Hiusaha ang Inyong Kasingkasing Ngadto ni Jesukristo: Ang Sagradong Gasa sa Musika sa Primary

Ang mga awit sa Primary mahimo usab nga gamhanang mga himan sa pagtudlo sa doktrina. Ang pipila sa awit naghisgot sa mga istorya sa kinabuhi ug sa pagpangalagad sa Manluluwas. Ang uban nagtudlo sa Iyang mga kinaiya, sama sa Iyang pagtuo, Iyang paglaom, ug Iyang gugmang putli. Ug ang labing sagrado nga mga awit nagpamatuod sa Iyang walay kinutoban nga Pag-ula ug sa gugma nga midagayday gikan niana nga buhat sa kaluwasan.

Usa ka propeta sa Ginoo, si Presidente Russell M. Nelson, mitudlo: “Ang [musika] mahimong makahatag og padayon nga impluwensiya alang sa kaayohan nga bisan lapas na sa mga panahon nga ang mga bata gagmay pa. … [Kini] adunay gahom sa paghatag og espirituhanong pag-amuma. Kini adunay makaayo nga gahom. Kini adunay gahom sa pagpahiluna sa pagsimba; kini nagtugot kanato sa pagpamalandong sa Pag-ula sa [Manluluwas] ug sa Pagpahiuli sa ebanghelyo uban sa makaluwas nga mga baroganan ug makapahimaya nga mga ordinansa. Ang musika makahatag kanato og gahom aron sa pagpahayag sa atong mainampoon nga mga hunahuna ug mohatag sa atong pagpamatuod sa sagradong mga kamatuoran.”

Isip mga ginikanan, mga lider, ug mga magtutudlo, ang atong paningkamot naglakip sa pagtabang sa mga bata nga makadawat niini nga gisaad nga mga panalangin pinaagi sa pagtudlo nga may katuyoan sa mga kamatuoran sa ebanghelyo nga makita diha sa musika. Si Presidente Nelson mitudlo usab nga “ang mga bata makakat-on sa doktrina sa higayon nga sila nagkat-on sa pagkanta nga sama ra usab nga sila makat-on sa doktrina diha sa klase.” Kini nga mga awit makahatag og daghang leksiyon nga makatabang sa pagpalambo sa pagtuo nga mopunting sa mga bata ngadto sa Manluluwas ug motabang nila nga makapalambo og debosyon ngadto sa Iyang ebanghelyo.

Ang mga kasulatan nagtudlo nga ang mga awit sa mga matarong nga naggikan sa kasingkasing makapahimuot sa Manluluwas. Ako mahingangha na lamang sa kahimuot sa unsay mamugna sa mga tingog sa labing bata nga mga disipulo sa Manluluwas. Ako nakahibalo nga ang ilang mainampoong mga awit moabot sa langit isip pagpadayag sa pagtuo nga nagdapit sa Balaang Espiritu aron ikompirmar ang mahangtorong mga kamatuoran ug modapit sa uban sa malumo ug sa mahigugmaong paagi nga modawat sa pagdapit sa atong Manluluwas nga mosunod Kaniya ug mopauli. Sama sa gipahinumdom kanato ni Elder Henry B. Eyring, niana nga mga higayon sa pagbati sa Espiritu nga kita adunay ebidensya sa Pag-ula sa Manluluwas nga naglihok diha sa atong kinabuhi.

Ang musika sa Primary mahimong usa ka milagro nga makahatag og kaayohan sa atong mga anak sa tibuok nilang kinabuhi. Ang usa ka awit nga nakat-onan sa nag-edad og sayis adunay gahom nga magpabilin diha kanato—ug mahimong mobalik sa mosunod nga dekada sa mga higayon sa pagdesisyon, tentasyon, kasubo, o kamaya. Tingali sa atong umaabot nga katuigan, ang mga liriko sa “Sundon Ko ang Plano sa Dios” mahimong magsilbi nga lig-ong espirituhanon nga koneksiyon nga mopaalingawngaw sa pagsaksi ni Apostol Pablo sa kaseguradohan sa mga saad sa Dios ngari kanato. O kini mopahinumdom nato nga tungod kay motuman ang Dios sa Iyang mga saad, ang Iyang mga pakigsaad nagtanyag og lig-on nga konsuwelo ug usa ka dapit nga kadangpan ug modapit kanato nga lig-on nga ibutang ang atong paglaom ug kasegurohan diha ni Jesukristo ug sa Iyang maulaong gahom.

