Ang Mahangtorong Gasa sa Pagpamatuod

Siya nasayod sa tanan ug makagagahom sa tanan. Pinaagi sa Kahayag ni Kristo ug sa pagpangalagad sa Espiritu Santo, ang Iyang impluwensya anaa bisan asa. Iyang kinaiya ang pagpanalangin kanato.

Nakakita Siya sa atong kinabuhi kaniadto, karon, ug sa mahangtorong padulngan. Walay butang nga matago gikan Kaniya.

Ang imbitasyon ni Presidente Russell M. Nelson sa “paghunahuna og celestial” nag-awhag nato sa pagsunod sa panan-awon ug kinaiya sa atong Langitnong Amahan.

Tungod sa Iyang balaanong mga kinaiya, ang atong Langitnong Amahan naghatag nato sa matag maayo nga gasa, matag usa nga naghunahuna sa Iyang mahangtorong panglantaw ug panan-awon.

Mao usab kini ang responsibilidad nga mopili og maayo.

Si Jesukristo mibayad sa labing dako nga bili alang niana nga pribilihiyo sa Iyang bililhong dugo.

Usahay tingali nagtuo kita nga ang kabubut-on nagpasabot nga pagbuhat sa bisan unsay atong gusto. Apan ang kamatuoran nga ang kantidad gibayaran nagpasabot nga ang kabubut-on usa ka sagrado nga gasa.

Kita mga tinugyanan, ug ang mga tinugyanan mao ang responsable alang sa usa ka butang. Niini nga sitwasyon, kita mao ang responsable alang sa mga pagpili nga atong gihimo sumala sa kahibalo nga anaa kanato ug sa mga gasa nga gihatag kanato. Kita dili makahimo sa pagpili nga dili mahimong responsable sa mga sangpotanan.

Ngano man nga kita adunay kabubut-on?

Aron mopili sa maayo.

Aron mopili ni Kristo.

Aron mopili sa kinabuhing dayon—balik-balik.

Ang usa ka pagsaksi gikan sa Espiritu Santo mas labaw pa kaysa nakakita. Siya ang dili hitupngan nga saksi sa Amahan ug sa Anak. Si Presidente Nelson mitudlo, “Sa umaabot nga mga adlaw, dili na posible ang espirituhanong pagsugakod kon wala ang giya, direksyon, makahupay, ug makanunayon nga impluwensya sa Espiritu Santo.”

Mga kaigsoonan, kini ang hinungdan kon ngano nga ang matag usa nato nagkinahanglan sa gahom sa Espiritu Santo karon.

Ang pagpamatuod pinaagi sa Espiritu Santo moabot sa daghang paagi. Sama sa usa ka bombilya sa suga diha sa ngitngit nga lawak, mahimo kining moabot sa talagsaon ug kalit nga paagi. Mahimo kini nga moabot sama sa pagsubang sa adlaw sa hinayhinay ug sa paglabay sa panahon. Mahimo kining moabot sama sa mga bidlisiw sa hayag, anam-anam nga pagkabantang ngadto sa lunsay nga salabotan. Bisan unsa pa man nga paagi, kini moabot pinaagi sa Espiritu Santo.

Nagdako ko sa matahom nga Jamaica; makalingaw ug maanindot kini. Hinuon, sa akong pagsugod sa hayskul, pipila sa mga klasmeyt ug mga higala wala makasabot sa akong desisyon nga mahimong miyembro sa Simbahan ni Jesukristo. “Nganong nagpasakop man ka niana nga simbahan?,” mangutana sila. “Nganong mituo man ka niana nga istorya?”—nagpasabot sa Unang Panan-awon. “Nganong mibasa man ka niana nga basahon?”—nagpasabot sa Basahon ni Mormon. “Nagtuo ba gayod kamo nianang tanan?” Ug “Nganong giusikan man nimo ang imong kinabuhi?”

Sakit kaayo kadto, ilabi na kon kini nagagikan sa mga tawo nga akong gimahal.

Apan ang wala nila mahibaloi mao kini: ako adunay kasinatian uban sa Espiritu Santo. Samtang kana nga pagpamatuod mipuno sa akong kasingkasing, miwagtang kini sa kasakit sa mga adlaw, ug sa “usa ka higayong daklit, nakita kong langit.”

Tingali gipangutana kamo sa pipila niini nga mga pangutana. Tingali, bisan karon napuno kamo sa mga pangutana sama nako kaniadto.

Ang gasa ug pagsaksi sa Espiritu Santo magamit sa tanan.

