Ang Resipe sa Maayong Balita

Kon inyo nang nabisita ang among estado sa Louisiana, seguro pamilyar kamo sa among daghang lamian nga pagkaon—gumbo, jambalaya, étouffée, ug ang listahan nagpadayon sa uban pa.

Matag karon ug unya, akong makita ang akong kaugalingon nga may kaisog nga magluto sa usa sa lamian nga mga resipe. Ang wala malista nga kataposang lakang human isagol ang tanang sangkap ug ang pagsunod sa detalyadong mga instruksiyon mao ang paghimo sa kataposan nga pagtilaw ug pagtan-aw kon aduna bay kulang. Niana nga punto, akong madungog ang batid sa pagluto nga mga Creole nga naghunghong diha sa akong mga dalunggan, “Dungagi pa diha og Tony’s.” Ang Tony’s usa ka Creole nga panimpla nga gihimo sa Opelousas, Louisiana, ang akong lungsod nga natawhan. Kasagaran kini gigamit isip “sekreto nga sangkap” aron mabawi ang pagka dili perpekto nga nahimo samtang nagsunod sa resipe.

Ang akong asawa, si Michelle, ug ako nakabaton og kahigayonan sa pagserbisyo isip mga lider sa misyon didto sa Louisiana. Kami adunay tradisyon sa pagtudlo sa mga misyonaryo unsaon sa pagluto sa iyang espesyal nga jambalaya nga resipe sa kataposan nilang gabii sa mission home sa dili pa mopauli sa ilang mga pamilya. Agig dugang sa ilang mga pagpamatuod sa gipahiuli nga ebanghelyo ni Jesukristo, ang among mga misyonaryo mibiya sa misyon uban ang pagkamapasalamaton alang sa mga resipe.

Pipila ka bulan ang milabay, nag-browse ko sa Church Media Library ug nakakita og link ngadto sa koleksiyon sa mugbo nga mga bidyo nga gitawag og Restoration Conversations with President Russell M. Nelson [Pagpahiuli nga Panagsultihanay uban ni Presidente Russell M. Nelson]. Ang ulohan sa usa sa mugbo nga mga bidyo nakadani sa akong pagtagad ug nakapahiyom nako. Gitawag kini og “Scriptures Are God’s Recipes for Happy Living [Ang mga Kasulatan Mao ang mga Resipe sa Dios alang sa Malipayong Pagkinabuhi].” Dali dayon nakong gi-klik ang maong duha ka minuto nga bidyo ug gitan-aw si Presidente Nelson nga nagtudlo og usa ka grupo sa mga bata sa Primary og usa ka simple ug gamhanan nga mensahe kon unsaon nga magmalipayon. Siya mitudlo: “Kon ikaw naghimo og keyk, ikaw mosunod sa mga direksiyon, dili ba? Ug makakuha ka og maayo nga resulta, dili ba?”

Siya mipadayon, nagsulti mahitungod sa pagkahimong 95 anyos sa dili madugay: “Ang katawhan mosulti, ‘Unsay imong kaonon? Unsa ang imong sekreto?” Siya mitubag, “Ang sekreto gitawag og mga kasulatan. Mahimo nimo silang basahon ug tun-an.”

Maayo, ania kita niini. Ang simple nga sekreto alang sa malipayon nga pagkinabuhi mao ang pagsunod lamang sa resipe sa Dios nga gidetalye sa mga kasulatan. Gitawag ko kini og “Ang Resipe sa Maayong Balita.”

Unsa ang inyong buhaton kon adunay mahitabo nga sayop sa pagsunod sa resipe? Ah, nalakip diha sa Resipe sa Maayong Balita ang “sekreto nga sangkap” aron maseguro nga makuha nimo ang sakto diha sa kataposan. Ang tubag sa kanunay mao si Jesukristo.

