Ug Karon Makakita Na Ako

Uban sa matuod nga gugma kitang tanan nagpalanog sa pasidungog ni Presidente Oaks sa pagtaliwan ni Presidente Russell M. Nelson. Ug uban sa susama nga gugma ug halawom nga pagbangotan, kitang tanan nag-ila sa bag-ohay lang nga mga trahedya sa Michigan ug hapit kada adlaw sa tibuok kalibotan. Kita nag-ila niini nga mga butang uban sa gugma ug pagmahal ug pagsalig diha ni Ginoong Jesukristo.

Ang ikasiyam nga kapitulo sa Juan nagtala sa kasinatian ni Jesus ug sa Iyang mga disipulo nga nangagi duol sa usa ka makililimos, buta gikan sa pagkatawo. Kini ang nakaaghat sa mga disipulo sa pagpangutana ni Jesus sa daghang komplikadong relihiyoso nga mga pangutana kabahin sa gigikanan ug kapanulundan sa limitasyon niini nga tawo. Ang Magtutudlo mitubag pinaagi sa pagbuhat og usa ka butang nga yano kaayo ug makapatingala kaayo. Siya miluwa sa yuta ug mihimo og gamay nga masa sa lapok. Siya dayon mibutang niini ngadto sa mga mata sa tawo, nagsugo kaniya sa paghugas didto sa Linaw sa Siloam. Kining tanan gihimo sa tawo nga walay panan-aw ug “mibalik siya nga makakita na” nag-ingon ang kasulatan. Pagkaimportante sa ebidensiya, nga tugbang sa mga tinguha o argumento o gani sa daotang tuyo nga nagsupak sa kamatuoran.

Aw, nahadlok nga kini nga milagro makadugang pag-usab sa hulga nga nahimo na ni Jesus sa ilang gituohan nga awtoridad, ang mga kaaway sa Manluluwas miharong sa bag-ong nakakita nga tawo ug miingon sa kasuko, “Kami nahibalo nga [si Jesus] usa ka makasasala.” Ang tawo namati sa makadiyot, unya miingon, “Ako wala mahibalo kon siya makasasala ba. [Apan] usa ka butang nga akong nahibaloan [gayod] mao kini, nga kaniadto buta ako apan karon makakita na ako.”

Si Jesus mihatag sa unang kahulogan niini nga panagsultihanay, nagsulti sa Iyang mga disipulo nga kining tanan nahitabo “aron ang mga buhat sa Dios ikapadayag.” Hinumdomi nga kaduha niini nga sugilanon ang aksiyon sa Manluluwas gipasabot nga “pagdihog” sa mga mata sa buta nga tawo, usa ka buhat nga mahuman pinaagi sa paghugas. Kini nga paghulagway sa “ang mga buhat sa Dios [nga] gipadayag” mahimong nagsugyot sa pagpahigayon sa usa ka ordinansa.

Laing kamatuoran nga dayag dinhi mao ang mga instrumento nga gigamit sa Tiglalang sa langit ug yuta ug sa tanan nga anaa dinhi sa paghatag niini nga milagro: pagluwa ug ang gamayng lapok! Kining dili gayod komon nga mga sangkap nagpahayag nga ang Dios makapanalangin kanato pinaagi sa bisan unsang pamaagi nga Iyang pilion. Sama ni Naaman nga misalikway sa Suba sa Jordan o sa mga anak sa Israel nga nagdumili sa pagtan-aw sa bitin diha sa tukon, unsa ka sayon alang kanato ang pagbaliwala sa tinubdan sa atong katubsanan tungod kay ang mga pamaagi nga nagtudlo ngadto niini daw yano kaayo.

Apan kita mahinumdom gikan sa Basahon ni Mormon nga pipila sa mga butang nga yano ug bililhon ug nga sa dili pa ang pagkatawo ni Jesus, kini mapanagna nga “siya walay panagway ni kaanyag; ug sa diha nga ato na siya nga makita, wala siyay katahom aron ato nga tinguhaon siya.” Unsa ka sagad ang Dios mipadala sa Iyang halangdon nga mensahe pinaagi sa bag-ong gitawag ug nabalaka kaayo nga presidente sa Relief Society o sa usa ka walay kahibalo nga batang lalaki diha sa umahan sa New York o sa usa ka bag-o pa kaayo nga misyonaryo o sa usa ka bata nga naghigda sa pasongan.

Unsa kaha kon ang mga tubag sa atong mga pag-ampo moabot sa yano o komplikado nga mga paagi? Andam ba kita sa paglahutay, sa pagpadayon sa pagpaningkamot sa pagsunod sa ebanghelyo ni Kristo bisan unsa pa nga luwa ug lapok ang gikinahanglan? Mahimong dili kini klaro kanunay kanato kon unsay gibuhat o ngano, ug, sa matag karon ug unya, kitang tanan mobati gamay sama sa senior nga sister kinsa miingon, “Ginoo, mahimo bang hatagan ko nimo og panalangin nga wala magtakoban?”

Ikonsiderar ang ebidensiya sa laing kamatuoran, kini mahitungod sa balaan nga pagkapari. Sa pagdokumento sa Simbahan nga personal nga giorganisar ni Jesukristo, ang unang linya ni Lucas mabasa, “Gitigom ni Jesus ang [dose] 12 ka tinun-an ug iyang gihatagan silag gahom ug awtoridad,” mga espirituhanon nga gasa nga wala gihatag base sa makapadani nga mga kredensyal ni gitino sa tradisyon o katungod sa pagkatawo. Kini wala gihatag sa usa ka eskwelahan sa pagkabalaan o sa usa ka teyolohikanhong seminaryo. Kini gitugyan lamang pinaagi sa pagpandong sa mga kamot pinaagi sa usa kinsa dunay awtorisado nga mga kamot nga gipandong kaniya sa usa ka walay putol nga han-ay balik ngadto sa tinubdan sa tanang balaan nga awtoridad, ang Ginoong Jesukristo.

