Pagdasig sa Usag Usa

Bag-ohay lang nakabasa ako og usa ka kasinatian nga mitandog kanako. Nahitabo kini sa USA Masters Track and Field National Championship—usa ka kompetisyon alang sa mga edaran.

Usa sa mga partisipante sa 1,500-metro nga lumba mao ang 100-anyos nga si Orville Rogers. Ang tagsulat nagsaysay:

“Sa dihang mibuto ang starter nga pistola, ang mga magdadagan misutoy, samtang si Orville anaa sa kaulahian, kon diin nagpabilin siya nga nag-inusara halos sa tibuok lumba, nag-aginod. [Sa dihang] ang nahabilin nga magdadagan nga kauban ni Orville nahuman na, si Orville aduna pay duha og tunga ka lap (tuyok sa trak) nga nahabilin. Duol sa 3,000 ka mananan-aw ang hilom nga nagtan-aw niya samtang siya hinay nga naglibot sa trak—hingpit, hilom, ug dili komportable nga nag-inusara.

“[Apan] sa dihang gisugdan niya iyang pinaka-ulahi nga lap, ang mananan-aw mitindog, nag-abiba ug nagpalakpak. Dihang hapit na niya matapos ang lumba, ang mananan-aw saba na kaayo. Uban sa pagdasig sa liboan ka mananaw-aw, si Orville migamit sa tanan niya nga kusog. Ang mananan-aw nalipay kaayo samtang milabang siya sa finish line og gigakos sa mga ubang magdadagan. Si Orville mapaubsanon ug mapasalamatong mikaway sa mananan-aw ug mibiya sa trak nga may bag-ong mga higala.”

Kini ang ika-lima nga lumba ni Orville sa kompetisyon, ug sa matag usa sa mga lumba, siya usab ang pinakaulahi nga mitapos. Tingali ang uban matental sa paghukom ni Orville, maghunahuna nga sa iyang edad wala na unta siya miapil sa lumba—nga dili siya angayan nga moapil sa kompetisyon kay iya lang gilangay ang iyang mga lumba alang sa tanan.

Bisan pa og maulahi siya kanunay, si Orville mitala og lima ka world records nianang adlawa. Walay usa nga mitan-aw sa iyang lumba nagtuo nga posible kana, apan ni ang mananan-aw o magdudula ang mga hukom. Si Orville wala maglapas sa bisan unsa nga mga lagda, ug ang mga opisyales wala mopaubos sa bisan unsa nga mga sumbanan. Midagan siya sa parehas nga lumba ug mituman sa parehas nga mga kinahanglanon sama sa uban nga mga magdudula. Apan ang iyang ang-ang sa kalisod—sa niini nga sirkumstansya, mao ang iyang edad ug limitado nga kusog—gikonsiderar pinaagi sa pagbutang niya sa 100+ og edad nga dibisyon. Ug diha nianang dibisyon, mitala siya og lima ka world records.

Sama nga nagkinahanglan si Orville og dako nga kaisog sa kada kompetensya sa dagan, nagkinahanglan usab og dako nga kaisog ang pipila nato ka mga igsoong babaye ug lalaki nga mosalmot sa inadlaw-adlaw nga kinabuhi, nahibalo nga mahimo silang hukman sa dili makiangayon nga paagi bisan pa og naghimo sila sa ilang pinakamaayo nga makasunod sa Manluluwas ug makatahod sa ilang mga pakigsaad uban Kaniya.

Bisan asa pa kita nagpuyo sa kalibotan, bisan pila pa ang atong edad, kini usa ka nag-unang panginahanglan sa tanan nato nga mobati nga nahisakop, mobati nga kita importante ug gikinahanglan ug ang atong mga kinabuhi adunay katuyoan ug kahulogan, bisan unsa pa man ang atong mga sirkumstansya o limitasyon.

