Ang Ngalan nga Itawag Kaninyo

Si Presidente Russell M. Nelson mitudlo nga kon ang Ginoo direkta pa nga makaistorya nato, ang unang butang nga Iyang buhaton mao ang pagseguro nga kita nakasabot sa atong tinuod nga pagkatawo: kita mga anak sa Dios, mga anak sa pakigsaad, ug mga disipulo ni Jesukristo. Ang ubang ngalan sa kaulahian makasagmuyo nato.

Nakat-onan ko kini sa akong kaugalingon sa dihang ang akong kinamagulangan nga anak nga lalaki nakadawat sa iyang unang selpon. Sa dakong kalipay, misugod siya sa pagbutang sa mga ngalan sa iyang pamilya ug mga higala ngadto sa iyang mga kontak. Usa ka adlaw akong namatikdan nga ang iyang mama mitawag. Sa screen makita ang ngalan nga “Mama.” Kana nindot ug ligdong nga pagpili—ug, moangkon ko, usa ka timaan sa pagtahod sa mas maayo nga ginikanan sa among panimalay. Natural lang, nakuryuso ko. Unsa kaha ang iyang gibutang nga ngalan nako?

Gi-scroll nako ang iyang mga kontak, nagdahom nga kon si Wendi “Mama,” ako usab “Papa.” Wala didto. Nangita ko og “Papa.” Wala gihapon. Ang akong kakuryoso nausab ngadto sa gamayng kabalaka. “Gitawag ba ko niya og ‘Corey’?” Wala. Sa kataposang pagpaningkamot sa pagpangita, naghunahuna ko, “Kami mga magdudula og soccer—basin gitawag ko niya og ‘Pelé.’” Nanghinaot lang. Sa kataposan, gitawagan nako ang iyang numero, ug duha ka pulong ang migawas sa screen: “Dili Mama”!

Mga kaigsoonan, unsa ang ngalan nga kamo pagatawgon?

Si Jesus mitawag sa Iyang mga sumusunod og daghang ngalan: Mga Disipulo. Mga anak nga lalaki ug mga anak nga babaye. Mga anak sa mga propeta. Karnero. Mga higala. Ang kahayag sa kalibotan. Mga santos. Matag usa niini nagdala og mahangtorong kamahinungdanon ug nagtimaan og personal nga relasyon uban sa Manluluwas.

Apan taliwala niining mga ngalan, usa ang mipatigbabaw sa tanan—ang ngalan ni Kristo. Sa Basahon ni Mormon, si Hari Benjamin gamhanang mitudlo:

“Wala nay lain nga ngalan nga gihatag diin ang kaluwasan moabot; mao nga, manghinaot ko nga kamo modala diha kaninyo sa ngalan ni Kristo. …

“Ug mahitabo nga kinsa kadtong magbuhat niini makaplagan diha sa tuo nga kamot sa Dios, kay mahibaloan niya ang ngalan diin siya pagatawgon; kay pagatawgon siya pinaagi sa ngalan ni Kristo.”

Kadtong modala sa ilang kaugalingon sa ngalan ni Kristo mahimong Iyang mga disipulo ug mga saksi. Diha sa basahon sa Mga Buhat, atong mabasa nga human sa Pagkabanhaw ni Jesukristo, ang pinili nga magsaksi gisugo sa pagpamatuod nga kinsa kadtong mituo ni Jesus, nagpabunyag, ug midawat sa Espiritu Santo makadawat og kapasayloan sa mga sala. Kadtong midawat niining sagrado nga mga ordinansa nagtigom sa Simbahan, nahimong mga disipulo, ug gitawag og mga Kristiyano. Ang Basahon ni Mormon naghulagway usab sa mga tumutuo ni Kristo isip mga Kristiyano ug sa mga tawo sa pakigsaad isip “mga anak ni Kristo, iyang mga anak nga lalaki, ug iyang mga anak nga babaye.”

Unsay ipasabot sa pagatawagon pinaagi sa ngalan ni Kristo? Nagpasabot kini sa paghimo ug pagtuman sa mga pakigsaad, kanunay nga paghinumdom Kaniya, pagsunod sa Iyang mga sugo, ug pagkahimong “andam … mobarog isip mga saksi sa Dios sa tanang panahon ug sa tanang butang.” Nagpasabot kini nga mobarog uban sa mga propeta ug apostoles samtang ilang gidala ang mensahe ni Kristo—uban sa doktrina, mga pakigsaad, ug mga ordinansa niini sa tibuok kalibotan. Nagpasabot usab kini nga moserbisyo sa uban aron hupayon ang pag-antos, mahimong kahayag ug magdala og paglaom ni Kristo ngadto sa tanang katawhan. Siyempre, kini usa ka tibuok kinabuhi nga paningkamot. Si Propeta Joseph Smith mitudlo nga “kini usa ka dapit diin wala pay tawo sukad nga nakaabot niini nga panahona.”

