Pagbaton og Hiyas sa Pagpugong sa Kaugalingon

Niadtong Mayo 2021, samtang nagbisita sa gibag-o nga Salt Lake Temple, si Presidente Russell M. Nelson nahingangha sa mga paningkamot sa mga pioneer kinsa, uban sa limitado nga mga kapanguhaan ug lig-on nga pagtuo, mitukod sa sagrado nga bilding, usa ka pisikal ug espirituwal nga obra maestra nga nagpabiling lig-on sulod sa dugayng panahon. Hinuon, naobserbahan usab niya ang mga epekto sa pagdahili sa yuta, nga sa paglabay sa panahon maoy hinungdan sa pagkal-ang sa mga bato sa orihinal nga pundasyon ug sa pagkahuyang niini, nga klarong timailhan nga nagkinahanglan og dugang nga pagpalig-on sa estruktura.

Unya ang atong minahal nga propeta mitudlo kanato nga ingon nga kinahanglanon ang pag-implementar og dakong buluhaton sa pagpalig-on sa pundasyon sa templo aron makasugakod kini sa pwersa sa kinaiyahan, kita usab nagkinahanglan nga mohimo og talagsaon nga mga buluhaton—tingali mga buluhaton nga wala pa nato mahimo sukad—aron mapalig-on ang atong espirituwal nga pundasyon diha ni Jesukristo. Sa iyang halandomon nga mensahe, siya mibilin nato og duha ka mahinungdanong mga pangutana alang sa personal nga pagpamalandong: “Unsa kalig-on ang inyong tukuranan? Ug unsa nga mga pagpalig-on sa inyong pagpamatuod ug pagsabot sa ebanghelyo ang gikinahanglan?”

Ang ebanghelyo ni Jesukristo nagsangkap kanato og balaanong dinasig ug epektibong mga pamaagi aron mapugngan ang espirituwal nga pagkahuyang sa atong mga kalag, mapalig-on ang atong pundasyon sa gamhanang paagi ug matabangan kita nga malikayan ang mga babag sa atong pagtuo ug pagkahuyang sa atong pagpamatuod ug sa atong pagsabot sa sagrado nga mga kamatuoran sa ebanghelyo. Usa ka partikular nga mahinungdanong baroganan sa pagkab-ot niining katuyoan makita diha sa seksiyon 12 sa Doktrina ug mga Pakigsaad, usa ka pagpadayag nga gihatag pinaagi ni Propeta Joseph Smith ngadto ni Joseph Knight, usa ka matarong nga tawo nga tinuoray nga nagtinguha nga makasabot sa kabubut-on sa Ginoo, dili lang sa panggawas nga kausaban apan mobarog nga lig-on sa iyang pagkadisipulo—“lig-on sama sa mga haligi sa langit.” Ang Ginoo mipahayag:

“Tan-awa, sultihan ko ikaw, ug usab ang tanan nga adunay mga tinguha sa pagdala ug pagtukod niini nga buhat;

“Ug walay tawo nga makatabang niini nga buhat gawas kon siya magmapainubsanon ug puno sa gugma, adunay pagtuo, paglaom, ug gugmang putli, mapinugnganon sa kaugalingon sa tanan nga butang, ngadto sa bisan unsa nga isalig kaniya.”

Ang giya sa Manluluwas, nga nakarekord niining sagrado nga pagpadayag, nagpahinumdom nato nga ang pagpugong sa kaugalingon mahinungdanon nga pagpalig-on alang sa usa ka lig-on nga pundasyon diha ni Jesukristo. Usa kini sa kinahanglanon nga mga hiyas, dili lamang niadtong gitawag sa pagserbisyo apan usab sa tanan nga mihimo og sagradong mga pakigsaad ngadto sa Ginoo ug midawat nga matinud-anong mosunod Kaniya. Ang pagpugong sa kaugalingon mopahiuyon ug molig-on sa ubang Kristohanong mga kinaiya nga gihisgotan niini nga pagpadayag: kamapainubsanon, pagtuo, paglaom, gugmang putli, ug tiunay nga gugma nga nagagikan Kaniya. Dugang pa, ang pag-ugmad og pagpugong sa kaugalingon usa ka makahuloganong paagi sa pagpanalipod sa atong mga kalag batok sa dili maklaro apan makanunayon nga espirituwal nga pagkahuyang tungod sa kalibotanong mga impluwensya nga makapahuyang sa atong pundasyon diha ni Jesukristo.

