Mga Propeta sa Dios

Minahal kong kabatan-onan, unsa ka nindot nga sesyon sa komperensiya kita aduna! Nakadungog na kita og tulo ka buhing Apostoles ni Jesukristo. Pagkaanindot nga panalangin! Ug makadungog pa kita og usa pa, si Elder Henry B. Eyring. Ang espirituhanon nga pista nagpadayon!

Sa dihang namulong ko sa miaging tuig, nakakat-on kita kon unsaon sa pag-atubang niini nga kalibotan pinaagi sa kasinatian ni David uban ni Goliath. Nahinumdom mo sa lima ka bato? Karon mopakigbahin ko og istorya sa Daang Tugon nga akong nabasahan niadtong sama pa ko og edad ninyo nga nakapahimo nako nga gustong mahisama sa manlalaban niini. Ang Biblia wala magsulti nato sa iyang ngalan, mao nga ato siyag tawgon nga ang babaye sa Sunam kay mao ni ang ngalan sa iyang lungsod.

Usa ka adlaw si propeta Eliseo miagi sa Sunam, ug atong nabasahan nga dihay “usa ka babaye nga dato; ug [gidapit] niya siya sa pagkaon og pan. Ug mao kadto, matag agi niya niadtong dapita, mohapit gayod siya … aron sa pagkaon og pan.” Gihunahuna nako nga si propeta Eliseo nalipay kaayo sa pagdapit nga mokaon ngadto sa iyang balay! Miagi na siya sa makadaghang higayon, sa dihang usa ka adlaw niana ang babaye miingon ngadto sa iyang bana, “Karon, nakasabot ko nga siya usa ka balaang tawo sa Dios.”

Ang babaye nag-ingon, “Karon, nakasabot ko.” Kini daw iyang gidapit si Eliseo sa iyang balay nga wala mahibalo nga siya ang propeta; siya nakadawat sa iyang pagpamatuod pinaagi sa Espiritu Santo sa pagpaminaw og maayo sa unsay gisulti ug gitudlo ni Eliseo. (Hinumdomi, walay mga hulagway niadtong higayona! Mao nga lisod ang pag-ila sa propeta pinaagi sa iyang nawong lang.)

Apan wala pa mahuman ang istorya didto. Usa ka adlaw ang babaye miingon ngadto sa iyang bana, “Maghimo kitag gamayng lawak didto sa pulangki [attic], … ug butangan ta kinig higdaanan, ug lamesa, ug lingkoranan, ug suga: aron nga inig anhi niya, makapahulay siya.”

Kining matinud-anon nga babaye andam nga mohimo og lawak sa iyang balay aron ang propeta, inig agi sa siyudad, adunay kapahulayan!

Karon makakat-on kita og gamhanang leksiyon gikan niini nga kasinatian.

Ang Ginoo mipamatuod ngadto sa babaye sa Sunam nga si Eliseo usa ka propeta sa Dios, ug siya milihok pinaagi sa pagpadayon kaniya sa iyang balay.

Kita usab makadawat og personal nga pagpamatuod sa propeta sa Dios karon ug ablihan ang atong mga kasingkasing ug mga hunahuna—ang atong panimalay—sa mensahe nga ang atong Langitnong Amahan aduna alang nato niining kataposang mga adlaw.

Mahal nga kabatan-onan, ako modapit kaninyo sa pagpangutana sa inyong kaugalingon niini nga pangutana: “Aduna ba akoy personal nga pagpamatuod sa buhing mga propeta sa Dios?”

Magsugod kita sa sinugdanan.

Unsa ang usa ka propeta? Ang propeta usa ka tawo kinsa gitawag sa Dios aron mamulong alang Kaniya. Adunay mga propeta ania karon sa yuta, sama sa karaan.