Ang Jamaica para nako murag Palmyra ni Joseph Smith. Kini ang akong Sagrado nga Kakahoyan. Wala ko kahibalo sa eksaktong dapit kon asa si Joseph miluhod aron mag-ampo diha sa Sagrado nga Kakahoyan, apan nahibalo gyod ko kon asa ko sa dihang ang akong Sagrado nga Kakahoyan nahimong reyalidad. Nahitabo kini sa Four Grove Road, Mandeville, Jamaica, sa akong kaligoanan, sa alas 6:00 sa buntag sa Miyerkules tulo ka tuig human sa akong bunyag. Kining sagrado nga kasinatian nahitabo tungod kay duha ka semana sa wala pa kini mahitabo ang usa ka dinasig nga sister nga misyonaryo midapit nako sa pagbasa sa Basahon ni Mormon. Si Sister Audrey Krauss mitambong niini nga komperensiya karon uban sa iyang pamilya, ug gihigugma ko siya sa kahangtoran.

Kana nga kasinatian nakapausab nako.

Mga kaigsoonan, ang pagpamatuod wala ihatag alang sa temporaryo nga paggamit. Kini nga gasa nga gikan sa atong mahigugmaong Langitnong Amahan gitumong nga magmahangtoron kay ang tighatag mahangtoron. Ang pagpamatuod dili usa ka butang nga atong gidahoman nga sa kaulahian mawala ra. Kinahanglang dili kini maluya o makunhoran tungod kay ang usa ka butang sa akong kinabuhi nausab o ang usa ka butang sa kalibotan nausab. Kinahanglan nga mag-anam kini og kalig-on tungod kay, sama sa mga talanton sa sulugoon diha sa sambingay sa mga talanton, ang akong personal nga pagpamatuod usa ka gasa nga kinahanglang padaghanon—dili ilubong.

Sa pagtan-aw og balik niadtong lisod nga mga adlaw sa pagsulay ug pagpanglutos nga akong naagian sa bata pa nakatabang nako sa dapit diin ako karon nahibalo sa akong kaugalingon. Wala lamang ko motuo, molaom, o mosalig, bisan kon kini mahinungdanon nga mga bahin sa pagtuo diha sa dalan ngadto sa usa ka segurado nga saksi. Ako nagdayeg kaninyo sa pag-ugmad og inyong kaugalingong pagpamatuod pinaagi sa pagpangutana, pagtuon, pag-ampo, pagpuasa ug pagpamalandong. Palihog ayaw paghunong. Takos kini sa matag paningkamot sa pagpadayon niini nga dalan paingon sa pagpamatuod. Kinsa o unsa man ang inyong tugotan aron mawala kana? “Unsa ang labaw pa nga pagpamatuod nga imong maangkon kaysa gikan sa Dios?”

Ang matag anak nga lalaki o anak nga babaye sa Dios makabaton og mas lawom, mas lig-on, ug mas segurado nga kahibalo alang sa ilang kaugalingon. Sama ni Joseph Smith, nga mikompirma sa iyang pagpamatuod bisan pa man sa oposisyon, kita makaingon, “Ako nasayod niini, ug ako nasayod nga ang Dios nasayod niini, ug ako dili makalimod niini, ni ako mangahas sa pagbuhat niini.”

Akong minahal nga mga kaigsoonan, tugoti nga ang gamayng turok sa pagpamatuod moepekto kaninyo hangtod nga kini molabong ngadto sa usa ka walay kataposang mahimayaon nga segurado nga kahibalo.

Kon ikaw nabunyagan ug nakompirmahan nga miyembro sa Ang Simbahan ni Jesukristo sa mga Santos sa Ulahing mga Adlaw apan nanglimbasog gihapon og, “Dili ko segurado kon nasayod ba ko,” palihog hinumdomi kini nga saad nga anaa sa pag-ampo sa sakramento: “Nga sila sa kanunay makabaton sa iyang Espiritu uban kanila.” Tungod niini nga saad, matag usa nato makapadayon sa dalan paingon sa pagpamatuod ug sa usa ka segurado nga kahibalo.

Karon ania ang dakong kamatuoran: Bisan unsa pa man nga paagi nga ang pagpamatuod ihatag—kon kini anam-anam sama sa pagsubang sa adlaw o moabot pinaagi sa mahimayaon nga panan-awon—nagkinahanglan gihapon kini og usa ka pagpili sa pagdawat niining bililhon nga gasa.

Ang pag-ingon nga “Ako mopili nga motuo” mas makapasayon sa pagdawat sa usa ka pagsaksi gikan sa Dios. Kon atong makita nga ang atong pagpamatuod nagkahuyang, hinumdomi nga ang mga pagpili nga atong gihimo mao ang nakapakunhod sa gahom sa pagpamatuod. Apan ang pagpamatuod wala mawala. Kinahanglan lang kita nga mopili sa pagkonektar pag-usab ngadto niini.

Ang pagpili nga motuo usa ka maalamon ug gamhanan nga paagi sa paggamit sa atong kabubut-on.