Tungod kay ang panaw sa pagkadisipulo nagkinahanglan og panahon ug paningkamot nga natukod sa “pagtulun-an human sa usa ka pagtulun-an, sugo human sa usa ka sugo,” sayon kaayo nga madani sa kalibotanong mga ngalan. Makahatag lamang kini og temporaryo nga bili ug dili gayod kini igo. Ang katubsanan ug ang mga butang sa kahangtoran “mahitabo pinaagi sa Balaan nga Mesiyas.” Busa, ang pagsunod sa propetikanhong tambag sa paghatag og prayoridad sa pagkadisipulo tukma ug maalamon, labi na sa panahon nga adunay daghan kaayong nagkompetensyahanay nga mga tingog ug mga impluwensya. Kini ang labing mahinungdanong tambag ni Hari Benjamin sa dihang miingon siya, “Akong tinguha nga hinumdoman ninyo nga ipabiling nakasulat kanunay ang ngalan diha sa inyong mga kasingkasing, nga … kamo makadungog ug masayod sa tingog diin kamo pagatawgon, ug, sa ngalan usab nga iyang itawag kaninyo.”

Nakita ko kini sa akong kaugalingong pamilya. Ang lolo sa akong papa nga si Martin Gassner nausab sa kahangtoran tungod kay ang usa ka mapaubsanong presidente sa branch mitubag sa tawag sa Manluluwas. Sa Germany niadtong 1909, lisod kaayo ang panahon ug ang kwarta lisod kaayo. Si Martin nagtrabaho isip welder sa usa ka planta nga naghimo og mga tubo. Siya miangkon, hapit kada sweldo igasto sa pag-inom, pagsigarilyo, ug pagpalit og makahubog nga ilimnon para sa kagrupo sa imnanan. Ang iyang asawa sa kataposan mipasidaan niya nga kon dili siya mag-usab, siya mobiya.

Usa ka adlaw, ang kauban sa trabaho ni Martin misugat niya sa pagpadulong sa imnanan nga nagdala og gum-os nga gamayng basahon sa relihiyon. Nakit-an niya kini sa dalan ug miingon kang Martin nga lahi ang iyang gibati niini human sa pagbasa sa pamphlet nga giulohan og Was wissen Sie von den Mormonen?, o Unsay Inyong Nahibaloan Mahitungod sa mga Mormon? Segurado ko nga kana nga ulohan giusab.

Ang address nga nakabutang sa luyo, igo ang kaklaro nga matultolan kon asa nahimutang ang simbahan. Medyo layo kini, apan nadasig sila sa ilang nabasa ug midesisyon nga mosakay og tren niana nga Dominggo aron mag-imbestigar. Sa dihang miabot na sila, ilang nakita nga ang address dili mao ang simbahan nga ilang gidahoman apan usa ka punerarya. Si Martin nagpanagana—tungod kay, sa pagkatinuod, ang simbahan sulod sa punerarya murag lahi ra kaayo.

Apan sa itaas, sa usa ka giabangan nga luna, ilang nakita ang usa ka gamayng grupo sa mga Santos. Ang usa ka tawo nga midapit nila sa panagtigom alang sa pagpamatuod. Si Martin natandog sa Espiritu ug nakadayeg kaayo sa yano, sinsero nga mga pagpamatuod nga siya mihatag sa iyang pagpamatuod. Ug didto, nianang lahi kaayo nga dapit, nga siya miingon nga siya nasayod na nga kini tinuod.

Human niana ang tawo mipaila sa iyang kaugalingon isip presidente sa branch ug nangutana kon pwede ba sila mobalik. Si Martin mipasabot nga layo kaayo ang iyang gipuy-an ug dili makahimo sa sinemana nga biyahe. Ang presidente sa branch miingon lang, “Sunod nako.”

Nanglakaw sila og pipila ka block ngadto sa duol nga factory diin ang higala sa presidente sa branch nagtrabaho. Human sa mubo nga panag-istoryahanay, si Martin ug ang iyang higala gitanyagan og trabaho. Dayon ang presidente sa branch midala nila ngadto sa bilding nga apartment ug migahin og kapuy-an alang sa ilang mga pamilya.

