sa Dios magtigom isip nagkahiusa diha ni Jesukristo, ang Ginoo nagtanyag og talagsaong natural nga mga paagi sa pagpalapad sa atong nasinati nga kahingpitan ug pagsabot sa Iyang gipahiuli nga ebanghelyo.

Sa pag-andam kanato alang sa gingharian sa langit, si Jesus nagsulti sa mga sambingay sa dakong panihapon ug sa kumbira sa kasal. Niini nga mga sambingay, ang dinapit nga mga bisita naghimo og mga pasangil nga dili moadto. Ang agalon misugo sa iyang mga sulugoon “lakaw pagdali ngadto sa mga kadalanan ug kasuoksuokan sa lungsod” ug sa “[mga highway] ug sa kakoralan” nga “dad-a dinhi” ang mga kabos, mga pungkol, mga piang, ug mga buta. Sa espirituhanong pagkasulti, mao kana ang matag usa kanato.

Ang kasulatan namahayag:

“Ang tanang nasod pagadapiton” ngadto sa “usa ka panihapon sa balay sa Ginoo.”

“Andama ninyo ang agianan sa Ginoo … aron ang iyang gingharian mokatap sa yuta, nga ang mga lumulupyo modawat niini, ug maandam alang sa mga adlaw nga moabot.”

Karon kadtong gidapit sa panihapon sa Ginoo naggikan sa tanang dapit ug kultura. Tigulang ug batan-on, adunahan ug kabos, lokal ug tibuok kalibotan, atong gihimo ang atong mga kongregasyon sa Simbahan nga susama sa atong mga komunidad.

Isip labaw nga Apostol, nakita ni Pedro ang langit nga miabli sa usa ka panan-awon sa “usa ka dakong panapton nga gihiktan sa upat ka eskina, … sa sulod niini diha ang tanang matang sa … mga mananap.” Mitudlo si Pedro: “Karon naila ko na nga ang Dios walay pinalabi. … Ang mahadlokon [sa Ginoo] ug nagbuhat sa matarong iyang dawaton bisag taga-diin pa siya.”

Diha sa sambingay sa maayong Samaryanhon, si Jesus nagdapit kanato sa pagduol sa usag usa ug ngadto Kaniya diha sa Iyang balay abotanan—Iyang Simbahan. Siya nagdapit kanato nga mahimong maayo nga mga silingan. Ang maayong Samaryanhon misaad nga mobalik ug moganti sa pag-atiman niadtong anaa sa Iyang balay nga abotanan. Ang pagsunod sa ebanghelyo ni Jesukristo naglakip sa paghatag og luna alang sa tanan diha sa Iyang gipahiuli nga Simbahan.

Ang diwa sa “luna sa balay nga abotanan” naglakip sa “walay maglingkod nga mag-inusara.” Kon kamo moadto sa simbahan, kon makakita kamo og usa ka tawo nga nag-inusara, mahimo bang abiabihon ug tuparan ninyo siya? Tingali dili kini mao ang inyong batasan. Ang tawo mahimong makita o mosulti nga lahi kay kaninyo. Ug siyempre, sama sa mahimong isulti sa usa ka fortune cookie, “Ang usa ka panaw sa panaghigala ug gugma sa ebanghelyo magsugod sa unang pagtimbaya ug walay maglingkod nga mag-inusara.”

Ang “walay maglingkod nga mag-inusara” nagpasabot usab nga walay tawo nga maglingkod nga mag-inusara sa emosyonal o espirituwal nga paagi. Miuban ko sa usa ka masulub-on nga amahan sa pagbisita sa iyang anak nga lalaki. Mga tuig na ang milabay, ang anak nga lalaki mahinamon nga mahimong usa ka bag-ong deacon. Ang okasyon naglakip sa iyang pamilya nga nagpalit kaniya sa iyang unang pares sa bag-ong sapatos.

Apan sa simbahan, gikataw-an siya sa mga deacon. Ang iyang sapatos bag-o, apan dili uso. Naulaw ug nasakitan, ang batan-ong deacon miingon nga dili na gayod siya moadto pag-usab sa simbahan. Ang akong kasingkasing nagsubo gihapon kaayo alang kaniya ug sa iyang pamilya.