Sa pinakaulahi nga lap sa lumba, ang tanang mananan-aw malipayong midasig ni Orville, naghatag kaniya ug kusog nga mopadayon. Dili igsapayan nga siya ang pinakaulahi nga nahuman. Alang sa mga partisipante ug mananan-aw, labaw pa kini sa kompetisyon. Sa daghang paagi, kini usa ka matahom nga ehemplo sa gugma sa Manluluwas nga gipadayag. Sa dihang si Orville nahuman, tanan sila nagmaya.

Sama sa Masters Championship, ang atong mga kongregasyon ug mga pamilya mahimong pundokanan nga mga luna diin kita modasig sa matag usa—mga komunidad sa pakigsaad nga nadasig pinaagi sa gugma ni Kristo alang sa usag usa—nagtinabangay sa usag usa nga mabuntog ang bisan unsa nga hagit nga atong giatubang, naghatag sa matag usa og kusog ug pagdasig nga dili mohukom sa usag usa. Kita nagkinahanglan sa usag usa. Ang balaanong kalig-on naggikan sa panaghiusa, ug mao kana ang rason nga si Satanas nanlimbasog nga gub-on kita.

Sa kasubo, sa pipila nato, ang pagsimba mahimong lisod tungod sa naglahi-lahing mga rason. Mahimo nga ang usa ka tawo nanlimbasog sa mga pangutana bahin sa pagtuo o ang usa ka tawo adunay kabalaka o depresyon. Mahimo nga ang usa ka tawo gikan sa lain nga nasod o kaliwat o usa ka tawo nga adunay lahi nga mga kasinatian sa kinabuhi o mga pamaagi sa pagtan-aw sa mga butang nga daw makahimo nila nga mobati nga wala sila nahisakop. Gani mahimo usab kining walay sakto nga tulog ug gikapoy na kaayo nga mga ginikanan sa mga masuso ug mga gagmayng bata o usa ka tawo nga walay kapares sa kongregasyon nga puno og mga magtiayon ug mga pamilya. Mahimo usab kining usa ka tawo nga nanlimbasog nga makabaton og kaisog nga mobalik human sa pipila ka tuig nga nawala o usa ka tawo nga padayong mibati nga dili gayod sila takos ug dili gayod mahisakop.

Si Presidente Russell M. Nelson miingon: “Kon ang usa ka magtiayon sa inyong ward nagdiborsyo, o ang usa ka batan-ong misyonaryo miuli og sayo, o usa ka tin-edyer nagduhaduha sa iyang pagpamatuod, sila wala magkinahanglan sa inyong paghukom. Sila nagkinahanglan nga makasinati sa tiunay nga gugma ni Jesukristo nga makita sa inyong mga pulong ug mga aksyon.”

Ang katuyoan sa atong kasinatian sa simbahan mao ang paghatag og importante nga mga koneksyon ngadto sa Ginoo ug ngadto sa usag usa nga gikinahanglan kaayo alang sa atong espirituwal ug emosyonal nga kaayohan. Kauban sa mga pakigsaad nga atong gihimo uban sa Dios, nga nagsugod sa bunyag, mao ang atong responsibilidad nga mohigugma ug moamuma sa usag usa isip mga miyembro sa pamilya sa Dios, mga miyembro sa lawas ni Kristo, dili lang usa ka listahan nga atong tsekan kon nahuman na og buhat.

Ang Kristohanong gugma ug pag-amuma mas taas og mas balaan. Ang tiunay nga gugma ni Kristo mao ang gugmang putli. Si Presidente Russell M. Nelson mitudlo: “Ang gugma nga putli moimpluwensya nato ‘sa pagtambayayong sa usag usa nga mga alantoson’ [Mosiah 18:8] kay sa maghatag og kalisod sa usag usa.”

Ang Manluluwas miingon, “Kon maghigugmaay kamo, mahibalo ang tanan nga kamo akong mga tinun-an.” Ug si Presidente Nelson midugang: “Ang gugma nga putli mao ang nag-unang kinaiya sa tinuod nga sumusunod ni Jesukristo.“ “Ang mensahe sa Manluluwas klaro: Ang Iyang tinuod nga mga disipulo molig-on, mobayaw, moawhag, moagni, ug modasig. … Kon giunsa nato sa paghisgot ngadto ug mahitungod sa uban … importante kaayo.”