Kining tanan nahitabo sulod sa duha lang ka oras. Ang pamilya ni Martin mibalhin pagkasunod semana. Paglabay sa unom ka bulan nabunyagan sila. Ang tawo nga kanhi nailhan kanhi nga walay paglaom nga palahubog nahimong madasigon kaayo sa iyang bag-ong tinuohan nga ang mga tawo sa lungsod misugod sa pagtawag niya, tingali dili ingon ka mabination, “ang pari.”

Bahin sa presidente sa branch, dili ko makasulti ninyo sa iyang ngalan—wala na siya mailhi tungod sa kadugay. Apan ako motawag niya og usa ka disipulo, mensahero, Kristiyano, buotan nga Samaryanhon, ug higala. Ang iyang impluwensya mabati gihapon 116 ka tuig na ang milabay, ug ako nakabenepisyo sa iyang pagkadisipulo.

“Adunay panultihon nga ikaw makaihap sa mga liso sa usa ka mansanas, apan ikaw dili makaihap sa mga mansanas nga naggikan sa usa ka liso.” Ang liso nga gitanom sa presidente sa branch namunga og dili maihap nga bunga. Wala gayod siya masayod nga 48 ka tuig ang milabay, pipila ka henerasyon sa pamilya ni Martin sa duha ka habig sa tabil maselyo sa Bern Switzerland Temple.

Tingali ang labing nindot nga mga wali mao kadtong dili gayod nato madungog apan atong makita sa hilom, wala magpaabot og pagdayeg nga mga lihok ug binuhatan nga makita diha sa mga kinabuhi sa ordinaryong mga tawo kinsa, naningkamot nga mahisama ni Jesus, naghimo og maayo. Unsa ang talagsaon nga gihimo niining presidente sa branch dili kabahin sa tsekanan nga listahan. Nagsunod lamang siya sa ebanghelyo sama sa gihulagway diha sa Alma: “Wala nila gisalikway si bisan kinsa nga … mga gigutom, o mga giuhaw … nagmanggihatagon sila ngadto sa tanan, sa tigulang ug sa batan-on, … sa lalaki ug sa babaye.” Ug, ang punto nga kinahanglang dili nato mataligam-an, wala nila gisalikway si bisan kinsa “bisan gawas sa simbahan o sulod sa simbahan.”

Kadtong kinsa midala sa ilang kaugalingon sa ngalan ni Kristo giila, sama sa giingon ni Joseph Smith, “Ang usa ka tawo nga puno sa gugma sa Dios, dili matagbaw sa pagpanalangin sa iyang pamilya lamang, apan mokaylap ngadto sa tibuok kalibotan, matinguhaon sa pagpanalangin sa tibuok katawhan.”

Kini ang paagi sa pagpakabuhi ni Jesus. Gani, daghan kaayo ang Iyang gihimo nga ang Iyang mga disipulo dili makasulat niining tanan. Si Apostol Juan misulat, “Daghan pa kaayong mga butang nga gibuhat ni Jesus. Kon gisulat pa ang tanan, nagtuo ako nga ang tibuok kalibotan dili gayod paigo nga kasudlan sa mga sinulat.”

Maningkamot kita sa pagsunod sa ehemplo ni Kristo, magbuhat og maayo ug himoon ang pagkadisipulo nga tibuok kinabuhi nga prayoridad aron sa matag higayon nga kita makighinabi sa uban, ilang mabati ang gugma sa Dios ug ang mapamatud-anong gahom sa Espiritu Santo. Dayon kita mahimong moapil sa lolo sa akong papa ug sa uban nga namahayag, sama sa disipulo nga si Andres, “Nakita namo ang Mesiyas.”

Sa kataposan, ang atong pagkatawo dili matino sa kalibotan. Apan ang atong pagkadisipulo matino pinaagi sa mga ordinansa nga atong nadawat, mga pakigsaad nga atong gituman, ug sa gugma nga atong gipakita ngadto sa Dios ug sa silingan pinaagi lamang sa paghimo og maayo. Sama sa gitudlo ni Presidente Nelson, mga anak gayod sa Dios, mga anak sa pakigsaad, ug mga disipulo ni Jesukristo.

Ako mopamatuod nga si Jesukristo buhi ug mitubos nato. Siya miingon, “Gipili ko ikaw ug ikaw akoa na.” Sa ngalan ni Jesukristo, amen.