Sa mga kinaiya nga nagbaton sa tinuod nga mga disipulo ni Kristo, ang pagpugong sa kaugalingon mabantayan dayon isip usa ka paghulagway sa Manluluwas sa Iyang Kaugalingon, usa ka bililhong bunga sa Espiritu, nga mahimong madawat sa tanan kinsa bukas ngadto sa balaanong impluwensya. Kini mao ang hiyas nga nagdala og panag-uyon ngadto sa kasingkasing, nag-umol sa mga tinguha ug mga emosyon inubanan sa kaalam ug kakalma. Sa mga kasulatan, ang pagpugong sa kaugalingon gipresentar isip mahinungdanong bahin sa paglambo sa atong espirituhanong panaw, nga naggiya nato paingon sa pagpailob, pagkadiosnon, ug kamaluluy-on samtang nagputli sa atong mga pagbati, atong mga pulong, ug atong mga binuhatan.

Ang mga disipulo ni Kristo kinsa naningkamot sa pag-ugmad niining Kristohanong kinaiya molambo sa kamapainubsanon ug mapuno sa gugma. Usa ka malinawong kalig-on sa kahiladman motumaw diha nila, ug sila mas makahimo sa pagpugong sa kasuko, pag-amuma sa pailob, ug pagtratar sa uban inubanan sa kamatugtanon, pagtahod, ug kaligdong, bisan kon ang mga hangin sa kalisdanan mohampak og kusog. Sila maningkamot nga dili molihok nga madalidalion apan mopili sa paglihok uban sa epirituwal nga kaalam, giniyahan sa maaghop ug malumo nga impluwensya sa Balaang Espiritu. Niini nga paagi, sila mahimong menos ang kalagmitan sa espirituwal nga pagkahuyang tungod kay, sama sa gitudlo ni Apostol Pablo, sila nasayod nga sila makahimo sa tanang butang pinaagi ni Kristo, kinsa naglig-on kanila bisan og adunay mga pagsulay nga mahimong makapahuyang sa ilang pagpamatuod bahin Kaniya.

Sa iyang Espitola ngadto ni Tito, si Pablo mipadangat og sagrado nga tambag kalabot sa kwalipikasyon niadtong nagtinguha sa pagrepresentar sa Manluluwas ug sa pagbuhat sa Iyang kabubut-on inubanan sa pagtuo ug kamapahinungoron. Siya miingon nga sila kinahanglan nga maabiabihon, ligdong, matarong, ug balaan—mga kinaiya nga klarong nagpakita sa impluwensya sa pagpugong sa kaugalingon.

Hinuon, si Pablo mipasidaan nga sila kinahanglang “dili garboso, dili dali masuko, … [ug] dili bangis.” Ang ingon nga mga kinaiya wala mahiuyon sa hunahuna sa Manluluwas ug makababag sa tinuod nga espirituwal nga paglambo. Sa konteksto sa kasulatan, ang “dili garboso” mao ang tawo nga dili molihok inubanan sa kamapahitas-on ug garbo; ang “dili dali masuko” mao ang tawo nga molikay sa natural nga pag-aghat nga mahimong dili mapailobon ug masuko; ug ang “dili bangis” nagpasabot ngadto sa tawo nga nagsalikway sa makabingkil, agresibo, ug mapintas nga kinaiya sa sinultihan, sa pisikal, ug sa emosyonal nga paagi. Kon maningkamot kita nga usbon ang atong kinaiya inubanan sa pagtuo ug kamapainubsanon, kita lig-on nga maangkla sa pulido nga bato sa Iyang grasya ug mahimong putli ug lunsay nga mga instrumento sa Iyang balaan nga mga kamot.

