Si Jesukristo ug ang Imong Bag-ong Pagsugod

Si Jesus “miadto sa tanang dapit ug naghimog mga maayong butang.” Atong mabasa kanang yano nga mga report diha sa basahon sa Mga Buhat. Pagkadakong kuwang niana nga pamahayag! Si Jesus seguradong naghimo og mga maayo! Siya ang labing mahinungdanon—ug tinubdan—sa pagkamaayo! Siya mahalaron sa Iyang tibuok kinabuhi ngadto sa pagbuhat og maayo. Siya “maluluy-on, dili daling masuko, puno sa gugmang walay paglubad ug [kamatuoran].”

Ang bisan unsang pangahas sa paghulagway o pagminubo sa Iyang kamaayo ug kaluoy mahimong usa ka mapaubsanong pahayag! Sa pagpakatinuod, sa ingon si Apostol Juan misulay sa pagpahayag, kon kita mosulay sa pagrekord sa tanang pagpakita sa pagkamaayo sa Manluluwas, “[bisan] ang tibuok kalibotan dili gayod paigo nga kasudlan sa mga sinulat.”

Ang pipila ka piho nga mga ehemplo nga atong mahandom hangtod sa hangtod diha sa kasulatan bahin sa gihimo ni Jesus nga “pagbuhat og maayo” nakapatandog gayod ug nakapahibulong, ilabi na kon kita maghunahuna gayod kon unsa kahay bation kon maanaa didto, aron masaksihan ang Iyang mga milagro, aron madawat ang Iyang mga pagtulun-an, ug masinati ang Iyang pag-ayo. Siya nakig-istorya sa mga sinalikway sa katilingban, Siya mihikap sa masakiton ug mahugaw, Siya nagdala og kahupay ngadto sa mga naluya, Siya nagtudlo sa makapalingkawas nga kamatuoran, ug Siya mitabang sa mga makasasala sa paghinulsol. Ngadto sa matag sanlahon, sa buta nga lalaki, ug sa mananapaw nga babaye; ngadto sa bakol, sa bungol, ug sa amang; ngadto sa tanang nag nga inahan, disperado nga amahan, ug nagbangutan nga biyuda; ngadto sa gipanghimaraot, sa gipakaulawan, ug sa nag-antos; ngadto sa namatay nga lawas ug sa espiritu nga nahilayo sa Dios, unsa ang iyang gihimo mao ang pagtanyag og usa ka bag-ong sinugdanan. Oo, laing mapaubsanon nga pamahayag!

Ang tanang butang nga Iyang gisulti ug gibuhat naghatag og usa ka bag-ong sinugdanan alang sa matag usa niadtong Iyang giayo, gipanalanginan, gitudloan, ug gihaw-as sa sala. Siya wala mopalayo gikan kanila, ug Siya segurado nga dili mopalayo gikan kanimo. Hunahunaa kini nga higayon nga makadungog sa bisan hain niining makahatag og kinabuhi nga mga pulong gikan Kaniya:

“Anak, gipasaylo na ang imong mga sala.”

“Talita, cumi”, nga sa ato pa, “Inday, ingnon ko ikaw, bangon.”

“Mahinlo ka.”

“Bisan ako dili usab mosilot kanimo. Lakaw ug ayaw na pagpakasala.”

“Anak, ang imong pagsalig nag-ayo kanimo. Pauli nga malinawon.”

Ang mga pulong sa Manluluwas ngadto niining mga indibidwal mubo, apan ngadto kanila Siya naghatag og dakong pagbag-o sa kapasayloan, pagkaayo, pagpahiuli, kalinaw, ug kinabuhing dayon. Ug ang mahimayaon nga balita mao nga, Siya nagtanyag sa samang bag-ong sinugdanan nganha kaninyo ug ngari kanako. Kitang tanan makabaton og bag-ong sinugdanan pinaagi, ug tungod ni, Jesukristo. Bisan kamo. Ang bag-ong mga sinugdanan mao ang sentro sa plano sa Amahan alang sa Iyang mga anak. Kini mao ang simbahan sa bag-ong mga sinugdanan! Kini mao ang Simbahan sa bag-ong mga pagsugod!