Ang hamtong nga mga miyembro sa tibuok kalibotan, sa higayon sa kalisod, kasagaran makahinumdom ug modangop ngadto sa mga awit sa Primary nga ilang nakat-onan sa bata pa. Alang sa daghang hamtong nga miyembro, kini nga mga awit misuporta sa unang paglambo sa ilang pagtuo ni Jesukristo ug kasagaran mao ang unang dapit diin nagsugod ang ilang pagkakabig ngadto sa Iyang ebanghelyo. Ang mga ginikanan, mga lider, ug mga magtutudlo miamuma niana nga pagtuo sa mga katuigan pinaagi sa mainampingon nga pagtudlo, pagkanta, ug pagpamatuod ngadto sa mga bata.

Usa ka sister mipakigbahin nako nga ganahan kaayo siya sa mga musika sa Primary, ug human sa 20 ka tuig iya kining giila nga nakapalambo sa iyang padayon nga pagkakabig sa ebanghelyo ni Jesukristo. Lain nga miyembro mipamatuod nga ang Primary mitisok og liso sa mustasa nga pagtuo sa dihang gamay pa siya ug mao ang rason nga siya nakabalik sa Simbahan sa Ginoo sa dihang 30 na ang iyang pangedaron. Ang Manluluwas misaad, “Ang Maghuhupay … magtudlo ug magpahinumdom kaninyo sa tanan nga akong gisulti kaninyo.” Ang musika sa Primary mahimong usa ka paagi nga matuman kana nga saad.

Lain pa nga gimahal nga awit sa Primary nagpahayag sa gahom sa yano nga pagtuo ug malungtarong pagpamatuod:

Samtang nagkanta ang mga bata, sila nagpahayag sa tinguha sa usa ka disipulo ug magkat-on sa sumbanan sa pagpuyo sa pakigsaad. Ang Espiritu makagamit sa musika aron matatak ang walay kataposang mga kamatuoran diha sa ilang malumong mga kasingkasing. Ug pag-abot sa panahon, ang mga bata makapili nga ihiusa ug idangop ang ilang mga kasingkasing ug ilang kinabuhi ngadto ni Jesukristo pinaagi sa paghimo ug pagtuman sa sagrado nga mga pakigsaad ngadto Kaniya.

Ang sagradong musika makatabang nato nga tinud-anay nga makahibalo sa doktrina ni Jesukristo ug moandam nato sa pagdawat sa Iyang mga ordinansa. Kini mokonekta sa doktrina sa Manluluwas ngadto sa atong panumdoman ug kana nga panumdoman ngadto sa atong pagkadisipulo Niya.

Isip mga lider sa Primary, kita adunay kahigayonan ug sagradong responsibilidad nga segurohon nga ang musika sa Primary matudlo nga adunay kalipay, adunay pagsabot sa doktrina, ug inubanan sa Espiritu. Kini naglakip sa pagdapit sa mga bata nga bantayan kon unsa ang ilang gibati samtang sila nagkanta ug sa pagtabang nila nga maila nga kadto nga mga pagbati nagagikan sa Espiritu Santo. Kini nga mga paningkamot makatabang nga maandam ang atong mga bata alang sa sagrado nga mga ordinansa, sama sa bunyag ug pagkompirma, ingon man pagdasig sa ilang panumdoman sa pakigsaad samtang sila kanunay nga mobag-o sa ilang mga saad ngadto sa Dios.

