Motan-aw ngadto sa Dios ug Mabuhi

Sa milabay nga Hunyo niining tuiga, usa ka makalilisang nga aksidente nahitabo sa nasod sa Lesotho sa habagatang Africa. Usa ka gamayng bus nga may sakay nga 20 ka young women sa Maputsoe Branch sa Simbahan ug pito sa ilang mga lider nagpadulong sa kapital nga siyudad, sa Maseru, alang sa usa ka panagpundok sa young women gikan sa ilang district. Dihang nagbiyahe sila sa duha ka lane nga highway sa mga oras sa buntag, usa ka kasugat nga sakyanan, misulay og overtake sa laing sakyanan, milapas sa linya nga para sa bus. Wala nay higayon aron malikayan ang panagbangga, ug sulod sa mga segundo nagbanggaay ang mga sakyanan, nangababag sa karsada, ug miulbo ang kalayo.

Sa kinatibuk-an, 15 ka tawo ang namatay sa aksidente, lakip ang unom ka Lider sa Young Women, ug ang presidente sa branch ug iyang asawa. Ang mga naluwas, mga sakop sa pamilya, ug mga higala mipadayag og labihan nga mga emosyon, lakip ang mga gutlo sa kapungot, depresyon, ug gani pagbati nga sad-an. Bisan pa niining mga pagbati ug mga pangutanang wala matubag, gihupay nila ang usag usa ug miduol sa Dios pinaagi sa sagradong musika, sa mga kasulatan, ug pag-ampo, diin nakakaplag sila og kahupayan. Ang disesite anyos nga naluwas si Setso’ana Selebeli mipamatuod, “Si Jesukristo nahigugma kanamo ug nag-uban kanamo, bisan og ang among mga kasingkasing nasakitan.”

Usa ka batan-ong babaye ug lider nga nadala sa ospital para matambalan ang iyang mga paso nanagtuon sa Basahon ni Mormon. Ang usa miingon, “Bag-o lang, nagbasa kami sa Moroni, ug namulong si Moroni sa parehas gayod sa unsay akong gibati. … Dihang namulong siya, sama og nag-ingon siya, ‘Ikaw kinahanglan nga magkat-on niini nga mga pulong tungod kay nahisulat kini aron ikaw matabangan nga makalatas niini.’”

Sa usa ka gitingob nga serbisyo sa haya [funeral service] alang niadtong mga namatay, ang Area Seventy nga si Elder Siyabonga Mkhize mitambag, “Tanan kita kinahanglan nga moduol sa Ginoo niining panahona ug mangayo og kahupayan sa atong mga kasingkasing ug … sa paghupay sa kasakit nga atong gibati.” Ang presidente sa Young Women gikan sa silingan nga Leribe Branch, si Mampho Makura, mihangyo, “Duol ngadto sa Ginoo, ug pagkaplag og kalig-on sa pagdawat sa Iyang kabubut-on. Si Jesukristo ‘maoy gisandigan sa atong pagtuo ug tighingpit niini’ [Mga Herbreohanon 12:2]. Ayaw ilayo ang panan-aw, apan motan-aw ngadto Kaniya.”

Tan-aw ngadto Kaniya. Ang iyang mga pulong mipalanog sa tambag ni Alma ngadto sa iyang anak nga si Helaman: “Iseguro nga Motan-aw ngadto sa Dios ug Mabuhi.” “Gisulti ni Alma ang kasinatian ni Lehi ug sa iyang katawhan basi sa Liahona: Sayon ra ang pagpatalinghog sa pulong ni Kristo, nga motudlo kanimo sa usa ka tul-id nga agianan paingon sa walay kataposang kalipay, sama sa pagpatalinghog sa atong mga amahan niini nga kompas, nga nagtudlo kanila sa usa ka tul-id nga agianan paingon sa gisaad nga yuta.” Miingon sa Alma, “Kon sila motan-aw mabuhi sila … Ug kon kita … motan-aw mabuhi kita sa kahangtoran.”

Sa laing okasyon, mihisgot si Alma sa sanglitanan sa bitin nga tumbaga nga giisa ni Moises dihang ang karaang mga Israelita gisakit sa mga bitin nga mapintas. Gisultihan sa Ginoo si Moises sa pagbuhat og larawan sa usa ka bitin; ug ibutang kini sa tumoy sa usa ka tukon, uban sa saad nga “ang hipaakag bitin dili mamatay, kon motan-aw niini, mabuhi.” Gipasabot ni Alma nga ang bitin nga bronsi usa ka matang o simbolo ni Kristo, kinsa ibutang sa krus. Daghan ang mitan-aw ug nabuhi, apan ang uban, sigon sa mga pulong ni Alma, “gahi kaayo” nga dili lang gayod sila motan-aw ug nangamatay.