Tungod sa bunyag pinaagi sa tubig ug sa Espiritu kita “matawo pag-usab” ug “magkinabuhi sa bag-ong kinabuhi.” Unsa kaha ka dako nga paglaom ang dala nianang bag-ong sinugdanan ngadto sa tawo nga nanglimbasog sa kabug-at sa sala o nag-antos gikan sa mga epekto sa samok nga kinabuhi ug guba nga mga relasyon? Si Jesus Mismo wala nagkinahanglan og kapasayloan sa sala o bag-ong pagsugod sa kinabuhi, apan Siya nagpabunyag, nagpakita kanato sa daling makita nga dalan ngadto sa bag-ong sinugdanan nga Iyang gihimo alang sa matag usa kanato.

Ug ang inyong bag-ong sinugdanan dili lang kausa mahitabo. Kita may kalagmitan nga maghunahuna nga ang atong bunyag mao lang ang bugtong natong higayon sa bag-ong sinugdanan. Dili kana mao. Kita dili lang adunay usa lang ka higayon. Kining bag-ong mga sinugdanan mahimong mahitabo sa kada adlaw! Ug segurado sa kada semana samtang kita moambit sa gamayng piraso sa pan ug moinom sa gamayng kupa sa tubig agig paghinumdom sa gasa sa atong hingpit nga Manluluwas, nga namatay alang sa klaro katuyoan sa paghatang kanato og daghang bag-ong sinugdanan kutob sa mahimo sumala sa atong gikinahanglan! Si Jesus naghatag kanato og ingon kadaghang bag-ong sinugdanan sigon sa atong gikinahanglan.

Inubanan sa debosyon ug pagsugakod sa pasalig ngadto sa usa ka bag-ong kinabuhi diha ni Kristo, kita mamahimong usa ka “bag-ong linalang,” diin ang daan nga mga butang moagi na ug ang tanang butang mahimong bag-o. Unsa nga kapasayloan ang gidala nianang ikaduhang kahigayonan ngadto sa kalag sa tawo nga naningkamot, pinaagi sa pagpadayon sa pagpili sa hugot nga pagtuo diha sa makaayo ug makapahiuli nga gahom sa atong Manunubos, bisan pa man sa makaluya nga mga problema sa diha sa napukan nga kalibotan? Ang Manluluwas wala gayod moundang sa Iyang pasalig sa pagtuman sa kabubut-on sa Amahan ug pagkompleto sa Iyang balaan nga misyon sa pag-ula, bisan pinaagi sa kasakit nga nakapakurog Kaniya, ug sa pag-agas sa dugo sa matag lungag sa panit, ug sa pag-antos sa lawas ug sa espiritu, ug nag-ampo nga ang mapait nga kupa unta matangtang. Usab, Siya nagpakita alang kanato kon unsa ang matinud-anong paglahutay.

Sa matag pakigsaad nga atong himoon ug sa matag paningkamot nga atong ihatag aron mapadayon kini, kita makadawat og usa ka “bag-o nga kasingkasing” ug mas mapuno sa “bag-ong espiritu.” Sa hinay hinay, kon sigehon nato sa pagdapit ang Iyang kaayo ngadto sa atong mga kasingkasing ug isalikway ang makalupig nga mga tingog diha sa atong mga ulo, kita mamahimong Iyang katawhan tungod kay tinuod nga gihimo nato Siya nga atong Dios. Gipanghingusgan og maayo ni Jesus nga mamahimo ntong Hari ug atong Magbalantay ug atong Prinsipe sa Kalinaw, ug kita kinahanglan gayod nga mopili sa paghimo Kaniya nga ingon niana diha sa atong mga kasingkasing ug mga hunahuna.

Ang paghinulsol moabli sa kahigayonan sa atong bag-o nga mga sinugdanan, presko nga mga pagsugod, ug ikaduha nga kahigayonan. Ang mga pagtulun-an sa atong minahal nga Presidente Russell M. Nelson naghatag og katin-awan sa sayop nga mga hunahuna kabahin sa balaan nga gasa sa paghinulsol, ug sa akong hunahuna kita sa kataposan nagsugod na nga masabtan kini.