Diha sa abogong mga dalan paingon sa Jerico, ang matag usa kanato gikataw-an, gipakaulawan ug gipasakitan, tingali gitamay o giabuso. Ug sa nagkalainlaing matang sa katuyoan, ang matag usa usab kanato mibaliwala, wala makakita o midungog, tingali tuyo nga mipasakit sa uban. Kini mao gayod tungod kay kita nasakitan ug nakapasakit sa uban nga si Jesukristo modala kanatong tanan ngadto sa Iyang balay abotanan. Diha sa Iyang Simbahan ug pinaagi sa Iyang mga ordinansa ug mga pakigsaad, moduol kita sa usag usa ug ngadto ni Jesukristo. Kita mohigugma ug gihigugma, moserbisyo ug giserbisyohan, mopasaylo ug gipasaylo. Palihog hinumdomi, “sa langit ang kasakit di itugot”; ang mga palas-anon sa yuta mapagaan—ang kalipay sa atong Manluluwas tinuod.

Sa 1 Nephi 19, atong mabasa: “Gani ang Dios mismo sa Israel gitunobtunoban [nila]; … sila mibaliwala kaniya. … Mao nga sila mobunal kaniya, ug mag-antos siya niini; ug sila modapat kaniya, ug mag-antos siya niini. Oo, luwaan nila siya, ug mag-antos siya niini.”

Ang akong higala nga si Propesor Terry Warner miingon nga ang paghukom, paghampak, pagbunal, ug pagluwa dili panagsa nga mga panghitabo nga nahitabo lamang sa mortal nga kinabuhi ni Kristo. Kon giunsa nato pagtagad ang usag usa—ilabi na ang gigutom, ang giuhaw, kadtong gibiyaan nga nag-inusara—mao ang atong pagtagad Kaniya.

Sa Iyang gipahiuli nga Simbahan, kitang tanan mas maayo kon walay maglingkod nga mag-inusara. Dili lang kita yanong mopahiluna o motugot. Kita tinud-anay nga moabiabi, modawat, mangalagad, mohigugma. Hinaot nga ang matag higala, sister, brother dili mahimong usa ka langyaw o estranghero apan usa ka bata sa panimalay.

Karon daghan ang mibati nga nag-inusara ug nahibulag. Ang social media ug artificial intelligence makahimo kanato nga magtinguha alang sa tawhanong pagkasuod ug pisikal nga hikap. Gusto nato nga madungog ang tingog sa usag usa. Gusto nato ang tinuod nga pagkahisakop ug pagkamabination.

Adunay daghang rason nga tingali kita mobati nga kita dili mohaom sa simbahan—nga, sa pasumbingay nga pagkaistorya, kita naglingkod nga nag-inusara. Kita mahimong mabalaka mahitungod sa atong tonada, mga sinina, sitwasyon sa pamilya. Tingali mobati kita nga dili igo, baho og aso, nangandoy alang sa moral nga kalimpyo, nakigbulag sa usa ka tawo ug mibati og kasakit ug kaulaw; nabalaka bahin sa usa ka palisiya sa Simbahan. Kita tingali dili minyo, diborsiyado, nabalo. Ang among mga anak saba; kami walay mga anak. Kita wala miserbisyo og misyon o mipauli og sayo. Ang lista nagpadayon.

Ang Mosiah 18:21 nagdapit kanato sa paghiusa sa atong mga kasingkasing diha sa gugma. Ako modapit kanato nga dili kaayo mabalaka, dili kaayo mohukom, dili kaayo magdahom og dako sa uban—ug, kon gikinahanglan, mahimong dili kaayo mohukom sa atong kaugalingon. Kita dili makamugna sa Zion sulod sa usa ka adlaw. Apan ang matag “kumusta,” matag mainit nga lihok, mas mopaduol sa Zion. Mas mosalig kita sa Ginoo ug mopili nga malipayon nga mosunod sa tanan Niyang mga sugo.

Sa doktrinal nga paagi, sa panimalay sa hugot nga pagtuo ug pagpakigdait sa mga Santos, walay maglingkod nga mag-inusara tungod sa pagkahisakop sa pakigsaad diha ni Jesukristo.

Mitudlo si Propeta Joseph Smith: “Gibilin kini alang kanato aron makakita, makaapil ug makatabang sa pagpadayon sa Ulahing adlaw nga himaya, ‘ang dispensasyon sa kahingpitan sa panahon … ,’ sa dihang ang mga Santos sa Dios magkapundok nga maghiusa gikan sa tanang kanasoran, ug mga kaliwatan, ug katawhan.”