Ug sa usa ka simbahan nga nakasabot sa gasa sa kaluoy, dili ba kini nindot kaayo nga laing ebidensiya sa katinuod niana nga simbahan nga makakita niini nga mga panalangin ug mga pakigsaad nga maanaa sa atong namatay nga kaliwatan, kadtong atong mga pamilya kinsa nag-una kanato? Angay ba silang silotan tungod kay wala silay akses sa ebanghelyo o tungod kay sila natawo sa usa ka panahon o sa usa ka dapit diin wala ang balaanong mga ordinansa ug mga pakigsaad alang kanila? Ang Simbahan ni Jesukristo sa mga Santos sa Ulahing mga Adlaw adunay sagrado, gipahinungod nga mga balay sa Ginoo diin ang buhat sa kaluoy ug kaluwasan gihimo sa puli nga paagi matag adlaw ug gabii alang niini nga mga namatay, ingon man usab sa pagtanyag og mga kahigayonan sa pagsimba ug mga ordinansa alang sa mga buhi. Sa akong kahibalo, kining piho nga ebidensiya sa kamatuoran sa Dios, sa Iyang malukpanon nga gugma sa Dios alang sa mga buhi ug sa mga patay dili makita bisan asa sa kalibotan—gawas sa usa ka simbahan nga nagpakita niini nga kamatuoran niining piho nga hilisgotan: Ang Simbahan ni Jesukristo sa mga Santos sa Ulahing mga Adlaw.

Ang akong unang makahatag og panan-aw, makahatag og kinabuhi nga kasinatian sa tinuod nga ebidensiya sa kamatuoran wala moabot uban sa pagdihog og lapok o didto sa linaw sa Siloam. Dili, ang instrumento sa kamatuoran nga nagdala sa akong pagkaayo gikan sa Ginoo miabot isip mga pahina sa usa ka basahon, oo, ang Basahon ni Mormon: Laing Tugon ni Jesukristo! Ang mga pangangkon bahin niini nga basahon giatake ug gisalikway sa pipila ka tawo nga wala mituo, ang kasuko kasagaran susama sa mapintas nga pagsaway niadtong misulti sa naayo nga tawo nga dili gayod posible nga siya nakasinati sa unsay iyang nahibaloan nga nasinati gayod niya.

Kini gilabay sa akoa nga ang mga paagi diin kini nga basahon nahimo dili praktikal, dili katuohan, makauulaw, gani dili balaan. Karon, kana usa ka mapintas nga pinulongan gikan ni bisan kinsa nga naghunahuna nga masayod sa mga paagi diin ang basahon nahimo, tungod kay ang bugtong paghulagway nga gihatag mahitungod niadto nga mga paagi mao nga kini gihubad “pinaagi sa gasa ug gahom sa Dios.” Mao na. Kana ra ang tanan. Magkinaunsa, ang epekto sa Basahon ni Mormon sa akong kinabuhi dili menos nga milagroso kay sa pagpahid og luwa ug lapok nga gibutang diha sa mga mata sa buta nga tawo. Kini nahimo, alang kanako, nga usa ka gunitanan sa kahilwasan alang sa akong kalag, usa ka dili hitupngan ug makapatuhop nga kahayag sa pagpadayag, usa ka dan-ag sa dalan nga kinahanglan nakong laktan kon moabot ang mga gabon sa kangitngit. Ug kini seguradong nahitabo, ug kini seguradong mahitabo.

Ug tungod sa panglantaw nga gihatag niini kanako sa malukpanon nga gugma ug matubsanong grasya sa akong Manluluwas, ako mopakigbahin kaninyo sa akong pagsaksi, nahatagan og kaangayan dinhi sama sa gisulti sa mga ginikanan sa bag-ong napanalanginan nga tawo nga ang ilang anak nga lalaki kinahanglang madungog tungod kay “dako na man siya.” Aw, ako usab. Igo na ang iyang pangedaron nga seryoso siyang paminawon, sila mipasabot. Aw, ako usab. Duha ka bulan na lang sa dili pa ang akong ika-85 nga adlawng natawhan. Nakasinati kong hapit na gayod mamatay apan nabuhi pa. Nakauban nako ang mga hari ug mga propeta, uban sa mga presidente ug apostoles. Labing maayo sa tanan, sa pipila ka higayon ako napuno sa Espiritu Santo sa Dios. Ako masaligon nga ang akong saksi hatagan og labing menos nga gamayng konsiderasyon dinhi.

Karon, mga kaigsoonan, naangkon nako ang akong tibuok kalag nga kombiksiyon nga Ang Simbahan ni Jesukristo sa mga Santos sa Ulahing mga Adlaw usa ka tinuod nga pagpahiuli sa Simbahan sa Bag-ong Tugon—ug dugang pa—tungod kay dili nako ikalimod ang ebidensiya niana nga pagpahiuli. Sukad niadtong unang mga kasinatian, sa akong hunahuna ako adunay usa ka libo—napulo ka libo?—ngauban pa nga mga ebidenisya nga ang unsay akong gipamulong karon tinuod. Busa ako karon nahimuot sa pag-apil sa akong higala nga anaa diha sa kadalanan sa Jerusalem, diin uban sa akong dili na ingon ka kusog nga tingog ako mokanta:

Sa ngalan ni Jesukristo, amen.