Makapadasig ang makadungog sa atong kabatan-onan nga mohulagway kon unsa ang kahulogan sa paghinulsol para kanila. Bag-ohay lang kong nakadungog og usa ka batan-ong babaye nga nag-ingon, nga may pahiyom sa iyang panagway, “Kon maghunahuna ko bahin sa paghinulsol, mobati ko og grabeng kalipay ug paglaom. Akong bation ang gugma ug kamaya sa akong Langitnong Amahan ug sa akong Manluluwas. Dili ko mahadlok nga moduol sa Langitnong Amahan diha sa pag-ampo ug mangayo sa Iyang tabang sa bisan unsa nga akong gikalisdan. Kahibalo ko nga Sila wala magbantay nga makahimo ko og sayop nga butang. Dakong bukas ang ilang mga bukton. Mao kini ang paghinulsol para nako,” miingon siya. Kining batan-ong babaye nakasabot nga tungod ni Jesukristo, siya makabaton og bag-ong sinugdanan!

Nagkinahanglan ka ba og bag-ong sinugdanan? Makahimo ka ba og bag-ong pagsugod, gani ikaw mismo? Hunahunaa ang katawhan nga gipangalagaran sa Manluluwas—ang katawhan nga Iyang gitudloan, giayo, gibuhi gikan sa patay, gipasaylo, ug gipahiuli. Gipili ba Niya sila gikan sa partikular nga matang sa ekonomiya o kaagi? Gibutangan ba Niya og ilhanan ang matarong ug ang makasasala? Nagtumbok ba Siya sa mga tawo tungod kay sila mas angayan o mas gimahal? Wala.

Ang uban moduol Kaniya nga may dakong pagtuo, nagtuo sa Iyang gahom sa pag-ayo—sama sa babaye nga adunay talinugo, ang Romano nga centurion kansang sulugoon himatyon, ang sanlahon, si Jairus, ug ang buta nga si Bartimaeus. Matag usa nila maisog nga mibutang sa ilang pagtuo diha sa pagsulay, sa paghinaot nga ang kaayo ug ang gahom sa magtutudlo gikan sa Nazaret mousab sa ilang mga kinabuhi ug sa ilang mga panglantaw. Ug gihimo Niya. Gawasnon Niyang gipadagayday ang iyang pag-ayo.

Apan si Jesus mipanalangin usab niadtong nagduhaduha sa pagtuo, sama sa amahan sa masakiton nga anak nga mituaw, tingali sama sab ninyo, “Ginoo, duna koy pagtuo apan dili pa kini igo. Tabangi intawon ako.” Ug Siya mibubo pa gani og kaluoy niadtong wala gayod nagtinguha Kaniya, sama sa babaye nga gidala tungod sa pagpanapaw, ang balo sa Nain, ang baldado nga lalaki didto sa Betsata, ug ang lalaki nga natawo nga buta. Mibati ba kamo Kaniya nga milibot aron sa pagbuhat og maayo sa inyong kinabuhi bisan kon kamo wala nagtinguha Kaniya o sa pagsunod Kaniya?

Sa matag usa niining mga tawo sa kasulatan, ug sa tanan kinsa maminaw ug motubag, Siya mihatag og usa ka bag-ong sinugdanan, mahimong kini ang bag-ong kinabuhi nga gipasaylo sa sala, o usa ka bag-ong kinabuhi nga naayo sa sakit, o usa ka bag-ong kinabuhi nga gibangon gikan sa kamatayon.

Unsa ang kahulogan niini para nimo ug para kanako? Ang Iyang kaayo ug kaluoy ug mahigugmaong kalumo walay giila nga utlanan. Ang bag-ong mga sinugdanan maoy labing mahinungdanon sa plano sa Amahan! Ang bag-ong mga pagsugod mao ang misyon sa Anak! Ang bag-ong kadlawon, bag-ong hugna, ug bag-ong mga kahigayonan mao ang yano nga kinauyokan sa maayong balita sa ebanghelyo!

Busa, nahilayo ba kamo sa dugayng panahon gikan sa inyong mga pakigsaad aron modawat sa usa ka bag-ong pagsugod? Wala. Nabuhat ba ninyo kini o kana sa daghan ra kaayong higayon nga dili na angayan og laing kahigayonan? Wala. Nahilayo ba kamo og maayo gikan ni Kristo aron nga dili na Siya motabang ninyo sa pagsulat og bag-ong istorya gikan karon? Wala. Ang kaaway mao lang ang nakabenepisyo gikan sa ideya nga kamo naunlod na. Matubos gihapon kamo.