Sa pagpamalandong sa panginahanglan sa pag-ugmad sa hiyas sa pagpugong sa kaugalingon, nakahinumdom ko sa mga pulong ni Hana, ang inahan ni propeta Samuel—usa ka babaye nga adunay talagsaong pagtuo kinsa, bisan human sa grabe nga mga pagsulay, mihalad og kanta sa pasalamat ngadto sa Ginoo. Siya miingon, “Ayaw kamo pangandak o pagpagarbo kay ang Ginoo nga Dios nasayod sa tanan ug hukman niya ang mga buhat sa tawo.” Ang iyang kanta mas labaw pa kaysa pag-ampo—usa kini ka pagdapit sa iyang kaugalingon sa paglihok uban sa kamapainubsanon, pagpugong sa kaugalingon, ug dili pagpatuyang. Si Hana nagpahinumdom nato nga ang tinuod nga espirituwal nga kalig-on dili ipahayag sa madalidalion nga mga reaksiyon o mapahitas-on nga mga pulong apan pinaagi sa mapugnganon, manggihunahunaon nga mga kinaiya nga nahisubay sa kaalam sa Ginoo.

Kasagaran, ang kalibotan nagdayeg sa mga kinaiya nga nagagikan sa pagkaagresibo, kamapahitas-on, walay pagpailob, ug paghinobra, sa kasagaran gipakamatarong ang ingon nga mga kinaiya pinaagi sa mga pagpamugos sa inadlaw nga kinabuhi ug sa pagtinguha sa balidasyon ug popularidad. Kon kita dili mopili sa paglihok uban sa pagpugong sa kaugalingon ug mobaliwala sa malumo ug makakalma nga impluwensya sa Balaang Espiritu sa atong paagi sa paglihok ug pagsulti, kita dali nga mahulog sa laang sa kaaway, nga dili malikayan maoy modala nato sa paglitok og mga pulong ug paghangop sa mga kinaiya nga atong pagamahayan sa hilabihan, diha man sa atong sosyal, pamilya, o gani sa eklesiyastikal nga mga relasyon. Ang ebanghelyo ni Jesukristo nagdapit nato sa paggamit niini nga hiyas ilabi na sa mga panahon sa hagit, kay niini gayod nga mga sitwasyon nga ang tinuod nga kinaiya sa usa ka indibidwal mabutyag. Sama sa gisulti ni Martin Luther King Jr., “Ang moral nga kalig-on sa usa ka tawo labing mapakita dili sa higayon nga ang kinabuhi sayon, apan sa higayon nga kana nga tawo nagsinati og kalisod ug kontrobersiya.”

Isip mga tawo sa pakigsaad, kita gitawag sa pagkinabuhi nga ang atong mga kasingkasing lig-on nga nakagamot diha sa sagradong mga saad nga atong gihimo ngadto sa Ginoo, mainampingong mosunod sa sundanan nga Iyang giestablisar pinaagi sa Iyang hingpit nga ehemplo. Siya usab misaad, “Sa pagkatinuod, sa pagkatinuod sultihan ko kamo, nga mao kini ang akong doktrina, ug kinsa kadtong natukod diha niini, natukod sa akong bato, ug ang mga ganghaan sa impyerno dili modaog batok kanila.”

Ang pangalagad sa Manluluwas dinhi sa yuta naglangkob og hiyas sa pagpugong sa kaugalingon sa tanang aspeto sa Iyang kinaiya. Pinaagi sa Iyang hingpit nga ehemplo, Siya mitudlo nato “pagmapailobon sa mga kasakit, ayaw pagbiaybiay batok niadtong nagbiaybiay.” Samtang Siya nagtudlo nga dili kita magpadala sa kasuko tungod sa panagbangi ug panagbingkil, Siya namahayag, “Kamo kinahanglan nga maghinulsol, ug mahimo nga sama sa usa ka gamay nga bata.” Siya usab nagtudlo nga ang tanan nga magtinguha sa pagduol Kaniya uban sa bug-os nga kasingkasing kinahanglan nga makig-uli niadtong sila adunay kasuko o niadtong adunay bisan unsa nga pagbati batok nila. Uban sa kinaiya sa pagpugong sa kaugalingon ug maluluy-on nga kasingkasing, Siya mipaneguro nato nga kon kita trataron uban sa kabangis, dili mabination, walay pagtahod, o pagbaliwala, ang iyang kamabination dili mobiya nato, ug ang pakigsaad sa Iyang kalinaw dili kuhaon gikan sa atong kinabuhi.

Pipila ka tuig ang milabay, ang akong asawa ug ako adunay sagrado nga pribilihiyo nga mahimamat ang pipila sa matinud-anong mga miyembro sa Simbahan sa Siyudad sa Mexico. Daghan nila, sa personal nga paagi man o pinaagi sa ilang mga minahal, nakasinati og dili mahulagway nga mga pagsulay, lakip na ang mga pagkidnap, pagpatay, ug ubang sakit kaayo nga mga trahedya.