Gahunahuna ko nga kitang tanan adunay mga higayon diin atong gibati nga ang atong mga sangkap kulang pa, o naglisod kita sa pagsunod sa mga direksiyon, o tingali naa kitay nabuhat nga dili sakto, o adunay panghitabo nga dili nato mapugngan sa pagkahitabo ug uban pa.

Unsa ang kasolbaran? Ang pagdugang lang sa mga butang nga nagdapit ni Jesukristo diha sa inyong kinabuhi.

Busa, unsa man kaha ang resulta kon mas magdugang pa ni Jesukristo diha sa inyong kinabuhi?

Samtang nagserbisyo isip presidente sa misyon, adunay akoy kahigayonan sa personal nga pakigkita sa matag usa sa among batan-on nga mga misyonaryo matag unom ka semana. Atol sa one-on-one nga miting, komon kaayo sa mga misyonaryo nga mangayo og giya kon unsaon sa pagpalambo ang kaepektibo sa ilang panag-uban.

Sa usa ka okasyon, usa ka misyonaryo miabot alang sa iyang personal nga interbiyo ug milingkod. Akong mailhan sa iyang linihokan nga may bug-at siya nga gihunahuna. Nangutana ko, “Elder, unsay gusto nimong hisgotan karong adlawa?” Mihulagway siya sa pipila ka hagit nga iyang nasinati uban sa iyang kompanyon ug unsay epekto niini sa ilang abilidad sa paghimo sa misyonaryo nga buhat. Inubanan sa mga luha sa iyang mga mata, mitan-aw siya nako ug nangutana, “President, unsay akong buhaton?”

Niana nga higayon, sa tinuod lang wala ako masayod unsay itubag. Human sa mubo nga gutlo, nangutana ko niya kon OK ba nga magdungan kami og luhod sa pag-ampo alang sa giya gikan sa Espiritu. Misugot siya, ug kaming duha nangluhod ug nag-ampo alang sa inspirasyon.

Human sa pag-ampo, nagpadayon kami sa pagluhod sa mubong panahon ug dayon milingkod sa among lingkoranan nga nag-atubangay. Mihangyo ko kon mahimong magdungan kami nga mobasa og kasulatan. Sa among pag-abli sa mga kasulatan, mihunong ko ug misulti niya, “Elder, samtang magbasa kita sa kasulatan, palihog pangutan-a ang imong kaugalingon sa mosunod nga pangutana: Kon ako kining sundon nga mga kinaiya, mopalambo ba kini sa akong panag-uban ug sa among misyonaryo nga buhat?”

Dayon among giabli ang Moroni 7:45 ug kusog kini nga gibasa: “Ug ang gugmang putli mainantoson, ug mabination, ug dili masinahon, dili manghambog, dili mangita alang sa iyang kaugalingon, dili dali nga masuko, dili maghunahuna sa daotan, ug dili magmaya sa pagkadaotan apan magmaya sa kamatuoran, mainantoson sa tanan nga butang, matuohon sa tanan nga butang, molaom sa tanan nga butang, ug molahutay sa tanan nga mga butang.”

Ang elder dayon mitan-aw kanako nga may luha sa iyang mga mata ug miingon, “Oo, Presidente, apan kana lisod kaayo nga buhaton.” Miuyon ko ug mipahinumdom niya nga anak siya sa Dios nga adunay balaanong potensiyal nga makahimo niini uban sa Ginoo.

Dayon sa makadiyot gihisgotan namo ang sambingay sa bakilid nga gitudlo ni Elder Clark G. Gilbert sa Seventy, nga nagpahinumdom nato nga kita magkinahanglan sa pagsugod kon asa kita ug, uban sa Ginoo, magpadayon ug magpadulong diha sa usa ka positibo nga direksiyon. Akong mailhan nga gibati niya nga nabug-atan sa sunod nga mga lakang, mao nga mihangyo ko niya sa paghulagway sa iyang pagsabot sa kasulatan nga “pinaagi sa gagmay ug yano nga mga butang ang mga dagko nga butang ipahinabo” Iyang gihulagway ang konsepto nga pinaagi sa pagbuhat sa gagmay ug yanong mga butang, mahitabo ang dagkong mga butang. Mihangyo ako niya sa paggahin og usa ka minuto ug sa pag-ila og duha ka gagmay ug simple nga butang nga iyang mahimo nga magmabination ngadto sa iyang kompanyon.