Sa Kataposang Panihapon, human ang Manluluwas mipahigayon sa sakramento, si Mateo mitala nga “unya nag-awit silag usa ka alawiton sa pagdayeg sa Dios ug nangadto sa Bungtod sa mga Olibo.” Matag semana, ang nabunyagan ug nakompirmahan na nga mga miyembro sa gipahiuli nga Simbahan sa Ginoo, lakip na ang nabunyagan na nga mga bata nga sama pa ka bata sa walo ka tuig, nangandam aron moambit sa sakramento sa Ginoo. Pinaagi sa pagkanta og sagradong musika, ang mga kongregasyon sa mga anak sa Dios nahatagan og kahigayonan nga maandam ang ilang mga kasingkasing alang nianang sagrado nga ordinansa sa pagdala diha sa ilang kaugalingon sa Iyang ngalan, sa kanunay nga paghinumdom Kaniya, ug sa pagtuman sa Iyang mga sugo.

Minahal nga mga higala, ako mopamatuod nga ang mga awit sa Primary nagtudlo og mahangtorong mga kamatuoran ug doktrina nga mogiya nato ngadto ni Jesukristo ug sa Iyang ebanghelyo. Ako modapit kaninyo nga ikonsiderar kon unsa nga sukaranang mga kamatuoran ang lig-on nga natatak sa inyong mga kasingkasing pinaagi sa yano nga mga pagtulun-an niini nga mga awit ug sa pagpamatuod niadto nga mga kamatuoran ngadto sa labing bata nga mga disipulo sa Manluluwas samtang sila tudloan ninyo sa maayong balita sa ebanghelyo pinaagi sa awit.

Ako nakahibalo nga ang Dios nga atong Amahan, sa Iyang walay kataposan nga gugma, mipadala sa Iyang Pinalanggang Anak sa kalibotan aron motudlo nato, mopakita nato sa dalan, ug aron motubos nato pinaagi sa Iyang Pag-ula.

Ako nakahibalo nga ang kinabuhi ug pagpangalagad sa Manluluwas tinuod ug personal. Ang mga kasulatan puno sa mga istorya sa Iyang pag-ayo, Iyang kamalumo, ug Iyang mga milagro.

Ako nakahibalo nga ang Langitnong Amahan makadungog ug motubag sa sinsero nga mga pag-ampo sa Iyang mga anak, bisan unsa pa ang ilang pangedaron, kahimtang, o pinulongan. Siya maminaw sa hilom nga mga pangamuyo sa atong mga kasingkasing.

Ako mopamatuod nga sa Getsemani, gipas-an ni Jesukristo ang gibug-aton sa atong mga sala, mga kasub-anan, ug mga kasakit. Siya andam nga miantos tungod sa Iyang gugma alang nato ug mihimong posible alang nato nga mapasaylo ug makabalik sa panimalay sa Dios.

Ako nakahibalo nga kita literal nga mga anak sa Dios, gilalang sa Iyang panagway, gitugahan og balaanong potensyal, ug gidapit nga mobalik ug mopuyo uban Niya kon kita mopili nga mosunod ni Jesukristo.

Ako nakahibalo nga si Jesukristo mao ang atong hingpit nga ehemplo, ug samtang kita mosunod Kaniya pinaagi sa pagserbisyo, pagpasaylo, ug paghigugma sa uban, kita mahimong mas sama Kaniya kada adlaw.

Ug ako nakahibalo nga ang balaang mga templo sa Ginoo balay Niya dinhi sa yuta. Sa sulod niini, kita maghimo og sagradong mga pakigsaad, magdawat og mahangtorong mga panalangin, ug makat-on og dugang kabahin Niya ug makabati og dugang sa Iyang presensiya. Ang templo usa ka dapit sa pagkat-on, kalinaw, ug pagpangandam alang sa atong kinabuhi.

Ako mopamatuod nga ang mga paningkamot nga atong gihimo nga motudlo ug mokanta niini nga mga awit sa Primary ngadto sa atong mga bata dili lamang nindot nga kabahin sa atong relihiyosong tradisyon. Kini mga wali alang sa mga disipulo ni Jesukristo, mga pagpamatuod sa kamatuoran sa gipahiuli nga ebanghelyo, ug mga pag-ampo nga gihimong musika. Ang sagradong musika makapadan-ag sa Kahayag ni Kristo diha sa tigpaminaw ug makapatuhop niini sa kasingkasing sa tigkanta. Minahal nga mga higala, buot gihapon ni Jesus nga kita mahimong bidlisiw. Sa ingon niana ako mopamatuod sa sagradong ngalan ni Jesukristo, amen.