Ug ang bag-ong mga sinugdanan labaw pa kaayo kay sa atoa lang mga sala ug kasaypanan. Pinaagi sa kaayo ug kaluoy sa Manluluwas, kita makabaton og bag-ong mga pagsugod nga moaghat kanato sa pag-usab sa daan nga panghunahuna, dili maayong pamatasan, masuk-anong gawi, negatibong mga kinaiya, pagbati sa pagkawalay gahom, ug mga kalagmitan nga basolon ang uban ug maglikay sa personal nga responsibilidad. Kamo sa pagkatinuod makausab sa mga butang kabahin sa inyong kaugalingon nga nakapasagmuyo kaninyo sulod sa katuigan. Makasugod kamo pag-usab pinaagi sa gahom sa Agalon sa bag-ong mga sinugdanan. Siya dili gayod kapuyon sa paghatag og bag-ong sinugdanan ngari kanato.

Ngadto niadtong mga nanglimbasog sa samang sala o sa samang babag nga nagbalik-balik, padayon kamo. Siya wala magbutang og babag diha sa inyong atubangan. Siya wala magtakda og kinutoban sa inyong ikaduhang kahigayonan. Padayon kamo. Padayon kamo sa pagpaningkamot. Pangayo og tabang gikan niadtong naglibot kaninyo. Ug mosalig kamo sa bag-ong sinugdanan nga anaa alang kaninyo sa matag higayon nga kamo mobalik ngadto sa inyong Amahan diha sa kasinsero sa kasingkasing. Biyae ang tinuyo nga pagpakasala, kaswal nga pagbalikbalik, ug ang mapagarbohon nga pagsupak, sa inyong luyo kon diini kini angay nga mahimutang. Kamo dili kinahanglan nga mahimong kinsa kamo kaniadto. Hangopa ang inyong bag-ong pagsugod, ang inyong ikaduha o ikatulo o ikaupat—o ikagatos—nga higayon, gitanyag nganha kaninyo pinaagi sa maulaon nga dugo ni Jesukristo.

Mapasalamaton ko lapas pa sa ikahulagway alang sa bag-ong mga sinugdanan nga nahatag nako ug alang niadtong ikatanyag pa.

Ang atong Manluluwas militok sa usa pa ka mapaubsanon nga hinapos nga pamahayag nga kon wala kini walay mahimong kawsa alang sa paglaom o pagmaya niining adlawa. Human sa mga paghingutas sa Getsemane ug sa kataposan nga sakit nga pag-antos sa krus, Siya yanong miingon, “Natapos na.” Natuman na ang Mesiyanhon nga panagna, ug ang hingpit nga pagbayad sa utang tungod sa mga sala sa katawhan ug ang pag-antos nabayran na. Siya namahayag “natapos na” ang Iyang walay kinutoban ug mahangtorong sakripisyo. Apan ang Iyang Pag-ula dili makompleto hangtod nga Siya Mismo makasinati og bag-ong kinabuhi sa ikatulong adlaw, ang usa ka bag-ong sinugdanan isip usa ka nahimaya, nabanhaw nga binuhat pinaagi sa gahom sa Amahan.

Tungod kay Siya kanunayng nagbuhat niadtong mga butang nga nakapahimuot sa Iyang Amahan, ug tungod kay Siya “mituman sa kabubut-on sa Amahan sa tanan nga mga butang,” kamo ug ako makabaton og bag-ong mga sinugdanan. Dawata ang inyong bag-ong sinugdanan, gani karon, karon dayon. Si Jesukristo mao ang Tagsulat ug Tigtapos sa atong pagtuo, nagsulat og dili maihap nga bag-ong hugna uban kanato. Siya mao ang Sinugdanan ug ang Kataposan—ang kataposan sa atong kaulawan ug pag-antos, ug ang sinugdanan sa bag-ong kinabuhi diha Kaniya, nagtugot kanato nga madawat ang Iyang grasya, biyaan ang nangagi ug magsugod pag-usab sa bag-ong kadlawn sa daghang higayon sumala sa atong gikinahanglan. Sa tinud-anay ang Iyang “kamaayo ug kaluoy mosunod [kanato] sa tibuok [natong kinabuhi].” Sa ngalan ni Jesukristo, amen.