Ang Gahom sa Pagpangalagad ngadto sa Usa ka Tawo

Mga kaigsoonan, salamat sa inyong matinud-anong debosyon sa pagduol ngadto ni Jesukristo atol niining mahagitong mga panahon. Kamo talagsaon; kamo matahom; matag usa ninyo anak sa Dios. Akong pag-ampo nga kita mobati sa impluwensya sa Espiritu Santo samtang kita mahimo ug motabang sa usag usa nga mahimo, nga mahalaron nga mga disipulo ni Jesukristo ug mobati sa Iyang kamaya samtang kita mosimba diha sa balay sa Ginoo.

Si Presidente Russell M. Nelson mipahayag: “Karon ang panahon alang kaninyo ug kanako sa pag-andam alang sa Ikaduhang Pag-anhi sa atong Ginoo ug Manluluwas, si Jesukristo. Karon mao ang panahon nga atong himoon ang atong pagkadisipulo nga atong kinatas-an nga prayoridad. Sa usa ka kalibotan nga napuno gayod sa daghang butang nga makabalda kanato gikan sa ebanghelyo, sa unsang paagi nato kini mahimo?”

Siya mihatag sa tubag: “Ang makanunayon nga pagsimba sa templo makatabang kanato. Diha sa balay sa Ginoo, kita motutok ngadto ni Jesukristo. … Kita makaila Kaniya. … Ang matag sinsero nga tigpangita ni Jesukristo makakaplag Kaniya diha sa templo.”

Mao nga, unsaon nga kita mahimo ug motabang sa usag usa nga mahimong mahalaron nga mga disipulo ni Jesukristo? Kita mangalagad ngadto sa usa ka tawo. Ang pagpangalagad pinaagi sa pamaagi sa Manluluwas naglakip sa kapuangod, kamabination, pailob ug gugma nga dili mohukom. Samtang kita mangalagad ngadto sa usa ka tawo, kita modapit sa usa ka tawo nga moduol ngadto ni Jesukristo ug sa pagsimba diha sa balay sa Ginoo aron modawat sa Iyang matubsanong gahom. Sa laing pagkasulti, kita motabang sa usag usa nga mahimong mahalaron nga mga disipulo samtang kita mangalagad ngadto sa usa ka tawo sa mga pamaagi nga mopadulong ngadto sa balay sa Ginoo.

Kita makat-on gikan ni Jesukristo sa gahom sa pagpangalagad ngadto sa usa ka tawo inubanan sa gugma ug dili maghukom. Hinumdomi ang Samaryanhon nga babaye didto sa atabay. Kini nga babaye tingali mibati nga siya dili importante, nag-inusara, nawad-an og paglaom, ug gibaliwala. Tingali mibati siya nga wala siya mahisakop. Sa iyang tibuok kinabuhi siya adunay lima ka bana, ug ang lalaki nga iyang gikapuyo dili iyang bana. Ang uban tingali mihatag og dili matarong nga paghukom nga wala makahibalo sa mga sitwasyon sa iyang kinabuhi. Tingali usa kini sa mga rason nga siya miadto sa atabay nga nag-inusara sa labing init nga oras sa adlaw. Ug gani, siya mao ang usa sa una nga gisultihan ni Jesukristo nga Siya mao ang Mesiyas. Alang Kaniya, kini nga babaye mao ang anak nga babaye sa Dios.

Si Jesukristo mitudlo sa maong babaye nga pinaagi Kaniya ang usa ka tawo makadawat og kinabuhing dayon pinaagi sa pag-ambit sa buhi nga tubig. Siya mipahayag, “Apan ang moinom sa tubig nga akong ihatag kaniya … dili na gayod uhawon, kay ang tubig nga akong ihatag … mahimo … nga usa ka tuboran sa buhing tubig ug kinabuhing walay kataposan.”

Ang babaye sa Samaria mibati sa gugma sa Manluluwas ug nakadawat og saksi pinaagi sa Espiritu nga Siya mao ang Mesiyas. Human niini nga pagsaksi, siya mibalik ngadto sa siyudad ug midapit sa uban nga moadto ug motan-aw, ug daghan ang mituo ni Jesus “nga Siya mao gayod ang Manluluwas sa kalibotan.” Si Kristo nangalagad ngadto sa usa inubanan sa gugma; isip resulta, ang uban nahimo nga Iyang mahalaron nga mga disipulo.

Kita makat-on sa gahom sa pagpangalagad ngadto sa usa ka tawo uban sa kapuangod gikan sa mga Apostoles ni Kristo nga sila si Pedro ug Juan. Hinumdomi ang usa ka tawo, nga bakol sukad sa pagkatawo, naglingkod kada adlaw sa ganghaan sa templo nangayo og kwarta. Tingali kini nga tawo mibati nga siya dili importante, nag-inusara, nawad-an sa paglaom, ug gibalilwala. Tingali siya mibati nga siya wala mahisakop.