Ang mga pagtulun-an sa Manluluwas bahin niini yano kaayo. Kini makita diha sa Bulawanong Lagda: Buhata sa uban ang unsay gusto nimo nga buhaton nila diha kanimo. Ibutang imong kaugalingon sa kahimtang sa uban ug itratar sila sa samang paagi nga ikaw gusto nga trataron kon anaa ka sa ilang kahimtang.

Ang Kristohanong pagtratar sa uban buhaton dili lang sa atong mga pamilya o mga kongregasyon. Kini naglakip sa atong mga igsoong babae ug igsoong lalaki sa laing pagtuo o sa walay pagtuo. Kini naglakip usab sa atong mga igsoong babae ug mga igsoong lalaki gikan sa laing mga nasod ug kultura, lakip na katong adunay managlahing politikanhong baroganan. Kitang tanan kabahin sa pamilya sa Dios, ug Iyang gihigugma ang tanan Niyang mga anak. Siya nanghinaot nga ang tanan Niyang mga anak nahigugma Niya ug sa usag usa.

Ang kinabuhi sa Manluluwas usa ka ehemplo sa paghigugma, pagtigom, ug pagbayaw bisan niadtong gihukman sa katilingban nga mga sinalikway ug hugaw. Ang Iyang kinabuhi usa ka ehemplo mao ang gimando kanato nga atong sundon. Ania kita aron mopalambo sa Kristohanong kinaiya ug sa dili madugay mahimong sama sa atong Manluluwas. Ang Iyang kinabuhi dili ebanghelyo sa tsekanan nga buluhaton; usa kini ka ebanghelyo nga tabangan kitang mahimong maayo nga mga tawo—mahimong sama Niya ug maghiguma sama sa Iyang gibuhat. Siya gusto nga kita mahimong usa ka katawhan nga Zion.

Sa dihang ako hapit na mag-edad og 30, ako miagi og hilabihan nga depresyon, ug sa nianang panahona, murag ang realidad nga ang Dios buhi kalit lang nahanaw. Dili gayod nako mapasabot ang akong gibati kondili masulti nako nga gibati nako nga ako hingpit nga nahisalaag. Sukad sa gamay pa ko, kanunay akong nahibalo nga akong Amahan sa Langit anaa ug ako makasulti ngadto Kaniya. Apan nianang panahona, wala nako kahibalo kon aduna bay Dios. Wala ako sukad makasinati og ingon ana sa tibuok nakong kinabuhi, ug murag akong tibuok pundasyon nahugno.

Isip resulta, lisod para nako nga mosimba. Miadto ko, pero tungod kini kay nahadlok ko nga ingnon nga “dili aktibo” o “dili kaayo matinud-anon,” ug nahadlok ko nga mahimong bisitahan lang sa usa ka miyembro tungod kay giasngon kini. Unsa gayod akong gikinahanglan niadto nga panahona mao ang mobati og tinud-anay nga gugma, pagsabot, ug suporta gikan sa mga tawo nga nagpalibot nako, dili paghukom.

Pipila sa akong gikahadlokan nga hunahunaon sa mga tawo bahin nako, ako mismo adunay samang gihunahuna bahin sa uban sa higayon nga sila dili kanunay nagsimba. Kana nga sakit nga personal nga kasinatian mitudlo nako og mahinungdanon nga mga leksyon nganong kita gimandoan nga dili mohukom sa usag usa sa dili matarong nga pamaagi.

Aduna bay usa nato nga nag-antos sa hilom, nahadlok nga makahibalo ang uban sa gitagong mga pakigbisog tungod kay wala sila makahibalo unsay reaksyon sa uban?