Nangutana si Alma:

“Kon mamaayo man kamo pinaagi lamang sa pagpunting sa inyong mga mata aron kamo mamaayo, dili ba kamo motan-aw dihadiha, o ipagahi lamang ninyo ang inyong mga kasingkasing sa kawalay pagtuo, ug magtinapolan, nga dili ninyo ipunting ang inyong mga mata, aron kamo mamatay?

“ … Niana ipunting ninyo ang inyong mga mata ug sugdi nga magatuo sa Anak sa Dios, nga siya moanhi sa pagtubos sa iyang katawhan, ug nga siya mag-antos ug mamatay aron sa pag-ula sa ilang mga sala; ug nga siya mobangon pag-usab gikan sa mga patay, nga mao ang magpahitabo sa pagkabanhaw, nga ang tanan nga tawo mobarog sa iyang atubangan, aron hukman sa kataposan ug sa adlaw sa paghukom, sumala sa ilang mga buhat.”

Siyempre, ang tambag nga “motan-aw ngadto sa Dios ug mabuhi” dunay kahulogan ngari kanato dili lamang sa kahangtoran apan makahimo usab sa tanang kalainan sa kinaiya ug kalidad sa atong mortal nga kinabuhi. Hinumdomi ang mga pulong sa batan-ong si Sister Selebeli nga taga Lesotho nga nahisgotan na—“Si Jesukristo nahigugma kanato ug nag-uban kanato bisan ang atong mga kasingkasing nagsubo.”

Natural lang kini sa napukan nga kalibotan—diin ang panulay nagpadayon ug diin ang tanan dili hingpit—nga adunay mga kasagmuyo ug mga kasal-anan, pag-antos ug kasub-anan, kapakyasan ug kapildihan, pagpanglutos ug kawalay hustisya. Pinaagi lamang sa pagtan-aw ngadto sa Dios nga ang mga indibidwal, mga pamilya, ug gani ang mga kanasoran molambo. Si Presidente Russel M. Nelson mitudlo: “Tungod sa Manluluwas, pinaagi sa Iyang walay kinutoban nga Pag-ula, mitubos sa matag usa nato gikan sa kahuyang, mga sayop, ug sala, ug tungod kay Siya nakasinati sa matag sakit, kabalaka, ug palas-anon nga inyong nasinati sukad, [tan-awa sa Alma 7:11–13], nan samtang kamo tinud-anay nga maghinulsol ug mangayo sa Iyang tabang, kamo makabuntog sa mga hagit sa walay kasegurohan nga kalibotan karon.”

Walay saad nga mas kanunay gibalikbalik diha sa kasulatan sa Basahon ni Mormon kay sa niini: “Kon tumanon ninyo ang akong mga sugo kamo mouswag sa yuta: apan kon dili ninyo tumanon ang akong mga sugo kamo ipahimulag gikan sa akong atubangan.” Ang buhing kasinatian sa mga katawhan sa Basahon ni Mormon lapas sa mga siglong milabay nagpakita sa katinuod niini nga mga pulong. Ang “pag-uswag” nagpasabot sa pagtagamtam sa giya ug mga panalangin sa langit diha sa ilang kinabuhi. Ang “pag-uswag” nagpasabot sa pagkab-ot sa mga lebel sa ekonomikanhong kaayohan nga makapahimo kanila sa pagminyo, pagpasanay og mga pamilya, ug pagpangalagad sa panginahanglan sa uban. Ang “pag-uswag” naglakip sa kapasidad sa pagbarog batok sa kalisdanan ug pagsulay. Pinaagi sa grasya ni Kristo, ang “tanang butang [gibuhat] sa Dios alang sa [ilang] kaayohan,” mihashas kanila, ug mipalig-on sa ilang relasyon ngadto Kaniya.