“Apan miingon si Pedro, Wala akoy salapi o bulawan; apan ihatag [ko] kanimo ang ania kanako: Sa ngalan ni Jesukristo nga Nazaretnon tindog ug lakaw.”

Si Pedro migunit sa tuong kamot sa tawo ug mipatindog kaniya, ug ang tawo naayo. Pagkahuman dayon sa milagro, ang tawo misulod sa templo uban nila ni Pedro ug Juan, “siya naglakaw nga nagluksolukso ug nagdayeg sa Dios.” Sila si Pedro ug Juan nangalagad ngadto sa usa ka tawo sa mga paagi nga midala padulong ngadto sa balay sa Ginoo, ug kini nga tawo nahimong mahalaron nga disipulo ni Kristo.

Akong mga higala, dihay mga higayon sa akong kinabuhi diin ako mibati usab nga ako nga dili importante, nag-inusara, nawad-an og paglaom, ug gibaliwala. Gibati nako nga ako wala mahisakop. Ako gibunyagan ug gikompirmahan nga usa ka miyembro sa Ang Simbahan ni Jesukristo sa mga Santos sa Ulahing mga Adlaw sa dihang nag-19 anyos ko. Paglabay sa usa ka tuig, akong gidawat ang tawag nga moserbisyo isip usa ka full-time nga misyonaryo, apan daghan pa ang wala nako makat-oni mahitungod sa kasaysayan sa Simbahan.

Sa sayo pa sa akong misyonaryo nga pagserbisyo, akong nakat-onan nga dihay panahon sa dihang ang kaliwat sa Black African nga wala tugoti nga makatagamtam sa tanan nga mga panalangin sa pagsimba sulod sa balay sa Ginoo. Ang pagkahibalo niini alang sa unang higayon makahatag og mga pabati sa kasuko, kalibog, kamaduha-duhaon, ug kahadlok. Kini nga mga pagbati grabe kaayo nga ang akong abilidad sa pag-ila sa Espiritu Santo nawala sa makadiyot.

Suwerte lang kay, ako adunay talagsaon nga misyonaryo nga kompanyon, si Kevin Vick, kinsa nangalagad nako inubanan sa gugma, pailob, ug kamabination. Matag gabii samtang nasaksihan niya ang akong mga pagbati sa pagduha-duha ug kawalay kaseguroan, yano siyang moingon, Elder Johnson, “gimahal ko ikaw.” Human sa mga duha ka semana, gitugotan nako ang akong kaugalinong nga mobati sa gugma ni Kevin. Nakaangkon ko og kaisog sa pag-ampo ngadto sa Langitnong Amahan sa ngalan ni Jesukristo. Samtang ako nag-ampo, ako naganoy ngadto sa seksiyon 6 sa Doktrina ug mga Pakigsaad, mga bersikulo 21–23, nga nag-ingon:

“Tan-awa, Ako si Jesukristo, ang Anak sa Dios. … Ako ang kahayag nga nagdan-ag sa kangitngit. …

“… Hinumdomi ang gabii nga ikaw misangpit ngari kanako sa kinasingkasing, aron ikaw mahibalo mahitungod sa kamatuoran niini nga mga butang.

“Wala ba ako mamulong og kalinaw sa imong hunahuna mahitungod niini nga butang? Unsa ang labaw pa nga pagpamatuod nga imong maangkon kay sa gikan sa Dios?”

Samtang nagbasa ko, nakahinumdom ko. Nakahinumdom ko sa adlaw nga ako nagpuasa ug nag-ampo aron makahibalo nga ang Basahon ni Mormon mao ang pulong sa Dios, ug nga si Joseph Smith mao ang propeta sa Pagpahiuli. Ako nakahinumdom sa mga pakigsaad nga gihimo diha sa balay sa Ginoo nga nagkonektar nako ngadto ni Jesukristo sa personal ug sa suod nga paagi. Ako mibati sa gugma sa Manluluwas, sa Iyang kaluoy, ug sa Iyang pagseguro nga Ang Simbahan ni Jesukristo sa mga Santos sa Ulahing mga Adlaw mao ang Iyang gingharian dinhi sa yuta ug gikinahanglan aron sa pag-andam nato alang sa Iyang Ikaduhang Pag-anhi. Tungod kay ako nakahinumdom, ako nakahimo sa pag-ila pag-usab sa Espiritu Santo ug sa pagsabot sa mas hingpit nga si Jesus mao ang Kristo ug ako Iyang disipulo.