Wala koy laing mas maayo nga paagi sa paggamit sa akong kabubut-on kaysa pagpanalipod sa akong pagpamatuod.

Si Presidente Nelson mitudlo: “Ako mangamuyo kaninyo sa pag-ako sa responsibilidad sa inyong pagpamatuod. Trabahoa kini. Angkona kini. Atimana kini. Amumaha kini aron motubo kini. Palamboa kini gamit ang kamatuoran.”

Alang nako, ang mga pulong nga pag-ako sa responsibilidad, trabahoa, atimana, angkona, amumaha, ug palamboa murag usa ka tinugyanan nga gitugyanan og usa ka butang nga bililhon ug importante.

Sa bag-o pa ang Simbahan, si Parley P. Pratt mibati og kahiubos ni Propeta Joseph Smith ug mipili sa pagsaway niya ug sa Simbahan. Sa dihang si John Taylor nga gitudloan ni Parley sa ebanghelyo miabot sa lungsod, si Parley nakig-istorya niya ug mipasidaan nga dili mosunod ni Joseph. Si John Taylor miingon ngadto ni Parley:

“Sa wala pa ikaw mobiya sa Canada, ikaw mihatag og lig-on nga pagpamatuod mahitungod ni Joseph Smith nga usa ka propeta sa Dios, … ug ikaw miingon nga ikaw nasayod niini nga mga butang pinaagi sa pagpadayag ug sa gasa sa Espiritu Santo.

“… Aduna na ako karon sa samang pagpamatuod nga gikalipay nimo kaniadto. Kon ang buhat tinuod unom ka bulan ang milabay, kini tinuod karon. Kon si Joseph Smith kaniadto usa ka propeta, siya karon usa ka propeta.”

Ako mopamatuod nga si Joseph Smith usa ka propeta sa Dios ug ang propetikanhong gahom nga iyang nadawat nagpadayon karon. Si Jesukristo ang nagdumala niini nga buhat.

Ako modapit ninyo sa paghunahuna mahitungod sa inyong dalan ngadto sa usa ka segurado nga saksi ni Jesukristo ug sa Iyang ebanghelyo. Moako sa responsibilidad sa inyong pagpamatuod; mogamit sa inyong kabubut-on sa maalamong paagi ug moila sa tighatag ug sa Iyang tanan nga mahimayaong mga kinaiya. Ako mopamatuod nga ang gahom anaa kaninyo. Walay tawo nga makapili alang ninyo. Walay tawo nga makakuha niini nga gasa gikan kaninyo. Kamo makapili nga motuo.

Ako mosaad nga kon buhaton ninyo kini, ang inyong pagpamatuod mahimong usa ka “atabay sa buhi nga tubig, nga magtubod ngadto sa walay kataposan nga kinabuhi.” Mahimo kini nga usa ka angkla ug usa ka tigdasig, ug kini mopatunhay ninyo latas sa lisod nga mga panahon. Kini makahimo ninyo sa pagpalambo og espirituhanong mga gasa. Kini motabang ninyo sa inyong personal nga pagpangalagad ug pagserbisyo. Kini mahimong usa ka hinagiban batok ni Satanas ug sa inyong mga kaaway. Ang inyong pagpamatuod mahimong usa ka kalipay kon inyong makita nga kini nabatonan usab sa inyong mga anak, mga apo, ug mga apo sa tuhod ug niadtong inyong mga gimahal ug giserbisyohan. Kini mahimong gamhanan kon kini inyong ipakigbahin ug gamiton aron magpamatuod.

Kon kamo nasayod, kamo nasayod. Ako nasayod nga ako nasayod. Kita nagkinahanglan og daghan pa nga segurado nga mga saksi ni Jesukristo ug sa Iyang ebanghelyo. Palamboa kini! Tinguhaa kini! Dinalian kini! Kini ang kataposang dispensasyon—ang dispensasyon sa kahingpitan sa mga panahon.

Si Jesukristo namahayag niini nga kamatuoran: “Matapos ang langit ug ang yuta apan ang akong mga pulong magpabilin gayod sa kanunay.”

Mga kaigsoonan, ang usa ka pagpamatuod diha ni Jesukristo wala gayod gitumong nga mahimong usa ka temporaryo nga gasa. Walay butang mahitungod niini nga temporaryo—dili ang tighatag, ni ang gasa mismo, dili ang tigdala sa gasa, dili mahitungod kon kang kinsa ang gasa. Hinaot nga ang inyong pagpamatuod mahulagway niining sama nga paagi. Bisan kon “matapos ang langit ug yuta,” ang inyong pagpamatuod ug pagsaksi sa ebanghelyo ni Jesukristo dili mahanaw. Karon mao ang panahon nga mohupot niining bililhon nga gasa. Sa ngalan ni Jesukristo, amen.