Ang mga propeta mga manalagna ug mga tigpadayag. Nagpasabot kana nga sila makakita sa unsay dili makita sa uban, ug sila makapanagna sa umaabot nga mga panghitabo. Sila usab makapangandam nato sa mga kalamidad. Ang mga propeta nagdawat og mga sugo ug mga pagpadayag gikan sa Ginoo. Ang ikasiyam nga artikulo sa hugot nga pagtuo nagsulti sa nagpadayon nga pagpadayag niining kataposan nga mga adlaw. Kini nag-ingon, “Kami nagtuo sa tanan nga gipadayag sa Dios, sa tanan nga gipadayag Niya karon, ug kami nagtuo nga Siya mopadayag pa og daghan nga dagko ug mahinungdanon nga mga butang kalabot sa Gingharian sa Dios.”

Si Elder Gary E. Stevenson miingon, “Ang Ginoo nagpadayon sa pagpadayag sa Iyang mga sugo ug kabubut-on ngadto sa Iyang mga propeta karon tungod kay Siya nagtinguha nga giyahan kita ngadto sa kalipay niini nga kinabuhi ug ngadto sa celestial nga himaya sa sunod nga kinabuhi.”

Ang mga propeta usab namahayag sa ebanghelyo ug nadasig nga mga magtutudlo ug mga mensahero sa Dios ngadto sa tanan sa yuta.

Matag sakop sa Unang Kapangulohan ug sa Korum sa Napulog Duha ka Apostoles usa ka propeta, manalagna, ug tigpadayag. Nagserbisyo isip usa ka konseho ubos sa direksiyon sa Ginoo, aduna silay awtoridad sa pagpahayag ug paghubad sa doktrina ug pagtukod og palisiya alang sa Iyang Simbahan. Sila maampingong nag-ampo ug namalandong, kay ang mga desisyon niini nga mga korum kinahanglan nga magkauyon. Niini nga paagi, ang Ginoo nagpasalig kanato nga ang Iyang kabubut-on maoy matuman.

Ang mga propeta nagpamatuod kang Kristo—sa Iyang pagkaanaa, sa Iyang pangalagad, ug sa Iyang pagka-Dios.

Magbasa kita og pipila ka pagpamatuod gikan sa mga propeta diha sa Basahon ni Mormon.

Si Abinadi mipahayag:

“Ang Dios sa iyang kaugalingon manaog taliwala sa mga katawhan, ug motubos sa iyang mga katawhan.

“Ug tungod kay siya nagpuyo diha sa lawas siya pagatawgon nga Anak sa Dios.”

Si Samuel ang Lamanita mipamatuod usab nga si Jesukristo mao “ang Anak sa Dios, ang Amahan sa langit ug sa yuta, ang Tiglalang sa tanan nga butang gikan sa sinugdanan.”

Ug si propeta Moroni miingon, “Ako nakakita ni Jesus, ug … siya nakigsulti kanako nawong sa nawong.”

Sa dihang si Kristo mibisita sa mga Nephita, usa sa unang mga butang nga Iyang gibuhat mao ang pagtawag og napulog duha ka Apostoles. Ug Siya miingon ngadto sa mga katawhan, “Bulahan kamo kon mopatalinghog kamo sa mga pulong niining napulog duha nga akong gipili.”

Karon, tugoti ko mopakigbahin og pipila ka pulong alang sa mga ginikanan o ubang sakop sa pamilya nga nagpadako og mga anak. Ang Ginoo Mismo mitudlo ni Adan ug ni Eva sa mga kamatuoran sa plano sa kaluwasan. Ug dayon Siya miingon ngadto kanila, “Mohatag ko kanimo og usa ka sugo, sa pagtudlo niini nga mga butang sa gawasnon nga paagi ngadto sa imong mga anak.”

Unsa ang buot ipasabot sa pagtudlo sa gawasnon nga paagi? Kini mao ang pagkat-on sa mga kamatuoran sa ebanghelyo, nga may personal nga pagpamatuod niini, ug mopakigbahin niana nga kahibalo ngadto sa atong mga anak. Kini nagpalambo og pormal ug dili pormal nga panahon sa pagtudlo. Kini mao ang pagpuyo niana nga kahibalo ug pagpamatuod.