Mipasabot si Alma nga ang pagtan-aw ngadto sa Dios mao ang pagtuman sa Iyang mga sugo, padayon nga pag-ampo ngadto Kaniya alang sa Iyang suporta, magpakitambag Kaniya sa tanan nga inyong buhaton, ug pun-on ang inyong kasingkasing sa pagpasalamat ngadto Kaniya adlaw ug gabii. Ang mga sugo sa Dios ug tambag makita diha sa mga kasulatan ug sa mga pulong sa Iyang mga sulugoon. Ang mga baroganan ug mga mithi nga gipahimutang diha sa “Ang Pamilya: Usa ka Pamahayag ngadto sa Kalibotan” maoy una nga sanglitanan. Ang lain mao ang giya nga makita diha sa booklet nga Alang sa Kalig-on sa mga Kabatan-onan. Ang Tema sa Young Men ug Young Women karong tuiga mao ang “Tan-aw ngadto ni Kristo,” nga gikuha gikan sa makahupay nga direksiyon sa Ginoo ngadto ni Joseph Smith ug Oliver Cowdery: “Tan-aw ngari kanako sa matag hunahuna; ayaw pagduhaduha, ayaw kahadlok.” Ang Alang sa Kalig-on sa mga Kabatan-onan namulong mahitungod sa daghan nga labihan ka dinalian nga mga sugo ug mga sumbanan ug nagtudlo unsaon sa pagtan-aw ngadto sa Ginoo sa paghimo og maayong mga desisyon. Giya kini dili lang alang sa kabatan-onan apan sa tanan kanato.

Isip usa sa labing importante nga pananglitan, ang Alang sa Kalig-on sa mga Kabatan-onan adunay importante kaayo nga giya diha sa kapitulo nga giulohan og “Ang Inyong Lawas Sagrado.” Nagtudlo kini nga: “Itratar ang inyong lawas—ug ang lawas sa ubang tawo’—uban sa pagrespeto. Samtang mohimo kamo og mga desisyon mahitungod sa inyong panamit, estilo sa buhok, ug panagway, pangutan-a ang inyong kaugalingon, “Gitahod ba nako ang akong lawas isip usa ka sagrado nga gasa gikan sa Dios?’”

Ang Alang sa Kalig-on sa mga Kabatan-onan dugang nagpahayag nga: “Ipabiling sagrado ang pakighilawas ug ang sekswal nga mga pagbati. Kinahanglan nga dili kini mao ang hilisgotan sa mga pakatawa o lingaw-lingaw. Gawas sa kaminyoon tali sa usa ka lalaki ug usa ka babaye, sayop ang paghikap sa pribado, sagrado nga mga bahin sa lawas sa lain nga tawo bisan kon nagsinina. Sa inyong mga pagpili mahitungod kon unsa ang inyong buhaton, tan-awon, basahon, paminawon, hunahunaon, i-post, o i-text, likayi ang bisan unsa nga tuyo nga makapaaghat og mahigalon nga mga emosyon sa uban o sa inyong kaugalingon.”

Usa kini ka pagpahinumdom sa bag-ong tambag ni Presidente Nelson:

“Pipila ra ka butang ang mas daling makakomplikar sa inyong kinabuhi kaysa pagsupak niining balaan nga balaod [sa kaputli]. Alang niadtong kinsa nakahimo og mga pakigsaad uban sa Dios, ang pagka-imoral maoy usa sa labing dako nga mga paagi nga mawala ang inyong pagpamatuod.

“… Ang gahom sa paglalang og kinabuhi mao ang usa ka pribilihiyo sa pagkadios nga gitugot sa Langitnong Amahan nga buhaton sa Iyang mortal nga mga anak. Sa ingon, ang Dios mihimo og klaro nga mga lagda sa paggamit niining buhi, balaan nga gahom. Ang pisikal nga kasuod alang lamang sa usa ka lalaki ug usa ka babaye kinsa naminyo ngadto sa usag usa.

“Kadaghanan sa kalibotan dili motuo niini, apan ang opinyon sa publiko dili maoy basihanan sa kamatuoran. Ang Ginoo mipahayag nga walay dili putli nga tawo ang makakab-ot sa celestial nga gingharian. … Ug kon kamo dili putli, ako mohangyo kaninyo sa paghinulsol. Duol ngadto ni Kristo ug dawata ang Iyang saad sa hingpit nga kapasayloan samtang kamo hingpit nga maghinulsol sa inyong mga sala [tan-awa sa Isaias 1:16–18; Doktrina ug mga Pakigsaad 58:42–43].”

Hinumdomi nga sa gisaad diha sa Basahon ni Mormon, ang katugbang sa kauswagan dili kakabos—mao kini ang pagkahimulag gikan sa presensiya sa Ginoo. Ang Iyang presensiya nagpasabot sa impluwensya sa Iyang Espiritu sa kinabuhi sa usa ka tawo. Ang tanan madan-agan sa Kahayag ni Kristo samtang moanhi sila sa kalibotan. Agig dugang, ang uban magpabunyag ug makadawat sa gasa ug dugang nga kahayag sa Espiritu Santo. Magdala siya og inspirasyon ug giya, mopalambo ug mohapsay sa anaa niyang mga gasa ug mga abilidad, ug makatabang nga malikay sa daotang mga impluwensiya, sa dili maayong mga desisyon, ug dili maayong sangpotanan.