Ang Dios “dili mohimo og bisan unsa gawas lang kon kini alang sa kaayohan sa kalibotan; … aron iyang madani ang tanang katawhan ngadto kaniya. …

“… Nagdapit Siya [sa tanan] sa pagduol ngadto kaniya ug pag-ambit sa iyang kamaayo; … ug ang tanan managsama ngadto sa Dios.”

Ang pagkakabig diha ni Jesukristo nagkinahanglan nga atong isalikway ang kinaiyanhon nga tawo ug ang kalibotanong kultura. Sama sa gitudlo ni Presidente Dallin H. Oaks, atong biyaan ang bisan unsang tradisyon ug kultural nga binuhatan nga supak sa mga sugo sa Dios ug mahimong mga Santos sa Ulahing mga Adlaw. Siya mipasabot, “Dunay lahi nga kultura sa ebanghelyo, usa ka hut-ong sa mga mithi ug mga ekspektasyon ug mga binuhatan nga komon sa tanang miyembro sa Simbahan ni Jesukristo sa mga Santos sa Ulahing mga Adlaw.” Ang kultura sa ebanghelyo naglakip sa kaputli, sinemana nga pagtambong sa simbahan, paglikay sa ilimnong makahubog, tabako, tsa, ug kape. Kini naglakip sa pagkamatinuoron ug kaligdong, pagsabot nga mouswag kita dili pataas o paubos, sa mga posisyon sa Simbahan.

Ako nagkat-on gikan sa matinud-anong mga miyembro ug mga higala sa matag yuta ug kultura. Ang mga kasulatan nga gitun-an diha sa daghang pinulongan ug mga panglantaw sa kultura magpalawom sa pagsabot sa ebanghelyo. Ang lainlaing mga ekspresyon sa Kristohanong mga hiyas nagpalawom sa akong gugma ug pagsabot sa akong Manluluwas. Ang tanan bulahan kon atong ipasabot ang atong kultural nga pagkatawo, sama sa gitudlo ni Presidente Russell M. Nelson, isip usa ka anak sa Dios, usa ka anak sa pakigsaad, usa ka disipulo ni Jesukristo.

Ang kalinaw ni Jesukristo personal nga gituyo alang kanato. Bag-ohay lang usa ka batan-ong lalaki ang tiunay nga nangutana, “Elder Gong, makaadto pa ba ko sa langit?” Siya naghunahuna kon mapasaylo pa ba siya. Gipangutana nako ang iyang ngalan, naminaw og maayo, gidapit siya nga makig-istorya sa iyang bishop, migakos niya og maayo. Siya mibiya uban sa paglaom diha ni Jesukristo.

Akong gihisgotan ang batan-ong lalaki sa laing dapit. Sa wala madugay nakadawat ko og walay pirma nga sulat nga nagsugod, “Elder Gong, akong asawa ug ako nakapadako og siyam ka anak … ug miserbisyo og duha ka misyon.” Apan “kanunay nakong gibati nga dili ako tugotan didto sa celestial nga gingharian … tungod kay ang akong mga sala isip usa ka batan-on grabe kaayo!”

Ang sulat mipadayon, “Elder Gong, sa dihang ikaw misulti mahitungod sa batan-ong lalaki nga nakaangkon og paglaom sa pagpasaylo, napuno ko sa hingpit nga kalipay, nagsugod sa pagkaamgo nga tingali ako [mapasaylo].” Ang sulat mitapos, “Ako gani ganahan na sa akong kaugalingon karon!”

Ang pagkahisakop sa pakigsaad mapalawoman samtang kita moduol sa usag usa ug ngadto sa Ginoo diha sa Iyang balay abotanan. Ang Ginoo mopanalangin kanatong tanan kon walay maglingkod nga mag-inusara. Ug kinsay magdahom? Tingali ang tawo nga naglingkod tupad kanato mahimong atong labing maayo nga fortune cookie nga higala. Unta kita mangita ug mohatag og luna alang Kaniya ug sa usag usa diha sa panihapon sa Kordero, ako kinasingkasing nga nag-ampo sa balaang ngalan ni Jesukristo, amen.