Usahay kita adunay wala matubag nga mga pangutana ug mga pagbati nga dili importante, nawad-an og paglaom, nag-inusara, ug gibaliwala. Pero, akong mga higala, kinahanglan kita nga mopadayon inubanan sa pagtuo diha ni Jesukristo ug mohinumdom sa Iyang mga pulong:

“Ayaw kamog kaguol.”

“Dinhi sa kalibotan aduna kamoy kalisdanan apan pagmadasigon, gibuntog na nako ang kalibotan.”

Ako usa ka saksi niini nga reyalidad ug sa gisaad nga panalangin sa Manluluwas.

Busa unsa kahay atong mahimo aron maseguro nga ang atong pagpangalagad ngadto sa usa ka tawo labing epektibo? Ang pagsunod sa doktrina ni Kristo motabang kanato. “Ang pagsunodsa doktrina ni Kristo,” sumala sa gihulagway ni Presidente Nelson, “makahatag sa labing gamhanan, balik-balik nga pagkamahiyason, paghimo og espirituwal nga paglambo sa atong kinabuhi.

Samtang kita maningkamot sa pagsunod sa mas taas nga mga balaod ni Jesukristo, … ang Manluluwas motabang nato sa pagbuntog sa mga tintasyon niini nga kalibotan pinaagi sa pagpanalangin nato og mas dako nga gugma nga putli, kamapainubsanon, kamanggihatagon, kamabination, disiplina sa kaugalingon, kalinaw, ug kapahulayan.”

“[Kining espirituwal] nga paglambo, nga moabot pinaagi sa pagsunod sa doktrina ni Kristo,” sama sa gipasabot ni Elder Dale G. Renlund, “wala lang maghatag og gahom sa kausaban sa atong balaanong kinaiya ngadto sa atong mahangtorong padulngan, apan nagdasig usab nato sa pagtabang [sa pagpangalagad sa] uban sa tukmang mga paagi.” Si Elder Renlund nagpahinumdom nato nga “ang buluhaton sa Manluluwas mao ang pag-ayo. [sa paghimo kanato nga hingpit]. Ang atong buluhaton mao ang paghigugma—paghigugma ug pagpangalagad sa paagi nga ang uban mapaduol ngadto ni Jesukristo.”

Ang atong abilidad sa pagsunod sa doktrina ni Kristo mapalambo pinaagi sa inadlaw nga pagtuon sa Basahon ni Mormon ug senemana nga pag-ambit sa sakramento. Si Presidente Nelson mipahayag nga ang Basahon ni Mormon “nagtudlo sa doktrina ni Kristo … [ug] naghatag sa kahingpitan ug [labing masaligon] nga pagsabot sa Pag-ula ni Jesukristo nga makaplagan bisan asa.” Ganahan kaayo ko ini nga basahon. Ug ang mainampoong pag-ambit sa ordinansa sa sakramento matag semana makapadugang sa atong pagsabot sa Pag-ula ni Jesukristo ug sa Iyang doktrina ug makahatag og espirituwal nga pagbag-o, kahupayan, ug sa gahom sa pagkadiosnon sa atong kinabuhi. Hinumdomi, “diha sa mga ordinansa [sa pagkapari], ang gahom sa pagka-diosnon gipakita,” ug kini nga gahom nga gikan ni Jesukristo, makapalig-on sa atong tinguha ug sa atong abilidad sa pagpangalagad ngadto sa usa ka tawo.

Ang akong pagtuon sa Basahon ni Mormon ug pag-ambit sa sakramento makapamenos sa mga pagbati nga nawad-an sa paglaom, makapalambo sa akong determinasyon sa pagpangalagad ngadto sa usa ka tawo sa pamaagi sa Manluluwas, ug nagtabang sa pagkadisipulo nga akong labing taas nga prayoridad.

Akong mga higala, ako mosaad nga kon atong sundonang doktrina ni Kristo ug mangalagad ngadto sa usa ka tawo sa mga paagi nga modala ngadto sa balay sa Ginoo, kita makahimo sa pagpadayon inubanan sa pagtuo diha ni Jesukristo bisan pa taliwala sa wala matubag nga mga pangutana ug mga pagbati nga dili importante, nag-inusara, nawad-an og paglaom, ug gibaliwala. Kita modapit sa usa ka tawo nga moduol ngadto ni Jesukristo ug sa pagsimba diha sa balay sa Ginoo aron modawat sa Iyang matubsanong gahom ug gugma. Sa balay sa Ginoo, kita “mobati sa kaluoy [sa Manluluwas]. [Kita] makakaplag sa mga tubag sa [atong] labing makabalaka nga mga pangutana. [Ug kita] mas makasabot sa kamaya sa Iyang ebanghelyo.” Sa ngalan ni Jesukristo, amen.