Sama ninyo, nakaila ko og pipila kinsa sa makausa nagtagamtam sa gasa sa Espiritu Santo apan tungod sa kapakyas sa pagtuman sa mga sugo sa Dios nawad-an niana nga panalangin. Nahinumdom ko og usa ka tawo kansang pagkamiyembro sa Simbahan gitangtang tungod sa kalapasan. Miingon siya nga ang una niyang reaksiyon mao ang pagkasilo. Gibati niya nga gihukman siya sa imperpektong mga lider. Nasayod siya nga sayop ang iyang mga linihokan, apan nangatarongan siya pinaagi sa pagtumbok sa mga sayop ug mga kapakyasan sa uban. Sa kadugayan, nagsugod na siya nga mobati og kakomportable sa estilo sa kinabuhi sa gawas sa Simbahan nga walay mga obligasyon sa mga calling, mga ekspektasyon nga motambong sa mga serbisyo sa pagsimba ug pagpangalagad sa uban.

Nagpadayon kini sulod sa pipila ka panahon, apan nagsugod siyang mibati nga wala ang Balaang Espiritu—ang presensiya sa Dios—sa iyang kinabuhi. Tungod sa kasinatian, nasayod siya unsay pagbati kon anaa kini, sa matag adlaw, ang kahupayan, giya, ug pagsalig tungod sa Espiritu, ug gimingaw siya niini. Sa kataposan, gibuhat niya unsay gikinahanglan aron makahinulsol, ug mosarang sa makausa pa alang sa bunyag sa tubig ug sa Espiritu.

Ingon og walay utlanan ang tinguha sa mga tawo sa pagpangita og lainlaing kapanguhaan alang sa kahulogan, kalipay, ug tabang. Kadaghanan “nagtan-aw lapas sa tumong.” Apan dili angay nga kita “mga anak nga maanod-anod sa mga balod ug mapadpad ngadto-nganhi sa nagbalibali nga hangin sa doktrina [o mga urog].” Sa pagpangita sa Dios, makakaplag kita og kalinaw diha sa kalisdanan ug ang atong pagtuo makapadayon sa pagtubo bisan sa mga panahon sa pagduhaduha ug espirituhanong hagit. Makadawat kita og kalig-on bisan anaa ang oposisyon ug pagkahilayo. Atong mapahiuyon ang unsay labing angay sa karon nga panahon. Sa tinuod, walay laing paagi gawas sa giorden sa Dios Mismo: “Tan-aw ngari kanako, ug maluwas, kamong tanan nga katawhan sa tibuok kalibotan: kay ako mao ang Dios, ug wala nay lain.”

Ang pagtan-aw ngadto sa Dios nagpasabot nga dili kay Siya basta lang usa sa atong mga prayoridad; nagpasabot kini, hinuon, nga Siya ang labing taas nga prayoridad. Akong balikon kadtong makalilisang nga disgrasya sa Lesotho sa milabayng Hunyo. Gikan sa iyang gihigdaan sa ospital, usa sa mga lider sa Young Women nga naluwas, kinsa sa una dili motuo og Dios sa wala pa mamiyembro sa Simbahan, miingon nga ang iyang tuyo karon mao ang pagdiskobre nganong naluwas pa ang iyang kinabuhi. “Ang padayon nga pagserbisyo sa Dios maoy akong itubag, kon motubag man ko,” miingon siya. “Sige ko og hunahuna nga nahigugma ko sa Dios, apan karon ako nahigugma gayod, gayod, gayod, gayod Kaniya. Karon Siya ang [numero uno] nakong prayoridad sa akong kinabuhi.”

Mopamatuod ko nga ang Amahan, Anak, ug Espiritu Santo, kinsa hingpit nga nagkahiusa sa pulong, hunahuna, katuyoan, ug buhat mao ang usa ka Dios, diin kita makatan-aw alang sa maayong mga butang. Mopamatuod ko sa Pag-ula ni Jesukristo, diin naggikan ang gahom sa pagtuman niining talagsaon nga saad: “Tan-aw ngari kanako, ug lahutay hangtod sa kataposan, ug kamo mabuhi; kay siya nga molahutay hangtod sa kataposan ako mohatag og kinabuhi nga dayon.” Sa ngalan ni Jesukristo, amen.