Samtang nagtan-aw kami sa mga nawong niadto nga mga Santos, wala namo makita ang kasuko, kasilag, o tinguha sa pagpanimalos. Kondili, nakita namo ang hilom nga kamapainubsanon. Ang ilang mga panagway, bisan kon adunay kasubo, makita ang sinsero nga pangandoy alang sa kaayohan ug kahupayan. Bisan kon ang ilang mga kasingkasing gisakitan tungod sa pag-antos, kini nga mga Santos nagpadayon uban sa pagtuo diha ni Jesukristo, mipili nga dili tugotan ang ilang mga kasakit nga mahimong mga babag sa ilang pagtuo o mahimong hinungdan nga mahuyang ang ilang pagpamatuod sa ebanghelyo.

Sa pagtapos nianang sagrado nga panagpundok, among gitimbaya ang matag usa nila. Matag lamano, matag gakos nahimong usa ka hilom nga pagpamatuod nga uban sa tabang sa Ginoo, kita makapili sa pagtubag uban sa pagpugong sa kaugalingon ngadto sa mga kasagmuyo ug mga hagit sa kinabuhi. Ang ilang hilom ug walay pagpasigarbo nga ehemplo nagsilbi isip malumo nga imbitasyon sa paglakaw sa dalan sa Manluluwas uban sa pagpugong sa kaugalingon sa tanang butang. Gibati namo nga murag anaa kami sa atubangan sa mga anghel.

Si Jesukristo, ang labing halangdon sa tanan, nag-antos alang nato hangtod nga miagas ang Iyang dugo sa matag lungag sa panit, apan wala gayod Niya tugoti nga ang kasuko magdilaab sa Iyang kasingkasing, ni ang agresibo, makapasilo, o mapasipad-on nga mga pulong Iyang malitok, bisan taliwala sa ingon niana nga kasakit. Uban sa hingpit nga pagpugong sa kaugalingon ug walay sama nga kaaghop, wala Siya maghunahuna sa Iyang kaugalingon apan sa matag usa sa mga anak sa Dios—kaniadto, karon, ug sa umaabot. Si Apostol Pedro mipamatuod sa talahoron nga kinaiya ni Kristo sa dihang siya namahayag, “Sa dihang gibugalbugalan siya, wala siya mobalos sa pagbugalbugal; sa dihang gisakit siya, wala siya manghulga; gisalig hinuon niya ang tanan ngadto sa Dios, ang matarong nga Maghuhukom.” Bisan taliwala sa Iyang hilabihan nga pag-antos, ang Manluluwas nagpakita og hingpit ug balaanon nga pagpugong sa kaugalingon. Siya namahayag, “Bisan pa niana, himaya ngadto sa Amahan, ug ako nakaambit ug mihuman sa akong mga pagpangandam alang sa mga anak sa katawhan.”

Minahal kong kaigsoonan, akong ipadangat ang akong matinud-anon nga imbitasyon kanatong tanan nga ang atong mga hunahuna ug mga kasingkasing magbaton og Kristohanon nga hiyas sa pagpugong sa kaugalingon, isip usa ka sagrado nga tubag sa propetikanhong panawagan sa atong minahal nga si Presidente Russell M. Nelson. Kon kita maningkamot uban sa pagtuo ug kakugi nga apilan og pagpugong sa kaugalingon sa atong mga buhat ug mga pulong, ako mopamatuod nga atong mapalig-on ug maangkla ang atong kinabuhi sa mas segurado nga paagi diha sa tinuod nga pundasyon sa atong Manunubos.

Ako kinasingkasing nga mopamatuod nga ang makanunayong pagtinguha sa pagpugong sa kaugalingon moputli sa atong kalag ug mobalaan sa atong kasingkasing sa atubangan sa Manluluwas, hinayhinay nga mopaduol nato ngadto Kaniya ug moandam nato, uban sa paglaom ug kalinaw, alang nianang mahimayaong adlaw sa higayon nga kita mosugat Kaniya sa Iyang Ikaduhang Pag-anhi. Ako mopakigbahin niining sagrado nga mga pulong sa ngalan sa atong Manluluwas, si Jesukristo, amen.