Ang Basahon ni Mormon naghulagway sa 2,060 ka batan-ong kasundalohan isip “mga tawo sa kamatuoran ug kaligdong, kay sila gitudloan sa pagtuman sa mga sugo sa Dios ug sa pagpakabuhi nga matarong sa iyang atubangan.” Kining batan-ong mga lalaki matinud-anon nga mituman ni Helaman, kinsa niadtong higayona mao ang ilang lider sa militar ug usab ang ilang propeta, ug ilang giila nga ang ilang mga inahan mipuno sa ilang mga kasingkasing sa kamatuoran ug pagtuo.

Mga ginikanan, niini nga kalibotan diin dunay daghang tingog ug usahay daghang kangitngit, ang Dios Mismo nagsugo kanato sa pagpadako sa atong mga anak diha sa kahayag ug kamatuoran. Siya mitugyan kanato sa responsibilidad sa pagtudlo sa atong mga anak sa makaluwas nga mga kamatuoran sa ebanghelyo. Kon mapakyas kita sa pagbuhat niini, ang kalibotan dili mobuhat niini.

Mahal kong batan-ong mga higala, ako adunay pagdapit alang ninyo: Sa umaabot nga mga adlaw, ako modapit kaninyo sa pagluhod, ablihi ang inyong mga kasingkasing, ug pag-ampo uban sa hugot nga pagtuo ngadto sa Langitnong Amahan, maghangyo Kaniya sa pagkompirmar diha ninyo nga ang Iyang pinili nga propeta ug apostoles mao ang Iyang tingog sa kalibotan karon.

Ang babaye sa Sunam nagtudlo kanato nga makaangkon kita niana nga pagpamatuod pinaagi sa Espiritu Santo. Ako mosaad kaninyo nga sa higayon nga kita mahibalo nga sila mga dinihogan sa Dios, ang atong kinabuhi mas masayon bisan sa atong nagpadayon nga mga hagit, samtang magtuman kita sa ilang mga tingog uban sa pagsalig, hugot nga pagtuo, ug paglaom. Sa pagpaminaw ug pagtuman sa tingog sa propeta mahinungdanon sa paghupot sa matag maayo nga butang hangtod sa Ikaduhang Pag-anhi sa atong Manluluwas.

Ang pagkadaotan sa kalibotan nagkadako, apan ang Simbahan ni Jesukristo ug Iyang gingharian mas lig-on kaysa kaniadto. Ang Sion nagsul-ob sa matahom nga bisti, ug ang trono ni Kristo dili matumpag. Ang Ginoo naglaom kanato nga magmalig-on sa atong mga pagpamatuod, nga buhong sa pagtuo, ug maghinulsol matag adlaw. Ang atong Manluluwas, si Jesukristo, nagsalig sa matag usa kanato sa pagpadayon sa Iyang buhat.

Sa miagi, si Propeta Joseph Smith miingon, “Kaigsoonan, dili ba kita mopadayon sa hilabihan ka mahinungdanon nga katuyoan?” Bisan pa man, sanglit ang akong mensahe para inyo gayod, ang kabatan-onan, gusto ko mogamit sa pulong nga kabatan-onan imbis kaigsoonan. Andam na?

“[Kabatan-onan], dili ba kita mopadayon sa hilabihan ka mahinungdanon nga katuyoan? Padayon ug ayaw pagsibog. Pagmaisogon, [kabatan-onan]; ug padayon, padayon ngadto sa kadaogan! Pasadyaa ang inyong mga kasingkasing, ug paglipay sa hilabihan.”

Ako mapasalamaton alang sa paggiya ug gibalaan nga mga paningkamot sa buhing mga propeta. Ako mohatag sa akong mainitong pagpamatuod nga sila gitawag sa Dios sa pagdala, pag-establisar, ug pagdumala sa Iyang gingharian sa kalibotan karon. Ug kini kanunay nga maingon niini. Kanunay ang Ginoo maoy mopili sa Iyang mga sulugoon. Sa ngalan ni Jesukristo, amen.