Ang Ginoo lang ang hingpit nga nakahibalo sa aktuwal nga lebel sa kalisod sa lumba sa kinabuhi nga giatubang sa matag usa kanato—ang mga palas-anon, mga hagit, ug mga babag nga atong giatubang nga sa kasagaran dili makita sa uban. Ug Siya lang ang hingpit nga nakasabot sa mga makapausab sa kinabuhi nga mga samad ug truma nga nasinati sa pipila kanato kaniadto nga hangtod karon naka-apekto gihapon nato.

Kasagaran, kita mismo mapintasong mohukom sa atong kaugalingon, naghunahuna nga kinahanglan anaa na kita sa unahan sa lumba. Ang Ginoo lang ang hingpit nga nakahibalo sa atong indibidwal nga limitasyon ug kapasidad, ug tungod niana, Siya lang ang hingpit nga kuwalipikado nga mohukom sa atong binuhatan.

Mga kaigsoonan, mahisama unta kita niadtong mga mananan-aw sa istorya ug modasig sa usag usa sa atong panaw sa pagkadisipulo bisan unsa pa man atong mga sirkumstansya! Kana wala magkinahanglan nga kita dili mosunod sa mga lagda o mopaubos sa atong mga sumbanan. Kini mao ang ikaduhang dako nga kasugoan—ang higugmaon atong silingan sama sa atong kaugalingon. Ug sama sa giingon sa Manluluwas, “Sa matag higayon nga maghimo kamo niini alang sa usa sa labing ubos … gihimo ninyo kini alang kanako,” sa maayo o sa daotan. Siya usab misulti kanato, “Kon dili kamo maghiusa dili kamo akoa.”

Adunay mga panahon sa matag usa sa atong kinabuhi diin kita ang magkinahanglan og tabang ug pagdasig. Kita mopasalig karon nga kanunay nato kanang buhaton sa usag usa. Kon buhaton nato, kita mopalambo og mas lawom nga paghiusa ug makatukod og luna alang sa Manluluwas nga mobuhat sa Iyang sagrado nga buhat sa pag-ayo ug pag-usab sa matag usa kanato.

Alang kaninyo nga tingali mibati nga naulahi na kaayo sa lumba sa kinabuhi, niining panaw sa mortalidad, palihog padayon. Ang Manluluwas lang ang hingpit nga makahukom kon asa ka kinahanglan sa niining panahona, ug Siya maluluy-on ug makiangayon. Siya ang Halangdon nga Manghuhukom sa lumba sa kinabuhi ug Siya lamang ang hingpit nakasabot sa lebel sa kalisod nga inyong nasinati sa pagdagan, o paglakaw o pag-aginod. Iyang tan-awon ang inyong mga limitasyon, inyong kapasidad, inyong mga kasinatian sa kinabuhi, ug ang mga gitago nga mga palas-anon nga inyong gidala, ingon man usab ang mga tinguha sa inyong kasingkasing. Ikaw sa pagkatinood makahimo usab og bag-ong simbolikanhong mga world record. Palihog ayaw pagpakawala og paglaom. Palihog padayon! Palihog pagpabilin! Kamo gayod nahisakop! Ang Ginoo nagkinahanglan kaninyo, ug kami nagkinahanglan kaninyo!

Bisan asa kamo nagpuyo sa kalibotan, bisan unsa pa kini ka layo, palihog hinumdomi kanunay nga ang inyong Amahan sa Langit ug anga inyong Manluluwas nakaila ninyo sa hingpit ug nahigugma ninyo sa perpekto nga paagi. Kamo wala gayod makalimti kanila. Sila gusto nga dad-on kamo balik ngadto Kanila.

Ipadayon ang inyong pagtutok sa Manluluwas. Siya mao ang inyong puthaw nga gunitanan. Ayaw pagbuhi Kaniya. Ako nagpamatuod nga Siya buhi ug kamo makasalig gayod Kaniya. Ako nagpamatuod usab nga Siya nagdasig ninyo nga mopadayon.

Hinaot nga kitang tanan mosunod sa ehemplo sa Manluluwas ug modasig sa usag usa mao ang akong ampo sa ngalan ni Jesukristo, amen.