Human sa pipila ka gutlo, mipakigbahin siya sa iyang mga hunahuna. Dayon, mihangyo ako niya sa paggahin og usa ka minuto ug sa pag-ila og duha ka gagmay ug simple nga mga butang nga iyang mahimo nga magpailob sa iyang kompanyon. Hapit dayon niyang gipakigbahin iyang duha ka hunahuna. Klaro nga namalandong na siya daan niini sa wala pa ang among panagkita. Ako siyang gidapit nga dad-on kadtong pipila ka butang ngadto sa Dios sa pag-ampo ug sa pagpangayo og kompirmasyon, direksyon, ug inspirasyon kon unsaon nga matuman ang iyang plano uban sa tinuod nga katuyoan. Miuyon siya. Sa among pagtapos, mihangyo ko niya sa paghatag og mubo nga update sa iyang sinemana nga sulat.

Sa paglabay sa pipila ka semana akong nakita sa iyang sinemana nga mga sulat nga ang mga butang nagkauswag. Apan wala lang nako nakita ang pag-uswag diha sa iyang sinemana nga mga sulat, nakita sab nako kini sa sinemana nga mga sulat sa iyang kompanyon. Sa among sunod nga panagkita sa personal nga interbiyo, akong nakita ang kalahian sa gabii-ug-adlaw diha sa iyang panagway ug espiritu. Nangutana ko niya, “Busa, Elder, tinuod ba nga ang ‘gugma nga putli dili mopakyas?’” Mitubag siya uban ang dakong pahiyom: “Oo, ug pinaagi sa gagmay ug yanong mga butang mahitabo ang dagkong mga butang.”

Samtang sundon ninyo ang Resipe sa Maayong Balita alang sa malipayong pagpamuyo, hinumdomi ang pagtulon-an ni Presidente Nelson: “Bisan unsa nga mga pangutana o mga problema nga ikaw aduna, ang tubag kanunay nga makaplagan diha sa kinabuhi ug mga pagtulun-an ni Jesukristo. Pagkat-on pa og dugang bahin sa Iyang Pag-ula, sa Iyang gugma, sa Iyang kaluoy, sa Iyang doktrina, ug sa Iyang gipahiuli nga ebanghelyo sa pagkaayo ug paglambo. Dangop ngadto Kaniya! Sunod Kaniya!”

Kon nagkinahanglan kamo nga “maminaw Kaniya” ug makahibalo unsaon pagdapit si Jesukristo diha sa inyong kinabuhi, hunahunaa ang mosunod nga mga lakang nga gitudlo ni Presidente Nelson kanato mahitungod sa personal nga pagpadayag:

“Pangita og mingaw nga lugar diin kamo kanunay makaadto. Ipaubos ang inyong kaugalingon atubangan sa Dios. Ibubo ang inyong kasingkasing ngadto sa inyong Langitnong Amahan. Dangop Kaniya alang sa mga tubag ug alang sa kahupayan.

“Pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—oo, ang mga tinguha sa inyong kasingkasing. Ug dayon maminaw! Isulat ang mga ideya nga masulod sa inyong hunahuna. Isulat ang inyong mga gibati ug sundi kini sa paglihok sa unsay giaghat nga angay ninyong buhaton. Kon inyong balikbalikon kini nga proseso matag adlaw, matag bulan, matag tuig, kamo ‘molambo ngadto sa baroganan sa pagpadayag.’”

Mopamatuod ko nga si Jesukristo mao ang atong Manluluwas ug Manunubos. Siya “nahimo niya ang tanan nga atong gikinahanglan aron makabalik ngadto sa Langitnong Amahan.” Sa ngalan ni Jesukristo, amen.